المساعد الشخصي الرقمي

مشاهدة النسخة كاملة : :@*@*@((رسالة الى والدي))@*@*@


سعد بن شفلوت
09-06-2005, 03:18 PM
هذه القصيدة مرسلة الى والدي حفظه الله وابقاه الشيخ / عبدالله بن عبدالرحمن بن شفلوت وهي تعبر عن نفسها.



يالله ياللي بامره وتدبيره=الكون يدرج طارته ويديره
من غيره يدير الفلك من غيره=فرد صمد واحد ولا له ثاني
سبحانه الواحد الاحد سبحانه=لاريب في ذاته ولا في شانه
سامع دبيب النمل في صفيانه=لادب فالظلمى على الصفياني
ارجاه ستره واتلمس عفوه=ماني بمن بد الخلايق صفوة
كم هفوة جرّت وراها هفوة=طبحت فالهفوات للاذاني
وارجاه يلطفبي ويرحم حالي =لاجيت في قبري وحيد لحالي
تحت اللحد في حالة يرثالي=وحداني في حفرتي وحداني
واعوذبه من مكره ومن ناره=يوم التغابن والبشر محتاره
احدٍ كتابه يلقفه بيساره=وجه عبوس غاضب زعلاني
واحدٍ كتابه يلقفه بيمينه =مبسوط وتشوف السعد في عينه
الايمن والايسر كلهم من طينة =هذاك زعلان وذا فرحاني
من قدم الحسنى جته مثنية=ومن قدم السية لقاله سية
وحسن العمل شرطه صلاح النية=حتى الحيا شعبة من الايماني
والفرق بين الخلق ياعبدلله=ماهوب فالمنظر ولا فالطلة
ولا الشكل واللون لله لله =ولاّ هذا مصري وذا سوداني
الفرق بين الخلق في تقواهم =اعمالهم تعرض على مولاهم
ولاخير في كثير من نجواهم=ان كان ذا بعثي وذا علماني
فان كان ماربي غفر لي ذنبي=لاوالله الا خذتها في جنبي
منبي سواة الله تعالى منبي=وماللي بيده العفو والغفراني
لكن كيف اقنط وعفوه قادم =هو قابل التوبة لمنهو نادم
غفر لسيدنا وابونا آدم=يوم انطلق في ساقة الشيطاني
ياها جسي هات الكلام الطيب=لاتغازل الا البكر كب الثيب
احذف بعيد ولا تحذف قريب =وهات الكلام الصامل الملياني
من بعدها فارس وانا خو فارس= قل بالفم المليان جالك فارس
قطع الخرايم مالها الا فارس = وترى العرب في محب وشاني
تعوذ من ابليس واعصب راسك=اخوي واعرفك قوي باسك
روس الجبال النايفة مرواسك=وآخوي لامن عدوا الاخواني
وان قلت يارجال ويش الطاري = فيما تبين لي ان ظرفك طاري
باقولك ياخوي كنك داري = ومثل يعرف العلم ياذيباني
اركب على جيب اربعة والفيني=مشراه كاش ولاشري بالديني
شيكه مصدق بمية وسبعيني =ومخرجٍ من معرض الشيباني
اسود تقول انه قعودٍ مجهم = اهل المزاين وسدوه حججهم
عرض على قعدانهم واحرجهم= وعافوا بعد ماشافوا الذيداني
كل نشد ويقول ذا منهوله= يازين طوله فوق الارض وجوله
واثنى عليهم واحدٍ في قوله=راعيه من ساس العرب قحطاني
ساموه من راعيه سومٍ صامل=من عقب ماصوت عليه العامل
قال اسمعوا وانا ماعرف اجامل= يابايع البل بالغنم خسراني
خذا عليهم فالمزاين الاول=ثم ضرب حزم الجلد ماطول
قالوا علامك قال أول بول=المعذرة منكم وانا عجلاني
قالوا عليه العالم المختبصه =حدوه لاكن ماعطاه فرصة
واللي حرص يبغاه خانه حرصه=قامت عزومه تطمر الجرفاني
لا دق سلفه ثم جود خطه=يمشي على حسب الطلب والخطة
الطعس شقة والمطب ينطه=ويطرب لصوت محمد الشناني
في هيكله كنه وزارة نايف=حرابة الموذي ملاذ الخايف
ومكيفه كنه نسيم الطايف=لازان مرباعه وجوه زاني
ومن داخله بتقول مجلس شورا=وليا مشى مافيه كبر وجورا
غير اثقل من جبال تورا بورا= ديرة هل الردة قبايل خاني
وفي راسه اصلب من هل الفلوجة=يوم كسروا صف العدو وفوجه
النصف مات ونصف فالدبوجة=نكبهم الله نكبة حزيراني
واكره ماعندي لا طلع سواقه= شين الطبيعة لافحصت اخلاق
ويسوق بالشلة على رواقة= ثلاثة وسواقهم سمراني
واكره ماعندي كان صار لحاله=معه هنوف لاصق في جاله
بالهاتف يكلم مدير اعماله=لبناني الله يخزي اللبناني
في ذمتي لو لي عليهم سلطة =اني لسلمهم لقسم الشرطة
حتى لو اني طحتلي في ورطة=ورطة فيهم ورطة حديجاني
يافارس ادعسله وليلك مسرا=الجيب ذيب مايخاف الغدرا
وانته تدل الدار وانت بها ادرا=ديرة هل الماجوب والعرفاني
ديرة بني عمي رجال الطالة=اهل الفعول الغانمة والقالة
مثل البحر لاصك جاله جاله=يوم الرمك والخيل والميداني
اعيال ابن مندي تقول وتفعل=عند اللقا شر من الله منزل
امفواضة مع العدا ماتقبل=كم وزاحد جاته على الحجاني
فعل الكرم والطيب فيهم فطرة=ماهوب لا صنعة ولا هو بطرة
عصمان الاشناب ولحاهم عطره=ذربين الايمان وزبون الجاني
