المساعد الشخصي الرقمي

مشاهدة النسخة كاملة : قصة الهواجر من ابن هادي


السيف النادر
28-09-2004, 10:05 PM
بسم الله الرحمن الرحيم


المعروف ان قبيلة الهواجر التي تسكن في شرق الجزيرة العربية ترجع اصولها لقبيلة قحطان حيث ان ( جنب ) تجمع الهواجر بعبيدة ، وبحكم قربهم من قبيلة العجمان فإنه لا بد ان يحصل خلافات بين القبائل ويغيرون على بعضهم البعض ، االى ان رزق الله هذه الامة بال سعود الذين وطدوا الامن فيها وانتهت بذلك الحروب التي كانت تقع .

المهم أن الهواجر حصل بينهم وبين العجمان خلاف ، فأرسل الشيخ شافي بن شبعان شيخ قبيلة الهواجر لشيخ المشايخ محمد بن هادي ذلولاً وقلدها ( هملا ) وهو نوع من انواع طلب النجدة من القريب ، فإن اراد المرسل اليه المساعدة قطع القلادة وارجع الذلول وان اعتذر تركها ( غالبا لا تترك ) وارسل معها هذه الابيات والتي يذكره فيها بأن الهواجر يجتمعون مع عبيدة في جنب ويقول وعمر القارئين يطول :


ياراكب حمرا بلونه سحامه =ترعى الزهر لين الشحم فوقها زام
فوقه صبي ما تغير كلامه =يدي الخبر يم الرفاقة بالاولام
ياجنب تركوا الرثا والحمامه= احموا لنا من قبل حل التندام
صبيان قحطان غشاهم ملامه=ولها على صبيان جنب تلملام
حنا كما مايح ثمانين قامه=هيما وفي جيلانها تسعة اهيام
مايظهر المايح من أقصا غمامه=خطر على جيلانها بالتهدام
حنا شوي وحاميتنا القرامه =قطاعة ننطح ولو كملوا يام
ارماحنا وسط المدينة علامة=مع الصحابة قاتلوا ذيك الايام
فلما وصلت الذلول والقصيدة لابن هادي رد عليه بهذه الابيات :


ياسابقي تستاهلين السلامة=الله يجيرك من بلا سو الايام
لا بد من يومٍ نطير قتامه= اما على المطران ولا على يام
ياذا البهم والله ان تباري الجهامة=لما تجي من بين صفوى والاوجام
لي لابة حولتهم من تهامة=سلاحهم مخ الفرنجي والاروام
حنا كما سيل يطم العدامة=حول على طاش البحر له تلطام

فلما علم الفارس راكان بن حثلين شيخ العجمان برد الفارس ابن هادي ارسل له هذه القصيدة :


ياراكب حر تذرب سنامه=عليه ني راكب نيه العام
ماطققوا لحيه ليالي فطامه=مقوي عظمه لبن كل مرزام
الى ورد عد يطير حمامه=جا للصريمة من لحيه تقصام
تلفي لبن هادي كبير العمامه=شيخ ورمحه مع هل الخيل مرسام
مر يواعدنا بحرب وقوامه=ومر يجينا منه هرج وتسلام
حي الكلام وحي منهو كلامه=اللي لفانا منه هرج التوهام
وش الجزا ياشوق زاهي وشامه=بالسابق اللي ما عرفنا لها اوقام
كزيت لك نور السلف والجهامة=باغيك لي ذخرٍ في مقابيل الايام
غديت انا وياك مثل النعامة=جاها بلاها من ثقيلات الاقدام
ان كان تبغي سابقك والسلامة=خلوا ظعاينكم مع العتش خرام
حرم عليك النوط تطلق بلامه=مادام عنده واحد من ضنا يام
معنا الطويل اللي تجيكم علامه=مثل العديم اللي على الجول صرام(1)
الترك قبلك زارنا به زعامه=قد عافنا واختار عنا هل الشام
ان كان تطري حدرتك بالجهامة=لما توصل بك لهاذيك الاجام
ذي ديرة الحاكم كبير العمامة اللي نحا عنها طوابير الاروام
قدامكم شيخ رفيع مقامه=الخيل قرح وابيض الخد قدام(2)
يالله عسى الفردوس ملفا عظامه=اللي بعث دين النبي دين الاسلام(3)
وان رادها غيره ضربنا رثامه=عوّد يبدل هقوته بالتندام
مثل الدويش اللي يقدي الجهامة=عقرت جواده فوق رجله والاقدام
اقبل وحنا نسوي لك كرامة=شلف على شهب سريعات الاولام
تسعين رمح كسرن في عدامه=عشرين منهم بين راكان وحزام
كم ثار عند ركابنا من كتامه=ياما هلك من ضدنا من سبب يام
كم من حريب دارج الدم دامه=يشبع بها السرحان والطير لا حام
حنا كما سيل تنحا غمامه=هامل بردها بالفرنجي والاروام
سيله يقزي ما نحا من عدامه=ورعودها منها المدن له تقصام
كم سيف هندي فصخنا لجامه=بايماننا كنه مقابيس الاضلام
نروي من رقاب السكارى حيامه=في هيةٍ يشبع بها كل حوام
نطعن لعين اللي عريض سنامه=شقح مفاليها مباكير الاوسام
ان كان ودك عندنا لك كرامة=وتدري بضيفتنا لك الشرق والشام
اقبل علينا حي سوق المسامة=وعاداتنا نغلي جلب كل سوام
حريبنا تصبح بكبده ندامه=وبراية الله نجعله حذو الاقدام
نرجي مها شيلك تعدى تهامة=لا ساقك الله والقدم ناحر يامفلما وصلت قصيدة راكان بن حثلين لمحمد بن هادي رد عليه الابيات التالية :


