المساعد الشخصي الرقمي

مشاهدة النسخة كاملة : سهيل بعرض السماء شايف


البواردي
02-11-2005, 10:48 PM
سهيـل بعـرض السمـا شـايـف
وارع الولع عانـه يجهـز طيـوره
ياما حلا مقناص ذيـك الشفاشيـف
في غربي الصمان بطـراف قـورة
وخوة رجال كالبوهم علـى الكيـف
مـا يركبـون الا بعـزم ومشـوره
فوق الجيوب مبعـدات المحاريـف
حذف الحصى بدوربهن حذف كوره
ناصل الى حزم الجلاميـد وطريـف
ونرجع وناخذ في سواحيـق دورة
نسلي الخاطـر ولا مـن تكاليـف
وبعض الاوادم بالقصور محشـوره
يازين شبـت نارنـا والسواليـف
والبـن الاشقـر للنشامـا تـدوره
سوالـف مـا سمجوهـا ملاقيـف
اللي يعصد السالفه فـي حضـوره
عسى السحاب اللي مزونه مراديف
يعم سيلـه مـن تبـوك للشـروره
وعساه من جده يحدر على السيـف
ويسيـل الـوادي ويحيـي بـذوره
يسقي مداهيل البكـار المشاعيـف
وتربـع الفاطـر وترعـي قفـوره
تقطف زماليـق الشقـارا تقاطيـف
وريح الخزامى مثل ريحة بخـوره
والبدو ينسون العلـف والمعاليـف
وسوق العلف ماتاجد احـد يـزوره
وكل يربع في مكانه الـى الصيـف
والعشب في الروضه تشابك زهوره
في ديرة سكانهـا تكـرم الضيـف
الهـم فعـول للجميـع مخـبـوره
عندي تراها مثل باريـس وجنيـف
لـو انهـا بـرد شديـد وحـروره
احبهـا حـب القلـوب المواليـف
يالله عساهـا بالصـلاة معـمـوره
والرزق عند مصرف الكون تصريف
اللي يرزق حوت البحر في بحـوره
ماني على الدنيا كثيـر التحاسيـف
الادمـي عمـره ليـال محصـوره
وصلاة ربي عد مل ذعـذع الطيـف
على رسول الحـق والنـور نـوره




&&&&& لــــشـــاعـــــر&&&&&
ســــــهــــل بـــــنـــــدر الــــعـــتــــيـــبـــي