دقت الأجراس

[عبدالله العبيدي]

السلام عليكم ورحمة الله وبركاته ..
الله يمسيكم بالخير .


الملعبة دقت الأجراس بيديها ... النار تشعل بها والشوق يطويها ... تزهم شواعيرها تبدع قوافيها ... والراس مرفوع والرايات مرفوعه .


ياسلام الله على أهل الوفى والموجبات = عز راسي لاستدار الزمان ومسندي
ودنا في شاعرٍ لا سرينا مايبات = وإن عطينا درب يدّل ماهوب يغدي

[سعيد بن مانع]

عليكم السلام ...

اررررررحب ياعبدالله .... ومساك الله بالنور والرضااا






جاك الرفيدي ودق اجراس قيفانه=والله مثلك ترا نعني على شانه
يامرحبا مرحبا والنفس شفقانـه=والراس مرفوع والرايات مرفووعه



مرحبا بك يالعبيدي عداد النايفات=مرحبا ياعصبة الراس مرحب يابعدي
جاك من يفك عقده يحل المعضلات=اسرد المعنى وخلك ذهينٍ مهتدي

[محمد بن جفين]

الله عليكم

مبدعين
موال وطاورق كايف


واصلووا وزهلوا الصفوف

[عبدالله العبيدي]

أرحب يابن مانع ولاهنت

كلٍ من الناس يخطي والله الهادي ... والبعض للشاردة قانص وصيادي ... واليا نشدته لقيته حادرٍ وادي ... والراس مرفوع والرايات مرفوعه .
البقى والطيبه ياهل المعروف جات = أثر حظي يوم برقت به ماهو ردي
السوالف تدرج والليالي مقبلات = بين نجم سهيل ياذخر جدي والجدي

[عبدالله العبيدي]

محمد بن جفين
تسلم ولاهنت على المرور
عسانا نكون عند حسن ظنك

[سعيد بن مانع]

ولاتهوووون يالعزووه



صح لسانك




واستلم







يابن العبيدي وكلن يعرف دروبه=لكنّ بعض العرب قد ضاع في صوبه
بعضه تعرفه وعلمه بان في ثوبه=والراس مرفوع والابه رفيديه



في بعض الاحيان نلقى سوالف واضحات=في بعض الاحيان لبس الغموضه ترتدي
وفي بعض الاحيان نلقى سوالف غاديات=لكن ان الذيب يركض وراها ويعدي

[سعيد بن مانع]

محمد بن جفين

اررررررررررررررحب ولاهنت على المرور والمتابعه يالذيب

[فارس قحطان]

السلام عليكم ورحمة الله وبركاته

اررررحب ياعبدالله العبيدي

واصل انت وبن مانع الرفيدي وانا متااابع لكم

[عبدالله العبيدي]

أرحب يابن مانع وصح بدنك
تقول : (( في بعض الأحيان نلقى سوالف واضحات )) أزريت لا أجيبها على الطرق !!! أنت وش رايك ؟ تمشي معك مضبوط ؟

[عبدالله العبيدي]

استلم جعله يسلم راسك ويزيد نوماسك .

كنت أحسب إنك تعرف التمر والجصة ... وأثرك ياشاعر رفيدة تجهل القصة ... لكن لاتصبح الأوضاع مختبصه ... والراس مرفوع والرايات مرفوعة .


السوالف واضحة للعقول الواعيات = كيف ترقى الدور الأعلى بليّا مصعدي
لا تعسر الطرق وابن البيوت الطيبات = والقضية مابعد جاء لها من موعدي

[عبدالله العبيدي]

فارس قحطان
عليكم السلام ورحمة الله وبركاته
تبقى وتحيا ولاهنت على مرورك ومتابعتك

[ابن سابره]

واااااااااااصلو







دندن

[سعيد بن مانع]

جعلك تسلم ياعبدالله .... لاتخاف ماعليها خلاف .. لو انها بالصوتي وضحتها لك نفدااك ...







واسلتم جعلني ماأعدمــك ....







لاوالله اعرف وش المنصا وش الخافي=مير انت ماتعرف الرايح من الافي
افصفص العلم لين تقول ياكافــي=والراس مرفوع والرايه سعوديه



انصحك خلّك من المنتدى عوّد لشات=تلقى مايحل وضعك وتلقى منجدي
القضيه واضحه والليالي مخلفــات=غير وينه اللي عارف طريقه مقتـــدي

[سعيد بن مانع]

فارس قحطان ارررررررررررحب ووجودك ينومس نفداااك لاهنت









ابن سابره يالله ان تحييه ارررررحب اررررررحب ولاهنت على المتابعه نفداااك

[عبدالله العبيدي]

وأنت سالم يابن مانع ولاهنت ياذخر جدي .

وآسف على التأخير لأن والله إنقطع التلفون ولا حصل لي أدخل على النت غير هالساع فالعذر والسموحة

وسامحنا على القصور فلاشك إنك شاعر جزل وحنا نتعلم منك

واعذرني عن اكمال المحاورة لأن مثل ماتشوف ماتوفقنا ولا توافقنا .. لكن خيرها بغيرها

مع الشكر والتقدير لجميع الأخوان اللي شاركونا

والسلام ياكرام

[سعيد بن مانع]

اررررررررحب يالعزوه


ماهنا خلاف نفدااااك ..... وانا والله ماني شاعر فديت راسك انا اهوا الشعر وخاصه شعر المحاوره

وانا اخووض معكم ومع عيال عمي لاني بينكم ويحق لي احاول واتعلم هذا اولا
ثانيا انا شفت مجلس المحاورات نايم فحبيت في الايام اللي راحت اني ادخل فيه حياه شووووووي

على كل حال طاال عمررك

اعذرنا على الزلات وانت ماقصرت نفداااااك
واللي صار مثل ماقالوا بهارات محاورات
والخواطر صافيه ياعصبت راااااسي


دمت بخير وعافيه

[ابن منصور]

الله لايهنكم