**أبو زيد الهلالي**

[سفر بن مبارك]

بسم الله الرحمن الرحيم


هذه الحكاية ينسبها الرواة إلى (( أبو زيد الهلالي سلامه )) الفارس والشاعر المعروف . . . مر على بني هلال حين من الدهر أصابهم فيه الجوع , فقد شحت المراعي وقل الكلأ والمرعى , فمات أكثر حلالهم وأصاب القبيلة كلها الجوع والعطش فاقترحوا إرسال شخص يستكشف لهم الأراضي ويبحث لهم عن الأرض الطيبة فترحل لها كل القبيلة , وبالفعل نال هذا الاقتراح إجماع كل القبيلة إلا أنهم حاروا فيمن يرسلون وكان بالقبيلة شخص مسنّ - وقيل إنها عجوز - هذا الشخص يؤخذ رأيه فاستشاروه فيمن يرسلون فاشترط عليهم شرطاً قبل أن يقترحون من يرسلون وكان شرطه أن ترحل القبيلة كلها مسيرة يوم كامل بدون توقف وبعدها يعلمهم من هو الشخص المناسب , وبالفعل رحلت القبيلة مسيرة يوم كامل بدون توقف وبعد أن نزلوا بالمكان المحدد رجعوا له وسألوه عن الشخص فقال لهم هو أبو زيد الهلالي سلامه . . . فسألوه عن سبب اختياره له فقال أثناء رحيلنا لاحظت كل أبناء القبيلة يراوحون بالركوب بين ورك وورك أثناء الركوب على المطية إلا أبا زيد فقد كان ركوبه على ورك واحد حتى نزل وهذا دليل صبره وجلادته . . . واختاروه فعلا وأرسلوه , وقد طلب أن يرافقه اثنان من أبناء القبيلة ورحل هو ورفاقه يبحثون عن المرعى للقبيلة كلها . . . وطال بهم المسير دون جدوى , وتقطعت مطاياهم , وأصابهم الجوع فكانوا قرب قرية فنزلوا بسوقها ولم يجدوا من يطعمهم , كما لم يوفقوا إلى عمل يرتزقون منه . . . فاحتاروا بأمرهم , وكان أبو زيد واسع الحيلة داهية فاقترح على رفاقه أن يبيعوه في سوق المدينة على أنه عبد لهم , فقد كان أسمر اللون . . . وأما إلحاحه وافقوه على أن يبيعوه ويشتروا بثمنه مطايا وزاداً لهم , ويواصلوا البحث . . . أما هو فقد قال لهم أنه سيستطيع تخليص نفسه , على شرط أن يواصلوا هم البحث عن المراعي للقبيلة
فاتفق الثلاثة ونزلوا سوق المدينة . . وباعوه . . وقبضوا الثمن كما تم الاتفاق واشتروا بثمنه المطايا والمتاع . . . وقد كان ينوي الهرب من سيده الذي استراه , إلا أن هذا السيد كان نبيلاً وطيباً , أولاه ثقته وجعله وكيلاً على أمواله فصعب على أبو زيد أن يخون الأمانة ويهرب . . . ومن هنا كانت معاناته واستمر في خدمته فتره . . . وذات مرة كانوا جالسين بمجلس هذا السيد وأبو زيد بالقرب من الدلال يصنع القهوة . . . فتمنى السيد من يجيد العزف على الربابة ليحلوا لهم السمر فعرف أبو زيد أنها فرصته فنهض مسرعاً وأخذ الربابة وأنشد يقول

