|~ ( روائــع الشاعر سعيد بن فردان بن مشفلت )~|

[سعيد أبو ظهير]

السلام عليكم ورحمة الله وبركاته ~




إخواني أعضاء المنتدى، يسرني أن أقدم لكم عدداً من قصائد شاعر ترعرع في مركز المضة وولد فيها عام 1373 هـ تقريبا. فهو من قبيلة آل معمر عبيدة قحطان ، خدم وطنه في المجال العسكــــــري, كما خدم في دولة قطر في نفس المجال, قبل أن يعود الى أرض الوطـــــن.


إسمحوا لي ان أقدم لكم الشاعر المبدع سعيد بن فردان بن محمد بن مشفلت. (أبو نمــــــــر)

http://sn138w.snt138.mail.live.com/att/GetAttachment.aspx?tnail=1&messageId=d1db1897-8aea-11df-ac3a-002264c24342&Aux=44|0|8CCED0EB6E12210||




أحبتي سوف أضع بين أيديكم الآن مجموعة من قصائد ودرر هذا الشاعر الكبير ..

واللي أتمنى إنها تلبي ذائقتكم الشعرية ..





لقلوبكم مني أعبق التحايا وأجزلها

[سعيد أبو ظهير]

( 1 )


قلب يلي لم كل الخلايق في هواه
............واشتقى في حب ناسٍ قليل ايشوفها
لا نصحته من طريقٍ على جاله عصاه
............قال مخطي عن سلوم العرب وشفوفها
وبتلشت وصار سيري على غير اتجاه
............في ديارٍ نايشٍ ربعنا معروفها
ول يا قلب العنا غاطيٍ مره حلاه
............من غـثى دنياً تفرَّك عليه اكفوفها
يا حَسِين الزول ليه اتغطرس فلحياه
............ما تقدر عالمٍ ما جهلت اظروفها
ما تخاف وفيك ميزه بها كل الصفاه
............من شبكته ما شبح للعرب ووصوفها
الوعد والعهد فرضه كما فرض الصلاه
............وانت شمسك عقب لشراق بان كسوفها
ما لقينا مثلكم من يِسوِّي ذا السواه
............يا خسارة مواعيدنا وحلوفها
بعتنا يا زين برخيص في سوق الصفاه
............الزروف المبهمه بان رسم حروفها

( 2 )


انشاب راسي من هواء عالم الذره
...............رهنها الزمان وخربت كل لاوضاعي

أحدْ يخطي الجرّه وأحد يلزم الجره
...............وطال الجدال وراحت انصاف وارباعي

حلاوة إلسانك يازمن عوَّدت مره
...............وظاقت بنا كل العريضه والاسناعي

اغطرف بصوتي تالي الليل واجره
...............وبين شعاع الصبح في مرقدي واعي

هواجيس قلبـي تشغل القلب وتفره
...............مثل فر محالٍ على بـير زراعي

اعلاج الطب خافي الجرح ما سره
...............اراجع طبـيـبٍ جابـلي كل لاوجاعي

ولا يالطيف الروح لِدّْ النظر مره
...............تعالج لهيـبٍ لاجـيٍ بـين لاضلاعي

لا شفـتك بعيني تفـتح الجيـب وتزره
...............تغيـب الهموم وما غدالي وما ظاعي

ترى الحال من فرقاك ماهي ابمستره
...............براها الغرام وفيك ما نسمع الداعي

وصدَّقت فينا من به الناس مغتره
...............خبـيث الطبايع للمحبـين خداعي

شحوحٍ بخيره سافطٍ للعرب شره
...............يغني على لاوتار ويدق لصباعي

ولا عاد يوجد فيك ما يوزن الذره
...............جذبك الكلام ورحت مع شين لطباعي

غدينا كما سبحه من الخيط منـثرَّه
...............قطع خيطها اللي من غثى الوقت منلاعي


( 3 )


