نبح عن معنى لها

[العارض]

كلمات تحتاج لمعنى



يتنخطل
السعابيل
مبوبز
مندغ
مالغ
سبهه
يشنقل
الرزحة
كشة
يطريق
مزمع
تكلع
فاهي
البهانيس
الباب مجافا
اذلف
سفلة
حكاكة
رخمة
علبا
يزوع

يتاغر
يطوطح ......

[سعيد الجهيمي]

وش المطلوب يا فركـــــــــــــــــس
انترجمها ولا اعجبتك والا ايشششششششششششششششش ودك

[ابن خضير]

وش المطلوب يا فركـــــــــــــــــس
انترجمها ولا اعجبتك والا ايشششششششششششششششش ودك

وانا بعد اسال وش المطلوب



ولك تحياتي

[@تركي السنحاني@]

انا والله ما عرفت الا

((الرخمه))

الله لا يبلانا و لا يبتليكم

و ننتظر التفسير من الشباب

و ينك يا مذحج الطعان

انت شكلك عندك خبره

على ما اظن انها كلمات من صوب الحساء

لاهنت يا فركس

((على فكره اسمك حلو و انا من المعجبين فيه ))

تقبل تحياتي يالغالي

[عبدالله السحيمي]

بسم الله الرحمن الرحيم
السلام عليكم ورحمة الله وبركاته


في قامووووس هذي >>>>>>>>>>>>>تنكت انت ووجهك



بعضها لهى معنا والبعض ؟؟؟؟؟؟

[ابوديهـ]

في أي قاموس نلقاها ....

[سعيد الجهيمي]

السعابيل== اللعــــــــــــــاب أو التلال
يشنقل== ينقلب أو يطيح على وجهه
فــــــــــــــاهي == فـــاغــر و أهبل أو أفتش
أذلف== أنقلع أو أقلب وجهك ( يالبعيد )
رخمه== نوع من أنواع الطيور وهو ردي النوع و تقال للرجــــــــال إللي ما فيه خير ولا هو مطلق الله يجيرنا واياكم
يتاغـــر== يكرع أو يطلع هـــواء أو ريحه كريهه من فمه

اما الباقي ما أعــــــرف وش معناها ولا أتوقع أن القحاطين يستعملونهــــــــــــا:confused: :confused: :confused:

وتقبل الترجمـــــــــــــــه واعذرنا على القصور

[آل معمر]

بعضها لغة غربية <<< هاجاتك الفلسفة



صحيح والله

بعضها لغة عربية فصحى

مثل اذلف وهي مشتقة من الفعل ذلف أي توجهه

بعض العرب كاتن يقول ثم ذلفت عليه


سفلة نسبه للأسف

الرخمة نسبة لطير الرخم

غيرها الكثير

والله لو عندي وقت كان بحثت عنها في القاموس

طبعا هذا من ناحية أصلها في اللغة

أما من ناحية المعنى فهي معروفة بالعامية عند الجميع ومفهومة

تحياتي لك

[العارض]

شكرا للجميع واسفين للازعاج

[ناصر السنحاني]

بسم الله الرحمن الرحيم
السلام عليكم ورحمة الله وبركاته
مابه ازعاج يافركس

[العارض]

يا عبدالله السحيمي تبغا رد .. اسف

[العبدي]

هههههههههههه

منين جايبها ذي ..

على العموم استلم ..

يتاغر .. مثل قولة يتارع ..

علبا .. الرقبة من ورا ..

مالغ .. اللي يملغ عليك .. يعني يمزح مزح مخنز .. :applaudit:

وشوووكرن ..

[ماجد الخليفي]

يتنخطل = يتمايل

مبوبز = وضع من اوضاع الجلوس

مالغ = سيء الطعم

يشنقل = يتقلب

كشة = اشعث

تكلع = انتظر

فاهي = كسلان

سفلة = سيء الاخلاق

حكاكة = الرز المحروق في اسفل القدر

علبا = يمكن خلف الرقبة

يزوع = يقذف ما في معدتة

[العارض]

سلمت يمناك
وجميعها صحيح00

كشه = الشعر المنقوش او الاجعد
علبا = الرقبه من الخلف 0 يقول ضربني على علباى

شكرا اخ ماجد الخليفي والف تحية لك00

[العارض]

الشكر للاخ العبدي00

[العارض]

أكتب لكم الآن وانا( أرطي ) ، وكل الشوارع ( رطاريط )، ومن شدة المطر

( نسع ) مني كيس الأغراض ، ولا أدراكم كان راعي البقالة ( تنح ) ماانتبه

الا يوم ركبت السيارة ، فجاني ( يتنخطل ) قلت : (أها عاد) ...( افهق) بس

عني ( يالخانس ) ، والله انك ( فاهي ) ماتدري وين الله حاطك 0

وأول ما وصلت البيت نط عند السيارة واحد من البزران ( بسعابيله )

يفتش الأكياس يدور حلوى قلت : ( كف ) في ذاك ، يالله ( انقلع ) خل امك تنظفك

أول يا ها ( السبهة ) ، قال لي : عطني من اللي معك ، قلت له : والله انك ( مالغ )

وما لك طعم ، قلت له وين أخوك سعيدان قال : هذاك اهو ( مبوبز ) ماتشوفه ؟ ووين

عليان ؟ قال : قدامك...( دنق ) وتشوفه . وهذا عبيد جاي ( يطربق ) : آه وش تبي

يا ها ( الهلامة ) انت وثوبك ذا ( المزمع ) ؟ قال : وش جيتب لي ؟ . قلت : ( مير )

وبس رح غير ملابسك ريحتك (تكلع ) بالعامية انت و ( كشتك ) ذا اللي تقول كانها (عوشزة .. (
قال لي سعيدان : أبوي شف عبيد ( يتبوبح ) ، وسعيدان ماسكة من( مندغة ) ، والله انه

بغى ( يشنقل( ويطيح على ( الرزحة.. (
قلت للعيال : يالله عاد تراكم ( أغثيتوني ) ، تراني ( متغلق ( و ( هادني ) التعب

[منصور العبدالله]

هلا اخوي فركس

اشوف معظم هالكلمات موجوده في المنطقه الشرقيه

ومتداوله كثير عندهم وشعبيه

وممكن رد ال معمر فسر الكثير منها


يعطيك العافيه اخوي فركس والمعذره على ردي المتأخر

ابدعت وتميزت بحضورك الراقي والمميز

دمت في خير