يقـول الهـلالي والهـلالي سـلامـه

شـوف الفجـوج الخاليـات تــروع

يقـول الهـلالي والهـلالي سـلامـه

يبغـي الطمـع وهـو وراه طمــوع

لابد عقـب الوقـت من لايـح الحيـا

مـن بارقـن يوصـي سنـاه لمـوع

لابـرقـن إلا فـي حجـا مستهلــه

ولا طـرقـي إلا مـن وراه نجــوع

ولا ضحـك إلا البكـا مـردفـن لـه

ولا شبعــة إلا مقتفيهــا جـــوع

ولا يــدن إلا يــد الله فـوقهــا

ولا طـايــرات إلا وهـن وقــوع

ألا يا حمامتيـن فوق نبنـوب دوحـة

وراكـن فرقـن والحمــام ربــوع

حمـامتيـن جعـل تبلــن بنــادر

حـر قطـوع وجـاري لـه جــوع

وراكـن مـا تبكـن عليـا مظنتــي

لو كـان مـا يجـري لكـن دمـوع

أبكي عليهـا ليـن حفيـت نواظـري

ولانـي بمـن تدبيـر الإلـه جـزوع

حشى ما لاق غير الجـازي أم محمـد

عليهـا ثويـب الطيلســان لمــوع

تنفـق كمـا نفـق الوغيـد مـع أمـه

وتحـط الهـوى في قلـب كل ولـوع



قد يستغرب القارئ من تكرار اسم الشاعر بالبيت الأول والثاني ولكن ذلك لتأكيد أنه الهلالي وليس عبداً وقد بين للسيد أنه جاء يبغي الطمع فصار الطمع برأسه . . . عرفه السيد وأنَّبه على ما عمل وأطلق سراحه وأغدق عليه الهدايا وعاد أبو زيد لقبيلته

منقول

[خادم والديه العبدي]

ولا يــدن إلا يــد الله فـوقهــا

ولا طـايــرات إلا وهـن وقــوع

هذا البيت عن قصيده كامله

ابو مبارك بيض الله وجهك على النقل وال ابو هلال قصصهم واجد وممتعه

تحياتي000000اخوك

[سفر بن مبارك]

من قصص بني هلال

المقدمه:
القصه اللي انا ابي اتكلم عنها عباره عن محصله من عدة روايات عن بني هلال وقصة الجفاف اللي صابهم ومعاركهم وانا المسؤل عن الرواية وما يذكر فيها من احداث وقصائد واعتبر نفسي مصدر طرح هذه القصة بهذا الاسلوب حفظاً وليس كتابه لان اكثر الاحداث سمعتها وحفظتها ولم اجدها في أي مصدر مكتوبه علما ان عندي اربع مصادر من كتب غيرما تمكنت من جمعه من مصادر اخرى

في البدايه ابي اتكلم عن قصة الحب اللي حصلت بين ابو زيد الهلالي واسمه الحقيقي (سلامه) وعليا واسمها كامل عليا بنت الشيخ جابر العبيدي القحطاني
أول احداث القصه يوم شاف ابو زيد عليا اعجب فيها وجن جنونه انهبل جمال وجسم وبنت شيخ قال في نفسه ماخذها ماخذها بس العقبه الوحيده قدامه ان شيخ بني هلال مانع شباب بني هلال ما ياخذون الا من بنات بني هلال (وطبعا عليا بنت الشيخ جابر من عبيده من قحطان )راح لأميرهم واسمه حسن بن سرحان وطلب منه يسمح له يتزوج من عليا
عرض فكره الزواج من عليا على الأمير رفض الامير واصر ابو زيد ألا يتزوجها وقال للأمير انت بس شفها وتعذرني رفض الامير وارسل ناس يشوفونها ويوصفونها له جوه المراسيل ولا مدحوها له يقولون نحيفه ولهي على وصف ابو زيد
رفض الامير مره ثانيه وكرر عليه ابو زيد وطلبه انه يروح يشوفها بعد كثر الالحاح قال الامير بينه وبين نفسه ليه ما اروح اشوف هاللي خذت قلب ابو زيد وابو زيد معروف عنه انه فارس ولا يفكر في الزواج ولا يفكر انه يجي له عيال ابداً
ابو زيد كان يوصف عليا عند الامير حسن بن سرحان يقول عليا إذا وقفت من اوسط البنات بالطول وإذا جلست تكون اطولهن ( يقصد بكلامه أن فخوذها كبار إذا جلست ترفعها ) راح الامير يشوفها واخذ معه واحد اسمه ابو العلا وكان الامير راكب ناقه يوم شافها انبهر من جمالها ما يدري يمشي في أي اتجاه بالعربي ضيع نزل من ناقته وراح يمشي ويردد قصيده يقول فيها :






