شعراء من شبه الجزيره العربيه

[عابد بن مشهور]

أخواني أعضاء مجالس قحطان أتتني هذه الفكره وأحببت أن أُشارك بها في هذه المجالس وهي سرد بعض أسماء شعراء شبه الجزيره العربيه وسرد نبذه عن حياتهم ان وجد وعن بيت القصيد ألا وهو قصائدهم التي اشتهروا بها وسوف يكون الشعراء من جميع القبائل , ومنها يتعرف القاري على شعراء قد لم يسمع بهم من قبل , أرجوا أن أكون عند حسن الظن بي , كما أرجوا منكم المساعده والنصح والتعديل اذا كان هناك مايدعي لذلك .

وفي البدايه سوف يكون معنا شاعر معروف وله مكانه بين القبائل وخصوصا قبيلته وهي قبيلة عتيبه شاعرنا

شاعر معروف من قبيلة (( عتيبة )) القبيلة العربية المعروفة . . . عاش بداية حياته في بادية الحجاز بين حل وترحال خلف إبله . . . ثم استوطن الطائف على عهد الأشراف . . . نبغ بالشعر النبطي شاعر متميز عبقري فيلسوف في شعره سارت بأخباره الركبان فلمع كأشهر شعراء عصره فقرَّبه الشريف محمد بن عون أحد أشراف مكة بذلك الوقت فكان شاعرة وسميرة ونديمه وكانت الأحوال السياسية بذلك الوقت غير مستقرة خصوصاً فيما بين الأشراف أنفسهم حكام الحجاز في ذلك الوقت فكان كل فريق منهم ينازع الآخر للإمساك بزمام الأمور . . . ومن هنا برز كشاعر سياسي من الدرجة الأولى يناصر الفريق الذي يميل إليه ويرد على أعداء صديقة بن عون ويذكر ميزاته وفضائله للناس بشعره الذي يحرك الناس ويجتذبهم لابن عون ويزيد عدد مريديه . . . وعلى هذا المنوال سار جل شعره , وكان بن عون يغدق عليه العطايا والهبات ويزيد هو بمدحه ويتصدى لأعدائه
تعلق بالأدب العربي وكلف به فدرس اللغة العربية وآدابها وهو كبير السن فتحول من النبطي إلى الفصيح ولم يكن أقل إجادة فيه بل كان مبدعاً , أظن أنكم عرفتوا هذا الشاعر ومن لم يعرفه فهو الشاعر :

بديوي الوقداني .... وهذه احدى قصائده المعروفه وقد قيلت منذ سنون طويله وكأنه يعاصر هذا الزمان وقد أعجبتني كثيرا ودوما أُردد كثير من أبياته في هذه القصيده يقول فيها





