هل ذبح الشاة الحايل عندنا في قحطان من قمة الكرم أم من نقيصة ومذمومة ولا تجمل ؟ مهم

[وتد]

الإخوة الكرام صبيان قحطان
دار بيني وبين بعض الزملاء من قبيلتي غامد وزهران نقاش حول الكرم عند القبائل
المهم اكتشفت واستغربت جدا لقولهم بأن من يذبح الشاة لضيفه عندهم يصبح مذموم ومفضوح ويعاب عليه ذلك بل زاد البعض وذكر بإن الشاة والرخل لو ذبحها وأحضرها لبيته لرمي بها لأنها فضيحة ومنقود


أما عندنا في قحطان فوالله العلي العظيم إنها وخاصة في من أعرفهم وسابقا بالذات إنها من أفضل التكريم لضيفك
وكان في ما مضى إذا الرجل لديه رؤوس من الغنم وجاه ضيف عزيز وغالي يختار المضيف أعز ما يملك من غنمه وهي الشاة الحايل السمينة الغير مندولة ويذبحها إكراما لضيفه وبذلك يقطع نسلها ولن تتكاثر غنمه بعكس لو ذبح خروف

كذلك عند بعض القبائل الأخرى ذبح الشاة قمة في الكرم
قبيلة عتيبة الغالية تلقب بذباحة الحيل والحيل جمع حايل وهي الشاة السمينة الغير مندولة

أنتظر رأيكم ياأخوان على أحر من الجمر هل ما ذكرته صحيح أم لا ؟ وهل ذلك عند كل قبائل قحطان الكريمة والمعروفة بكرمها

[عايض المليحي]

أشوف أن ما فيها شيء

أغلبية القبائل تفعلها

[خالد ابن علي]

من اول افضل مايذبح الشاة الحايل واما هالحين الخروف السمين علشان يضبط المفطح :) والحمد لله على النعمة

[عبدالله بن غفره]

ارررررررحب ياوتد

ولاهنت على الموضوع



ومن وجهة نظري أن ذبح الحايل السمين وإذا كنت مختارها من غنمك فهذا يكون قمة الكرم لآنك بهذي الطريقة تقطع نسل الغنم تكريماً لضيفك الغالي


أما الوقت الحالي فالله يديم النعمه ويعزها

كل شيء جايز وكل رجال يدور للجماله


لاهنت وبيض الله وجهك

[حسن بن جعده]

الحايل من خير مايذبح للضيف ولاعند عبيده عيب فيها وهذا اللي عرفه عندهم وترى كل شارب له مقص أحد يستاهل حايل وأحد يستاهل قرص وهوبمثابة خروف بدون عظم ومنهم من يستاهل عصيده ومنهم من يستاهل قعود ومنهم من تقدم له الميسور شكرا

[فارس السروات]

(الحايل )وهي ماحال بينها وبين الدفاع الشحم المتراكم في احشائها فكانت افضل مايقدمه الرجل لضيوفه في زمن

كانت تندر الشياه السمينة كمايقول ابائنا وقد تغنى الشعار بذباحة الحيل

وفي هذا الزمن فالاغنام التي ترعى ولايجلب لها ( الشعير المستورد) لاتفرق بين صغيرها وكبيرها فلذة اللحم واحده

ولكن بعد التسمين الاصطناعي ضاعت النكهة في الصغير والكبير

[سعيد بن محمد بن خريم]

الكرامة هي الشحم ليس مهم حايل ام لباني

الشاة الحايل ما تاخذه دون 1000 ريال

[خالد العاصمي]

كله خير وبركة

والجود من الموجود

[وتد]

بيض الله وجيهكم على ردودكم الطيبة وفعلا قبايل قحطان هي أهل العادات وأهل الكرم وهذه العادة الطيبة اللي نفتخر بها هي للأسف نقيصة عند بعض القبايل ولا ألومهم أبدا لكل قبيلة عاداتها وسلومها ومثل ما قال أخونا الغالي حسن بن جعدة (( كل شارب وله مقص أحد يستاهل الحايل وأحد يستاهل القرص وأحد يستاهل القعود ))
تحياتي للجميع وما قصرتم جعلني فداكم

[مذحج الطعان]

أخوي وتد اسمح لي بهذه المداخلة البسيطة :

اما من قال ان من قدم الرخل او الحايل فهو منقود .......... فردنا عليه هذا الضيف كيف بيعرف إن هذي رخل ولا شاه

سألت أبوي عن أفضل مايقدم قال : الحايل أكبر الشياه الموجودة عندك ، وهذا في الغالب كانوا يقدمونا العرب في القديم ،
أما الحين فما أظن لو جاك ضيف بتقدم له يا فلان من الناس حايل لماذا ؟ لان الناس يبون الذبايح اللي لحمها طيب والخرفان الطيبة اللي لاهيب كبيرة ولا صغيرة وأكبر من الوسط ، بالعكس الحين لو تقدم حايل يمكن ما احد ياكلها
لأنها بالموت تطبخ عدل

يذكر لي والدي إن اهل بيشة إلى يومك هذا يقدمون الحايل واهل نجد اما كثير من الناس فيقدمون الخروف السمين اللي لاهوب وسط ولاكبير مرة

لعلك فهمت قصدي

شكرا لموضوعك الطيب

[العبدي]

مشكور يا وتد ...
بل انا اشوف انها قمة الكرم ...
واما اليوم ولله الحمد كثرت النعم وزاد الخير نسأل الله ان يديمها من نعمة

[وتد]

أخوي مذحج الطعان تحياتي لك وبارك الله فيك
الشاة الحايل هي الشاة الغير مندولة أي ليست دافع ما ضربها الفحل وهذي في العادة تكون سمينة وإذا ذبحتها ياطويل العمر تلقى سحرها ( الشحم اللي في بطنها حول الأمعاء) مثل الزبد ونحطة عادة فوق المفطح أما بالنسبة للحمتها فهي طرية جدا تنضج بسرعة وقد تكون أسرع من الخروف لأنها طرية
أما الشاة الكبيرة نسميها ( القحم) فهي في العادة لا تذبح لأنها ما تجمل وهي هزيلة
تحياتي لك أخوي مذحج الطعان وأشكرك على مداخلتك

كذلك الشكر للأخوان الكرام(محتري السيل وابن خريم ومشرفنا العزيز فارس السروات واخونا الغالي ابن غفرة والمطلول والمليحي تحياتي لكم جميعا على مداخلاتكم)