امسك طريق الخرج صوب الوادي=والوضع يابن بوي ماهو عادي
لا تحسب ان الوضع سادي بادي=ولا سوالف هاتف مجاني
وان كان راسك خارمن للدلة=ترى السليل فيه راس وسلة
ناصر سعيد المرجلة طبعٍ له=من لابة لك يكرمون العني
صل الفجر عنده وريح ساعة= تراه للهاشل طويل باعه
وترى سلامي له معك اوداعه=راعي الكرم معدم سمان الضاني
حث الخطا للديرة المسقية=هلت عليها المزنة الوسمية
لا والله الا زانت الصيفية=ماعليك من نشرة حسن كراني
منصاك ابوي الله يطول عمره=اللي على الراس وعلى العين امره
غداك عنده والعشا والسمرة=سقم العدو ومعزب الرحماني
وتلقى الشحم والعود والبرية=وتلقى تراحيب الوفا مثنية
يامرحبا بالضيف يالله حية=ترحيبة يرجحبها الميزاني
عبدالله بن شفلوت مقدم ربعه=لالتكت الصفين راعي فزعة
الطيب طبع له وحن من ربعه=ريف الضعيف ومدهل الضيفاني
عون الرفيق اللي حداه الحادي=ضاقت به الدنيا وهمه زادي
يحدر مع وادي ويسند وادي=من ضيقة في خاطره بلشاني
خاب الرجا في خاله وفي عمه= ومن غير ابن شفلوت يفرج همه
ينهي مواضيعه ويجلى غمه= في حزة قلوبها الصدقاني
يسعى لفعل الخير ويناديبه=عز الله ان مافيه شك وريبة
وان كان طبنا طيبنا من طيبه= وليا تردينا حن الردياني
شيخ على شيخٍ فعوله بانت= القاسية قدام عينه لانت
لو هي كبر ضلع الطويلة هانت= الراس يقدح والبعير عماني
كم من قضية حلها وانجزها= بالعقل والحكمة عطا موجزها
وبالطيب والعلم العلا بروزها= ما للحمول الا جمل زوماني
ذا موجزٍ عنه وربي يعلم= ىقولها والخافي اعظم واعظم
ذخري نهار الضيق جعله يسلم= عد الروى اللي يروي الضمياني
قله سعد مرسل عليك رسالة = ويقول ماشد الرحال الا له
ومن طيب فالك طيب الله فاله= وعلى علومك شفق وطرباني
فيها سلام عد برقٍ لاحي = من هاجس حي وضمير صاحي
بالمسك والورد الشذي فواحي = وازكى عطور النبت والريحاني
يا بوي حنا لك سند وحزامي = اضرب بنا غرب وجنوب وشامي
واليا غشا روس الجبال قتامي= اقرب لك من الرمش للحجاني
يابوي في بالي علومٍ واجد= يضحكله ناجد ويبكي ناجد
حتى وانا في فرض ربي ساجد = يالله تعافيني ولا تبلاني
لاشك راحت جعلها ما ترجع= من دونها حطيت باب يردع
ما للردى يابوي عندي مرجع= لو انها تمرض بعض الاحياين
خطا الرفيق اللي سمعنا عنه = رصعة بعير وماعلينا منه
ما كن شي صار لا ماكنه= خليتها تقدير للشيباني
ومهما حصل يبقى رفيقي غالي= مادام ميزان الوفا مامالي
شربت انا وياه مر وحالي = وفي ذمتي منساه لو ينساني
رفيقي اللي لابدا ماجوبي = خلا مشاغيله وقبّل صوبي
لا خير فيه ان ماخدم مندوبي= وارخا جنابه للزمن من شاني
ماهوب من خشمه علي يرزه= وادتى شي يطري عليه يهزه
اعلمه الرماية كل حزة= فلما اشتد ساعده رماني
ورفيقي اللي لابدا ماجوبه= لقيتله بالي وجهي صوبه
اقوم دونه واخدم مندوبه= وآقف معه واصهل صهيل حصاني
فان كان ياربعي شرح لي ضرفه= وانا آتمدحله ولابه وقفة
فعسا ذراعي ينهشه بو عطفه = رصاصته من وراد العماني
ما قلتها الا عارف معناها = احسب نهايتها قبل مبداها
واللي عطا نفسه على هواها= هذا وجوده وعدمه سيّاني
يا بوي ذا علمي وذا ماعندي= على علوم الطيب يقدح زندي
متحيزم بخنجر وسيفٍ هندي= خنجر زراف صبها الدوجاني
وعن اذنك آقدم نصيحة يابه= للابة اللي نعمها من لابة
تروا مواقيف الزمن غصابة= وىخصكم بالقول يالشباني
ومافيه شيٍّ نحمدالله يذكر = الا ني انصح واشجب واستنكر
امر بعروف ونهي عن منكر= القلب مضغة والدهر خواني
وانا من اولكم لنفسي شاجب= مقصر فالسنة وفالواجب
والنصح بين الربع حق وواجب= وماذكر به نار بلا دخاني
احذوا حذوا جدانكم وآباكم= واخذوا وصاة مجرب وصاكم
وعسى الردي فداً لنا وفداكم= ذكر الحيا والطيبين يباني
محدٍ على الدنيا مقيمٍ دايم= الموت ما خلا قعيد وقايم
صقره على روس الخلايق حايم= الخيل والميدان ياحميداني
الموت حق وللخلايق سنه = والحكم لله والفضل والمنة
كم واحد خيب امله وظنه= والارض كل من عليها فاني
والعذر منكم يامنهو عصابة راسي= ان كانّي قصرت ولا ناسي
مابه كمال الا لرب الناسي= منزل التوراة والفرقاني
وختامها صلوا على المختارا = شفيع خلقه من لهيب النارا
بعداد من طاف الحرام وزارا= وعداد ماهب الهوى الاغصاني