ابا العلا قدلي مع الدرب ناقتيبحسناك والا ناد لي من يقودها
يقولون لي عليا نشاش دقاقـهوانا اقول ريان من الغي عودها
ان وقفت دق العسيلي بوركهـاوان دنقت ما رده الا نهودهـا
قولو لطراد الهوى يطرد الهوىوانا كفيلك عن بلاوي حسودها




قولوا لأبو زيد ياخذها
العسيلي هو نوع من الجلد المقوى على شكل حزام وسيع على شكل حجل في الوسط ويقصد بالبيت ان وسطها ضامر مافيه شي يرد الحزام
على كذا يسمح لابو زيد ما لا يسمح لغيره طبعاً هذا ابوزيد الهلالي من قده
تزوجها ابو زيد
وكان معروف عن بني هلال انهم اهل طرب ورقص وفلة حجاج بس مافيه شي يدوم لانه جاهم اسبوع امطار الليل والنهار تصب عليهم ما قدروا يرقصون ولا ياخذون حريتهم من المطر قال لهم واحد( ويقال انها عجوز في اغلب الروايات ) اذا تبون المطر يوقف اسلخوا لكم بقره وهي حيه ويوقف المطر طبعاً هم ماصدقوا خبر سوو اللي قالته العجوز وفعلاً وقف المطر والوقفه الواقفه اخذوا ثمان سنين ما جاهم ولا قطره ولا هب عليهم الهبوب
ومن المواقف اللي صارت بسبب الجفاف ان ابو زيد كان هو وواحد اسمه عزيز ابن خاله رايحين يسقون ابلهم ونزل عزيز في البير يملا الدلو لخاله ابو زيد ( وكان يقال ان عزيز ولد ابو زيد من اخته وهذه المقوله لها قصه معروفه ولذلك سمي ولد خاله ولكن لسنا في سياق ذكرها في هذه القصه وكان ابو زيد لا يعترف به) نزل عزيز في البير مع نزوله قرصته حيه و (ون) منها وسمعه ابو زيد وقال له:





سمعت منك يا فتى الجود ونهعساك منها يا فتى الجود سالم



قال عزيز :





انـا سالـم منهـا ولانـي بسالـموالراس ما تطوى عليـه الغمايـم
أنا سالم لو ما ازرق الناب عضنيضربنـي بنابـه واتقـا فالرقايـم
وانا خايف يا خال هـذي منيتـيومن رافقك يا خال مـا رد سالـم
وحلفت أنا يا خال لروي ركايبـكواخلي الماء من على الحوض عايم




قال ابو زيد






يا وليّد قم خم الرشا واحتزم بـهخل اظهرك عن بير فيه الصمايم




ملا عزيز الدلو وطلعه خاله من البير ويوم شاف ابو زيد ان الموت جا عزيز( ون) ابو زيد ويوم سمعه عزيز قال





يا خال خل الـدوح والنـوح خلـهواعمل بقبري يا عطيب الضرايـب
خل القبر في راس عيطـاً طويلـهوسيفي ورمحي حطهن لي نصايـب
أغـدي بنـات الهلاليـه يجنـنـييجذ على قبـري بـروس الذوايـب
وداعتـك يـا خـال ورعٍ صغيـرٍيلعب مع الصبيـان وابـوه غايـب
احذرك انا يا خال عن ضربه العصاأو نهـرةٍ تـودع قليبـه حطايـب
وقولوا لبنت امي تغطـى وتستحـيليا جولها الخطاب فـوق النجايـب
وقولوا لبنت العـم ترحـل لاهلهـاحرم عليها اليوم شـوف الحبايـب



(بنت العم يقصد بها زوجته) مات عزيز ودفنه ابو زيد مثل ما وصاه وصب الدلو اللي طلعه عزير على قبره وقال ابو زيد فيه






دفقت على قبر الهلالـي قربتـهوخليتها تسق الرياض المجـادب
وحطيت على قبر الهلالي جوختهوخليتها تـذرا عليهـا الهبايـب
وحطيت على قبر الهلالي فتختهفي ما قع يشوفها كل صاحـب
وعقلت على قبر الهلالي بكرتـهوخليتها تعتب حوالا النصايـب



