۞ ورط اللي بعدك ببيت شعر عن موضوع معين۞

[العريفي الخالدي]

http://center.jeddahbikers.com/download.php?img=500993 (http://center.jeddahbikers.com/)

السلااام عليكم

كيف أحوالكم ان شاء الله تمام ؟

عندي لكم موضووع ان شاء الله يعجبكم

۞ ورط اللي بعدك ببيت شعر عن موضوع معين۞



موضوع شيق وممتع وراح يخلق جو من الحماااس والتذوق الشعري الرااقي والانيق ..

أهم شي الورطه ......


وهو إنك تورط العضو اللي بعدك ببيت شعر يحتوي على كلمه
أنت تختارها مثل :

(( شوق / سفر/ إخلاص / ليل /فرآق/ لوم / اليوم / النور))أي كلمه تخطر ببالك






مثال ...

يكتب بيت شعر يتضمن كلمة (( السيف ))


ماهي أليمهـ طعنة السيف والرمح
كَل الألم بطعنة ..{ آحباآب وآقرآآب }




أتمــنى تفآعلــكم


اللي بعدي لاهنت

بيت شعر يتضمن ((الصـبر ))


أخوكم / العريفي الخالدي

[سفر بن مبارك]

حياك الله يالعريفي الخالدي ....

وأبدأ بهذه البيتين من أبياتي :

الحرار اللي تعلى بالجناح وطار ۞ وأرتفع في عالي القمه بمرقابـه

ماتعود للوطى بمخلبه جــــــــزار ۞ يشبع القناص من ضربه بمخلابــه

وعلى فكره فكرتك رائعه وجميله وحماسيه ......

لاهنت وننتظر الأخوة ونأمل التفاعل في هذا الموضوع ......

[سعد الشواطي]

مرحبا ترليون يا الخالدي ..

فكرة وموضوع في غايه الجمال ..

استلم طال عمرك ..


هجرتك حتى قيل لا يعرف الهوى

وزرتك حتى قيل ليس له صبرا


اللي بعدي

بيت شعر يتضمن ((العشق ))

[عوض العبيدي]

عشقك دمار وعشق غيرك تجارة
واللي يبي ينتحر في يحب له مثلك

اللي بعدي بيت يتضمن (طول السفر)

[العريفي الخالدي]

سفر بن مبارك

سعد الشواطي

عوض العبيدي

شكرا لكم جميعا على تفاعلكم ودعمكم للموضوع

والأروع هو مروركم على الموضوعومشاركتكم فيه

وكلامكم أسعدني كثير

يطولي بأعماركم

والبيت هو:

اغليك يا طول السفر يوم ازرع الدنيا قصيــــــد===اروي حبوب القمح للجايع واشيـل احدايتـه

من طبعي اني ما استدير ونظرتي قدمي تزيـد===لاشك هاذي لدّت اللي سـار صـوب ابنايتـه


اللي بعدي الل لايهينك بيت يتضمن كلمة (قهر)

[,,القحطاني,,]

شفتك معه وصديت عنك واقفيت
اخاف اموت من القهر في مكاني
ولـ .. يا كبر القهر لاصار ما باليد حيله
والجروح من القرايب والخطا مني وفيني


الله يسلمك اللي بعدي هات عن [[ العمـــــــر ]] طول الله أعماركم على طاعته

[العريفي الخالدي]

شكرا لك يالقحطاني على مشاركتك معنا وابشر بالبيت

العمر لو طال ينقص مايطول === والنهاية بالكفن وسط اللحد

اللي بعدي ولا عليك أمر نبي بيت يتضمن كلمة ( الجرح )

[فلاح آل راكان]

الله الله ..

بيض الله وجهك يا العريفي على هذه الفكره الرائعه ..

وبيض الله وجييه الاخوان على التفاعل ..

استلم يا العريفي .
.
.


الجرح غاير والسنين اتعبتني = سايرتها رغم الهموم الأليمه

ابكي حوال الناس لو ما بكتني = عندي من الأحزان دوله عظيمه .
.

