المساعد الشخصي الرقمي

مشاهدة النسخة كاملة : عبدالله بن رزن الخنفري نبذه عنه ومختارات من قصائدة


عبدالله بن غفره
30-10-2008, 11:14 PM
نبذه عنه


الشاعر عبدالله بن رزن الخنفري القحطاني
ولد وعاش في نجد ومازال على قيد الحياه وقد تجاوز الثمانين من عمره ..
وقد عمل في خدمة وطنه حقبة من الزمن حتى أحيل الى التقاعد.

ويعتبر من الشعراء الذين لم ينصفهم الاعلام لعدم تواصله مع الوسائل الاعلاميه لبعده
عن حياة المدن وكذلك رغبته في الابتعاد عن الاضواء .. وهو شاعر يعيدك شعره
الى بيئة الباديه الماضيه بفروسيتها وكرمها وذكر الماضي التليد ،
وقد لا تخلو قصيده من قصائده من الحكم و النصائح كالحث
على تقوى الله والدعوه الى المحافظه على القيم والعادات والتحلي بالصبر ..




بعض اشعاره

القصيده الاولى يوصي فيها ابنه رزن بان يتصف بحميد الخصال وكذلك ينصحه ببعض النصائح التي تحث على مكارم الاخلاق كمراعاة حقوق الجار واكرام الضيف وغيرها من الوصايا والنصائح التي تدل على آصالته ومروئته و صدق شاعريته وعمق تجربته وبعد نظره






البارحه ليلي هواجيس وافكار = واصبحت من حلو المنام محرومي
مالي ومال العين لو هلت اعبار= ساعة تقاومني وساعه تنومي
المشكله قلبي عنيد وجضار = كنه يجاهد له طوابير رومي
يداعبني الهاجوس واصبحت محتار = مثل غريب الدار في وسط قومي
مع الاسف محد نواني بمسيار = ارتاح وانسى واردات الهمومي
الباب مفتوح ولا شفت ديار = الا هبوب الريح بالفرش تومي
وافتر دولاب الضماير بالاشعار = الله يلوم اللي لقلبي يلومي
جالس وانا كني على كير بيطار = واللي يشبه بالانجاز امهومي
وحالي كما عود تولاه نجار = ولابد له عقب الوجود معدومي
يا رزن بوصيك في شبة النار = خلك على درب المراجل عزومي
افرح ورحب لا لفا البيت خطار = والرزق عند اللي ينشي الغيومي
يا رزن بوصيك بالضيف والجار = ترى لهم حق علينا لزومي
واخذ بخاطر جار بيتك ولو جار = خله عزيز دايم وامحشومي
الجار له عند الاجاويد مقدار = اهل المروه عارفين السلومي
وخلك على ربعك حليم وصبار = ظلك الى هبت لهيب السمومي
يا رزن هم درعك الى صار ما صار = وبار الصحيب وكملن العلومي
وزلت رفيقك خلها ما بها عار = اصفح وخله في بحوره يعومي
والى خذا في موجة الجهل مشوار = ثم انثنى لك بادي له لزومي
عطه ولا تسمع كثيرين الاشوار = ما فات مات وراح مثل الحلومي
يا ما صفحنا من طويلات واقصار = والنفس عن بعض المعاني تشومي
ولابد ما نرحل ويبقن الاذكار = والدايم الله والبشر ما تدومي
ولا تامن الدنيا ترى الوقت غدار = ترمي مع غراتها بالسهومي
الله يجيرك من صواديف الاقدار = لعل حظك بالسعاده يقومي
واحرص على دينك مع القوم الاخيار = عينك تنام وخالقك ما ينومي
وهو الذي يعلم خفيات الاسرار = ما خسر من طاع الودود الرحومي
وعلى النبي صلوا عدد وبل الامطار = وعداد من طلة عليه النجومي