سعد بن عبدالله بن شفلوت

الهـاجري
09-06-2005, 03:58 PM
محجووووووووووووووز يا بن حبشان

ولي عوده

فارس قحطان
09-06-2005, 07:35 PM
السلام عليكم ورحمة الله وبركاته

ارحب ياسعد بن شفلوت

وصح لسانك وعلى شانك يالقرم

وعساك من اللي ياخذ كتابه بيمناه

وكفو كفو في آل مندي
وفي الشيخ عبدالله بن شفلوت

وقصيده تحتوي على اكثر من قصيده ونصيحه وحكمه
لله درك يابن شفلوت على هذه الرائعه

هنا الرياض
09-06-2005, 08:59 PM
صح السانك

وبيض الله وجهك

يا

سعد بن شفلوت

على القصيدة الجزلة

هبوب الجنوب
09-06-2005, 11:31 PM
كفو

ما قصرت

دخلت احسبها ابيات
وانتهى الوقت في المقهى وانا اقراها
بس تستاهل القراءه

صح لسانك

عبدالله المهداني
10-06-2005, 10:26 PM
صح لسانك
ياسعد
وبيض الله وجهك على كل حال
والله يطول عمر ابو عبدالرحمن على عز وعلى طاعة
تقبل تحيات المهداني
والسلام

تركي الفهري
11-06-2005, 05:42 PM
صح لسانك ياسعد ......
والله يطول في عمر الشايب

المكابسي
12-06-2005, 12:29 AM
صح لسانك يابن شفلوت

وعز الله انها قصيدة جزله .