أستمر الجفاف ثمان سنوات وبني هلال يشدون من مكان وينزلون في مكان يدورون الماء ويحفرون حتى في روس الجبال وكل مكان يشدون منه يدفنون فيه من موتاهم من العطش ولهم اثار كثيره في نجد والجنوب ومازالت ابارهم موجوده في كثير من مناطق المملكه وهذا من اكبر الادله على انه كان لهم وجود حقيقي وان القصص والكلام عنهم ليس من الاساطير ولكن استغلت شخصياتهم في كثيرمن القصص



ومن ما قيل بسبب الجفاف ما قاله الامير حسن بن سرحان:






ثمان سنين ما هوا نجد قطـرهولا زلزل الرعد الرزيـن وزار
ولاهبت الغرى ولاهبـة الصبـاولا طار من اشعاف البكار غبار
حفرت فالبيـدا ثمانيـن قامـهودورت انا الجم الغزير وغـار
يانجد وان طاح الحيا فازعجيلناوشبي لنا براس المقوزي نـار
لك الله صبيان النشاما تغيـروابنابٍ ضحوكٍ يعجـب الخطـار




بعد ثمان سنوات من الجفاف ضاعت الحيله عليهم ما فيه أي شئ لرعي حلالهم ولا فيه أي شي يشربون منه قال الامير حسن لابو زيد نبيك تروح تعس ديار تونس وتجيب الاخبار منها لانهم سمعوا ان فيها خير وان ارضها مليئه الخضره والعشب وتشوف فيها حيا والا لا. وكان اختياره لانه يعرف ان ابو زيد اقدر الناس على السفر لتونس وكان السفر لها يستغرق ثلاثه اشهر حسب ما ذكر في قصائد ابو زيد وان شاء الله اذكره في الاجزاء الجايه لاني ما ابي اذكرها مقسمه ولا جاء موقفها اللي قال فيه القصيده

بعد محاولات واقناع وافق ابو زيد انه يروح بس اشترط انه يرسل معه عيال الامير حسن وهم يحيى ومرعي ويونس

اولا لانهم فرسان وثاني لانه يبي يشوف اذا الموضوع مهم عند الامير ولا يهم بمخاطرت ابو زيد فهو بيوافق يضحي بعياله ويخاطر بهم لان الطلب ماهو هين

وافق الامير على شرط ابوزيد وجهز عياله من كل شي يحتاجونه
وكان طريقهم مع الحره في الحجاز وذلك مذكور في قصييده ابوزيد
يقول فيها
سرنا مع الحرات تسعين ليله ,,, نقود الطوعات خلف الجهايم


توجه ابو زيد وعيال الامير لتونس وفي طريقهم مروا على عامر الخفاجي في العراق واللي ايدهم ووعدهم انه يوقف معهم اذا احتاجوه اوا احتاجوا منه شي وتوجهوا من عنده باتجاه تونس واللي كانت فيها قبله بني قابس


وصلوا لتونس وكان حاكمها يقال له خليفه الزناتي


اكرمهم الزناتي احسن اكرام مع انه ما كان مرتاح لهم لانه كان حالم له حلم مخوفه وشايفٍ فيه ان جايهم سحابه من الشرق وتمطر عيهم شوك



ويوم وصل ابو زيد واللي معه لديار بني قابس وعرف انهم جايين من ديار الشرق قال في نفسه أكيد ان لهم علاقه بحلمي وان شي بيصير لي منهم وقال ليه انا ما احبسهم لين اتحقق من صحة كلامهم وبعدين اقرر اطلق صراحهم

وامر بحبسهم والتحقيق معهم


سألوهم من اين انتم جايين ووين رايحين قالوا حنا من ديار عامر وراجعين من الحج ومر بنا الطريق على دياركم

بس الكلام ما كان مقنع ابد ولافيه شي من الصحه

ما صدقوهم وامروا بحبسهم

وبعد مده امر بنقلهم من السجن لقبوا في قصر الزناتي

لانه ما كان متطمن لهم ابد ومازال يحس ان لهم علاقه بالحلم

الزناتي كان له بنت واسمها سعدى وتلقب بالصفيرا وكانت كاهنه تخط على الرمل وتكهن

ومن ما شافته بالخط على الارض انهم بيغزون وبيجيهم ناس يذبحون ابوها وان اللي بيقتل ابوها واحد اسمه ذياب