ان كان عندك للمسير كرامة=عجل ترى ربعك مشافيق وحيام
كرامة ترث عليكم ندامة=تصبح ذرايركم مراميل وايتام
كم شيخ قوم مطلقين حزامه=من عقب لبس الجوخ قدوا له الخام
وان كان تطري السيف تفصخ لجامه=لو هو على الدوشان ما كان تنلام

بعدها قام ابن هادي بغزو قبيلة مطير التي كانت في نجد وطردهم منها وقتل شيخهم الدويش على يد احد افراد القبيلة وهو من ال كليفيخ من ال دراج من الخنافر ، ولكن لا يحضرني اسمه في الوقت الحاضر .

مع العلم بأن كثيرا من الرواة والكتّاب يروون قصيدة ابن هادي كاملة أي القصيدة التي رد عليها راكان بن حثلين والقصيدة التي رد فيها ابن هادي على ابن حثلين متصلة بدون انفصال كأنها قيلت مرة واحدة ، والصحيح انه قال الابيات الاولى ثم رد عليه راكان ثم رد عليه ابن هادي ، والدليل الابيات واضحة لمن يفهم المعاني .

آمل ان يكون الموضوع (أد المئام ) على قولة اخواننا المصريين ، وان كان هناك اخطأ فأرجو تذكيري بها وتنبيهي اليها لأن الانسان ليس معصوما من الخطأ ، كما ان فيها فايدة لي وللقراء ،

هوامش :
(1) يقصد شيخ العجمان منصور أو محمد الطويل .
(2) قرح : جاهزة للغزو .
(3) يقصد الامام فيصل بن تركي

وشكرا لكم

شيخ المهادية
28-09-2004, 10:34 PM
كفوووو والله بشيخ المشايخ محمد بن هادي بن قرمله
صدقك يا السيف النادر انا كنت اقرا القصيده في كتاب ابطال من الصحراء ما كنت اشوف الرد فاستغربت الشي محمد بن هادي حاكم نجد وعنده اقوى فرسان ما ايرد على ركان ...
على العموم مشكور على المشاركه وننتظر المزيد...
اخوك شيخ المهادية