وهذه القصيده للشاعر يدعو فيها ابنه مفلح الى العوده والسكن بجوار ه بقية عمره .. ويخبره انه لن يستطيع الذهاب اليه بمنطقة عمله ، وذلك لحبه لقبيلته وعدم استطاعته مفارقتهم والرغبة في البقاء معهم مفتخراً في شجاعتهم ومحاسنهم .... ثم يشكر ملوك وطنه بعد الله على الامن وعلى ما بذلوه من جهود ادت الى نهضة هذه البلاد المباركه و كذلك على مواقفهم التي لا تنسى


لا دك بي هاجوس ما نامت العين = وياما صبرت وكل شي له حدود
مفلح انا سهران والناس ممسين = وهاجس ضميري له مصادير وورود
ابوك عمره طاف فوق الثمانين = وقريب يسكن حفرة دونه الحود
ومتى على الله تبلغ السن ستين = ارتاح انا واياك ما دمت موجود
ارتاح انا واياك مادام حيين = وان ما حصل ماني على السيف محدود
تكفون خلوني مع الربع الادنين = باقي حياتي واخر العمر للدود
هم مسندي لقام جمع المعادين = وهم درعي الضافي على اللين والكود
خنافر وقت الملاقى صلاطين = عند العشاير لا غشى الجو بارود
تشهد لهم الامجاد والناس دارين = مواقف تعرف بلا بحث وشهود
واليوم في وقت الرخا ومخدومين = في نعمة الاسلام والعدل ماجود
حكامنا هم نصرة الحق والدين =من جد الى جدٍ وجودٍ على جود
وبجهدهم جات الصحاري بساتين = تلبست بالخير والشر ملدود
الله يديم بعزهم قولوا آمين = والموسس الاول بجنات وخلود
بالسيف والاخلاص وطا الشياطين = عقب الحرايب راحت سهود وامهود
اهدافه الاسلام والله له امعين = وارتاح شعبه عقب طارد ومطرود

وفي قصيدة اخرى يطلب فيها من ابنه العوده والاستقرار بجواره . محبة للاجتماع معه


هاض الضمير وهلت العين عبرات = وعيّت عيوني من عناها تباتي
والله لولا ساعة بعد ساعات = حرام ما تسوى ريال حياتي
ياما صبرت وشفت بالوقت ميلات = والامر للي كون الكايناتي
وياما بدعنا من جديدات الابيات = وياحيلة الله ما تهيت مناتي
اومي لطيرٍ جال بالجو جولات = يطرد لجول ولا نوى للالتفاتي
ابدي له الملواح وارمي بالاصوات = مع الطمان ونايف المشرفاتي
ياما دعيت الطير مره ومرات = والله لا يقطع رجاي وشفاتي
طير السعد طيري ولي فيه هقوات = يشفي الضمير وينطح الواجباتي
ويا ناس قولوا له ترى الوقت فوات = ولا حياة الا وراها مماتي
وصبرت صبر ايوب واليوم هيهات = ردوا نظر لي واسمعوا بيناتي
السِّيف مالي يمة السيف نيات = ابواب صدري يمته قافلاتي
خلوني اخذ فاخر العمر سجات = معا بني عمي هل الطايلاتي
في ديرة مهيب دار الخواجات = بين الخشوم النايفه والحصاتي
واللي سكن بالهضب واللي ابانات = واللي على شط البحر والفراتي
كل كفل رزقه رفيع الدرجات = حتى خشاش الارض والحايماتي
الرزق ما ياتي بحيله وقوات = رزق البشر مضمون من حيث ياتي
ويا وامن الدنيا ترى الوقت دورات = ياما رمت ببحورها المظلماتي
ويا ربعنا كم فرقت من جماعات = ونسيوا قبايلهم وراحوا شتاتي
مع الاسف يا مشيدين العمارات = وين الوطن ووين راحت وصاتي
تنبهوا يا عيال واللي مضى فات = اخذوا حساب ايامها المقبلاتي
وختامها مني صلاة وتحيات = على النبي عد الحجر والنباتي