جتهم سعدى وسالتهم وقالوا لها نفس الكلام انهم حجاج


ضحكت عليهم وقالت يالكذابين معي علمكم انكم ابو زيد ويحيى ومرعي ويونس عيال الامير حسن بن سرحان ما قدروا ينكرون واعترفوا لها
ويوم شافوا ان ما لهم مجال اعترفوا لها علها تساعدهم
وطلبوا منها انها تساعدهم وقالت اساعدكم بس بشرط انكم إذا غزيتوا علينا فيه واحد اسمه ذياب ( ولد اخت ابو زيد) بيذبح ابوي إذا عاهدتوني انكم تزوجونيه اساعدكم قالوا ان ولد اخت ابو زيد صغير ولهوب فارس ولاعمره شارك في حرب لانه وقتها كان عمره صغير على خوض الحروب وما كان له أي فعل وكان ابوه خواف وسيرد قصيده قايلتها ام ذياب في ولدها تنصحه لا يسمع كلام ابوه وتامره انه يعصي ابوه ويروح للحرب قالت صاحب الاسم ذا بيدبح ابوي وتزوجونيه سواء كان ولد اخت ابو زيد او غيره

وافقوا على شرطها وقالت انا بروح لبوي وبقول انك عبد ( تقصد ابو زيد لانه كان اصلع من لبس الدروع واسود من الشمس ) وبقول لابوي ان سجن العبد عيب اترك الاحرار الثلاثه في السجن وفك العبد واكدت لهم انها بتساعدهم وعاهدتهم على ان ابو زيد ليطلع باي طريقه

وقالت لابو زيد اني اذا قدرت اطلعك لا تقول لاحد انك ابو زيد ثم ما يفكك ونبهتته من حيل ابوها وانه ما راح يفكه كذا لانها عارفه ان ابوه ما تطمن لهم ابد واذا اكتشفوا انك ما انت عبد انك برجع للسجن ويمكن اتورط معك
راحت لابوها وقالت له يفك العبد وحاولت انها تقنعه انه عبد وبعد محاولات اقنعته انه يفكه ويراقبه ويتاكد انه عبد


وافق المسكين ما عرف حيلة بنته عليه

بس ما وافق بفكه كذا لكنه امر اشجع فرسان بني قابس ويقال له العلام وقاله انه يراقب كل تحركاته لانه ناوي يسوي له حيله وامره انه اذا اكتشف ان العبد ما طلع عبد يقطع راسه على طول

ويوم راحت تفكه نبهتته وقالت له عن حيلة ابوها وانه مراقب


وكانت حيلة الزناتي انه قال حطوا العبد ( يقصد ابوزيد ) عند القدور وخلوه يطبخ وانت راقبه يالعلام وخلوا الخيل تعرض من قدامه والفرسان يلعبون ان شفت العبد طنش القدور وراح اهتمامه مع الخيل اعرف انه فارس واقطع راسه على طول ولا تناقشه


عرضت الخيل قدام ابو زيد ويوم شاف الخيل والفرسان نسي نفسه وانطنخ معها فارس وشاف الخيل والفرسان ولا له في شغلة القدور


وش صار بين العلام وابو زيد في الجزئ الجاي







(تنبيه : حقوق الكاتب محفوظة. نشر النص بالتّاريخ 19-04-2005
عبدالله العصيمي











انتهى الجزء الاول من قصتنا يوم

عرضت الخيل قدام ابو زيد ويوم شاف الخيل والفرسان نسي نفسه وانطنخ معها فارس وشاف الخيل والفرسان ولا له في شغلة القدور

جاه العلام وسأله قبل ما يقطع راسه من انت شاف ابوزيد انه تورط ولا له غير الاعتراف قال ابو زيد اقول وتعاهدني ما تذبحني قال العلام اعاهدك قال ان ابو زيد

طبعا العلام مضى منه عهد انه ما يذبحه ولا يقدر يخليه في الديار ويسال ليه ما ذبحته
قال العلام انا الليله بجهز لك مزهب وذلول تنحاش عليها بس تعاهدني انك اذا غزيتونا ما تذبحني ولا اذبحك ودي اشبع من الطراد ومن ذبح الفرسان من قومك وانت اذبح من قومي وانا اعاهدك ما اعترضك وعاهده ابو زيد على انه ما يذبح العلام .


