المساعد الشخصي الرقمي

مشاهدة النسخة كاملة : هذه قصتي واليكم قصتي ..!!


عبيدي الدمام/ابوزياد
02-10-2004, 10:45 PM
قبل ما ابدى لكم قصتي ابي اوضح للناس اللي ما يعرفون وشي (‏القضوم)


‏القضوم / ‏عباره عن حبوب يسفها الملجلج سفاً بفمه
وهي حبوب مسهره ياخذونها سملق شرق الرياض ايام الاختبارات علشان يجيبون درجات بس بسببها يجيبون العيد


بالنسبه لقصتي واللي هي كالعاده انتهت نهايه مأساويه

بداية قصتي.. ‏كنت معزوم بزواج واحد من اخوياي دوسري وكأي واحد معزوم رحت وسلمت عليه وباركت له على زواجه وغمزته له وقلت يا حليلك مستحي << ‏ماهوب وضح على هالكويحه مستحي ولا فرحان ولا زعلان من سواده

وعقبها جلسنا وتقهوينا وتعشينا وعقب العشاء جيت بأسلم عليه وبأمشي بس الرجال لزم علي اني اقعد

سألته وشي السالفه ؟؟؟ قال لي فيه فعاليات عقب العشاء

قلت وشو ؟؟ فعاليات ؟؟ سحب على سياره ولا العاب ناريه << ‏يا شين اللي متعودين على مهرجانات سوق الشعله

قال تعال اجلس وبتشوف ؟؟

وفجأه واول ما جلست طلعو علينا جوالي 30 ‏قهوجي بيديهم صينيات وبها بيالات شاهي ووزعوها علينا

شربت اول بياله وعقبها دفوني ببياله ثانيه

وبعدها جانا ابو المعرس وقال لنا : ‏تفضلوا برا << ‏تحسون قمه الاذلال من ذي الطرده

طلعنا برا ولقينا الشباب فارشين الزل ومادين الطيران وانواع الفله
بدو يحمون الطيران ويجهزونها وشوي الا احس رعشه بجسمي والنشاط يدب فيني

التفت عن يمين ولقيت شايب بيده مشاعب متكي عليه ومنحني ظهره

رحمته ورحت له وقلت يا خال تبي اجيب لك كرسي ؟؟
قال لا بس جب لي بياله شاهي

رحت وعطيتها بياله شاهي واول ما شربها صلب طوله ورمى العكاز وقعد يهبد صدره بيدينه مسوي طرزان التفت حولي ولقيت الشيبان كلهم نفس الحاله

وبدا الطق
طمبق طمبق طمبق طمبق طمبق طمبق سرىىىىىىىىىى سرىىىىىىىىىىىىىىىى طقطقطقطقطقطقطقطقطق

واستلجو البشريه وبدى الهز

طالعت بالساعه لققيتها السااعه وحده ولما قضو اول شوط لقيت الساعه 4 ‏فجر

جيت وقلت بشوف وش بالشاهي ذا ؟؟ لايكونون حاطين به سنافي وخلى الشبيبه تستلج << ‏على نياته

شرب لي بياله ونزلت الميدان معهم وبديت اجذب الانظار

ومن زود الفسقه والتصفيق عطبتها وصرت ارقص ماكرينا على السامري واسوي سحبة مايكل

وقعدت ارقص وازبد وحالتي حاله شوي وجاني زاار واستنزل واستنزل

واطيح متصلب بالارض على شكل صليب
ايديني ممدوده وجسمي متصلب ؟؟؟ جو وشالوني وخلوني اتكي على جدار القصر طالع فيني احد الشباب وقال احلى عندنا نسخه من فيلم الالم المسيح
صحيت من طيحتي ورجعت لبيتنا عالظهر وسحبتها نومه الين اليوم الثاني الظهر وقمت مهدود حيلي
دقيت على خوينا المعرس بأعرف منه وشي السالفه ؟؟ كلمته وسألته وش بالشاهي اللي خلنا نشيطين لذي الدرجه قال لي انهم حطو بالشاهي حبوب
انا قلت ياخي عطنا منها دامها منشطه وتخلينا اقوياء ورهيبين << ‏ما ودك تنطم

اخذت الحبوب من الرجال وكنت ناوي اسفها بالليل لا نامو الشيبان ببيتنا

وعالساعه 12 ‏لما نامو الشيبان سفيت لي كم حبه وشوي احس بالنشاط وقمت اتلوى من النشاط !! ‏قلت بنزل الحوش لعل وعسى اركض ولا شي ويروح النشاط
نزلت الحوش ولقيت سيارتي مغبره وحالتها حاله ومسكت معي اغسلها وجبت السطل والصابون وبديت تمسيح وتغسيل ومن زود الحماسه غسلت المكينه والشكمان والمراتب

وما حسيت بنفسي الا وانا مغسل كل مواتر اهل الحاره وكانس الشارع
وعقب هاليوم وانا ادمنت هالقضوم وصرت اسفها واحس بالنشاط يدب في اوصالي << ‏اموت يا مفردات
ومن زود النشاط صرت اشتغل وظيفتين ... ‏بوظيفتي الرسميه في الصباح وعقب العصر اشتغل اشيل بلك مع افغانيه <<< ‏يقول بنفسه يا رب ما يقرى لقمه ولا الخبل المملوح ولا د.‏حجازي الموضوع
وعقب هالادمان صرت عربجي وراعي تفحيط ومقاومات .. ‏وبأحد هالايام وانا في حاله من اللجلجه وقفت عند اشاره على موتري (‏ددسن 88) ‏ووقف جمبي راعي فراري ولقيته يطالع فيني بنظره مشبوهه << ‏تكفى يا روبي