هذي القصيده قالها في مدح أخيه ..
الشيخ / علي بن فردان بن مشفلت

البارحه في الليل منا ومنا
...........همٍ يلاويني على كل لاوي
لاقلت راح الهم قام يتثنا
...........وأمسيت بين الناس كني جلاوي
ما ينشكا للناس حظٍ سجنا
...........إلغير ربـي ما تفيد الشكاوي
ياما حفرنا فالطريق ودفنا
...........وياما هقينا من كبار الهقاوي
وقتٍ يلاعبنا وضيّع زمنا
...........يضحك لنا ضحك الهواء للهواوي
ياما على روس المشاكل نزلنا
...........لا تاه راي مكثرين الدعاوي
من لا نشد منا ترى ما شحنا
...........عند اللزوم يبين راعي العزاوي
يانفدا اللي من بعيدٍ تعنا
...........ما حسّب حساب التعب والكراوي
ابو فهد يفداه منهو تونا
...........شيخٍ بعيد ارموع ماهو دناوي
هو عزنا هو درعنا هو جملنا
...........لا قصرت لاشوار شوره رهاوي
ركب شداد العود في كل فنا
...........واخـتار في مسراه نجمٍ سماوي
مثل العسل صافي شرابه لهنا
...........وعلى عدو الله سيله نحاوي
من راس ابوي ومعدن الجود حنا
...........من راس ما ينداس عند النخاوي
انا صحيح اخطيت يا ممتحنا
...........امرٍ كتب لي في زمان شقاوي
طاف الظعن ما شفت جرة ظعنا
...........ما ينفع المجروح كثر المناوي
غيري شيوخٍ من مشايخ وطنا
...........تشكي على الدكتور كثر الاداوي
حنا عملنا غير ضيع عملنا
...........دونه وقف عبدالصمد والزواوي
نرضى ونزعل ما زعِل من زعلنا
...........عنده على الغلطه صحيح الفـتاوي
ابنصح اللي ما وصل ما وصلنا
...........يتبع انجوم الليل مثل الخلاوي
اللي على غفله بسيفه طعنا
...........واخـتل وزنه بين هاوي وغاوي
لا يدعي بالنظف ويصير منا
...........ثم تنصرم فيديه كل العراوي
ماله مع ربعه قصورٍ تبنا
...........ضوو عليه من الملامه مضاوي
لابد عقب الضيق يقرب يمنا
...........ثم نضرب بمخلابٍ سواة النداوي
العام مرباعه بروضة مهنا
...........بين الرجا والياس والحال ذاوي
واليوم في ديرة عربنا نزلنا
...........وقلنا عرب قانون واليل ضاوي
نامل وفي رب الملا كل املنا
...........ولا خاب منهو فيه دايم رجاوي
رحنا وجينا ما عليهم حزنا
...........عقب البطاء ربّع فوادٍ سناوي
امن السفر عوص النجايب عقلنا
...........وعلى المخده عقب الاسفار ناوي
يقوله اللي لا بغى القول غنا
...........من الراس للعراف قوله شـناوي


( 4 )


وصلنا المكان اللي وصلناه قبل ايام
.................وذي رسمته بالكف قبل امس راسمها
بغينا نحوم وطيرنا بالسما ما حام
.................ونفس الشقاء قامت تخالف حوايمها
على الهون يا لوام لو لمت ما نلام
.................جرى ما جرى والناس كثرت شتايمها
انا والهوا والحض دقٍ بروس اعلام
.................بيوت الشرف مسار ذا الوقت هادمها
الا يا رفيقٍ خابره من بيوت اكرام
.................يهين الرفيق وطارف الناس يكرمها
حداني زماني يوم جيته زمان العام
.................وحصلت صوره فوق الامتان حازمها
وسقت الركايب في طريق العرب قدام
.................مع درب عرافٍ عراضٍ محازمها
نبي دار من يحمل على الماضيات اوسام
.................عن الحاضر المشهود تحكي قدايمها
يسد اللزوم مجربٍ صاملٍ لا قام
.................ليا تاه راي اللي تواما قوايمها






وتقبلوا أعذب التحايا ..

[سفر بن مبارك]

أخوي سعيد

السلام عليكم ورحمة الله

صح الله لسانك ولسان أبو نمر أنعم وأكرم رجال أهل مكانه ومن وجهاء القبيله

وقصائده جزله ومعروف بشعره الجزل شرفتنا بارك الله فيك وننتظر جديدك ..