يوم جا الليل ركب ابو زيد الذلول وتوجه لاهله ويقال انه اخذ ثلاثه اشهر من بعد المسافه لين وصل اهله .


يوم وصل ابوزيد لنجد وقابله الامير وشاف عياله مارجعوا وعرف انهم في سجن الزناتي صاح بقومه وامرهم انهم يشدون الرحال بحلالهم وحريمهم حتى ما يذكرون ان وراهم شي يرجعون له او يتحسفون عليه .


ورد احد شعرائهم يقول






رحلنا ولا ابقينا بنجـدٍ حسوفـه
سوى عيلمٍ بيـن اللـوا وزرود
والفين ورد الما والفين صـدره
والفين مـا بيـن العـدام ورود
تراه بواد الشري ياجاهلـن بهـا
عليها النـواز النايفـات شهـود
ترد لها تسعين من جلـد بكـره
وتسعين مع تسعين جلـد قعـود
لا زاد ورده زاد ميـاح جمـه
عدٍ ليـا حـرك تـراه يـزود
دفناه عن نـاسٍ تـولاه بعدنـا
شحاحٍ ولا بالطايـلات تجـود
بذرنا عليه الجود لين امحلت به
سنين القسى ما لجلجن برعـود
ورحنا وعنه النفس ماهيب طايبه
عسانا ليا عاد السحـاب نعـود
عسانا نعود ونبتها يكسي الوطـا
ومن عشب ترمسها عليه ورود
غربيها زيزا بها الريـم والمهـا
وشرقيهـا يـذرا عليـه نفـود
عسى إله الكون يسقـي ترابهـا
وعليها بدهم الممطـرات يجـود
حيث انها تالد بها شمـخ الـذرا
ونصيهـا للصافنـات مــدود





رحلوا الهلاليه وطبعا معهم حلفائهم الزعابى ( قبلية زعب ) وما خلوا وراهم احد الا عليا مرة ابوزيد الهلالي لانهم قبل لا يرحلون كان فيه مشكله بين اهلها وبين بني هلال وكانت عند اهلها في نفس الوقت ورفضوا انها ترجع لبني هلال لين يجي ابوزيد ويحل المشكله ويوم جاهم ابوزيد بالاخبار وعرف ان عليا عند اهلها تركها على امل انه يرجع لها اذا خلص من مشكله الزناتي وجماعته .

مشت ركايب الهلاليه وخيلهم وكان ابوزيد يردد ابيات يقول فيها






يقول ابو زيد الهلالـي سلامـه
تجار نجد( ن) هالني كبر زومها
يقولون ذا ونقول لا ثـم ننثنـي
لحاجاتنا ناطا الغلا من حكومهـا
عفا الله عني ليلـه بـت ساهـر
بجو السميراء بت اساهر نجومها
بـت لكنـي شـارب قرقفـيـه
امدفقه فيها الافاعـي سمومهـا
نفسي تمنيني علـى ذبـح خيـر
على غير حق اوهمه من اوهومها
وهو يذبح الكوما الى قلص القرا
ولا قال يكفي درها عن لحومهـا
ولولاه مـا بتنـا بنجـد عشيـة
ولا وقفت زلباتنا فـي حزومهـا
وهو حسن الشده وحسن الرخـا
وهو اميرنا في جميـع علومهـا
ولو العجوز العامريه ما ارثـت
لنا حسـن كنـا جميـع نلومهـا






في طريقهم مروا على العراق وكان فيه حليف لهم يقال له عامر الخفاجي وكان امير قبيلته وكان له قصر معروف باسم الاخيضر نزلوا عند الخفاجي ماكتب لهم من ايام واكرمهم ويوم ننوا الرحيل الى تونس ما قدر الخفاجي يصبر يوم شاف الخيل والفرسان وشاف بنات بني هلال حب انه يشارك معهم ويكسب سمعه جهز نفسه ومن معه من ربعه ويوم نوا يمشي منعته امه ولا امتنع وقامت تلحقه وتلح عليه يجلس ما سمع كلامها

