عاداتكم الجمالة يابني مضيم تجملوا في بن هدلان ( يوجد أيضاً قصائد)

[عبدالله بن غفره]

لا يخفى على الكثير من أبناء قبيلة قحطان
ولا على الكثير من المهتمين بالشعر والشعراء
مشاركة ممثلقبيلة قحطان في الحلقة الرابعة
الشاعر / خليل بن هدلان
ذلك الشاعر الذي تشرف البرنامج بتواجده لما يحمله هذا الشخص
من شاعرية كبيرة جداً تمتزج بفن الإبداع وجزالة الألفاظ علاوةً
على الأسلوب المميز الذي يتخذه دائماً في قصائدة
ومن ناحية آخرى فالشاعر هو نسل أولئك الفرسان
الذي كتبوا للتاريخ دواوين من الفخر والشجاعة
وأجمل الأمثال في الفروسية وكذلك قصائد لا زالت تحفظ حتى الآن
وتذكر في جميع المجالس ويستشهد بجزء كبير من أبياتها

فأسمه الضخم والكبير بتاريخ ماضيه وآصالة حاضره
مكسب كبير لبرنامج شاعر العرب

وهذا ما سعى إليه البرنامج لكسب الاسماء الكبيرة
ولفت الإنتباه إليه بتواجدك كوكبة من الأسماء الشعرية الكبيرة
وهذا هو بن هدلان من ضمن هذه الأسماء الكبيرة والتي
تتنافس على لقب شاعر العرب تحت مسمى
جائزة الأمير محمد الأحمد السديري

حيث كان الإعلان له الأثر الكبير في نفوسنا كإبناء قبيلة قحطان
وقال في هذه المناسبة الشاعر / حسين العبدي
هذه الأبيات التي كتبت بماء الذهب
والإبداع في القصيد لا يستغرب على حسين
فهو من الشعراء الرائعين والذين يفرضون على الإبداع
بالحضور في قصائدهم دائماً

مبروك ثم مبروك لك يابن هدلان=يااسمٍ يجمل مـن قديـم وتالـي
فزيت يابوذيب لحظات الاعـلان=الطايله لـك والله ان كنهـا لـي
لانك ابن عم له مكانه وله شـان=حر مواكيـره بـروس الطوالـي
مثلك ذخر ربعه على مر الازمان=فخرْ وذخر ومكسب وراس مالـي
وقت الرخا والا لمن الزمن شان=وطيب الجدود اصل لطيب العيالي
يابن الرجال اللي لهم ماضي بان=واللي بلا ماضي فلا لـه توالـي
بنوا صروح المجد قمه وسيسان=مجد مخلـد مايعـرف الزوالـي
في صفحة التاريخ يبقون عنوان=يقرونه الاجنـاب والا الموالـي
وهرجي على واقع حقايق وبرهان=وهرج بلا برهان ماهـو يقالـي
ورد الجميل اليوم لك واجب وحان=فينا الوفاء لاهل الوفاء لايزالي
اشهر وربعك لك مخالب وجنحان=عسى السعد فالك على كل حالـي



كان حضوره من ضمن المتنافسين في الحلقة الرابعة
وقدم نص شعري جميل جداً وعالي الشموخ بمعناه
وجزل القصيد من قوة الألفاظ المستخدمة في نصه المشارك به

لفت إنتباه اللجنة بآداه الرائع واثنوا عليه ثناء يستحقه
وذكروا جماليات القصيدة بشراهه استرسلوا في الحديث عن النص
بشكل كبير لما للنص من حضور قوي جداً نال
على إعجابهم وإعجاب الكثير من الحضور


هذا الحضور وهذا الآداء لا يستغرب على خليل بن هدلان

وأترككم مع النص لمن لم تسمح له الفرصه بسماعه
في البرنامج على قناة رواسي

قصيدة الشاعر / خليل بن هدلان
المشارك بها في الحلقة الرابعة من برنامج شاعر المعنى


برق .. وهبوب .. وذكريات قديمات = وغلا مداهيل سقاها الغمامي
هزت شجون القلب واخذت سجات = وابعدت عن زخم المدن والزحامي
في خايع لا رحت له بعض الاوقات = كني على الدنيا محصل مرامي
لو المرام اللي تمنيت بالذات = اقفت به الايام مثل الحلامي
وامضيت لي في تختخ البيد ساعات= من الضحا حتى ولوج الظلامي
ما اشوف به حي ولا اسمع به اصوات = الا هوى الغربي ونوح الحمامي
اتبع هجوس البال من حيث ما جات = وفي شفها ذبيت روس العدامي
ومن عالي شفت القفار المريفات = تشدى نقوش معورجات الوشامي
وهديت فكر ضاري بالجزيلات = وستل جناحه واعتلا ثم حامي
وساعة لمح بالجو للجول حومات = صطى على شرد القوافي شمامي
وصاد البيوت الساميات الفريدات = النادرات اللي عليها الكلامي
صيد يجمل من يروم الجمالات = ويشبع مذاق اهل العقول الفهامي
هدو يقدم للوجيه السفيرات = مع بالغ التقدير والاحترامي
وللقول فعل وللمواجيب حزات = لادقت الساعه وشد الحزامي
الطايله لو دونها العمر فوات = آرد عليها مثل ورد الحيامي
ورثٍ ورثته من شيوخ البطولات= الشامخين المقدمين الكرامي
شاعر ولي في حومة العز وقفات=والله يعديني دروب الملامي
والشعر وهبه من بديع السموات = وله قيمةٍ يسمو بها كل سامي
والعرف رحله لاكتساب المهارات = ومن التجارب يستفيد العصامي
والرجل رامي والمكاسيب شارات = ولا يصيب الطيّبه كل رامي
ولا كل من طب البحور الغزيرات = يجيب در دونه الموج طامي
ولا كل من يسرج ظهور الاصيلات = يثني ليا منه غشاها عسامي
ولا كل من شال السيوف الرهيفات = يروي شباة السيف والكون حامي
ولو كل طير له كفوفٍ شطيرات = محدٍ فرق بين القطا والقطامي