[سعيد أبو ظهير]

صح بدنك ~ يابو مبارك

والشرف لي المشاركة معكم في هذا الصرح الشامخ

نورت يالغالي ~|

[نايف راكان]

لاهنت اخوي سعيد وبيض الله وجهك وصح لسانه


مشكور

[سعيد أبو ظهير]

قايل ما يهون ..~

تشرفت بمرورك يابو راكان .. والله يوفقك دنيا وآخره

[محمد بن مسفر بن جليد]

صح الله لسانك ولسان أبو نمر أنعم وأكرم رجال أهل مكانه ومن وجهاء القبيله

وقصائده جزله ومعروف بشعره الجزل شرفتنا بارك الله فيك وننتظر جديدك ..

[سعيد أبو ظهير]

أبو مسفر .~
الله يحييك نورت الموضوع بتواجدك ..

شاكر لك مرورك الطيب

[سعيد أبو ظهير]

يسعد صباحكم بكل خير ..

هذي إحدى قصائد أبو نمر .. أتمنى أن تحوز على إعجابكم .~


حان اللقى مع طيبات التماثيل................وطار النعاس وزان بدع القوافي
لا فات نصف الليل هيلٍ بلا كيل................هذي مواريدٍ وهذي مقافي
ترقب سراها كل ما طرف الليل................خبر الهموم اللي تبيح الخوافي
مرٍ توردني على شاطي النيل................ومرٍ مع المظماه رجلي وحافي
عجزت اكايد جاير الظلم والميل................امشي بدربي واتلفت اخلافي
محتار في دنيا العناء والبهاذيل................دنياً دخل لجواد منها اختلافي
خلت اشيوخ الناس مثل المهابيل................ابيوتهم تسفي عليها السوافي
ماكن لهم فلكون بعض المداخيل................وتيارهم مقطوع والنور طافي
ماهو بوقت مصادم الخيل بالخيل................دليل هرجٍ والعواقب عوافي
لاغاب نجم اسهيل من يفقد اسهيل................غير انت ياللي بالسوالف تفافي
مغرور بالنظره وزين الاقاويل................واثرك على ماقيل خط انعطافي
عينك على الغرات مثل الدرابيل................وعند اللوازم غايبٍ ماتشافي
دايم اعلومه في المجالس تهاويل................ومن سمع صوته قال وش ذا السنافي
خبلٍ على ماقيل صعيب المناويل................ويقول معروفي على الناس ظافي
لا بنافعٍ نفسه ولا به محاصيل................ولا يرتكي للحمل ناسٍ اضعافي
ما تنفع الجودات في بارد الحيل................اليا صفا يومين ماهو بصافي
ولاينبنا بيتٍ على جاري السيل................ولا ينزهم في الضيق من كان هافي
ولا ينفع الغرقان كثر العواذيل................ما فات مات وكافي العلم كافي
يقوله اللي شربكته المحابيل................بين الرجا والياس والجو صافي
صافي وصفّته القلوب المغاليل................ولا ينذكر بالخير من كان جافي
فياراكبٍ من فوق زين التفاصيل................بواج جيان الخلاء والفيافي
ما وقفه راعيه بين الدواليل................في لازمه ماحط فوقه إلحافي
ما فوقه الا دريوله والمراسيل................اليا اندرج في الخط صعبٍ يطافي
ملفاك منهو فلقسى يذبح الحيل................لا عدّو الظفران بالطيب وافي
تلقى الحشم والبن والطيب والهيل................ونفسٍ خفيفه من نفوسٍ اخفافي
زيزوم قومٍ في اللوازم مشاكيل................تارد مواريد الخطر ما تخافي
يفداه منهو يشمت الناس وبخيل................هرجه كثيرٍ والسوالف عجافي
ثم قل لبوخالد جرالي غرابيل................جور الزمان يبيح مكنون خافي
ما تسند الشكوى لبعض الازاويل................تسند على اللي ما يمل الوقافي
حلالها ون صار فيها عراقيل................ليا يبسّت في الضيق حمر الاشافي
وصلاة ربي عد وبل المخاييل................وعداد من هلل وكبّر وطافي
على محمد في ختام التماثيل................والمعذره ون صار خله بقافي
كبرت وهانت وانتهى الحط والشيل................وانا احمد الله ما علينا خلافي