صقر القحاطين
29-09-2004, 02:44 AM
ارسل بن شافي شيخ بني هاجر الأمير شافي بن سفر الشباعين بالقصيدة التالية لابن هادي شيخ قبائل قحطان .
يـا راكـبٍ حـمـرا بلونـهـا سحـامـه=ترعي الزهر لين الشحم فوقها زام
عليـهـا صـبـى مــا تغـيـر كـلامــه=يـدي الخبـر يـم الرفاقـه والاعــلام
منـصـاك شـيــخ بـيـنـات اعـلامــه=شيخٍ ورمحه في أهل الخيل ملحـام
منصاك ابـن هـادي كبيـر العمامـه=مـكـدر الصـافـي بـعـجـات الأيـــام
حن درعـه الضافـي وقـوة حزامـه=وعـدوة القـاسـي نـدوسـه بـالأقـدام
صبـيـان قحـطـان عليـهـم مـلامــه=والهـا علـى صبيـان جنـبٍ تلـمـلام
تجنـبـوا درب الـرثــاء والـمـلامـه=احـمـوا لـنـا قــدام وقـــت الـتـنـدام
حـنـا كـمـا مـايــح ثمـانـيـن قـامــه=هيمـا وفـي جيلانهـا تسـعـة اهـيـام
ما يظهر المايح من أقصى الغمامه=خـطـر عـلــى جيـلانـهـا بالـتـهـدام
حـنــا شـــوي وشايلـتـنـا الـقـرامـه=قـطـاعـةٍ نـذبــح ولا كـمـلـوا يـــام
رماحـنـا وســط المـديـنـه عـلامــه=مـع الصحابـه قاتـلـوا ذيــك الأيــام
وبعد طردة مطير على يد قحطان من اعالي نجد وليست نجد الوسطى لان نجد خاليه من مطير ويقصد بعالي نجد الصمان والاراضي الي حولها وياليتك كملت قصيدة محمد بن هادي شيخ قحطان لكن بكملها نيابه عنك حتى تاصل الفكره كامله .


يــا سابـقـي تستاهلـيـن الـسـلامـه=الله يجيـرك مـن بـلا ســو الأيــام
لــي لابــةٍ حدرتـهـا مــن تـهـامـه=وسلاحها صنع الفرنجي والأروام
اعلوهـم فـي الطـور ثـور كتـامـه=واسفلهم اللي كدر الماء على يـام
ياذا البهم والله أن تباري الجهامـه=أيلين تنزل بين صفوى والأوجـام
حـنـا كـمـا سـيـل يـطـم الـعـدامـه=حول على طاش البحر لـه تلطـام
ولابــد مــن يــوم يـثـور كـتـامـه=أما على المطـران وإلا علـى يـام
كـلـه لعيـنـا شـافـي فــي كـلامــه=يشكي علينـا الضـد قبـل ذا العـام المقصود بشافي شيخ بني هاجر .ملاحظه :
( صفوى : هي مدينة صفوى الحالية في المنطقة الشرقيه وتقع شمال منطقة القطيف )
(الاوجام : هي ايضا قرية تقع غرب منطقة القطيف )

وعندما علم راكان بن حثلين شيخ العجمان بان قبيلة قحطان قد رحلت من نجد قاصده الشرقيه بنية حرب العجمان ويام جنبآ الى جنب مع بني هاجر، ابلغ العجمان أن يستعدوا للحرب ، ولكن الحرب مع قحطان شيء عسير المنال . وأرسل بن حثلين بعض الهدايا إلى محمد بن هادي أمير قحطان يطلب منه العودة وعدم الاشتراك في الحرب ، ولكن ابن هادي رفض هدايا راكان بن حثلين وقال : ( شورك مردود في زورك وهداياك معادة إليك ) .

وذهب الشيخ راكان نفسه إلى الأمام فيصل بن تركي وطلب منه أن يعيد قبائل قحطان بقوله : ( يا طويل العمر إن بني هاجر وقحطان لو اجتمعوا معاً فسوف يشعلون النار فينا وفيكم معاً . فقال له الأمام فيصل بن تركي : ( اصلح مع بني هاجر أولاً فأعيد قحطان، وبدون ذلك فلا أستطيع ردهم )
وأرسل الشيخ راكان من فوره إلى الأمير شافي بن سفر أمير بني هاجر يطلب الصلح . وتمت المصالحة فعلاً بعد
ذلك طلب الأمام من قحطان العودة إلى أرضهم في نجد :

وقال الشيخ راكان هذه القصيدة ردا على قصيدة محمد ابن هادي بعد عودة قحطان إلى نجد :




يا راكب حرٍ تذرب سنامه=نيه على نيه جديد من العام
ملفاك شيخ بينات اعلامه=شيخٍ ورمحه في أهل الخيل مسلام
وجاله كلام حي من هو كلامه=اللي لفى منه هروج وتوهام
ويش الجزاء يا شوق زاهي زمامه=بالسابق اللي جات من صوب الأروام
أهديت لك نور السلف والجهامه=وأبغيك ذخر في مقاديم الأيام
غديت أنا وياك مثل النعامه=جاها بلاها من ثيقلات الأقدام
وان كان تبغى سابقك للسلامه=فلا تحول بالجحادر على يام
ولا تطاوع شافي في كلامه=بالك تطاوع شور فضاي الأنعام
الشايب اللي ما تحلل إعظامه=عيت تبيّده الليالي والأيام
لاشب له ضوء براس العدامه=قمنا نربط غالي القش بحزام
يحرم عليك النوط فكة إبلامه=مادام فيها واحد من ضنا يام
وصلاة ربي عد منشأ غمامه=على بني خصه الله بالإكرام