أيامنــا والليالــي كــم نعاتبهـا =شبنـا وشابت وعفنـا بعض الأحوالـي
تاعد مواعيــد والجاهـل مكذبهـا =واللي عرف حدهـا من همهـا سالـي
إن أقبلـت يوم ما تصفـى مشاربهـا =تقفـي وتقبـل وما دامـت على حالي
في كــل يوم تورينـا عجايبهـا =واليوم الأول تراه احسـن من التالـي
أيـام فـي غلبهـا وايـام نغلبهـا =وايام فيهـا ســوا والدهـر ميالـي
جربت الأيام مثلـي من يجربهـا =تجريب عاقل وذاق المــر والحالـي
نضحك مع الناس والدنيا نلاعبـها =نمشي مع الفي طوع حيـث ما مالـي
كم من علومٍ وكــم آداب نكسبهــا =والشعر مازون مثقــالٍ بمثقالــي
اعرف حروف الهجاء بالرمز واكتبها =عاقل ومجنون حاوى كـل الأشكالي
لكن حظــي ردي والروح متعبهـا =ما فادني حسن تاديبي مـع أمثالـي
إن جيت ابي حاجـةٍ عزت مطالبها =العفو ما واحدٍ فــي الناس يا والي
قومٍ الـى جيتهـم رفـت شواربهـا =بالضحك واقلوبها فيها الردا كالـي
وقومٍ الى جيتها صكـت حواجبهـا =وابد ت لي البغض في مقفاي واقبالي
ما كنــي إلا حــال مغضبهــا =والكل في عشرتـه ماكر ودجالـي
يا حيف تخفي أموراً كنت حاسبهـا =واللي على بالهـم كلـه على بالـي
الجار جافـي وكـم قومٍ محاربهـا =والأهل وأصحابنا والدون والعالــي
والروح ويش عذرها في ترك واجبها =راح الحسب والنسب في جمع الأموالي
نفسي تبى العز والحاجات تغصبهـا =ترمي بها بيـن أجاويـد وانذالــي
المال يحــي رجالاً لا حيـاة ابها =كالسيل يحي الهشيـم الدمدم البالــي
عفت المنازل وروحـي يوم اجنبها =منها غنيمـه وعنها البعـد أولا لـي
لا خير في ديرةٍ يشقـى العزيز ابها =يمشي مع الناس في هـمٍ وإذلالـي
دارٍ بها الخــوف دومٍ ما يغايبهـا =والجوع فيها ومعها بعض الاحوالي
جوعى سراحينها شبعـى ثعالبهـا =الكلـب والهـر يقـدم كل ريبالـي
عز الفتى راس ماله من مكاسبهـا =يا مرتضي الهون لا عزٍّ ولا مالي
دللت بالروح لين ارخصت جانبهـا =وانا عتيبي عريب الجـد والخالـي
قومٍ تدوس الافاعـي مع عقاربهـا =ولها عزايم تهــد الشامـخ العالـي
خل المنازل وقل للبيــن يندبهــا =يبكي عليها بدمـع العيـن هطالـي
لا تعمـر الدار والقالات تخربهــا =بيع الردي بالخساره واشتر الغالـي
ما ضاقت الأرض وانسدت مذاهبها =فيها السعــه والمراجــل والتفتالِ
دارٍ بدار وجيــرانٍ نقاربهــا =وارضٍ بأرض وأطلالٍ بأطلالـي
والناس اجانيب لين إنك تصاحبهـا =تكون منهــم كما قالوا بالأمثالـي
الارض لله نمشــي فـي مناكبهـا =والله قدر لنـا أرزاق وآجالـــي
حث المطايـا وشرِّقهـا وغرِّبهــا =واقطع بها كل فـجٍّ دارسٍ خالــي
واطعن انحور الفيافـي في ترايبهـا =وابعد عن الهم تمسي خالي البالـي
من كل عمليـةٍ تقطــع براكبهـا =فدافد البيــد درهـامٍ وزرفالــي
تبعدك عـن دار قـومٍ ودار تقربها =واختر لنفسـك للمنزال منزالــي
لو مـتّ فـي ديرةٍ قفراً جوانبهــا =فيها لوطـى السباع الغبس مدهالي
اخير مـن ديرةٍ يجفـاك صاحبهـا =كم ذا الجفا والتجافـي والتعلالـي
دوس المخاطر ولا تخشى عواقبهـا=الموت واحد وبعد العـز يجلالـي
ان المنايــا إذا مـدت مخالبهــا =تدركك لو كنت في جو السما العالي
ما قرت الاسد في عالـي مراقبهـا =تسعى على الرزق ما حنت للاشبالي
والشمس في برجها والغيـم يحجبها =تقفي وتقبـل لها في العرش مجدالِ
رب السماوات يا محصي كواكبهـا =يا مجري السفن في لجات الأهوالي
ضاقت بنا الأرض واشتبت شبايبهـا =والغيث محبوس يا معبـود يا والي
يا الله من مزنــةٍ هبـت هبايبهـا =رعادها بات له في البحر زلزالي
ريح العوالي من المنشـا تجاذبهـا =جذب الدلى من جباء مطوية الجالي
ديمومةٍ سبلـت وأرخت ذوايبهــا =وانهل منها غزير الوبـل همالـي
تسقي دياراً شديد الوقـت حاربهـا =ما عاد فيها لبعض الناس منزالـي
يا جاهل اسمـع تماثيـلاً مرتبهـا =فيها معاني جميـع القيل والقالـي
مثـل المحابيـب زادت في قوالبها =في صرفها زايده عن قرش واريالي
يا ربي توبه وروحي لا تعذبهــا =يوم القيامه إذا ما ضاقت اعمالـي
وازكى صلاةٍ على المختار نوهبها =شفيعنا يوم حشرٍ فيه الأهوالـــــي

وســـــــــــــــلامـــــــــــــــتــــكـــــــــ ــــــــــــــم]

[محمد بن جفين]

اخوي الغالي عابد بن مشهور
احب اشكرك على هذا الجهد الرائع

وهذا النبذه عن الشااعر بديوي الوقداني
وسلمت يمينك

ولي عوده باذن الله

[العريدي]

لاهنت ......

والموضوع دسم .. ومهوب غريبة عليك العلوم الطيبة ..

[عابد بن مشهور]

محمد بن جفين


لاهنت يالغالي وكلي سرور بوجودك وتعليقك ومنكم نستفيد .


العريدي


ولاتهــــــون ومشاركتك هي راس المال يالغالي ونُسر بتواجدك .


أخوكم

عابد بن مشهور

[عابد بن مشهور]

أخواني هناك الكثير عن هذا الشاعر الفذ ولكن سوف أختصر لكم كي لا يطول عليكم ويكون في الاختصار استمتاع أكثر ,,,, هذه هي قصيده للشاعر بديوي الوقداني وهي بحق تستاهل أن تُقرأ وتُحفظ كذلك واليكم القصيده "


انفكت السبحة وضاع الخرز ضاع=
وبغيت ألمه يا سليمان وازريت

صار الذهب قصدير والورد نعناع=
أنكرت ريحه مختلف يوم شميت

الباب طايح والمسامير خلاّع=
والحَبّ فيه السوس والفار في البيت

أمسيت أكيل الراى بالمد والصاع=
قست الأمور وعفتها ما توريت

لا فاقد الحيلة ولا قاصر الباع=
ويا الله يامولاي فيك استغريت

الذيب رزقه في ميادين الأرواع=
وانا برزقي في زماني تعنيت

وانا مربّى من زماني ومطواع=
ربتني الأيام حتى تربيت

[عابد بن مشهور]

غدا ان شاء الله مع شاعر جمع الشعر والفروسيه وكان يلجأ اليه أفراد قبيلته يحتكمون اليه ويُحكمونه لم عُرف من نزاهته وحياديته ( أي مرد حق ) وهو شاعر من قبيلة ,, قــــــــحــــــــــطـــــــــان ,, وسوف نتعرض لكثير من حياته وسيرته التي ملآت أرجاء الجزيره العربيه الى يومنا هذا .


