المساعد الشخصي الرقمي

مشاهدة النسخة كاملة : مصــــافــحــــة : باعدادها كفيت مشكور ياهيف ,, من خاطرن لك باح جزره ومده


ماجد بن عبدالله بن شغاث
04-12-2010, 08:37 AM
( مصافحــــــــــــة )
الســـلام عليكم ورحمــة الله وبركـــاتــــه :

اولا يسعدني ويشرفني انضمامي معكم في هذا الصرح , و بدات بهذه المشاركة لتكــون مصافحــة معكم في وقتها ,,,,, اتمنى ان تقبلوها كما هي وان تنال على إعجـــابكم




بعد الضحية جا نهار المواقيف = ومداحم الوبّال من كل بدّه
واهل الابل صدّار ولا مناكيف = والوضع زايد حدت(ن) فوق حدّه
وكلن يجوْد ولاحسب للمصاريف = لاسم المعزي ماحسب ويش مدّه
والجايزة مشهورتن دون تعريف = اربط حزامك يالمشارك وشدّه
يــ امّا وطا ولا بروس المشاريف = واللي يبا العليا كسبها بيدّه
وان جا نهار العرض ياهل التصانيف = والكل جاب اللي وصل فيه حدّه
تشوّف لذود(ن) تشادى العواصيف = ثلاث تفهق بالحلا من يندّه
الاوله سود(ن) تعدى التواصيف = جهام لونه ليلة(ن) مجرهدّه
اذانها شلفن تركّز مشاريف = من فوق عين(ن) للقشر مستعدّه
والها خشومن نابياتن مهانيف = طفح اللحي راهي من الزين خدّه
وارقابهن تشدى الصقال المراهيف = وسع النحور وكل عينن تودّه
والثانية حمر النعم ياهل الكيف = من شافها وِلِّع ولا اطرى المصدّه
كن لونها ماخوذ من حمرة الطيف = ولا من الوان الشفق مستمدّه
حمر(ن) مايزهاها قصيد وسواليف = قول النبي عن كل قولن يسدّه
والثالثة ياشيب عيني وياحيف = لن ماوصلنا بالتواصيف قدّه
نذر(ن) علي لاقيّف الحرف تقييف = لينه يصافح زاهي الحرف قدّه
وضح(ن) تماميات مامثلها شيف = كنْها على البل طاغية مستبدّه
اليا اقبلت مثل المزون المراديف = واليا ادبرت كل الخلايق تلدّه
والها خشوم احد من شذرة السيف = واسبال تاصل للشبر لو تعدّه
واذانهن خرع(ن) قصار مناكيف = ونحر(ن) وسيع كنه بالوصف قدّه
سند الرقاب جنوبهنّه غطاريف = عكشا وبر ماجاله اللي يقدّه
وسنام(ن) مطرّف عن الجنب تطريف = متوخر(ن) والردف ساواه حدّه
ماهيب ذود(ن) جمعوها اللواقيف = اتلاد(ن) مقيمات يعرف مردّه
بنات هرش(ن)سقت فيها التواصيف = ووصوفها اكبر مالها اللي يعدّه
مسكانها بين الضلوع المهاديف = والباب من دونه بالاقفال سدّه
والله عنها ماتطرف ولا عيف = يالين قبري بالنصايب تحدّه
الوضح ذود(ن) للطرب يالعواريف = تسكر مع الهوبال تتلا المودّه
تٍطرب وتَطرب للقلوب المواليف = اللي على البل ساق دمه وكدّه
شيكات فوق الارض دون المظاريف = كم واحد(ن) من سعرها باح سدّه
وكم واحد(ن) روح يجر التلاهيف = جداه هلة عبرته فوق خدّه
ماجابها راع العلوم السفاسيف = اللي علومه بين هاته وودّه
ماجابها ياكود راع المعاريف = حر(ن) ينومس فالمقانيص هدّه
وياحي من له فالمواقف مثل هيف = وقف للاول واحتماله وردّه
وافرح بني عمه من السيف للسيف = وكل القبايل شاقها فعل يدّه
وقحطان تاثق ماتحسب التصانيف = ترقب للاول شايشة مستعدّه
دام العديم مشرف القوم تشريف = مندوب عنا للمزاين نعدّه
ماعاد ننشد كيف مجرى التصاريف = ولا عاد ننشد ويش بالزود ندّه
من شاف فعله مايشوف التحاسيف = قده فعوله والفعل جاه قدّه
وللمرجلة ماهو يحسب التكاليف = يسوق فيها ماملك مايعدّه
مجمّل(ن) مخبور فعله وقد شيف = بالطيب ورث ابوه من ورث جدّه
يفرح به العاني ويفرح به الضيف = طلق الحجاج لمن لفى مايصدّه
وختامها مزن(ن) نصوب(ن) مقانيف = مرودمن ياكن بطويق حدّه
يهل ودانه سكوب(ن) مراعيف = يرعد ورعده للسحابه يقدّه
باعدادها كفيت مشكور ياهيف = من خاطر(ن) لك باح جزره ومدّه
جاب الفرايد يوم حمي المواقيف = خمسين قاف(ن) ناهيه مستجدّه
من واحد(ن) ماجاب شعره من الزيف = اسمك رفع بيته وفعلك يشدّه
من ماجد ابن روق جتله على الكيف = والكفو مثلك فالشعر وش يسدّه
لو سقت شعري من اليمن فيك لطريف = ومن الخليج العرض لا بحر جدّه
مـ الحقت وصفك ياعديم التواصيف = لكن عسا ماقيل يشفع لعدّه
هذا واصلي عد ذاري العواصيف = على نبياً كرم الله خدّه


ماجد بن عبدالله آل روق

ماجد بن عبدالله بن شغاث
04-12-2010, 08:43 AM
#اتمنى من الادارة تنسيق العنوان لتحويلة لمصافحة بدلاً عن عنوانه الحالي

صالح حسن الكيرعاني
04-12-2010, 11:59 AM
بيض الله وجهك بياض الشحم على هذه الباذخه


وعزالله انك كفيت ووفيت معنى ومبنى ووصف وتسلسل ممتع فلله درك


ويستاهل هيف راعي الاوله


ولاتبطي بجديدك ياكحيلان

ماجد بن عبدالله بن شغاث
09-12-2010, 02:16 AM
بيض الله وجهك بياض الشحم على هذه الباذخه


وعزالله انك كفيت ووفيت معنى ومبنى ووصف وتسلسل ممتع فلله درك


ويستاهل هيف راعي الاوله


ولاتبطي بجديدك ياكحيلان


وجهك ابيض يابو حسن

ولاهنت على الاطراء

وتشرفت بمرورك على القصيدة وردك عليها

حامد القريشي
25-12-2010, 05:16 PM
اضافة بسيطة على ماذكره الأخ الغالي صالح حسن الكيرعاني
إإإبداااااع بكل ماتعنيه كلمة إبداع ياماجد .. صح لسانك واعتلى شانك .. تقبل مروري وفي انتظار جديدك .. دمت بود

ابن سراع القحطاني
25-12-2010, 09:55 PM
اول شي
ارحبوووووووووووووووووووووووو

صح لسانك وبيض الله وجهك اشهد بالله كلام مليان توصيف ومدح وجزاله


جعل يمناك ما تعطب يالشلي






تحياتي وتقديري لسموك الكريم