المساعد الشخصي الرقمي

مشاهدة النسخة كاملة : قصيدة ستة نصايح


راشدالعرجي
01-05-2011, 04:44 AM
هذه قصيده لاحد الزملاء واريد رايكم وتعليقاتكم ولكم تحياتي
القصيده بعنوان ستة نصايح ويقول فيها




يا هـــــاجسي والشعر مزنٍ هماليل لا لاح برّاقه غشى الأرض وبله
وأردف وغطّى كل وديــانه الســـيل وأنبت ثراها قحويـــــانه وربلـــه وتــــــهيّضت كـل القلــوب المعاليل وشفت البدو كلٍ يسايـر هوا أبلــه
أرجــوك حضّر لي بديــــع التماثيل قافٍ ليا سمعه ضمير أنطرب له
ورّد حبــالك صافيـات المنــــــاهيل يـــــاهاجسٍ ما قد قصر فيه حبله
الفكر يملــــك غالي البن والهيــــــل وحنـا لجل كيفه نشب الحطب له
يا فكر صــب الكيف جوف الفناجيل عده على الوافي ودنّ الرطب له
فنجــال حكمـــه تغتـــنمه الرجاجيـل ماهو مثل فنجال عنـــــتر لعبــله
والفكـــر لبّى وأعتنى بالتعاليــــــــل مثــــــــــايلٍ ما صاغها فكر قبله
يمكن يجي الحافرعلى حافـــر الخيل وكـلٍ نصيبـه من سهامه ونبلـــه
سِتَـــة نصــــايح ما تبي أي تحليـــل نصايحٍ ما ضمّها قـلب الأبلــــــه
تدري وش اللي يزعل الرجل بالحيل لاعزّ له رجــلٍ وهو ما حسب له
وتدري متى تصعب على كل حلحيل لاجاه ضيفٍ ما لقى وش يهب له
وتدري وش اللي يسهر العـين بالليل زلّة رفيـــقٍ قد دنــــيت الشبب له
وأكيد تدري عن هـل القال والقيــــل من ســـاير النمّام جاب النشـب له
جنّب عن هـروج الخـــبول المهابيل هرج الخبل ناتج من عقــول هبله
من يستمع فيهـم يشـــــوف الغرابـيل المِقْــــديه في الشـرق والقوم قِبْله

أبو عساف
02-05-2011, 10:00 AM
ارحب ياراشد

وصح لسان الشاعر وياليت نعرف اسمه

الله لايهينك على النقل ويبيض وجهك

لاتحرمنا الجديد

تحياتي وتقديري

محمدبن عبيان الفهري
04-05-2011, 08:02 AM
ارحب ياراشد

وصح لسان الشاعر وياليت نعرف اسمه

الله لايهينك على النقل ويبيض وجهك

لاتحرمنا الجديد

تحياتي وتقديري

رائد نملان الحبابي
05-05-2011, 10:35 AM
لاهنت وصح الله السان قايلها

ابن قاسم السنحاني
07-05-2011, 10:49 PM
يعطيك العافيه على النصايح