[فيصل بن مسفر القحطاني]

لاهنت على الطرح المميز والراقي والقصائد المميزه للشاعر الكبير /سعيد بن فردان


تقبل مروري

[سعيد أبو ظهير]

لاهنت يابو مسفر على المرور الطيب ..

فعلاً قصائد مميزة ..~

[سعيد أبو ظهير]

السلام عليكم ورحمة الله وبركاته

الله يسعد أيامكم يا أعضاء هذا المنتدى المميزين ..

أقدم لكم مجموعة قصائد لشاعر كبير من شعار قبيلة آل معمر حفظهم الله ..

وهو الشاعر / سعيد بن فردان ( أبو نمر ) ...

إليكم هذه القصائد واللي أتمنى أن تحوز على إعجابكم



البارحه من ضيقت الصدر منحاس
..............سهران لين الصبح بين عموده

آخذ مع الهاجوس مسرا ومرواس
..............لا راح همٍ ذاك عقبه يروده

قامت تقالبني جدادٍ ودراس
..............مثل القليب اللي تعاقب اوروده

تفرني فرة هل الكيف للكاس
..............لا فره السلطان واشعل وقوده

في مجلسٍ فيه السلاطين جلاس
..............هذاك من هذاك مبداء سدوده

شربت كاس المر من غير مقياس
..............والحال من حظي تدانت جهوده

لا والله الا بيّن الشيب فالراس
..............وانا بسجنٍ ماتفاهم جنوده

سجنٍ كبيرٍ جامعٍ كل لاجناس
..............فيه النشاما باليدين معدوده

يثّر على اللي للمواجيب حساس
..............لا صار مانفس الفـتى بمحدوده

فلا تسند الشكوى على ساير الناس
..............تسند على اللي فلقدايم جدوده

قرمٍ يقوس الوضع ما دام ينقاس
..............في ماقفه لاقام يثبت وجوده

معروف عند الناس ساسٍ على ساس
..............حلال حبلٍ مرمساتٍ عقوده

يابو محمد جارك الله من الباس
..............خطٍ وصلكم ما وصلنا ردوده

مدري زعل والا طواري اووسواس
..............ترى بعض لاصحاب غير محموده

سكر اسموعك من منافق وبلاس
..............في غيبة اصحابه يدرّج قعوده

يقّلب الصوره على كل لاجناس
..............وليا أدعينا ما يحضّر اشهوده

رحتوا ورحنا بين مارج وهلاس
..............في بحر طامي ما تحدد حدوده

في غبهً يغرق بها كل غطاس
..............عزي لمن فيها تجدد قيوده

فلا تشعل النيران من غير مقباس
..............كلٍ على فعله يبند بنوده

عقّب صبـيٍ فالدواوين حواس
..............اليا دعى داعيه ماجاد جوده

يغر بالنظره وزينات الالباس
..............وعند الشدايد غاشيته البروده

والله لولا الخوف من حد لامواس
..............لدوس لين يبين نقصه وزوده

يقوله اللي فاقدٍ نصف لحساس
..............معاد تقدح فلفـتيله زنوده

لا لاح برقٍ راح طايف وعساس
..............برق الحيا هيض اشجونه ارعوده

من دونه البيبان وقفال حراس
..............والفكر سابح من صلاصل لاجوده

اغصون قلبـي يـبن ممدوح يـباس
..............بسباب حظٍ للمشاكل اصعوده

سلكٍ من الكهرب ضرب شوط فلماس
..............والجو ممطر والبـيوت مهدوده

وانا اتحرى واضرب اخماس واسداس
..............ابطى مجيك والسيوف امغموده

والراس مثل النور ماهو بـينداس
..............وان داسته لاقدام عزه لحوده

والراس بـين الناس وقع به الفاس
..............ورفيقك الغالي تحفت اخدوده

عنواني الحاير مدون بقرطاس
..............ولا والله انشد صاحبـي وش صدوده

وهذه أخرى :