وقام الأمام فيصل بن تركي بجمع الفارسين المتنازعين جمل بن لبده القحطاني والشيخ راكان بن حثلين وذلك بعد أن استتب السلام بينهما ، والعودة إلى نجد وطلب منهما أن يقولا كل منهما بيتاً من الشعر .
فقال الفارس جمل ابن لبدة :






والله لولا فيصل وأمر الشيوخ امطاع=أن قد انشد وننزل بين الحسا وانطاع
ويقصد جمل لولا أمر الامام فيصل لشيخ قحطان بعدم غزو يام والعجمان كان الان منازل قبيلة قحطان بين الحسا وانطاع


وأجابه الشيخ راكان قائلاً :




تراه يكذب يا فيصل ما هوب لك مطواع=نتافة لحية مرشد والشيخ الآخر ضاع

أما مرشد والشيخ الآخر الذي ضاع كما جاء في الشطر الأخير من قصيدة راكان فكان المقصود فيهم المزكيه ولهم قصه حلوه ههههههههههه هم مطاوعه ويسمون مزكيه الي يلوفون البدو ويجمعون الزكاه وهم مرسولين ويشتغلون مزكيه عند الامام وكان منبهم الامام انهم مايمرون على بن لبده ولاياخذون منه الزكاه لكن ضيعو الطريق والله قطهم على جمل بن لبده فشافهم بن لبده ويحسبهم ضيوف وقام يذبح لهم كرامتهم قبل لايصير بينهم سلام ومعالم وترحيب فقام لمطوع وعزل بعض البل والثاني المطوع مرشد اقبل عليه قال بن لبده لرجال مرشد العلم قال حنا لمزكيه والبل ذي بناخذها فما كان من بن لبده الا انه طرح المطوع جنب الشاه الي ذبحها لهم انجن المطوع مرشد يوم شاف الدم يحسبه ذبحه على غفله فصاح فسمعه وشافه المطوع الثاني هو والعبيد الي معه وحطو رجلهم يبغون النجاه وكانو مايدلون لان الي يدل هو المطروح جنب الشاه فضاعوفي نجد وهي طويله المهم ان راكان استغلها ذريعه عند الامام عشان يبين له ان بن لبده مهوب مطواع ولايهمه الامام ولاعبيده لكن الامام ضحك وقال لولا بن لبده ماجاتني العطايا منكم ياراكان ويقصد فيها الامام ان انتم يالعجمان ماكنتم بتستسلمون لي لولا قوة قحطان ووقوفكم معي خوفآ من قحطان وليس حبآ فيني .....وسامحوني


تحياتي للجميع

السيف النادر
29-09-2004, 11:21 AM
شيخ المهادية :
شكرا على مرورك وبالنسبة لشيخ المشايخ ورده فهذي غلط الرواة حيث التبس الامر على كثير من القراء وخصوصا من القبائل الاخرى ، اما نحن فنعرف القصيده ونعرف الردود ، لكن اللي نتمناه ان يكون الموقع مرجع للكتّاب والرواة بفضل جهودكم وجهود الاخوة الذين يضيفون ويعقبون على جميع المواضيع ، عسى الله ان يثيبهم ويوفقهم ليخرج الموضوع على اتم وجه . ا



اما بالنسبة لـ صقر القحاطين ، فاعتبر انك مسوي فيني جميل بإضافة بعض الابيات التي كانت تنقصني واضافة بعض المعلومات التي كنت اسمعها واستغربت عدم وجودها في كتاب منديل بن فهيد ، مع انه راوية معروف وقليل ما يضيع السالفة او القصيدة ، وبالنسبة للقصة فعز الله انها مضحكة بالفعل ،وتصرف الامام مع راكان كان تصرف حكيم لأنه لا يريد الاصطدام مع قبيلة بحجم قبيلة قحطان التي لو اجتمع ابن سعود مع العجمان مع غيرها من القبائل لكان هناك شأن للقحاطين فالوقت الحالي .:050103nbh