وقال فيه واحد من ربعه

ولد الخفاجي راح وامه تذوده ** خذن قلبه بالمنى والمواعيد
يبغى يطلع مع هل الخير جوده ** ورث لنا قصر الاخيضر وعربيد



( عربيد ) ثعبان ضخم كان يربيه الزناتي في قصره

بعد ما اقتربوا بني هلال من تونس ارسلوا مرسولهم للزناتي يبلغه انهم وصلوا واذا ما فك المساجين وسمح لحلالهم يرعى في دياره انهم بيصبحونه

دخل المرسول على الزناتي قال الزناتي

لا هلا فيكم ولا مرحبا بكم ** منين جيتوا يا ضراب الشعابه

قال الهلالي

جينا نبا المرعى ونسكن عندكم ** والكل منا واقف ( ن ) دون واجبه

قال الزناتي

ترى وعدكم طلعة الشمس باكر *** واللي يتردى يحسن الموس شاربه

رجع الهلالي لربعه وبلغهم ان الزناتي يتحدى ولا يبغى الصلح

جهزوا الهلاليه انفسهم وخيلهم وعدتهم وعزلوا له تسعين الف من فرسانهم وفي مقدمتهم الامير حسن بن سرحان وابو زيد الهلالي وخلوا بعض الفرسان عند الحلال والحريم والعبيد حمايه واذا احتاجوهم ارسلوا لهم .

هجموا على الزناتي وربعه واستمرت معاركهم شهر ما ردوا خبر للي وراهم من فرسان ولا بلغوا اهلهم عن كل اللي يصير معهم

بعد شهر قتل اكثر الفرسان من الطرفين وارسلوا الهلاليه مرسولهم يستنجد بباقي الفرسان وكان المرسول عبد من عبيد بني هلال واسمه سعد

اول ما وصل سعد لربعه استقبله ذياب بن غانم وكان صغير ما عمره شارك في معركه
قال ذياب

ياسعد خبرني ولا تكن ما جرا ** عن الخيل والفرسان من جا خيارها
انشدك عن سابق بدير بن وايل ** هي من طوال الخيل او من قصارها

قال سعد

يا سيدي سابق بدير بن وايل ** ضربت بسيف هد عالي فقارها
يقصد انه قتل

قال ذياب

انشدك عن عيال الزعابى الثلاثه ** هم عزوتي يا سيدي من خيارها

قال سعد

يا سيدي كل الثلاثه ذبحوا ** ما جيتك الا قد توافت عمارها

قال ذياب

انشدك عن ولد الخفاجي عامر ** عساه سالم من بلاوي اخطارها

قال سعد

ثلاثين يوم( ن ) حام الترك عامر * * ولك الله ما يعرف ليلها من نهارها
ومن ذبحته كل النسا زاد حزنهن ** يهلن على قبر الخفاجي عبارها

قال ذياب

لا حلكم لا بلكم وابل الحيا ** يقطع نجوع ( ن ) ما ثنت دون جارها

زعل ذياب وضرب العبد بعقب الرمح وجهز نفسه للغزو مع باقي الفرسان وكان ابو ما له غيره وكان كبير سن وقعد يوصي ذياب ويقول له تجنب الزناتي والعلام وهو يوصيه سمعته ام ذياب وردت عليه بها الابيات

لا تردي ابني يا هداني مقصر ** عساك عن برد الجنان تغيب
عساك يا ابني وان تداريت عنهم ** شلفاه تخطيهم وفيك تصيب
تباعد عنا يا ذياب بن غانم ** له حربة ( ن) تدع الوليد يشيب
له حربة ( ن) ما ياقع الطل فوقها ** عشاه من دم الرجال غصيب

[سفر بن مبارك]

شكرا ً لأخي خادم والديه على هذا التشجيع القيم والملموس بيض الله وجهك .....

[عوض الرفيدي]

سفر الله لايهينك على الموضوع الكفوو والله يعطيك الف عافية وتقبل مروري

[فهد العلياني]

لاهنت علي القصه والقصيده


تحياتي لك


..