اللي بعدي ( عزة النفس )

[العريفي الخالدي]

شكرا أخوي فلاح نورت الموضوع

لكن ماحطيت البيت يمكن نسيت

بأحطه عنك اذا تسمح

الجرح ماهو خاطر شوي ويروق... الجرح حتى لو تشافى يعللك
واذاك متحمس متاهات وطروق.... انا تعبت اشد حيلي واحاولك

وهذا بيت عن عزة انفس

صادف غرورك عزة النفس فيني === ولاخضعت بعزة النفس مـــــــــعذور

آسف انا ما ابيك ياللي تبــــيني === وماني على لحق المقفين مجبور


اللي بعدي بيت يتضمن كلمة (ياليت)

[,,القحطاني,,]

شكرا يالعريفي


وأليك ياخوي البيت واللعبة أعجبتني بالذات أنها بالشعر وهذا البيتين لابد منهم


]ياليت الليالي علمتني بالاقـــــدار***فكرت بالمكتوب ما فيه حيلة]



وخذ عندك



ليته قبل مايفارقني حفر قبري *** أكون للقبر أهون من حضن غيره




بيت عن القطيعة ,,,,,,,,,,,

[العريفي الخالدي]

أهلا أخوي القحطاني نروت الموضوع

وشكرا على الأبيات الرائعة خصوصا البيت الثاني

واستلم البيتين يالقحطاني

طبعي ليا شفت الجفا والقطيعة === لحقت مبدين القطيعة قطاعة
لو له على قلبي سبب مأستطيعه === القلب تليته من أصل قاعه

اللي بعدي عن ( الهوى)

[محمد بن مسفر بن جليد]

القطيعه يا بن عمي ترها ما تفيد ------------------------------------------------------ واصل الي يوصلك لو دره بعياد






بعياد

[العريفي الخالدي]

هلا والله وغلا بشاعرنا القدير أبو مسفر

شاكر لك تواجدك اللي أتشرف فيه حقيقة

والبيت اللي أورته كان جميل جدا

لكن (القطيعة) أنا سبقتك فيها وطلبت بيت عن (الهوى)

والمسابقة هي مش مساجلة هي اختيار موضوع معين يكون في بيت شعر منقول مو لازم يكون أنت اللي تكتبه

شاكر لك مرة ثاية مرورك وتواجدك

اللي بعدي بيت عن( الهوى)

[,,القحطاني,,]

عهد عهدته يا هوى البال مصيون
لو بعدوني عنك عشرين عام

عهد الهوى له المحبين يوفون
وانته هوى قلبي وغاية مرام


بيت عن [ الدمع ]

[العريفي الخالدي]

صح لسانك أخوي القحطاني

ياصاحبي واللي خلق نعمة السمع
انك هنا بين المعاليق ثابت

والدمع هذا اللي تشوفه مهوب دمع
اشعلت عيني لجل اشوفك وذابت

الي بعدي

(القلب)

[القنا]

حياك الله يا العريفي

واللي طلبت هذا هو:

بيت قديم جدا (منقول)

يا قلب ما طعتني حتى أني أدلك====== واكفيك فرقة عشير منك متغاني

واللي بعدي نبغى عن الدنيا

[العريفي الخالدي]

اهلا بأخوي القنا

نورت الموضوع بابداعك في اختيار هذا البيت الرائع

استلم البيت يالقنا



يا عمري الدنيا ما تسوى تنام وخاطرك زعلان

ولابه شي يستاهل يخلي قلبك يعاني

اللي بعدي ابي بيت يتضمن (الخيانة)

[عبدالعزيز بن سعيد ال معمر]

لاهنت يالعريفي على الموضووع الاكثر من رائع ,,,
اصــعــب اللحــظات لاصــارت خيــانه ****** واصعـــب خيــانه لاصـارت من خوي
وليــف القلــب يالعـرب العــن بيـانه ****** اعلــن الفـرقـا وقـرب الموسم كوي


البيت الي بعدي يتضمن <(الزعل)> ,,