لا تلوم الصاحب اللي على الدنيا وحيد
..............الذياب اليا عوت لك عوت لك كلها

النصيحه طيبه منك والراي السديد
..............بس زلة والمغربل بدوره زلها

مابقى عقب التجارب غريب ولا بليد
..............بينت الايام دق العلوم وجلها

الله الخلاق في الخلق يفعل ما يريد
..............قبل تبداء بالنصيحه صلاتك صلها

اعتبر ما صار ملبوسه الثوب الجديد
..............مدها وامدها سلها واسلها

انتهى وقت التحدي وسادات العبيد
..............مابقى الا شجرةٍ كلنا في ظلها

الجميع احرار والشيخ هارون الرشيد
..............وقفته لاجات وقت اللزوم بحلها

لاتعاندني تراني على العليا عنيد
..............الكرامه جعل روس الرخوم افداً لها

عز وآلي بارقٍ لاح برقه من بعيد
..............فوق دارٍ جعل وبل السحاب يعلها

مدهلٍ للذيب والطير والضبي الفريد
..............في ربوع المملكه ما تغير دلها

شاعريٍ جوّها لا هجير ولا جليد
..............دونها لسوار صعبٍ علّي اوصل لها

القلوب اتذوب والحد جسرٍ من حديد
..............والمشاكل بالسوالف صعيبٍ حلها


وهذه القصيده قالها الشاعر أيام حرب الكويت :


بسم القحاطين يبدا الشاعر اشعوره
...............حسب الاوامر يقول القاف شاعرها
مشاعرٍ بلفرح والنصر مغموره
...............كل النشاما تعبر عن مشاعرها
حنا حمات الوطن وحزام اخو نوره
...............اليا نخانا نهلل في منابرها
الشعب واعي وقول الرب دستوره
...............سهوم المنايا تقادح من نواظرها
احفاد من شيدو فوق الوطن سوره
...............افعالهم لوله تشهد الحاظرها
مكتوبةٍ في جبين الوقت مذكوره
...............نبراس روس العرب والرب ناصرها
قدام يوم الخميس يشعشع بنوره
...............الرافدين اصبحت قفرٍ عمايرها
خميس لجل الخميس ايبّرد احروره
...............وعدّي والعود بعيونه يناظرها
بغداد بالقاذفه وكروز ممطوره
...............غيم سماها بعد ماهل ماطرها
واشتب نارٍ تشابه نار تنوره
...............خطلان الايدي على راسه تكررها
لعيون حورٍ تجر الصوت مقهوره
...............مع فجت النور جند ابليس قاهرها
قومٍ على غفلة الجيران مسعوره
...............تحكي عرب والبلاوي في ظمايرها
رحنا وجينا ودار العز معموره
...............طشوه في حفرةٍ له كان حافرها
صدام نفسه على النيران محشوره
...............من قو جوره على النيران حاشرها
صدام ربـي صدم به وانتهى دوره
...............مصايبٍ صابته ماهو ابقادرها
الطاسه اللي تقل الراس مشعوره
...............له وردةٍ تاه راسه في مصادرها
تعايدت لقمته في نص حنجوره
...............واخـتل وزنه وظاقت به معابرها
غرّوه ناسٍ على لوهام مغروره
...............بس الحقيقه تبرهن عن مظاهرها
جيش السعودي ليا من صف طابوره
...............داس المخاطر ولا يخشى مخاطرها
يمشي وراية هل التوحيد منشوره
...............العزوة اللي عظيماتٍ مفاخرها
فزّعت شرف في نهار الضيق مخبوره
...............ترخص عمار الفناء في سوق تاجرها
ماهيب بفزعة علي وحسين للثوره
...............فزعت فشل فشلت فالضيق ذاخرها
حتى عرفات في يمناه باكوره
...............معارضٍ شلة الخذلان ياسرها
مثل اللخرّق شامرٍ ما يستر العوره
...............عزي لقومٍ تبـي ياسر يناصرها
يا كويتنا من وجيه الشر ماجوره
...............تبقين حره نظيفه من كعابرها
يقذف عليك الشبح ما كل في زوره
...............يضمن هدفها قبل يطلق ذخايرها
فوقه عيالٍ نهار الحرب مشهوره
...............مثل الشياهين تشهر من مواكرها
تلعب بجيش العراقي لعبة الكوره
...............وحزب البعث توها يحفر مقابرها
الطمره اللي طمر ماهي ابمطموره
...............تصعب على شاربه لاجا بيطمرها
جزاه عقب المغالط دهنت اسيوره
...............حتى يثمن وجيه كان حاقرها
لو طاع وفدٍ وفّد له وخلص بشوره
...............ما كانت ارواح خلق الله خسايرها
بغداد محصورةٍ واللقوات محصوره
...............وصدام يصفق براسه في عوايرها
لاهداف عندنا خمسة عشر صوره
...............اقمارنا فالسماء عكسٍ اتصورها
كلٍ على قد عرفه جاب مقدوره
...............وهذي قصيدة مع الشّعار بنشرها

