المساعد الشخصي الرقمي

مشاهدة النسخة كاملة : معنى المرجله


فهد العابسي
08-07-2009, 10:52 AM
إذا المراجل لبسة شماغ وعقال =قل للعذارى يلبسنّ العمايم
ما عاد يفرق زول حرمه ورجال =دام الفعايل تشبه البعض دايم
المرجله ما هيب كلمه وتنقال =وتروح ما راحت هبوب النسايم
وإلا خشونة صوت أو رفع الأثقال =أو رزة صدور وفعل الزلايم
ولا هي بعد مفتاح موتر وجوال =وإلا ردى لسانن حديثه شتايم
المرجله شيمه عن القيل والقال =رفيع نفس (ن) حر بالجو حايم
المرجله عقلٍ وزن وزنه جبال =ودون العقل وش فرقنا والبهايم
يا مسندي لو مايل الوقت بي مال =يا ولد أبويه يا عظيم العزايم
يا معرب الجدين من العم والخال =يا نخوة المفزوع وقت الهزايم
المرجله يا خوي هي طولة البال =هي العزم هي الصبر فالظلايم
فيها الكرم عزه دله وفنجال =فيها الكرامه عن ردى الطبع شايم
والدين لامنه خذا القلب منزال =مشى طريق الحق وابليس نايم
ومن لا عرف ربه في طيب الحال =لابد وقت الضيق بالهم هايم
حتى صلاتك مع جماعات ورجال =في خيرها يا خوي نعم الغنايم
ولامن نصف ليلك قم صفي البال =يا عظم أجرك بين ساجد وقايم
ولا من رفع ربي له كل الأعمال =حسن الذكر لا قالو فلان صايم
وخلك شريف القصد يا طيب الفال =سوء المقاصد فالبيوت الهدايم
واحذر تبيع النفس في درب الأنذال =وتتبع خوي إبليس راع النمايم
النفس خيل لك إذا كنت خيّال =ومن لا قوى نفسه قوته الهزايم
ولا صرت ما تدري لو يش أنت رجال =والله خسارة فيك ذبح التمايم


اخوكم الصغير/فهد العابسي.

خالد العاصمي
09-07-2009, 11:44 AM
أرحب أرحب يافهد

قصيدة معبرة وصح لسان قايلها

وتسلم يمينك على النقل للقصائد الجزلة

ولاهنت يالعابسي وبيض الله وجهك

سعد الجروي
09-07-2009, 09:58 PM
قصيده قويه

صح السانك

دمتم سالمين

علي آل جبعان
09-07-2009, 10:51 PM
ولا صرت ما تدري لو يش أنت رجال
والله خسارة فيك ذبح التمايم

اخوكم الصغير/فهد العابسي.

بيض الله وجهك على هذه القصيدة الرائعة
أخي الغالي
فهد العابسي
هل هذه القصيدة من نظمك؟

ودمت بودّ

فهد العابسي
10-07-2009, 12:20 AM
الكثر من الأشخاص يعرف بيت او بيتين من هذي القصيده.

لوجودها ابيتها على التواقيع والصور المختلفه.

ووصلتني وحبيت ان يقرأها الجميع.


رد على السؤال وشكرا.

سفر بن مبارك
10-07-2009, 12:23 AM
شكرا أخي :فهد العابسي,,
وتم التعديل ......

نايف راكان
10-07-2009, 08:55 PM
لاهنت يا فهد على العلوم الطيبه والقصيده الجزله





مشكووور