ويصف احوال الناس في هذا الزمان قائلاً


يالله يا مجري نسيم الهبايب = يا باسط ارضه ورافع سماها
ارجوك يا مولاي جزل الوهايب = عنّي على نفس تكابد عناها
سجيت في الدنيا شباب وشايب = واشوفها تلعب على ما طراها
مر نشوف إبها الترف والعجايب = ومر نشوف نجومها في ضحاها
وشفت الحسد والكره بين القرايب = ياهي مشاكل ما عرفنا دواها
وبين الاخو واخوه صارت طلايب = ناس تردى حظها ويش جاها
والجار من جاره يشوف المصايب = وين الرجال اللي تعز اقصراها
وهرج المجالس فيه مخطي وصايب = والرجل يعرف كلمته وش وراها
والصبر يا محلاه حاضر وغايب = ناس تحلابه على الله جزاها
الصبر حكمه والليالي ركايب = تقفي باهاليها وتبعد نياها
ياما غدت به تحت عوج النصايب = وتوّعد الباقي وتطحن رحاها
يالله يا منشي حقوق السحايب = انك تكافينا دواهي بلاها
واغفر ذنوب اللي من الذنب تايب = رحمتك يامولاي انا في رجاها
فيك الرجا منك العطا والوهايب = فاول مباديها وفي منتهاها


[align=center]وقال مادحاً من هو اهلاً للمديح ( الامير محمد السديري رحمه الله ) بعد ان ألف كتابه الشهير ( ابطال من الصحراء ) الذي حوى قصص واخبار واشعار نخبة من الفرسان الشجعان .. والذي من بينهم الشيخ شالح بن هدلان واخيه الفديع وابناء شالح رحمهم الله جميعا


ولف كتاب صار للصدر شافي = ومولفه لعل عمره سنيني
لمح لنا مافيه بين وخافي = وامذكرٍ به كل قلب فطيني
جدد سواليف لجيل مقافي = وشرح بها في جيلنا الحاضريني
انا اشهد انك يالسديري سنافي = طيّب وترغب منهج الطيبيني
يا عيد من جاء لك من البعد لافي = ويا غيث من حولك بغبر السنيني
يا سعد اهل هجن باهلها مشافي = ويا ترثة الاجواد ذرب اليميني
اتعيش يابو زيد ريف الضعافي = وزيزوم قوم فالقسا ما تليني
اصل السدارا طيب والشبر وافي = بحلم ومعروف ودنيا وديني
وشكراً على ما قلت قصه وقافي = واحييت ذكر الفرس القادميني
مني عدد ما دار حول المطافي = بازكى تحيه لك وللغانميني
وهذا وسامحني ترى القلب صافي = والعرف ما يعرض على العارفيني


جمع واعداد : خليل بن هدلان

شامانـ العاطفي
31-10-2008, 12:06 AM
لاهنت يا عبدالله على الموضوع الرايع

والله يطول بعمر ابن رزن ..

وتقبل تحيتي ..

عاشق الوطن
31-10-2008, 12:31 AM
الاخ عبدالله بن غفره

السلام عليكم ورحمة الله وبركاته

معلومات وافه وجميله

عن الشاعر العلم عبدالله بن رزن

نتمنى له طولة العمر

وفي الحقيقه ان القصائد التي أوردت

قصائد وافيه وجميله

تقبل تحياتي

@ابوريان@
31-10-2008, 12:35 AM
لا دك بي هاجوس مـا نامـت العيـن وياما صبرت وكل شـي لـه حـدود

مفلح انا سهـران والنـاس ممسيـن وهاجس ضميري له مصاديـر وورود

ابوك عمـره طـاف فـوق الثمانيـن وقريب يسكـن حفـرة دونـه الحـود

ومتى على الله تبلـغ السـن ستيـن ارتاح انا وايـاك مـا دمـت موجـود

ارتـاح انـا وايـاك مـادام حيـيـن وان ما حصل ماني على السيف محدود


الله يعطية طول العمر ويجمعه مع من يحب في الدنيا والاخرة

قلبى على ولدى انفطر وقلب ولدى عليا حجر

تحياتي لك يابو غادة

مشاري بن نملان الحبابي
31-10-2008, 11:27 PM
لاهنت على النقل

والله يطول في عمره

الضويري
01-11-2008, 12:54 PM
الله يطول بعمر الشايب على العز والطاعة

ولاهنت يابو غادة

تقبل تحياتي