قصيدة أخرى لأبو نمـــــــــر :

وصلنا المكان اللي وصلناه قبل ايام
..............وذي رسمته بالكف قبل امس راسمها

بغينا نحوم وطيرنا بالسما ما حام
..............ونفس الشقاء قامت تخالف حوايمها

على الهون يا لوام لو لمت ما نلام
..............جرى ما جرى والناس كثرت شتايمها

انا والهوا والحض دقٍ بروس اعلام
..............بيوت الشرف مسار ذا الوقت هادمها

الا يا رفيقٍ خابره من بيوت اكرام
..............يهين الرفيق وطارف الناس يكرمها

حداني زماني يوم جيته زمان العام
..............وحصلت صوره فوق الامتان حازمها

وسقت الركايب في طريق العرب قدام
..............مع درب عرافٍ عراضٍ محازمها

نبي دار من يحمل على الماضيات اوسام
..............عن الحاضر المشهود تحكي قدايمها

يسد اللزوم مجربٍ صاملٍ لا قام
..............ليا تاه راي اللي تواما قوايمها

وهذه قصيدة أخرى :


البارحه ما هملج الطرف برقاد
.............سهران لين الصبح جاله اشعاعي

من كل فج وصوب من غير ميعاد
.............وكني لها بد المخاليق راعي

لا قلت راح الهم ساعه وينعاد
.............صار الضمير الها مقر اجتماعي

اقنب قنيب اللي بدا روس لرجاد
.............من حر جوعه مهتنى النوم واعي

اخطى عشاه وشعشع الصبح وانقاد
.............يطرد عرب حوال لارضٍ مراعي

احرقت فالدخان لاكن ما فاد
.............بقعاء ثنيه والمجرب ارباعي

روابعٍ ننظر بها اضماد وافراد
.............وهقاويٍ كثرت وراحت ظياعي

تشتت لافكار وش زاد وش عاد
.............وظاقت افجوجك ياذلول الوساعي

فج الخلا صياده ان صاد بيصاد
.............تسري على مسراه غلث السباعي

طمعّت في دارٍ نفانيف وابراد
.............ولقيتها مدهل عقارب وفاعي

من شافها بيقول ما غيرها بلاد
.............ازوال وعقولٍ سوات الجراعي

عابر سبيل وشفت لي زيلة اجواد
.............وبغيت اشيد في وطنهم اشراعي

واثر البلد مشبوه من كثر نقاد
.............طيبٍ ذكر لي في عربها صناعي

فيها محطة بث لخبار وارصاد
.............ومهندس التسجيل فني وذاعي

اعلومهم ترمي على روس لاشهاد
.............وان جيتهم مثل النسور المقاعي

آون وناتٍ قديمات وجداد
.............ونين راسٍ حابلله كراعي

خمس وثمانٍ بالمراديع وقياد
.............ولاله رفيقٍ في غيابه يداعي

دون السفر بيبان وشبوك وافراد
.............دايم مع الشباك عينه تراعي

بسباب وقتٍ فيه من كل لابناد
.............غير الدواء لاهل القلوب الوجاعي

ناسٍ من النعمه غطاريف وسعاد
.............وعن ذكرهم فلقول مافيه داعي

التبع صار اليوم له خرُج وشدّاد
.............ويقال زومانٍ طويل الذراعي

ومدحٍ بدون اسباب راعيه ما فاد
.............مدح الظعوف اثر عليّه اصداعي

