المساعد الشخصي الرقمي

مشاهدة النسخة كاملة : عطوات وبلوات والعز يزداد$$ وقحطان والجهنان هم والطنايا


سعود المسعودي
06-02-2010, 04:01 PM
أضع بين ايديكم هذه القصيدة وهي ترحيبية في محفل الشيخ / خلف الكساب الجعفري العنزي بمناسبة ضيافته شيوخ واعيان بعض القبائل وهم قحطان و بني عطية وبلي وشمر وجهينة في قاعة الراسي في مدينة حائل يوم الخميس 20 / 2 / 1431 هـ
يامرحبا ترحيبة(ن) يوم تنقاد ‍= مثل المطر من صادقات النوايا
ترحيبة(ن) بالهيل والمسك والكاد = والعود الأزرق مع عذي النبايا
بحضور من لحضورهم مثل الأعياد = ضيوفنا اللي بالمعزة سوايا
عطوات وبلوات والعز يزداد = وقحطان والجهنان هم والطنايا
خمس القبايل يوم شوبات الاكباد = عوق الخصيم ويلحقون التلايا
رجال(ن) لها في قمة المجد مقعاد = اهل المعالي والكرم والندايا
سلايل نمور(ن) مواريثها بعاد = كم فارس(ن) طشوه دون الرعايا
ولا أذم في مدحي سلاطين الاولاد = والنعم باللي ياصلون الحرايا
وأثني الترحيب مثني وينعاد = على القبايل والحضر بالتحايا
في محفل الكساب كسااب الامجاد = خلف زبون التالفه و الونايا
فارس وللشيخة بنا صرح وعماد = النادر اللي ماكره بالعلايا
مثل النداوي للجزيلات صياد = وعليه من هداج وصف وحلايا
من روس رجال(ن) يوم هاجد وهجاد = أرداهم اللي مايهاب المنايا
لاثارت الهيجا وشان اللغا وكاد = ستر الترايف رادعات الشفايا
كم فارس(ن) رموه مع هجن وجياد = يوم المراجل في ظهور السبايا
جعافرة ربعي على روس الأشهاد = افعالهم يوم الفعايل تقايا
ويدوم عز وحكم سادات الاسياد = عيال من روض جميع الحنايا
عبد العزيز مولف قلوب الاضداد = صارت كما الاخوان عقب العدايا
وهدم طواغيت الجهل والرخا ساد = وحكم بشرع الله بعيد المدايا
طيب ثاره اللي خلق حي وجماد = ويظله بظله عليم الخفايا
واليوم بعهد اللي عن الحق ما حاد = مليكنا اللي مايحب الخطايا
عز الوطن واهل الوطن وامة الضاد = عبد الله اللي نايف(ن) بالمزايا
وولي عهده ساعده طير الاسعاد = سلطان سلطان السطر والحمايا
وسيف الامن نايف وللعز رواد = النايب الثاني نقي الطوايا
الله يوفقهم على درب الارشاد = وارواحنا للدار وإلهم فدايا
وختامها ماني عن الكثر نشاد = أبي اختصر والا الموارد رهايا
شاعر وانقدها قبل كل نقاد = وهايب(ن) ما سقت فيها جزايا
ومن رأس شيخ(ن) شيخته فوق الأسناد = عسى عظامه ماتجيها اللظايا
وتمت بذكر الله وما مد مداد = صلوا على طه شفيع البرايا


الشاعر / سعود بن هندي بن فندي المسعودي=

سفر بن مبارك
06-02-2010, 06:19 PM
الأخ سعود ....

السلام عليكم ورحمة الله ....

شرفت ولا كلفت شاعر وقصيدتك جزله وفي من يستحق نرحب بك هنا أجمل ترحيب والله يحيك تحيات المطر

وتستاهل زيادة سمعه يامرحبا .....

أبو معتز
06-02-2010, 08:52 PM
ارحب يا اخونا سعود وصح لسانك وبيض الله وجهك على الجزاله وافي وافي وافي

واله يحييك وسعداء بوجودك يالذرب , تحياتي

سعود المسعودي
07-02-2010, 12:05 AM
الأخ سعود ....

السلام عليكم ورحمة الله ....

شرفت ولا كلفت شاعر وقصيدتك جزله وفي من يستحق نرحب بك هنا أجمل ترحيب والله يحيك تحيات المطر

وتستاهل زيادة سمعه يامرحبا .....


وعليكم السلام ورحمة الله وبركاته



الشرف لنا والجزاله مرورك المشرف



الله يحييك ويبارك فيك والف شكر لك على الترحيب الطيب





دمت بخير

سعود المسعودي
07-02-2010, 12:08 AM
ارحب يا اخونا سعود وصح لسانك وبيض الله وجهك على الجزاله وافي وافي وافي

واله يحييك وسعداء بوجودك يالذرب , تحياتي


فيك البقا الله يسلمك


و وجهك ابيض والوفا والطيب انتم ماكره



دمت بخير