أخوكم

عابد بن مشهور

[العريدي]

يا خوي عابد .. العلوم الطيبه عند أهلها .. وانت تحري بها جهدك هذا يستمتع ويسفيد منه الكثير ..

الله الله في المواصله على هالمنوال يا خوك ..

الله يرعاك ..

[عابد بن مشهور]

العريدي

هذا من طيبك يالغالي وأبشر بكل مايسرك ويرضيك لاهنت على المشاركه الجميله .

[عابد بن مشهور]

شاعرنا اليوم هو الفارس والشاعر :شالح بن هدلان

تعريف بالشاعر :


هو : شالح بن حطاب بن هدلان بن قاشان بن قريان بن دراج بن حسن بن خنفر أل محمد .. الجحادر .. القحطاني

ألف وستين ونعم أنشهد .



لايعرف تاريخ ميلاده بالتحديد ولكنه توفي سنة 1340هـ 1341هـ تقريباّ قرب ( ضرما )
نشأ شالح بين أفراد قبيلته الخنافره من قحطان فكان مثاليّا بشجاعته وامانته وصدقه وكرمه وحسن خلقه
وكان يحكم لحل المشاكل سواء ٍ كانت قبيلته اوّ فرديّه فكان محبوباّ عند قبائل قحطان والقبائل الاخرى
كان الفديع أصغر من شالح سنّا ولكنه يماثل اخيه شالح في كل شي بشجاعته باخلاقه وباالاضافه انه كان مغامراّ بفروسيتّه الى حدٍ بعيد ومطيعٍ لاخيه في كل شيئ والدليل على ذلك قصيده للفديع وهي كالتالي :





يابو ذعار افديك لوني لحالي= واصبر على الدنيا وباقي تعبها

وان غمّ اخوه معثرين العيالي = انا لخويه سعد عينه عجبها

وان جنّ مثل مخزمات الجمالي = كم سابقٍ تقزا وانا من سببها

كم خفرةٍ قد حرمّت للدلالي = لبست سوادٍ عقب لذّة طربها

وان جيت لي قفرٍ من النشر خالي= يفرج بي الحوّاز يوم أقبل ابها

افديك ياشالح بحالي ومالي = يافارس الفرسان مقدم عربها

يامتيّهٍ أبله بروس المفالي = ياللي حميت أحدودها ياجنبها

فتأثر شالح بما قاله الفديع فرد قائلاّ :


[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]


واخوي ياللي عقب فرقاه باضيع= كنيّ بما يجري على العمر داري

اخوي ياستر البنيّ المفاريع = ومطلق لسان اللي باهلها تماري

ماقطّ يومٍ شد بين الفراريع = ياكود مابين الكمى والمشاري

ليته عصاني مرةٍ قال ماطيع = كود انيّ اصبر يوم تجري الجواري

انشهد انّه لي سريع المنافيع =عبدٍ مليكٍ لي ولاني بشاري

تشهد عليه مناتلات المصاريع =ومطلق لسان اللي باهلها تماري

يمناه تنثر من دماهم قراطيع =وعوق العديم اللي بدمّه يثاري

جداّع سفرين الوجيه المداريع =خلي سروج الخيل منهم عواري

القلب ماينسى بعيد المناويع =ليثٍ على صيد المشاهير ضاري



ووقع ماتوقعه شالح عن مستقبل اخيه الفديع والذي قتل في احدى معارك قحطان مع عتيبه ورثاه بالقصيده المشهوره وهي كالتالي :




امس الضحى عديت روس الطويلات =وهيضت في راس الحجا ماطرالي

وجريت من خافي المعاليق ونّات =والقلب من بين الصناديق جالي

واخوي ياللي يم قارة ( خفا ) فات =من عاد من عقبه بيستر خمالي

ليته كفاني سوّ بقعا ولا مات =وانا كفيته سوّ قبرٍ هيالي

وليته مع الحيين راع الجمالات =وانا فدا له من غبون الليالي

واخوي يومن بعض الأخوان فلاّت =من خلقته ماقال ذا لك وذالي

تبكيه هجنٍ تالي الليل عجلات =ترقب وعدها يوم غاب الهلالي

وتبكي على شوفه بنيٍ عفيفات =ومن عقب فقده حرمّن الدلالي

عوق العديم ان جاء نهار المثارات =والخيل من حسّه يجيهن أجفالي



وبقى شالح حزينّا على أخيه فعزم بالثأر للفديع .. وبقى شالح يترقّب الفرص بالحمده من رؤساء عتيبه بعد ان تقابل الطرفين في احدى المعارك .. عمد احد فرسان ال هدلان للفارس عبيد بن تركي بن حميد فقتله .. فكبرت مصيبة الحمده على مقتل عبيد .. فقال ضيف الله بن تركي هذه القصيده :





ياونتي ونّة كسير الجباره =اليا وقف مااحتال واليا قعد ونّ

عليك ياشبّاب ضوّ المناره =عليك ترفات الصبايا ينوحن

من مات عقب عبيد قلنا وداره =لاباكيٍ عقبه ولا قايلٍ من

تبكيه صفراّ البسوها الغياره =وتبكيه يوم انّ السبايا يعنن

وتبكيه وضحٍ ربعّت بالزباره =اليا قزن من خايعٍ مايردّن

الخيل عقب عبيد مابه نماره =وشعاد لوّ راحن ووشعاد لوّ جنّ

ياشيخ ماتامر عليهم بغاره =كود الجروح اللي على القلب يبرن

يقطع صبيٍ ماينادي بثاره =الى اقبلن ذولي وذوليك قفّن

ياهل الرمك كلٍ يعسف امهاره =والمنع مانطريه لاهم ولا حن



فرد شالح بن هدلان على قصيدة ضيف الله بالقصيده التاليه :