يسعى زمانك يبيض الوجه بنكاد
.............ولا فاد في دنياك كثر المساعي

في كل قطبٍ رحت باحث او رواد
.............اطرد نصيبٍ راح طيّت وداعي

ون جيت بنزل دار لافيه حساد
.............دايم على الغرات مثل السواعي

وغديت في دنياي صادر اووراد
.............اهذل هذيل الذيب في كل ساعي

ورضيت بالمقسوم والحظ معتاد
.............دِبْرَت عزيز الشان وامره مطاعي


؛× وسلامتكم جميع ×؛

[محمد بن مسفر بن جليد]

مرٍ توردني على شاطي النيل................ومرٍ مع المظماه رجلي وحافي
عجزت اكايد جاير الظلم والميل................امشي بدربي واتلفت اخلافي

[سعيد أبو ظهير]

أبو مسفر ..~
لاهنت .. على المرور .. الطــــيب

[ابونايف الحبابي]

لاهنت ياابوظهير المعمري والرفيق لرفيقه في ذي واكبر منها وقصايد جزله وعندي في عبيده بيتين واعذرني/

عبيد ه اللي يكسبون الجمايل *نعم ابهم لاجا نهار القتالي .

ربع ابن شفلوت قوم الصمايل *اهل المواقف والعلوم الجزالي.

وربعي حباب العز والشك زايل* قوما توقف للحمول الثقالي .

قحطان لو قاموا تصير الهواويل *تارد على العد الفريد الزلالي .


وتقبل تحيات الحبابي الرياض @@@@

[سعيد أبو ظهير]

أبو نايف .. قايل ما يهون

وصح لسانك .. وما عليك زود يالذيب

[سعيد أبو ظهير]

إليكم هذه القصائد للشاعر سعيد بن فردان ( أبو نمر )
أتمنى أن تلبي ذائقتكم الشعرية

/

أقبل ظلام الليل والصدر ظايق
.............وانا خوي الليل وانا رفيقه

ليلٍ تباشر به عيونٍ غرايق
.............تشكي جروحٍ مزمناتٍ عتيقه

الوضع ذا الايام ماهو بلايق
.............الراس فيه اصداع مدري شقيقه

حظٍ يسوقه تالي الوقت سايق
.............حتى وقع في كوكبٍ ما يطيقه

اليا جفاك الدار عن كل بايق
.............فخـتار دربٍ ما يوقف طريقه

انا وصدقاني غدينا حرايق
.............واللي صفا منهم يشب الحريقه


وهذه قصيدة أخرى ..~



قال أبن فردانٍ قافٍ قز طاروقه
............من عبرةٍ فالضماير جات بقصاها
يسوقني هاجس الافكار واسوقه
............سوق المناديب هجنٍ طال مسراها
النوم مع هجعة الممسين ماذوقه
............في ماقفٍ يزعل العقال مرضاها
عيني وسهر الليال السود مرفوقه
............خيم عليها الزمان وشمت اعداها
العام سباقةٍ واليوم مسبوقه
............على السبوق المقفي نثرت ماها
والنفس من جورها شره ومطفوقه
............ترسل مراسيلها من كثر ما جاها
كله من اللي جذبني زين منطوقه
............معاد جيته وداره وين بلقاها
العام في دارها ومسوقة سوقه
............واليوم دونه اذيابٍ جرت اعواها
الجادل اللي من العشاق مصفوقه
............بيت الشرف بيتها والعز مبداها
عين اشقرٍ تله الصقار بسبوقه
............يوم ابعدت صيدته ماهوب وياها




وسلامتكم