استفسار عن بيت محاوره لحبيب العازمي

[منصور بن مشهور ال جالي]

السلام عليكم ورحمة الله وبركاته

لاشك ان من اجمل المحاورات اللي سمعتها

كانت بين عمالقة الشعر

عبدالله بن شايق وحبيب العازمي

بس عندي استفسار وابي التفسير الصحيح للبيت

لو كان التفسير يجيني على الخاص اهم شي اعرف

البيت يقول لحبيب

يــــــــــاراع الــمــنــيــحـــه ردهـــــــــــا لاخـــــــــــر الـــــــــــذود
تـــــبــــــي تــحــتــلــبــهــا بــــــــــــس جــــــتــــــك مـــحـــلـــوبـــه
زمـــــــان الــهــوايـــل يــجـــمـــع الــبـــيـــض والــــســــود
واشـــــــوف الــهــوايـــل جــــــــات والــــوقــــت دوبــــــــه

ورد بن شايق يقول

يـاويـلــك مــــن الــلــي صـــــار والــبـــاب مــســـدود
تـــــــرى راعــــــــي الــســـاحـــل يــــعــــرف الــرطـــوبـــه
انـــــــا لـــــــي يــمـــيـــن وديــــــــن ووعــــــــود وعــــهــــود
لاقــــــــــــــوم اتـــعــــجــــبــــك واحـــــــطــــــــك عـــــجـــــوبـــــه


اتمنى الرد في اقرب وقت

وشكرا لكم

[منصور بن مشهور ال جالي]

ياشباب معقوله 40 مشاهده ولا رد

معقوله القسم مافيه احد عارف وش معنى البيت

ياشعار وينكم ترى ماهي ماخذها منكم وقت

[القادري الشريفي]

ارحب يامنصورب ن مشهور ال جالي

وهذي المحاورة من اقوى المحاورات بين الشاعر حبيب العازمي والشاعر عبدالله بن شايق

والمعنى شوي غامض لاكني اعرفه وبرسله لك على الخاص

تقديري

[إبن عاطف]

الله لا يهينكم جميع... أخوي الشريفي أرسل لي تفسيرك على الخاص و لا عليك أمر...

أخــــــــوك إبن عــــــاطف,,,

[فواز أبوخالد]

مشكلة إذا تعتقدون أن الشعر لايفهمه إلا الشعراء ..........!!

المهم وبإختصار :

حبيب يقول :

الملعبة لنا وحنا مسيطرين عليها و أنصحك بتركها لنا

وأننا السادة فيها ومكاننا فيها رفيع لايقارن بمكانتكم

وأنك جيتني من أول الليل والمفروض ماتاتي إلا في آخر الليل

وكأنه يلمح أنه لن يستغرق القضاء عليه إلا وقت قصير .

أما إبن شايق فيقول :

إنني الآن أنا وأنت لوحدنا بالملعبة وكأنه يعلن التحدي

ويتوعده بما سيحصل له .. والرطوبه تلميح لسهولة الأمر .. وإن كنت

أرى فيها تلميحه جنسيه غير محببه ...!!

ثم مدح نفسه وتوعد خصمة وأنه سيجعله عبره للمعتبرين .

وسلاااااامتكم .

........

[علي بن شبله]

على فمك الشحم يا فواز أنا معك في هذا الراي

[فهد بن راجح]

الله اعلم بما في صدور الشعار


لكن اعتقد والله اعلم ان حبيب من بداية المحاوره يقول الملعبه لنا مثل ماقال اخوي فواز وابن شايق يقول الملعبه موجوده وانا موجود وانت موجود وعسى ليلن قربك يعود ورنا جيدك


وفي البييتين اللي تسئل عنها في آخر المحاوره يقول حبيب لابن جعيثن ياراع المنيحه لان راشد ابن جعيثن هو اللي طلب ابن شايق للحفل ..


وابن شايق يقول ترى راعي الساحل يعرف الرطوبه يقصد راعي الحفل شاعر ونسيبه شاعر وانتبه وراعي المنيحه شاعر لاتغلط عليهم وعلى حفلهم


والله اعلم


اجتهاد شخصي

[منصور بن مشهور ال جالي]

الله لاينكم جميع على المرور

الشي الثاني يافواز بن خالد

الا نفهم الشر ولا هو لك لحالك

حنا لو مانفهم كان سألتك عن المحاوره كامله مو بيتين بس

وتفسيرك الله يطول بعمرك ما أحس انه وافي

على العموم اشكر لك مرورك

ومرور الاعضاء

[محمد الحركان]

والله الظاهر ان الموضوع غير هذا كله وانه بعيد

وتفسيره غير صالح للنشر

مع الاحترام للجميع............................................

[العبدي]

والله الظاهر ان الموضوع غير هذا كله وانه بعيد

وتفسيره غير صالح للنشر

مع الاحترام للجميع............................................

:rolleyes:

[فهد آل سلمان]

كل شاعر تلقى عنده تفسير ابياته

ومايعرف معناهالا خصمه لانه يعرف زين

او انه صاير لهم موقف قبل وتكلموون

ومافيه احد يفسر المعنى يمكن تتوقع ان المعنى على تفسير

توقع اما تقول المعنى كذا غير صحيح

خاااصه شعار كبار طابخين الشعر طبخ يجي اي واحد يحدد تفسير المعنى مااظن يجيبه

شفت تفسير ابن جدلان لقصيده الفراعنه تنهبل منه تحس انك بوادي والناس بوادي

[منصور بن مشهور ال جالي]

انا معك يابن سلمان في كل اللي قلت

بس الابيات هذي فيه لغز

وكل مانشدة احد قالي معناها مو زين

هنا قامة في راسي شياطين ابي اعرف ليه ووش المعنى

حاولت افهمه وماقدرت

سألت جارنا العاطفي قلتله وش معناها <<< لان ابوه شاعر

راح سأل ابوه وقاله لاتسألي عنها معناها شين

طيب احد يقولنا

[فهد آل سلمان]

الله يبعد الشياطين من راسك وتقلى معناااها


هههههههههههههههههههههههه الله يستر عليك

[منصور بن مشهور ال جالي]

ابشرك رقدوا

عرفت المعنى

والحين اي واحد يسألني والله لا احرقه الين اعلمه

لازم الواحد يتعب