ضيف الله اشرب ماشربنا مراره =واصبر وكنّك شالحٍ يوم حزّن

راح الفديع اللي علينا خساره =واخذ قضاه عبيد حامي ثقلهن

يمنىّ رمت به ماتجيها الجباره =اللي رمت بعبيد في معتلجهن

من نسل ابوي وضاريٍ بالشطاره =يصيب رمحه يوم الأرماح يخطن

وعبيد خليّ طايحٍ بالمعاره =عليه عكفات المخالب يحومن

وعادتنا بالصيد ناخذ اخياره =ثلاة الجذعان غصبٍ بلا من

ياقاطع الحسنى ترى العلم شاره =لابد دورات الليالي يدورن

حريبنا كنّه رقيد الخباره =خطرٍ عليه اليا توقّظ من الجن

ماني بقصّادٍ بليّا نماره =اجدع نطيحي بالسهل وان تلاقن

من حل دار الناس حلوّ ادياره =لابد ماتسكن دياره ويغبن

ومن شق ستر الناس شقوّ استاره =ومن ضحك بالثرمان يضحك بلا سن

وان كان ضيف الله يعسّف امهاره =فمهارنا من عصر نوحٍ يطيعن

تدنا لصبيانٍ سواة النماره =شهبٍ لماضين الفعايل يعنن


وعندما جلس شالح وقت وهو حزين على موت الفديع ورضى بقضى الله وقدره ... أعاضه الله ........( بذيب ) ...........

وكان لشالح ستة ابناء ( ذعار . وذيب . ومناحي . وسداح . وعبدالله . ومحمد ) رباهم شالح على مكارم الأخلاق وعلى الفروسيه وتبيّن لأب من سيعوضه بالفديع فكان ذيب محط اهتمام والده حيث بزغ نجم الفروسيه به والشجاعه والرجوله من الصغر
وبرز ذيب واصبح مضرب المثل بشجاعته بين قبائل الجزيره العربيه


يتبع

[عابد بن مشهور]

وذات يوم اجتمع كبار قحطان في أمر مالم يدعو فيه شالح ... فغضب شالح من ذلك الأمر وقرر الرحيل وقال هذه القصيده المشهوره :




انا ليا كثرت الأشاوير ماشير =حلفت ماتي بارزٍ مادعاني

وانا خويّه بالليال المعاسير =والا الرخا كلنٍ يسد بمكاني

وشوري ليا هجّت توالي المظاهير =شلفاّ عليها رايب الدم قاني

شلفّا معوّدها لجدع المشاهير =يوم السبايا كنها الديدحاني

ماني بخبلٍ مايعرف المعايير =قدني على قطع الفرج مرجعاني

ان سندوّ حدرت صوب الجوافير =وان حدروا سندت لمرييغاني

تاخذ بخيران المريبخ مسايير =ومادبر المولى على العبد كاني


فرحل شالح بعد هذه القصيده الى قبيلة الدواسر ... واثناء وجود شالح مع الدواسر أغار فرسان عتيبه على الدواسر وكان عمر ذيب 14 سنه وكان والده قد اعد فرساّ من الخيل ودربه على فنون القتال لانه يعلق عليه امالاّ كبيره
وكان الدواسر قد لحقو بالمغيرين وارتدوّا ابلهم ومعهم ابن جارهم ذيب بن شالح والذي دفع بجواده الى فارس من فرسان عتيبه فضربه بالرمح واخذ جواد الفارس وتعتبر غنيمه واللتي اتضح بعدها انه لايعادلها شي من خيل اعتيبه وربما نجد ايضّا
وعندما علم الأمير محمد بن سعود بن فيصل ومحمد بن رشيد امير حائل ارسل كلٍ منهما رساله لطلب الفرس الغنيمه من شالح ... ولكنه اعتذر وقال هذه القصيده :



ياسابقي كثرت اعلوم العرب فيك =اعلوم الملوك امن اولٍ ثم تالي

لاني بلا بايع ولاني بمهديك =وانا اللي استاهل هدوا كل غالي

وانتي من الثلث المحرّم ولا اعطيك =وانتي بها الدنيا شريدة حلالي

ياما حلى خطو القلاعه تباريك =افرح بها قلب الصديق الموالي

وياما حلى زين الندا في مواطيك =في عثعثٍ توّه من الوسم خالي

وياحلو شمشولٍ من البدو يتليك =بقفرٍ به الجازي ترب الغزالي

الخير كلّه نابتٍ في نواصيك =وادله ليا راعيت زولك قبالي

بالضيق لوجيه المداريع نثنيك =وعجله وريضه من خلال التوالي

حقك عليّ اني من البر ابديك =وعلى بدنك الجوخ أحطّه اجلالي

يانفدا اللي حصلك من مجانيك =جابك عقاب الخيل ذيب العيالي

جابك صبيّ الجود من كف راعيك =في ساعةٍ تذهل عقول الرجالي

ياسابقي نبي نبعّد مشاحيك =والبعد سلم مكرمين السبالي

صوب الجنوب وديرته ننتحي فيك =لربعٍ من الأوناس قفرٍ وخالي


ورحل بعد ذلك الى الربع الخالي خوفاّ على جواد ذيب تؤخذ قسراّ
وفي هذه الفتره سطع نجم ذيب بن شالح واتجهت له الأنظار وزاد حب ابوه له وادرك شالح بانه مفارق ذيب لا محاله وقال شالح وهو يرثي ذيب بالقصيده المشهوره وهو حياّ !!! :





