المساعد الشخصي الرقمي

مشاهدة النسخة كاملة : عبدالله المشعلي... بنو قحطان


ناصر بن هذال ال شري
11-03-2009, 11:44 AM
يا الله يا والي تدابير الأكوان= يا عالم ما بالضماير يكنا

يا اللي فرضت ألنا الفرائض والأركان= ومكنتنا بالدين حتى مكنا

يا واحد بأمرك جرى كل ما كان= ومن العدم كونتنا لين كنا

خلقت خلقك وأنت للخلق عوّان= عنا على طاعتك يا رب عنا

يا رب ثبتنا وزدنا بالإيمان= أنت العظيم اللي بأمنك ومنا

يا من لوجهك يسجد الإنس والجان= وعذبت من ضل وعصاك وتجنا

رفعت سبع فوق من دون عمدان= وبسطت سبع فوقها تمتحنا

ألطف بعبدك قبل زوغات الأذهان= اللي بلذة عيشته ما تهنا

يحمل من أوزاره قناطير وأطنان= وقلبه بذكرك يامن ويطمئنا

واللي تخفيه المقابيل ما بان= وجسور آماله في خياله تبنا

كلٍ على دنياه يسعى على شان= سعادته والحظ لا شان شنا

واللي جمع دينه ودنياه ربحان= دينٍ ودنياً غيرها ما شحنا

وان قلت الحيلات في بعض الأحيان= حنا القريبين البعيدين حنا

حنا مع اللي يسكن الأرض سكان= وبعزومنا فوق الثريا سكنا

حنا العرب أصل العرب " بنو قحطان "= صفوة عرب " شبه الجزيرة " وطنا

نجوبها ونقطن على كل مقطان= وقت الجهل كم منهلٍ به قطنا

عدلين للصاحب وللضد عوجان= بني " مظيم " مزبنين المجنا

يلقا بنا الخايف ملاذٍ ومزبان= ومن حدته سود الليالي زبنا

يوم السنين الماضيه خوف وأمان= عدونا ما يامن الخوف منا

نطمع ولا يطمع بنا كل طمعان=واللي طمعنا ناخذه مع ضعنا

حماية الساقه هل سنان وعنان= تنبي تواريخ أهل الأمجاد عنا

وسلومنا ورثٍ من أبا وجدان= نطيب من طيب أصلنا ومعدنا

" عشرٍ " تميزنا بها بين الأقران=هي تقترن فينا وفيها اقترنا

مفاخرٍ نفخر بها سر وإعلان=ومن العصور الماضيه بقيت ألنا

رد المغيره لا رقص كل شيطان=بشلفا ورمح مثل رمح المطنا

وفك النشب بين العرب لا بدأ الشان=بالصلح وان كبرت حملنا وشلنا

نبرك لحمل ما يشيله بليهان=ويهون بأمر الله وحنا ما هنا

والحق مقطاعه عوارف وشيخان=منا وفينا وسلمٍ يورخ ألنا

وترحيبنا ناموس شيبٍ وشبان=وابيوتنا على المراجل تبنا

والضيف يلقى له كرامه بسفطان= نكرمه لو فقر الليالي شطنا

وقصيرنا نرفع مقامه ولا يهان= ما يحسه أدنى محسةٍ من جهنا

وجويرنا يامن بنا وحقه يصان=اليا زبن فينا حفظنا وصنا

وعانيّنا نعينه على مر الأزمان= يشهد لنا ماضي وحاضر زمنا

وخوينا يرقى على راس ما بان= من وين ما تبين المواجيب بنا

ونافي ليا منه غدر كل خوان= اليا عطينا العهد معاد خنا

لنا الوفاء والجود مبدأ وعنوان= نتعب من أجله دايم ونتعنا

وأقوالنا وأفعالنا خير برهان= واللي يراهنا ما ياخذ رهنا

ميزاننا يرجح على كل ميزان= ولا ختل ميزان الزمان اتزنا

هذا ولا في حق الأجواد نقصان=كل القبايل وصلوا اللي وصلنا

أرجال وافين ومشايخ وفرسان= كم من راعي منسف وسيف يسنا

إن كان من " قحطان " وان كان " عدنان " = نعتز فيه وعضونا من بدنا

من طاب فعله طاب والخد ميدان= لو انتمى الأوطان بعّد ودنـّا

واليوم " بدو .. وحضر " من فضل منان= صرنا سواء من شامنا لا يمنا

عبدالله المشعلي

سعيد الجهيمي
11-03-2009, 12:58 PM
السلام عليكم

صح الله لسان ابو راكــــــــــان وسلمت يمنى ناصر كحيلان


وقصيده وافيه جزله وقحطان اهل المدح والثنى

والله يعلي شاننا وقدرنا جميع


والله لا يهينك على حسن النقل والاختيار الموفق لهذه القصيده


لا عدمناكـ يا ابن شري


وتقبل مرور اخوكـ

البشري

مشاري بن نملان الحبابي
11-03-2009, 01:51 PM
صح لسان الشاعر عايض بن ريكان المشعلي ..

ولاهنت على النقل ..

ابو سلوان القحطاني
11-03-2009, 08:35 PM
صرحكم العالي من اصلكم العالي




تقبلو تحياتي00000000000000000000ابو سلوان

فهد العلياني
12-03-2009, 01:21 AM
ارحب ياناصر


وصح لسان الشاعر عبدالله المعشلي ولسانك

ولاهنت يالذيب علي تنزيل القصيده

وتحياتي لك

..

ناصر بن هذال ال شري
12-03-2009, 02:49 AM
يستاهل ابو مبارك

عبدالله بن غفره
12-03-2009, 03:25 AM
القصيدة فيها تناغم كبير جداً بين الشطر الأول والثاني

وعمد الشاعر في أستخدام أحراف موجودة بنهاية الشطر الأول
ووظفها بفكره الراقي وإبداعه الغير مستغرب في الشطر الثاني


قصيدة جميل ومعنى جميل جداً


وصح الله لسان ابو مبارك

وبيض الله وجهك يابن شري
مواضيعك موافيه وعلومك دايم ذربه


اخوك

سفر بن مبارك
20-03-2009, 06:47 PM
شكرا ً لك أخي ناصر بن هذال ال شري على النقل الموفق ولا يستغرب منك فأنت جزل ومن بيت جزاله

خالص الشكر وصح لسان قائل القصيده ........

أبو معتز
21-03-2009, 02:21 PM
لاهنت لاهنت يا ناصر وصح السانك واللسان الشاعر نقل موفق .. بيض الله وجهك و وجهه
تقبل مروري