ولو التمني يدرك المستحيلات = اروت ضحاضيح الخلا كل ضامي
الله جعل بين الرجال اختلافات = وصارت مقاييس القدر والمقامي
واكبر دليل ان السنين العسيرات = يظهر بها بين الاسامي اسامي
امثال ابن هادي زبون الونيات = وشالح وذيب مخضبين الحسامي
وعقاب بن سعدون ستر العفيفات = وراكان بن حثلين زيزوم يامي
من وقعهم تشبع سباع مجيعات = اليا حصل بين الجموع التحامي
ماهيب تمثيل وبطولة روايات = ودور درامي في مسلسل درامي
واليوم ياعصر الرخا والسلامات = نشت قنوف الخير شرق وشامي
وقامت تزبر كنها خشم ابانات = وهلت مطرها عقب عج وقتامي
ومنها ارجعت شهب الديار المحيلات = وصارت تزاهى بالنفل والخزامي
وزانت مراتيع الفياض العشيبات = ورعى بها اللي ما يعرف الجهامي
فيها الجمل يمشي على غير مشهات =وش عاد لو يبني عليه السنامي
اليا برك ما يحتمل للثقيلات = واليا وقف ماله شداد ومسامي
تمسي به وتصبح كبار الطموحات = ويزمي على شوفه من البعد زامي
وبينه وبين اللي زمى له مسافات = يشيب منها اللي بحل الفطامي
ماله ياكود الصبر لو جاه ميلات = وعزالله انه لو شكا ما يلامي
وهذا سبيل الوقت من ماضي فات = لا زان عام ماصفا كل عامي
ولو الظروف تقدر اهل المروات = مابه عزيز من زمانه مضامي


الشاعر خليل بن هدلان



جادت قريحة الشاعر علي بن رفدة الحبابي
بعدة أبيات صور من خلالها شعوره الغير المستغرب
تجاه ماشاهده على قناة رواسي
وفيها يطلب الفزعه والوقوف مع الشاعر خليل بن هدلان
ليتم تأهله ضمن المرحلة القادمة بأذن الله

قصيدة الشاعر / علي بن رفده الحبابي


لعيون شالح يالقحاطين والذيب = فريس قحطان الجبال الرواسي
عوق الخصيم اللي حمو شمخ النيب =لبيه يافرز الوغى طنخ راسي
بني مضيم وللوفاء رمز والطيب = فيكم جبله يا عمى كل قاسي
لنا بني عم على السلم والريب = خلان شدتها شنار الحماسي
هواجر ذبو صعيب المراقيب = من خالف سلوم النشاما يداسي
هم عزنا لاما لحقنا شواذيب =فيهم حميا غير مع قو باسي
ياربعنا تكفون عز المطاليب = نفعة ولدنا في زمانن قياسي
ذا قول ابن رفده ولافيه تثريب = هواجر وقحطان عزي وساسي
لعيون بن هدلان شالح مع الذيب = خليل ينخى في قناة الرواسي
الشاعر علي بن رفده الحبابي


وجاءت هذه الخمسة ابيات كدافع قوي جداً
لدعم الشاعر معنوياً وتزرع الحماس في نفس المتلقي
ليقوم بالدعم والتصويت لشاعرنا خليل بن هدلان

وكانت هذه الدره من الشاعر سعد بن مرزوق الحبابي

ابشر بوقفتنا معك يا ابن هدلان = اسبح بحر وانحت صخر لا تحاتي
ان كانت بحبك القوافي والاوزان = انت الذي ترهي على النادراتي
وان كانها صارت مزاحم وفرسان = جدك هو اللي يتعب المسرجاتي
وان كانها فزعه وناديت قحطان = يرسون مثل الشمخ الراسياتي
من الجنوب لنجد الى ساحل عمان = تاريخهم ماضي وحاضر وآتي
شعر سعد بن مرزوق الحبابي


وأقول أنا ( قوموا لبن هدلان والعمر فاني )