[أبــومبارك الـعـابسي]

لاهنت يا ابو مبارك

قصص جميلة مدعومه بقصائد رائعة

تقبل تحياتي واعجابي بمواضيعك

[ابن عياف]

بيض الله وجهك ولاهنت

على النقل الرائع والجميل

وهذا انت اذا حليت حليت بجميل

فلاهنت ولاشنت

----------------

من حفظي قديماً

عبيدية ما هيب عنبا طويله ........ ولا بعريان من الجسم عودها
ان وقفت دق العسيلي وركها ....... وإن دنقت ما ردها إلا نهودها

وايضاً قصديت ذياب والعبد

يقول

ابشدك عن الخفاجي عامر ...... هو من خيار القوم وإلا ثبارها

قال العبد :

ان كان تنشد عن الخفاجي عامر .... غدى مع القوم يوم اجتوالها

قال ذياب :

مح الله قوم ما ثنت عند عامر ..... مح الله قوم ما ثنت عند جارها

قال العبد :

تسعين شلف كسرت عند عامر ... وغدى على قبر الخفاجي كسارها

وذلك ليعذرهم ذياب

قال ذياب :

مح الله قوم ما ثنت عند عامر ..... مح الله قوم ما ثنت عند جارها

ولم يعذرهم

قال العبد :

تسعين عذراء فرعت عند عامر .... وغدى على قبر الخفاجي عبارها

قال ذياب :

مح الله قوم ما ثنت عند عامر ..... مح الله قوم ما ثنت عند جارها

قال العبد :

تسعين يمنى قطعت عند عامر ... وغدى على قبر الخفاجي أيمانها

قال ذياب :

مح الله قوم ما ثنت عند عامر ..... مح الله قوم ما ثنت عند جارها

ورمى العبد بالرمح

وكان العبد مجهز نفسه وعارف ان ذياب بيقتله

فراغ عن الرمح وقال في التراب يا رمح ذياب

فرد عليه ذياب وقال

تعقب ارفع الرمح وشف

فرفعه العبد فإذا به في راس حيه

فهرب العبد وخاف

------

هذا من حفظي من جدي لأمي / مشبب بن مقبل الاكلبي غفر الله له

فقد كان حافظ لقصص بني هلال من ابوه وجده

فلم يكونوا يقرأون الكتب

علماً أن الرويات الهلاليه تختلف من مكان لمكان ومن راوي لأخر

تقبل تحياتي وتقدير

يا مبدع الشبكة

[سفر بن مبارك]

أهلا وسهلابإخي عوض الرفيدي شكراً لك على المرور الجزل ..............

[سفر بن مبارك]

شكراً لإخي فهد العلياني حياك الله............

[سفر بن مبارك]

الله يحييك اخي الغالي أبو مبارك العابسي لاعدمتك على الحضور المتميز .............

[سفر بن مبارك]

هلا وغلا بإستاذنا الكبير والمبدع ماشاء الله عليك الأبيات التي اضفتها صحيحه لاعدمتك وألف شكر وتقدير

أستاذي بن عياف بارك الله فيك وشكراً لك على التعليق الطيب.................

[حمد الظلافيع]

مشكور

[ابوسعيد النهاري]

لاهنت لاهنت
وبيض الله وجهك وجعل يمناك والله ماتعطب

[سفر بن مبارك]

شكرا ً لك أخي الكريم :حمد الظلافيع على المرور ...........

[سفر بن مبارك]

شكر الله لكم جميعا للا هتمام................................

[ابوحسين]

لاهنت علي القصه والقصيده


تحياتي لك

[سفر بن مبارك]

هلا وغلا اخي ابو حسين شكرالك............................................ ...............

[سفر بن مبارك]

شكرا لك أخي ابو سعيد النهاري لاعدمتك..........................................

[فهدالعبيدي]

مشـــــــــــــــــــــــــكور على المـــــــــــــــــــــوضوع تاريخ وعلوم طيبه

[سفر بن مبارك]

هلا وغلا بأخي فهد العبيدي لاهنت على المرور

[سفر بن مبارك]

خالص التحيه للجميع.......................