ماذكر به حيّا بكى حي ياذيب =واليوم انا ببكيك لو كنت حيّا

وياذيب يبكونك هل الفطر الشيب =ان لايعتهم مثل خيل المحيّا

وتبكيك قطعانٍ عليها الكواليب =وشيّال حمل اللي يبون الكفيّا

وتبكيك وضحٍ علقوها دباديب =ان رددت من يمّة الخوف عليا

ويبكيك من صكّة عليه المغاليب =ان صاح باعلى الصوت ياهل الحميّا

ننزل بك الحزم المطرّف الى هيب =ان رددوهن ناقلين العصيّا

انا اشهد انك بيننا منقع الطيب =والطيب عسرٍ مطلبه ماتهيّا


وبعدها كان ذيب جالس عند والده وكان شالح يمازح ذيب بهذه الأبيات ... ولكن ذيب اخذ الأمر بجديّه : وهذا ماقاله شالح بممازحة ابنه ذيب :



ياذيب انا يابوك حالي ترداّ =وانا عليك امن المواجيب ياذيب

تكسب لي اللي لاقحٍ عقب عداّ =طويلة النسنوس حرشا عراقيب

تجر ذيلٍ مثل حبل المعداّ =وتبري لحيرانٍ صغارٍ حباحيب

واشري لك اللي ركضها ماتقدا =ماحدٍ لقى فيها عيوب وعذاريب

قبّا على خيل المعادي تحدى =مثل الفهد يوثب عليهم تواثيب

انشهد انك باللوازم تسداا =وانشهد انك خيرة الربع بالطيب

ياللي على ذيب السرايا تعدا =لو حال من دونه عيال وعواطيب

ليثٍ على درب المراجل مقدى =مافيك ياذيب السرايا عذاريب


وبعد ماسمع ذيب قصيدة والده عزم على الغزو ومعه شبّان من قبيلة قحطان نحو عتيبه وعندما قصدوا منهل يرتاده عتيبه ... لمحه احد الرماه هو ورفاقه فاطلق عليه النار واصابت ذيب بن شالح اصابه قاتله .... فعندما سمع شالح بهذا الخبر .. كبرت مصيبته بفقد ابنه ذيب وقال هذه القصيده المشهوره :



ياربعنا ياللي على الفطر الشيب =عزالله انه ضاع منكم وداعه

رحتو على الطوعات مثل العياسيب =وجيتوا وخليتوا لقلبي بضاعه

خليتو النادر بدار الاجانيب =وضاقت بي الافاق عقب اتساعه

تكدرن لي صافيات المشاريب =وبالعون شفت الذل عقب الشجاعه

ياذيب انا بوصيك لاتاكل الذيب =كم ليلةٍ عشاك عقب المجاعه

كم ليلةٍ عشّاك حرش العراقيب =وكم شيخ قومٍ كزتّه لك ذراعه

ويضحك ليا صكذت عليه المغاليب =ويلكد على جمع العدو باندفاعه

وبيته لجيرانه يشيّد على الطيب =وللضيف يبنى في طويل الرفاعه

جرحي عطيب ولا بقى لي مقاضيب =وافخت حبل الوصل عقب انقطاعه

كني بعد فقده بحامي اللواهيب =وكنيّ غريب الدار مالي جماعه

من عقب ذيب الخيل عرجٍ مهاليب =ياهل الرمك ماعاد فيها طماعه

قالو تطيب وقلت وشلون بطيب =وطلبت من عند الكريم الشفاعه

[عابد بن مشهور]

هذا توضيح بسيط وقد نقلته من أحد كتاب المنتديات ولم اجد بعد توضيحه أي رد على كلامه ويقول أم مصدر الكلام من شيبان ثقات ومن أكثر من مصدر يقول الكاتب :

البيتين التاليه :



ياذيب انا بوصيك لاتاكل الذيب = كم ليلةٍ عشاك عقب المجاعه

كم ليلةٍ عشّاك حرش العراقيب = وكم شيخ قومٍ كزتّه لك ذراعه
شاع بين كثير من الناس أنها لشالح بن هدلان , و رواها بعض الشعراء والمؤلفين كما رويتها أنت , فنسبوها لشالح بن هدلان .


و الـــــحــــــقـــــيـــــــقـــــــه , , , , أنها ليست لشالح بن هدلان ولم يستخدمها أصلاً لا ابتداعاً ولا اقتباساً , لا في هذه القصيدة ولا غيرها من قصائده .