اخوكم السيف النادر

إبن الأروق
30-09-2004, 10:51 AM
لاهنت يالسيف النادر على الموضوع الشيق

والصراحة وانا قاعد اقرا السالفه مركز على الاختلاف وابغي اكتب اللي اعرفه في النهايه

لكن يوم شفت مشاركة السعدي صقر القحاطين عرفت انه جابها صح

ويوم قريت مشاركته حسيت انه كتب اللي في بالي

ياسعد المنتدى اللي فيه مثل صقر القحاطين ولا يهونون الباقين



واقدم شكري الخاص للسيف النادر وللاخ صقر القحاطين

ذْيْبْ½اْلْ¤رْوْقْ
30-09-2004, 10:53 PM
مشكوووووووووووووووووووووووووووووووووور

فارس قحطان
01-10-2004, 10:35 AM
السيف النادر

شكرا لك على هذا الموضو ع المميز

واشكر باقي الأخوه الذين شاركوك
في الموضوع

وكانت مشاركاتهم من الأخوه

ودائما نريد مشاركاتنا ومناقشاتنا
تكون من باب الأخوه

وعدم اثارة اية نعرات قبليه

والله لايفرق بينا جميعا

اخوكم
فارس قحطان

الضويري
02-10-2004, 07:54 AM
هذه قصيدة اما لخالد بن علوش المسارير او لاخوه سعد بن محمد رحمهما الله

لانه اختلف فيها الرواة



يالله يالمطلوب ياعدل النظر........... يارازق(ن) الطير خفاق الجناح

يارازق(ن) الطير في بر وبحر..........بامره يسير العبد وتهب الرياح

ايقول ابن علوش في اللعب افتكر..........واوحوا كلامه يامروية الرماح

هواجر(ن) لا جا زعازيع النذر...كم واحد(ن) من ضربنا في الضيق طاح

وان زعزعوا قحطان حذفنا الغتر..........هم ربعنا لاثار مشخول الملاح

هم ربعنا في خير والا في قشر...........لاقامت الجربا تحكك بالصحاح

قحطان من نجد(ن) ليا سيف البحر......من ضدهم يمسي بهمه ماستراح

من ضدهم نسقيه كاسات الكدر.............ونبيته في ليل والا في صباح

عند العشاير ما نهاب من الخطر..لا حل ضرب مخلص(ن) والكذب راح

ترى الظفر يالربع رايات الفخر......ترى الظفر في الضيق ياطيور الفلاح

كله لعينا الغر براق النحر............اللي جبينه برق صيف(ن) يوم لاح

وختامها صلوا على سيد البشر........اقول قول(ن) منه عرضي مستباح




وسلامتكم

إبن الأروق
02-10-2004, 08:31 AM
لاهنت يالاجودي

الضويري شكرا لك ..... والله طربتني على ذا الصبح

الله يرحمهم جميع

السيف النادر
02-10-2004, 11:56 AM
الأخوة :

ابن الاروق /هذا ان دل يدل اهتمامك وعلى المامك بتاريخ القبيلة ، الذي ضيعه كثيرا من ابنائها فالوقت الحالي .


ذْيْبْ½اْلْ¤رْوْقْ /يعطيك العافية ما سوينا شي . ، وعلى فكرة ترى الاسم فيه غلط ما ادري متعمد ولا لا حيث ان الاسم يقول ( ذيب نص ال روق ) :d


فارس قحطان / الله يعطيك العافية على ارشاداتك اللي تنور لنا الطريق وتفيدنا ولا تضرنا .

الضويري : مشكور على المشاركة الجميلة والفعالة ، وكفو صبيان قحطان .

إبن الأروق
02-10-2004, 12:55 PM
انه ماهوب ذيب على آل روق كلهم ؟؟؟

لا هو يحط ذا الزخارف علشان محد يقدر يدخل بنكه للمنتدى ..... مادري احد(ن) لاعب عليه وقايله انه بيسرقون النك حقك ؟؟

لاتقولون اني غلطت على الرجال .... تراني امون عليه

كحيلان
13-02-2005, 03:50 AM
مشكووووووووووووووووووووور ولاهنت اخووووي السيف النادر..


اخووووووووكم


كحيلاااااااااااان..

حمد محمد السنحاني
02-02-2010, 09:50 PM
لاهنت بيض الله وجهك