حنا لبن هدلان بنسدد الدين = دينٍ علينا من طوال اليماني
اهل الفعول اللي نهار الاكاوين =تاريخ بحروف الذهب لقحطاني
خليل بن هدلان نسل المسمين = يزهم عيال مضيم قاصي وداني
يدعي لنا صاحين نقبل مجانين = ونسمع صدى صوته وجانا جناني
حنا هل الفزعه وحنا السلاطين = على الشداد وفوق سرج الحصاني
حنا قحطان مرجحين الموازين = من عصرنا الحالي وماض الزماني
خليل ينخى يالرجال الميامين = قوموا لبن هدلان والعمر فاني
شعر / عبدالله بن غفره العاطفي



آخواني الأعزاء
خليل بن هدلان
لن يــتأهل إلا بتوفيق من الله
ووقفه صادقة منكم بالدعم والتصويت

وكلي آمل فيكم والأمل فيكم كبير جداً

خمس رسائل تكلفتها تقريباً 20 ريال


فلم أكتب هذا الموضوع واقوم بتنسيقه وإعداده
إلا ما رأيته بأن هذا الشاعر يستحق منا الدعم
والتصويت الصادق وعدم الإتكالية على بعض
لان الأتكالية منها خسرنا ممثلينا في المسابقات الآخرى


خليل يستاهل التصويت فلا تبخلون عليه ياقحطان
وانتم هل الفزعه والوقفه اللي ترفع الراس


لترشيح الشاعر
اتبع الخطوات في هذه الصورة

http://www.qahtaan.com/works/up/get.php?hash=2mtzxpovau1216861791 (http://www.qahtaan.com/works/up)

[سعيد الجهيمي]

السلام عليكم


صباح الخير يا ابن غفرهـ

والله يجمل حالك على هالموضوع اللي يشرح الخاطر

قصايد جزله من رجال كفوووووووووو كلهم و وافين

وصح الله ألسنتكم جميع ولا هو بغريب الطيب من منبعه يا العاطفي


واشكرك مره ثانيه على هالموضوع المتكامل


وبن هدلان ان شاء الله الشباب ما يخذلونه
وان الله يوفقه ويأخذ المركز الأول هو او واحد من صبيان قحطان
وان شاء الله ان جميع المشاركين من قحطان يكسبون المراكز الأربعه الأولـــى


ولا هنت لا هنت ي ابو غادهـ

[موسى بن محمد آل شاهر]

بيض الله وجهك ملاااااايين يا بن غفرة وابن هدلان يستاهل ولا حنا مقصرين معه ومع غيره من شعراء قحطان والله يوفق الجميع

دمتم في حفظ الله

[عبدالله بن غفره]

سعيد الجهيمي


مرورك مميز ومحل تقدير وإعجاب


ولك مني كل الشكر والتقدير على تواصلك الطيب وحضورك المشرف


اخوك
عبدالله

[شامانـ العاطفي]

يعطيك العافية

موضوع متكامل ولا اروع ..

و خليل بيتأهل ان شاء الله ..

لاهنت ..

[الضويري]

بيض الله وجهك يابن غفرة ووجه العبدي على القصيدة الجزلة

جاري التصويت

وان شاءالله بيتأهل

تقبل تحياتي

[العبدي]

ابن غفرة , بيّض الله وجهك

ووجه كافّة الشّعراء

وابن هدلان يستاهل التّأهل لــ أنّه شاعر متمكّن

ولكن نظام التّصويت لا يعرف الا تصويت الجمهور

فــ ابن هدلان ما تعنّى وشارك الا وهو داري وواثق

ان هناك قبيلة تمتد من ابراد في اليمن إلى عالية نجد إلى العين وكافّة دول الخليج

وكما قلت يا ابن غفرة عشرين ريال لن تكلّفك شيئاً فــ الموقف أكبر

أقتبس هذا البيت لــ حسين العبدي

ورد الجميل اليوم لك واجب وحان ** فينا الوفاء لاهل الوفاء لايزالـي

فما هو واجب راعي الوفا يا اهل الوفا

غير ردّه

وآل هدلان سجّلو اسمهم واسم قحطان ونحتوه في جبال نجد ولا يزال التّاريخ يستذكر افعالهم وطيبهم وقصائدهم



وهذا ابن رفدة ينخى قحطان واقتبست هذا البيت

ياربعنـا تكفـون عـز المطاليـب ** نفعة ولدنـا فـي زمانـن قياسـي

البيت هذا اكبر من اي كلام

فماهو موقفكم يا قحطان

وهذا وقت من اصعب الأوقات

والله لا عاد به حربٍ علشان تقولون حنّا نفزع في اوقات الحرب

ولكن هذه حرب اليوم



وابن مدّاد حوّط الدّعوى ولا عاد لي مجال اقتبس بيت واخلّي بيت


وهذا ابن غفرة يزهمكم ويقول

خليل ينخـى يالرجـال المياميـن ** قوموا لبن هدلان والعمـر فانـي





بيّض الله وجيه شعراؤنا

كفّو ووفّو

واليوم يومكم

يا قحطان

ردّو الدّين لــ ابن هدلان



(( يرجى من كل شخص ارسال رسائل تذكيريّة للــ الأصدقاء والأقرباء موضّحاً فيها طريقة التّصويت ))


وفالكم الفوز يا قحطان