المساعد الشخصي الرقمي

مشاهدة النسخة كاملة : هذه قصيدة في الشيخ ناصر بن حزام ابو سنون ال مسعود لانه ملكني بمعروف


عبد الله بن مرضي
22-02-2010, 07:37 PM
[center]بسم الله الرحمن الرحيم
هذه القصيدة في الشيخ/
ناصر بن حزام ابو سنــون ال مسعود القحطاني
وهو غني عن التعريف
اقول فيها:
ابد بذكر الفرد العزيز الجليل_واقول في بدع قافي لاثنيت المقال
سلام مني عدد ماهل وبل المخيل_واعداد ما اذرت وهبت هبوب الشمال
يالطيب عادتك تتعب لكسب الجميل_يامن بطيبك وقفاتك ملكت الرجال
يالصاحب اللي مانبي لك بديل_ورفقتك يالكاسب العليا لنا راس مال
فيك استوت لي طواريق القصيد الدليل_ومن شاف طيبك وعادتك تمثل وقال
يابوحزام اطلب الله جعل عمرك طويل_وعسا السعد دايمً لك ياراعي الجود فال
ياراعي المجلس اللي للنشاما سبيل_فيه الشحم يتبع المدخن وشقر الدلال
ويفداك يا ناصر بن حزام خطوا البخيل_اللي من المرجله يغنيه جمع الريال
يامن نقلت الثقيل اللي يكود الذليل_وذي عادت الجزل ما يقنع بغير الجزال
وعنوانك المجد وافعالك لمجدك دليل_والنعم قسمك ايلامن دار فيك المجال
وجهً وجاهً يحل الكايد المستحيل_والناس لك في لوازمها تشد الرحال
وضلع ايذري ذراك وفيك يلقا المقيل_ومن حده القيظ يلقا بك غبيط الظلال
ولا غير شرواك يصلح للمراجل عميل_وتستاهل المدح والسمعه على كل حال
وانا من اوصافك الواجد ذكرت القليل_يا كامل الوصف والكامل عزيزالجلال
يا نسل عودً رقا بالطيب راس الطويل_والطيب غازيك من جدً وعمً وخال
من لابة وزنهم بين القبايل ثقيل_مرسين تاريخهم بالعز مرسا الجبال
قحطان حصنن ملاذً للخوي والدخيل_وامجادهم من على عصر الجهل ما تزال
وختامها مثل مبداها سلامً جزيل_اعداد مايجلي الظلما بزوغ الهلال
وسلامتكم
القائل الشاعر/
عبدالله بن مرضي الودعاني الدوسري

مشاري بن نملان الحبابي
23-02-2010, 01:59 AM
أرحب يا عبد الله بن مرضي ..

صح الله لسانك واعتلى شانك ..

وبيّض الله وجهك على هذه الجزالة ..

ومليون نعم بالمادح والممدوح ..

شرفتنا وأسعدتنا بمشاركتك معنا في شبكة قحطان ..

في انتظار جديدك يا الدوسري ..

عبدالله فراج العلياني
23-02-2010, 08:48 PM
وانا من اوصافك الواجد ذكرت القليل_يا كامل الوصف والكامل عزيزالجلال
يا نسل عودً رقا بالطيب راس الطويل_والطيب غازيك من جدً وعمً وخال


ارررررررررحب والله صح الساااااااانك شاعر جزل بارك الله فيك


وتقبل مروووووووووووري