كحيلان
12-06-2005, 07:23 PM
صححححححححححححح الســـــــانك يبو شـــــفلوت


وبيض الله وجهك علـى القصـــــــيده

ابــن الفــرس
15-06-2005, 11:15 PM
صح لسانك

قصيده وافيه من وافي

ونعم بك بكل عائلة آل شفلوت بدون عدد او تخصيص

عيال عم ومن عضام الراس

اهل دين وعزوه وكرم ومنبع الطيـــب

اتمنى ان يصل سلامي لوادك الله يحفضه من كل شر

اخوك :

سعد ابن الفرس

بلاد رفيــــــــــده

الهـاجري
16-06-2005, 07:04 PM
اسف

كنت احسب القصيده هذه للشاعر سعد بن حبشان ال شفلوت

بس مارحت بعيد

على العموم صح اللسانك ياسعد بن شفلوت

والله لايهينك يا وجه جنب
قصيده جزله

من شاعرن جزل

تحياتي وتقديري لكم
يا الشفاليت

فهد المكودر
18-06-2005, 07:41 PM
السلام عليكم ورحمة الله وبركاته

الاخ / سعد ابن شفلووت


صح والله لسانك ونعم بك وبشايبك وبعزوة كلها

قصيده جزله ولا تستغرب من راعيها

سمير
22-06-2005, 03:38 AM
صح إلسانك يا سعيد على ذي القصيده القويه ولا هنت
والله يطول في عمر العود مع التحيه والسلام

ابن هملة
28-07-2005, 03:54 AM
صح لسانك

والله يبيض وجهك على القصيدة الي تشرح الخاطر

والله لا يحرمنى من قصيدك العذب

سعد بن شفلوت
30-09-2005, 01:40 AM
مرحبا فيك

يالصالاني على كل حال.

سعد بن شفلوت
30-09-2005, 01:45 AM
هلا وغلا

يافارس

وجودك شرف


ولا عليك زود يالغالي

عساك فالوجود

سعد بن شفلوت
30-09-2005, 01:48 AM
صح بدنك ياهنا الرياض
ولك الشكر الجزيل

سعد بن شفلوت
30-09-2005, 01:50 AM
لنا الشرف ياهبوب الجنوب

خذينا من وقتك .

لكن نعوضك بوحدة قصيرة انشاء الله

سعد بن شفلوت
30-09-2005, 01:52 AM
عبدالله المهداني


كنك المطر

الله لايخلي منك وجودك بحد ذاته فخر

سعد بن شفلوت
30-09-2005, 01:56 AM
هلا ياتركي

وافي الله يخليك..

سعد بن شفلوت
30-09-2005, 02:00 AM
يامرحبا

يالمكابسي

شرفت لاعدمتك

سعد بن شفلوت
30-09-2005, 02:01 AM
هلاوين

ياكحيلان

وافي يالغالي.

سعد بن شفلوت
30-09-2005, 02:03 AM
تحياتي

الحارة يابن الفرس

ولاهنت

حسينـ الفحوسـ
30-09-2005, 02:05 AM
صح السااااانك وبيض الله وجهك وهذا اقل ما تسويه عند شايبك الله يطول عمره

سعد بن شفلوت
30-09-2005, 02:06 AM
مرحبا

يالصالاني مرة ثانية


والامور بسيطة

زلة في صديق

سعد بن شفلوت
30-09-2005, 02:09 AM
مر حبا

يالمكودر

حضورك له طابع خاص في النفس

وكلامك ثمر .
لاهنت

سعد بن شفلوت
30-09-2005, 02:11 AM
صح بدنك

ياسمير

وتقبل من الشكر اجزله

سعد بن شفلوت
30-09-2005, 02:12 AM
ارحب

يابن همله

شرفت ولاكلفت مرحبا .

ولاهنت على كل حال