لغز الوزير !!

[معيض بن دشن]

منتدى قحطان مساكم الله بألف خير = ودنا نصرف ذهب ما نبا صرف الهلل
قربو ذليل واللغز يبغى له خبيـــر = بنشد الشعار عـن لغـز يبغى لــه عــمل
لغز واضح بس خلو الفكر له يستدير = ومن لفى بالحل قلت الحمل جاه الجمل
ويش ورع(ن) ساكنٍ وسط بيت له صغير = في طرف عود كبير طلع مظرب مثل
رجل له وجهين لكن رايه راي غير = اشهد ون كان صمل على رايه صمل
لــه لسانينٍ وقلـب لكنه مــا يسير = وله يدين اشمال ويمين بالزين اكتمــل
رجــل لــه شعبيته يعرفه حتى الوزير = محتميٍ أبـــوه خصٍ لــيـا عشق دبــل
ون توفى الورع قالو على عوده ظرير = والحلال يضيع ويروح مضياع الهمل

[خولان بن عامر]

ابو عبد المجيد

والله انا في الالغاز من يوم انت خابر اني تاركها لانها تشغل الفكر واجد وتعرف حنا يالشباب نخاف على

افكارنا:)

لكن اللغز اللي اشوفك تطرحه يجيني له شوق والله مادري وايش السبب وهذا حلي بطريقه مسهله عسى ان يكون الحل موجود ضمن ابياتي هذه


ياهل الالغاز ردوا على العود الكبير =شاوي جانا يدّور على ذودٍٍ همل
رحبوا به واذبحوا له طلي ولا بعير=صاحب يستاهل العود الازرق والنفل
صاحبٍ اخذ برايه لما جيت استشير=له مكان في عطارد ولاخر في زحل
اشهد انه بالغلاء والوفاء ماله نظير= الصديق الصادق اللي على قوله فعل
علمو ا له بالخبر عبر موجات الاثير=قولوا ان القلب عن بعض الاشياء ماغفل
في بعض الاحيان يسلى على في وهجير= وفي بعض الاحيان مثل التجوري لاّ قفل
علموا له كيف راعي الذهب عود فقير=وعلمو له كيف راعي الجبل راح السهل
الغريب ان السهل فيه طير مايطير=والسهل راعيه ماهو مثل راعي الجبل
والسحاب اشوف نوه وهماّله غزير=والغريب اشوف وبل السحابه مانزل
الشكل واللون كا لون بحر مستدير = وانت داري يالعبيدي وعارف ويش حصل
كان تبغى الصدق والعلم الاول والاخير= ضمن بيتٍ من بيوتي ترى حلي وصل
خولان بن عامر

[عبدالله بن غفره]

اررررررررحب يابو عبدالمجيد


ولاهنت على اللغز والتواجد الرائع والحضور الراقي


وصح لسانك


أما أنا والله ماعندي حل والمعذره لاني محتاج تفكيري هاليومين ومثلك خابر ياللي يغطي احتياجاتنا


أبو نايف

صح لسانك ولاهنت على الحضور المختلف والراقي جداً


وأتمنى ان يكون حلك صحيح مع ثقتي فيه


تحيتي لك وللجميع

[معيض بن دشن]

استاذي خولان بن عامر : في الحقيقه عندما قرأة ابياتك وردك وخصوصاً الحل الذكي وقفت لك احتراماً وتقديرياً ..
أبو نايف صح والله لسانك مليون على الحل الوافي والراقي وهذه ليست بغريبه على شاعر مثلك انشهد انك كفيت ووفيت ..
كما اتقدم بالشكر لاخي العزيز ( عبد الله بن غفره ) وأقول شكراً لك على المجهودات والتواصل معنا ...
تقبلو مني كل الاحترام والتقدير ،،،،