نزلت الدريشه وقلت تقاوم يا الحبيب ؟؟؟ قال ايه يا الزلابه << ‏لا تعليق من جد

فتحت باب موتري ونزلت وحطيت بتانكي البنزين 8 ‏حباب شبح << ‏من اقوى انواع القضوم
وقلت يالله ابن امك تسبقني << ‏حتى موتره يقضم

ولعت الاشاره خضراء وحطيته بالاول ودعست ؟؟؟؟؟؟؟ وقمت عليه ومن زود الحماسه مسكت خط ولا حسيت بنففسي

بس اخر شي اخبره لوحه عالخط مكتوب الحدود الاردنيه

رجعت للرياض وانا حالتي حاله ومتلخبط و رحت لمستشفى الامل وعالجوني من ادماني وصرت رجال وش زيني

بس طحت لك بشله داجه كلهم صعايده وخلوني ادمن شم بويه

واعتزلت العالم واعتزلت اهلي واخوياي وفرغت وقتي للشم ولخدمة المجتمع


ThE EnD



‏ما يستفاد من القــصه :

1/ ‏لا تشربون شي ما تعرفونه
2/ ‏اتركو عنكم العربجه والحركات البايخه وخلكم سنعين وتحبون ماما وبابا
3/ ‏الله يعز الحكومه << ‏لا زال تحت تأثر الشم

شبل قحطان
03-10-2004, 01:32 AM
هههههههههههههههههههههههههههههههه

الله يرجك يا ابو زياد .

تدري وش احسن شي باالقصه؟؟؟؟؟؟ انك دفيت الموتر بقضوم وقام على الفراري

فارس قحطان
03-10-2004, 05:42 PM
ومن زود الفسقه والتصفيق عطبتها وصرت ارقص ماكرينا على السامري واسوي سحبة مايكل


هههههههههههههههههههه

والله من الأقلاع كله والله ياانا مت من الضحك

عبيدي الدمام/ابوزياد
04-10-2004, 12:31 AM
هذه هي الابتسامه الحيه ..
واذا قلت لكم انها قصه حقيقيه اسردها علي صاحبها وقد تاب وعالج نفسه من هذا الدمان ..
وهذه نهاية المدمن (( مستشفى الأمل )) في انتظارك اخي فتب من الآن وعالج نفسك قبل النهاية المأسويه ..

السيف النادر
04-10-2004, 12:38 PM
الله يعافينا وياه

عبيدي الدمام/ابوزياد
04-10-2004, 10:46 PM
اللهم آمين ..

ساري
23-10-2004, 07:01 AM
الله يعطيك العافيه يا راعي الشرقيه

هذي علومك مع القضوم والشاهي

اجل مع الفياقراااااااا ............ وش بتسوي

جربها وعطنا علومك لا هنت.......هههههههههههههههه

ســــــــــــــــــــاري

عبيدي الدمام/ابوزياد
24-10-2004, 02:28 AM
ابشر يالغالي ..

ارسلها على البريد المستعجل ...

وانا جاهز لها ..

ابن شويه
24-10-2004, 02:35 AM
حاووووووووووووووه

المهم مايستفاد من هالقصة

لاهنت ياابا زياد

خالد آل مطرف العاطفي
24-10-2004, 03:05 AM
هااااااااااه الحين ..دريت

( لا يلدغ المؤمن من جحرٍ مرتين )
اخو ك
خالد

عبيدي الدمام/ابوزياد
25-10-2004, 03:27 AM
هلا بك يا خالدنا ....

الف شكر مرورك هنا ....

ترى القصة ماهي علي على واحد تاب وسردها علي وانا جبتها كما هي ....

ذيب ال سلمان
25-12-2007, 12:55 AM
ابصم بالعشرهـ ان في راسكـ سلك مفصوولــ

علي الحرامـ اني رحت فيها من الضحكـ
تقبل مرووري ولا هنت
اخوكـ//ذيـــ[ب]

غابش القحطاني
25-12-2007, 02:03 AM
هههههههههههههههههههههههههههههههههههههههه

منصور العبدالله
25-12-2007, 06:26 AM
هههههههههههههههههههههه يابو زياد


عز الله زانت علومك


زين مسكت على سيارتك بس


زيم مامسكت الشارع كله


لاهنت قصه حلوه وكوميديه وهذا اللي نبيه نبي اللي يخلق المواضيع زي قصة اخونا ابو زياد


لا هنت وبيض الله وجهك على حضورك الجميل


ابداع في ابداع يابو زياد والله يعطيك العافيه

وتستاهل سمعه على هالقصه

مقبل السحيمي
25-12-2007, 04:46 PM
لاهنت يابوزياد

والله لايبلانا

عبدالرحمن المشجري
25-12-2007, 05:20 PM
ههههههههههههههه
لا هنت يا..بوزياد..

حرام بالله انك مفلــسع هههههههه

امـــــــــــا تقوم على فراري وتمسك الخــــط للاردن بـ ددســ88ــن


ولا هنت

عبدالله آل عباد
25-12-2007, 10:27 PM
هذا عبيدي الدمام/أبو زياد


كان أحد أعضاء الاستراحه

ولا تمل مواضيعه

ومختفي له فوق سنه ذلحين


مايندرى وينه

أتمنى عودته


وأشكر من قام برفع الموضوع


دمتم

وهذي سمعه من عندي له وللي رفع موضوعه ولكل من رد على هالموضوع

ولي يعرفه يدعوه للعوده مره ثانيه

آل معمر
26-12-2007, 12:58 AM
هخهخهخهخهخهخهه

حلوه هههههههههههه قصة زاحفة ورايقة

صحيح الموضوع قديم من عام 2004

ولكن برضه يعتبر جديد ورائع

يسلمو