آه ياطير

[العريفي الخالدي]

السلام عليكم ورحمة الله وبركاته


آه ياطير(ن) نوى ينزح بعيدي = حدّته شهب الليالي في حشاه
عزتي له يوم عزّم من جديدي = يم دار(ن) مابها حي(ن) رجاه
ماخَذْ إلا عام في وكْره وكيدي = ثم قالوا جيبوا الطيّب نباه
طير(ن) أشقر ما يطير إلا يصيدي = ماحد(ن) مثله ولا أحد(ن) قد قناه
لاضرب صيده غدى ريشه بديدي = لو صيده قوّته قوّة حصاه
ونْ قلبي ثم وزّع للوريدي = وصار دمي ما احْتوى قلبي حواه
يوم قالوا ياصقر نبا نعيدي = فعلنا كله مثل ذيك السواه
رحْت أدعي في صلاتي للمجيدي = ربي المعبود في سابع سماه
ربي الرحمن رحّام العبيدي = هو تعهّد ان يجيب اللي دعاه
أسألك في كل اسم(ن) لك مجيدي = ماعلمنا منه واللي في خفاه
وأسألك سؤال يعقوب(ن) وأزيدي = بعد فعل عياله الشين بضناه
وأسألك سؤال يونس يوم قيدي = بعد ما هاج البحر لأعلى مداه
أو كما أيوب يوم أصبح وحيدي = ماحد(ن) مثله صبر في مبتلاه
يوم أردْت ان تكشف الضر الأكيدي = قلت اركض ذلكم غسل وماه
يالله اللي نزّل اقرأ والحديدي = ونزّل الأنفال والتوبة وطه
تكشف الضر الذي عيّا يحيدي = واجعله يالله تكفير لخطاه
وسهّل أمره ياالهي فالمديدي = واقطع الفيروس من قاصي قصاه
من يلومه راعي البيت المشيدي = بيت عز وبيت طيب وبيت جاه
من يلوم الجد لو دمعه سريدي = جعل عين اللي يلومه للعصاه
وكل ماجدّت علومك يالعضيدي = هاتها ياراعي الصدر الفلاه
واعرف انك ياسعد تجمع رصيدي = ومن فعل شيء(ن) من الحسنى لقاه
ويالربع تكفون من يسمع قصيدي = يدعي الرحمن لايقطع رجاه
ثم صلوا عد رمل(ن) وسط بِيدي = على النبي اللي ومرْنا بالصلاه


تحياتي

[مهدي بن مسفر الحبابي]

أخوي العريفي الخالدي

صح لسانك وسلم فكرك

رايعه بروعة حضورك

لك احترامي وتقديري

[سعيد الجهيمي]

الله الله

صح لسانك وعلا شانك وعلى الاخرى عانك<<<<<<< على الاخرى تعني على الثانيه ؟؟؟؟ ههههههه

لا تحرمنا يا صقر من جديدك ومشاركاتك


وتقبل مروري

[دهام الجروي]

يعطيك العافيه على القصيده