ولكن تشابه القافية والأسماء وتوافق الموضوع وشهرة وانتشار البيتين بالذات دون باقي أبيات قصيدتها الأصليه جعل الكثير يظنها من قصيدة شالح المشهوره وينسبها لها حتى بعض الرواة والمؤلفين .فـــــــالــــــصــــــحــــــيــــــح : , , , أن هذه البيتين للشاعر :


(((( راشــــد بــــن مـــعــــديـــــه الـــقـــحـــطـــانـــي )))


و ذيب المذكور فيها هو الشيخ (( ذيب بن جعفر ابن عبّود )) شيخ قبيلة آل مسعود الجحادر قحطان .
وذلك عندما توفى فرثاه راشد بن معديه بقصيدة منها البيتين السابقين .
وقصيدة راشد كما يلي :




شدّو صلاةٍ في هوى شمّخ النيب = و خلّو على العدّ المسمى بضاعه

يا ذيب انا بوصيك لا تاكل الذيب = كم ليلةٍ عشاك حِـلّ المجاعه

كم ليلةٍ عشّاك حرش العراقيب = و كم شيخ قومٍ كزتّه لك ذراعه

شف عايضٍ و معيض جولك معازيب = و انا بشيرك بالعشا و الشباعه

و خوانهم مثل الحرار المراقيب = كم هجمةٍ بايمانهم جت طماعه

و عرار خيّال البكار الحنازيب = لا قلّ هوش مسدّرين الجماعه

و اولاد مسعودٍ رماة و معاطيب = يا ويل من يعطونه الوجه ساعه

خيّالة الشرفا رجال المواجيب = لا جا نهار الهوش يوم القطاعه

مرعين سمحات البكار المخازيب = يا زين شوف بيوتهم في رفاعه

برماحهم ينحون عنّا الاجانيب = و لشيخهم يمشون سمعٍ و طاعه

وهذا ما يؤكده الكثير من كبار السن من قبايل الجحادر الذين نقلو القصيدتين مع قصة كل واحده عن اهلها وحاضرينها .
وقد أشار لذلك الاستاذ منديل الفهيد في كتابه (( آدابنا الشعبية ))
كما أن البيتين في قصيدة راشد أقوى ترابطاً وأسلم تسلسلاً في صياغة النص وتراكب المعنى .


ثم تابع يقول معلق على البيت الاخر وهو قول الشاعر :


تكدرن لي صافيات المشاريب = بالعون شفت الذل عقب الشجاعه

الشطر الثاني أنكره الكثير من الرواة وممن نقلو القصيدة عن أقرب وأوثق مصادرها , وقال البعض أنه ليس في القصيدة أصلاً . بل من تركيب أحد الرواة لمّا خانته الذاكرة فاخترعه ليكمل به القصيده .
وفي معنى الشطر انكسار وذلّة بالغه وصريحه تستنكر القبائل استخدامها , فكيف تنسب لفارس شجاع وشيخ مهيب , و في رثاء لموقفٍ ليس فيه ذلّة مطلقاً لا لذيب ولا لشالح .

وأصح الروايات التي وصلتني وسمعتها عن القصيده (( رأي شخصي )) هو الآتي : طبعا رأي الكاتب صاحب هذا الكلام اللذي أنقله لكم الان





ياربعنا ياللي على الفطر الشيب =عزالله انه ضاع منكم وداعه

رحتو على الطوعات مثل العياسيب =وجيتوا وخليتوا لقلبي بضاعه

خليتو النادر بدار الاجانيب =و جيتو لنا بالذل عقب الشجاعه

تكدرن لي صافيات المشاريب =وضاقت بي الافاق عقب اتساعه

من عقب من بيته يشيّد على الطيب =وللضيف يبنى في طويل الرفاعه

ويضحك ليا صكذت عليه المغاليب =ويلكد على جمع العدو باندفاعه

جرحي عطيب ولا بقى لي مقاضيب =وافخت حبل الوصل عقب انقطاعه

كني بعد فقده بحامي اللواهيب =وكنيّ غريب الدار مالي جماعه

من عقب ذيب الخيل عرجٍ مهاليب =ياهل الرمك ماعاد فيها طماعه

قالو تطيب وقلت وشلون بطيب =وطلبت من عند الكريم الشفاعه

[عابد بن مشهور]

نُتابع اذاااااااااااااااً

[عابد بن مشهور]

ندم شالح على قصيدته اللتي ادت لغزوة ذيب المشؤمه وكانت من اسباب مقتل ذيب .. وقال شالح هذه القصيده النادره واللتي لم تشتهر كقبيلاتها من القصائد المشهوره وهي كالتالي



ذيبٍ عوى وانا على صوته اجيب =ومن ونتي جضّت ضواري اسباعه

عزالله انيّ جاهلٍ مااعلم الغيب =والغيب يعلم به حفيظ الوداعه

يالله يارزّاق عكف المخاليب =يامحصيٍ خلقه ببحره وقاعه

تفرج لمن صابه جروحٍ معاطيب =وقلبه من اللوعات غادٍ اولاعه

ان ضاق صدري لذت فوق المصاليب =ماني بمن يشمت فعايل ذراعه

صار السبب مني على منقع الطيب =ونجمي طمن بالقاع عقب ارتفاعه

ياطول ماعجيتهن مع لواهيب =ولاني بداري كسرها من ضلاعه

وياطول مانوختّها تصرخ النيب = وزن البيوت اللي كبارٍ رباعه

واضوي عليهم كنهم لي معازيب =اليا رمى زين الوسايد اقناعه

واضوي عليهم واتخطى الأطانيب =وأخذ مهاوية الجمل باندفاعه

ابنذر اللي من ربوعي يبا الطيب =لاياخذ الا من بيوت الشجاعه

يجي ولدها مذربٍ كنّه الذيب =عزٍ لبوه وكل ماقال طاعه

وبنت الردي ياتي ولدها كما الهيب =غبنٍ لبوه وفاشلٍ يالجماعه

يكبر زوله عند بيت المعازيب =متحريٍ متى يقدّم متاعه


وبقى شالح حزين على ابنه ذيب ... وذات ليله سمع بشخص يدعى الهويدي من قحطان ينشد عن طيره ويصوّت .. من عيّن الطير ... فهاضت قريحة شالح وقال الأبيات التاليه :






