قصيدة في المــقنــــاص

[الـــجـــحــلــي]

المــــــقــنـــــــاص




أنا على المقناص قلبي يرفي
فترة ونرجع يم اهلنا منا كيف
بديار لفروق الحبارى تلفى
جنوب من حزم الجلاميد وطريف
الطير هو غاية غرامي وشفي
اقدره تقدير الاجواد للضيف
من كبر قدره حامله فوق كفي
وارعاه تسع شهور بالقيظ والصيف
ودهله لاشفت ريشه مصفي
على الدعو واخفف النسر تخفيف
نقله يشرفني وشوفه يكفي
عن شوف ناس ما تعرف المعاريف
لاشفت لي نو بروقه ترفي
نويت اجهز موتري للتكاليف
القيظ كله جالس(ن) ومتعفي
وبرد المكيف نشف الدم تنشيف
متى سموم القيظ عنا تقفي
وسهيل قبل يعمد الفجر قد شيف
والنار يصلح شبها للتدفي
والبرد نوجس من نسيمه هفاهيف
وقمنا لعزبتنا نشيل ونضفي
ونكمل الناقص ونملا المطاريف
واللي نشيل من اللوازم مكفي
ومكتفين العفش بالحبل تكتيف
ويمكن اليا جينا البقالة نوفي
حاجات نشريها كمالة مصاريف
والصبح من حزم ابرقيه مقفي
صوب المعظم والهضاب المقاييف
بديار جعل اشجارها ما تجفي
تعلها غر المزون المراديف
في رفقة اللي نارهم ما تطفي
على الشرف والجود ربع مواليف
مجلاس طلقين الشوارب بصفي
على الدلال اللي بهن ساخن الكيف
خويهم ما اوجس كلامٍ يحفي
غير المزوح الطيبة والسواليف
عقال وزن عقولهم ما يخفي
ولاهم على الفاضي خفاف وملاقيف
وسلامتكم


منقوووووووووول

[ابراهيم آل بي حبيب الرفيدي]

سلمت يالجحلي والله لا يهينك

وياليت تقول لنا من الشاعر

ولا تحرمنا من مشاركاتك الطيبه

[القهره]

السلام عليكم ورحمة الله وبركاته
اخوي ابراهيم اتوقع ان القصيده
لشاعر الكبير بدر الحويفي الحربي وشكرا"

[معيض بن صميع]

الجحلي


ياهلا والله ومرحبا


المقناص رائع والقصيدة أروع


شكرا جزيلا لك على هذا النقل والإختيار العذب


تقبل خالص التحية والتقدير

[عبدالله بن غفره]

قصيده رائعه ونقل مميز


تقبل فائق تحياتي



لا تحرمنا من جديدك

[الـــجـــحــلــي]

يعطيكم العافية ولكم جزيل الشكر