ان كان تنشد يالهويدي عن الطير =الطير والله يالهويدي غدالي

طيري عذاب معسكرات المسامير =ان حل عند قطيعهن الجفالي

ان جاء نهارٍ فيه شرٍ بلا خير =وغدا لهن عند الطريح اجتوالي

ان دبرٍ خيلٍ وخيلٍ مناحير =وغدن مثل مخزمات الجمالي

على الرمك صيده عيالٍ مناعير =وشرّه على نشر الحريب الموالي

يضحك الى صكّت عليه الطوابير =طير السعد قلبه من الخوف خالي

خيالنا وان عرجدن المظاهير =وزيزوم عيراتٍ طواها الحيالي

غيثٍ لنا وان جت ليال المعاسير =وبالشح ريفٍ للضعوف الهزالي

يسقي ثراه امن الروايح مزابير =تمطر على قبرٍ سكن فيه غالي


وفي احد الأيام ... كانت احدى بنات الهدلان ... عندما سمعت جماعه من ال ذيبه ال حسن الخنافر يصوتون لراعي لديهم اسمه ذيب واخذو يرددون اسمه وينادونه فاثارت شجون بنت ال هدلان على ذيب بن شالح وقالت :




ليت ال ذيبه مادعو عندنا ذيب =يومٍ قلبي سج منه ونسيناه

فإن ذيبهم ذيب الغنم والمشاريب =إن ذيبنا نمرٍ على الخيل ينضاه

ذيبٍ شفا الادنى وجوع الأجانيب =على النقا والسرق ماهو بيدناه

لا واقمحي يافارك العرف بالطيب =اتجر ثوب القز والقرن تشعاه

لا واقمحي يامناتلات المصاليب =والهجن عقبه نيّها زاد مبناه

الجد بن مزحم تراثة هل الطيب =في قولهم والا بعد مالحقناه

وابوه شالح شوق بيض الرعابيب =قلايعه خمس وثمانين مسماه

ياكم عزل من جل ذودٍ حنازيب =وكم ذود مصلاحٍ تخرّج خلاياه

ذيب النضا ذيب الرمك منقع الطيب =ومن مات يالدحّام عقبه نسيناه



ومن اخبار شالح بن هدلان


تجاور شالح بن هدلان وظافر الحوير القحطاني وغزو الاثنين معاّ ... فخالفهم الجدري على اهلهم ومات الكثيرون ومن ضمنهم زوجة شالح وزوجة ظافر .. واتفقو الأثنين ان لايتزوجوا الا جميعاّ ... فتزوجوا جميعاّ وبعد فتره تواجها وكلٍ يسأل الثاني عن ماواجهوو ... وقدّ توفّق ظافر بزواجه عكس شالح ..فقال شالح :



لاوهنيّك يالحويّر هنيّاه =يوم انت في شوقك لقيت البدايل

وانا وليفي مالقينا حلاياه =لو دوجوبي في قفارٍ وحايل

وليفي اللي كل ماجيت بنساه =دعو سميّه ذاهبين الحمايل

يفز قلبي كل مااوحيت طرياه =فز المحبب من خشوم الفتايل

ياطول ماني في ذرا البيت ويّاه =من بيننا ينشر جثيل الجدايل

قال انت شالح : قلت له ايه ايّاه =قال انقلع لا عاد عندي تخايل

مادام في شقراء دلالٍ مراكاه =ومادام فالحوطه غروس ٍ ظلايل


ومادامت الحضران للبر تذراه =ومدامت البدوان تقني الرحايل

ومادامت الحجاج للبيت تنصاه =ومادامت الحكّام تقني الأصايل

كن الزباد الخلص داخل شفاياه =من مبسمٍ مايدهله كل سايل

[العريدي]

جهدك الرائع .. يا خوي عابد لا يدل عليه عنوان الموضوع ..

كنت اتمنى انه يكون مستقل ..

على العموم انشهد انك ماقصرت و الله يرفع قدرك عند مولاك ..

[عايض السويداني]

اخوي عابد
بارك اله فيك
جهد جبااااااااااااااااااااااااار

تشكر عليه واله لا يهينك ويسلمك

ونتابع معك ما تكتب

[عابد بن مشهور]

العريدي

هلا وغلا فيك مرةً أُخرى .... ولكن اسمح لي مافهمت ماتعنيه بقولك :

يا خوي عابد لا يدل عليه عنوان الموضوع ..

كنت اتمنى انه يكون مستقل ..



أرجو التوضيح أكثر وأنا كلي آذان ضاغيه سواء كانت نصيحه أو تعديل أو أي شي بخصوص الموضوع أنت آمر وبس يالغالي



عايض السويداني

أفتخر بك وبأمثالك أن يكونون متابعين لم أكتب فلك الشكر والتقدير


أخوكم

عابد بن مشهور

[عابد بن مشهور]

شاعرنا القادم شاعر من شعراء الجزيره العربيه المعروفين واللذين يُشار لهم بالبنان اذا ذُكر لنا الشعر والشعراء

شاعرنا اليوم هو الشاعر :


محمد بن لعبون



هو: محمد بن حمد بن لعبون المدلجي الوايلي ’ ولد في (ثادق*)
سنة 1205 هـ في منطقه نجد ’ شاعر قدير’ في الطبقة الأولى من شعراء النبط ’ نشأ في حضن أبيه الأديب ’وتثقف ’ وتدل أشعاره على أنه متضلع في الأدب العربي ’ أنتقل وهو في ريعان شبابه الى مدينة الزبير في جنوب العراق ’ حيث قضى معظم سنوات عمره ’ واخيرا انتهى به المطاف ليعيش في دوله الكويت ’ السنوات المتبقية من عمره ’ عاش ابن لعبون احداث عصره منذ ولادته وطوال سنى حياته القصيره وحتى عند وفاته ’ فقد اصيب بمرض الطاعون ’ الذي اجتاح منطقه الخليج العربي في ذلك الوقت ’ ولد ونشأ في نجد ’ حيث درس وتعلم واكتسب عادات وتقاليد أهلها ’ وهو الشاب اليافع الذي يحب ويهوى ويلهو في الزبير التي شاهدت فترة من رجولته ’ وهو المجرب المستقر في الكويت حتى وافته المنية ’ برع في الغزل والامثال الشعبية والحكم والهجٌا والمدح ’’



من قصائده في الغزل والذكريات :



احمد المحمود مادمع همل =أو عدد ماحال وادله وسال
او عدد ماورد وراد الدحل =او رمى دلوه وماصّدر ومال
اوحدا حاد لسلمى أو رحل =سار هاك الدار أو داس المحال
احمده دوم على حلو العمل =سامع الدعوى ومعط للسؤال
ماعلى راك واعلى ومل =حاول الطاعه على ماصار حال

عنوان القصيده (احمد المحمود مادمع همل)


حاول ابن لعبون في هذه القصيدة ان يظهر براعته فتفنن في اختيار كلماتها بحيث تكون غير منقوطة ’ ومن ثم يطلق عليها النقاد (مهملة الحروف) ’

(2) الدحل: وجمعه دحول تجاويف في باطن الارض فيها ملازم للماء,,

(3) المحال : المفازة التي لاماء فيها

(4) الراك : شجر



حي المنازل منازل ذيك=
اللي تقول آخذك خاكي=


يامي أنا حالف لارميك=
ولا اصيدك بشباكي=


همي وغمي وسقمي فيك=
ينبيك عما حكى الحاكي=


ماليلة بت وانا بناخيك=
الا وانا شاكي باكي=


يامي وقتي تقضى هيك=
ياذروة العنصر الزاكي=


مديت حبل التراجي فيك=
وهجوس قلبي بمأوكي=


مافيه قول ولا تشكيك=
وقلبك لما عندي انباكي =


قصيدة او رسالة غرام كتبها ابن لعبون الى محبوبته (مي)
وردت بالمراجع أ_ ديوان النبط لخالد محمد الفرج
ووردت بديوان خيار مايلتقط من اشعار النبط لعبدالله خالد الحاتم




*خاكي: الخاك بالفارسية التراب
*هيك: بالفارسية لاشيء

رح ياخلي القلب مني وحيها=
وقل ياعويض النفس عند الحضاير=


يامي لي بك من قديم موده=
وصل الى انحلت جميع المراير=


يزيد الفتى المفتون ممشاه بالهوى=
ويشوف مامثلي لمثله مغاير=


كما شار له مركب بريح يسنه=
باهوم وهو في غبة المايخابر=


فلو يدري أني فيه راعي موده=
وكم وقفة وقفت بدناه حاير=


اصالي ملاقاة المواعيد عندها=
وبرد الشتامنها وحر الهجاير=


الا وشقا قلبي من الضيم والعنا=
وصفق الهوى يامي في كل عاير=


يقولون جور الحب يامي هين=
وحبك لجابي لاجي بالضماير =

قصيدة غزل قالها بن لعبون وهو مريض فوق المركب
يتذكر ولاينسى حبيبته وايامها السعيدة
ويتمنى لقاءها على الرغم من مرور ثمانية اعوام على فراقها


ومن قصائدة:


ياعاذلين الشجي خلوه=
الله يرشد بهم نوه=

قل للهباسين لاسالوه=
يخفي هوى مي ويموه=

دليت باب ولا دلوه=
فيه العجاريف ومروه=

وارخيت دمع عليه اغلوه=
كنه على وجنتي فوه=

ياعاذلين الشجي خلوه=
الله يرشد بهم نوه=


قل للهباسين لاسالوه=
يخفي هوى مي ويموه=


دليت باب ولا دلوه=
فيه العجاريف ومروه=

وارخيت دمع عليه اغلوه=
كنه على وجنتي فوه =

[كحيلان]

عــــــــــــابد الموضوع هذا أنا كاتبه في مجلس فرســـــــــان قحطــــــــان



شكرا للك على مجهــــــــــودك

[عابد بن مشهور]

هلا وغلا كحيلان ماعليش ماشفته واذا زليت عليك أنا مستعد بالي تبيه وراح أرجع لموضوعك وتقبل تحياتي

[عابد بن مشهور]

الاخ كحيلان بحثت في جميع أقسام المنتدى لم اجد موضوعك اللي تقول عليه لم أجد سوى مواضيع متفرقه عن أشخاص معروفين من قبيلة قحطان والظاهر ان الموضوع التبس عليك فموضوعي هذا شامل لجميع شعراء الجزيره وليس قحطان فقط أرجوا ات تكون الصوره واضحه لديك الآن .