المساعد الشخصي الرقمي

مشاهدة النسخة كاملة : قصيدة العفو عن قاتل السبيعي


الـــجـــحــلــي
01-01-2007, 05:37 PM
بسم الله الرحمن الرحيم
(قصيدة سبيع)والمسماه (قصيدة العفو)
هذه القصيدة في قبيلة سبيع والقصة صارفيها ملفى من قبيلة قحطان على سبيع في موضوع رقبة حلّ عليها القصاص واستقبلو سبيع قحطان وبيض الله وجيههم تنازلوا عن الرقبة وكانت القصيدة بعد الله سبحانه وتعالى هي السبب في العفو عن الرقبة وألقى القصيدة الشاعر/ سيف كليفيخ القحطاني حينما وصلوا عند سبيع في الملفى الأخير وبعد إلقاء القصيدة عفو سبيع عن الرقبة فجزاهم الله خيرالجزاء والقصيدة هي :


ياسبيــع ياهـل الثلاث اللي بهــا تعرفــون =واهل البخوت الكبار اللي تسمى بــها
واهل البشوت الوســـاع اللي لها تلبسون =اللي تجمل وتذري مــن تــذرى بـــها
ياسبيــع ياللي على سـم الرمـك تحتمــون =ألبل بشلــفٍ يفض الراس مضرابــها
ياسبيـع ياللي على وقت العسـر تكرمون =ياللي على المصرعين تفتّح أبوابـــها
ياسبيــع ياللــي لتــاريخ العــرب تذكرون =تحكــي التورايخ عنكــم وانتحاكابــها
ياسبيــع لاكثــرت الراحــات ماتهزمــون =لاصاحت المحصنات وشقت اجيابــها
ياسبيــع ياهل الرماح اللي تفض المتــون =هــل عزوةٍ ماتفــجّرمــن تعزوا بــــها
ياسبيــع ياللي على سلّم شرف تصعـدون =العــود يرقى بهــاوالغمـر يرقى بــــها
ياسبيــع ياهــل الفخـر من حقكم تفخرون =ولولا صدوق العبــارة ما نطقنا بـــها
والله لولااكتســـاب المــدح ما تمــدحــون =الاقوال بعد الفعول أموت واحيا بـــها
عليكــم البــيض ننشــرهـا وتستـاهــلـون =والبيض لسبيــع حاضــرها وغيّابـها
ياللي بنيتــوا خيـــام العفــوتسـتقــبلــون =جتكم قبايل بنواقحطـان واصحابــــها
قبــايـــلٍ يطــلــبــون الله ثــم يــطـلبـــون =ذبيـحة ربّطـت في حــوش قصّــابــها
بجاه ربــي وجــاه الرسـل والمــسلـمــون =تطـلب رجــالٍ تقــدّرجـــاه طـلابــــها
اعفــوا عسـاكم نهــار البــعث تستبعثـون =في زمرة الأنبيــاوالرسل واصحابــها
ياسبيـع جيــنا لكــم نمشي على ماتبـــون =بعــدٍ بلـتنــا البــــلاوي وابتلينــابــها
حــنّا الـلـحم وانتـم السكيــن والكون كون =كانــت وبانــت وحـــــنّا ما درينابــها
مـــن غـــدر الايـــام لانسـلم ولاتسـلمـون =بقــعا تلف وتــدور وتفتل اشـنابــــها
وحنــّّا عــن الغـيـــب لانـعلـم لا تعـلمــون =والدهــر فسّر حـــــلامٍ ماحلمنا بــــها
اليــوم جيــنا وبكــرة جعــلكـم ماتـجـــون =تشكون من نزغةالشيطان واسبابــها
النفـس حانــت وادانــتها جمــيع الديــون =وابــليس للشـــرودّاهــا ولاجــابــــها
تخضع تحت سيف شرع الله حديدالسنون =أمّــــاتغـدّى بهـا والا تعشّـــى بــــــها
تسامحـــــوا واعتــقوها جعلـكم تعتـــقون =في ساعـــةٍ كل نفسٍ تعرف حسابــها
وصــلوا علــى اللي بنور هدايته تهتدون =نبيــنا اللــي فتــح مكـة وصلـى بـــها
اللــي رفع رايــــةالإســلام والمســلمــون =واعدم وهدّم بيوت الشرك واحزابــها


ولقد تم بمشيئة الله تعالى بعد سماع هذه القصيدة العفو عن هذه الرقبة ولهذا لقبت القصيدة بـ (قصيدة العفو) حسب روايتهـــا ؛؛؛؛؛؛؛


وسلامت اعماركم

أبومسفر القحطاني
03-01-2007, 05:32 AM
ارحب يالجحلي لاهنت على ذا النقل الطيب وصح السانك والسان سيف الجروي مع ان لي ملاحظة مهمّة جداُ
في البيت الرابع عشر حينما قال الشاعر (بجاه ربي وجاه والرسل والمسلمون)

حيث انه لايطلب بوجه الله سبحانه الا الجنّة وكذلك لايصلح جمع وجه الله سبحانه مع جاه الرسل والمسلمون!!!!
وهذه من العثرات الشائعة والتي نعاني منها في الجنوب في الطلب والإلحاح بوجه الله سبحانه


ولكن مع ذلك فبيض الله وجه الشاعر سيف الجروي واسأل الله له التوفيق والسداد وان يجزاه خير الجزاء وان يعظم له الأجر والمثوبة




أخوك:
أبومسفر القحطــــــــــــاني

عبدالله آل عباد
05-01-2007, 01:58 AM
قد سمعت القصيده هذي في مقطع بلوتوث والله يعطيك ألف عافيه

أبو عساف
05-01-2007, 03:28 AM
الله لايهينك على النقل وبيض الله وجهك وصح لسان الشاعر سيف الجروي العبيدي

وعندي ملاحظه على أخر كلامك وتقول بعد ماسمعو هذا القصيده تنازلوا عن القحطاني

والشاعر بنفسه يقول في قناة الساحه ان السبيعي تنازل عن القحطاني وهو راجع من مكه ثانيا السبيعي راح للأمير

سلمان وطلب الأمير في الحق العام والكلام هذا كله قبل قصيدة الشاعر الكبير سيف 0 وتجي انت وتقول بعد ماسمعو

القصيده تنازلوا يصير فيها كلام ثاني

تقبل تحياتي ومشكور على نقل القصيده

الشامان
07-01-2007, 01:08 AM
الجحلي بيض الله وجهك على هذا النقل الرائع


وأحب أوضح للأخ العزيز الفاضل (( أبو عساف )) بأن هذه السالفه قديمه .....

وتختلف عن قصة السبيعي الذي عفا عن القحطاني لوجه الله ثم للجيره التي

دامت أكثر من سبعة عشر سنه وما زالوا جيران في حي الحاير .وذلك بعد

رجعت السبيعي من مكه .. كثر الله من أمثاله







تقبلوا تحياتي

@تركي السنحاني@
07-01-2007, 02:57 PM
ارحب يالجحلي لاهنت على هذا النقل الرايع وبيض الله وجهك والنعم بربعنا قبيله سبيع

علي الفهد
07-01-2007, 04:09 PM
لاهنت

بيض الله وجهك

وتد
09-01-2007, 07:58 PM
والله وألف والنعم في سبيع الغلبا بيض الله وجيههم
ولاهي بغريبة عليهم دائما راياتهم بيضا مع قحطان من أول وتالي

سعيد بن مسعود آل مهدي
09-01-2007, 11:44 PM
الجحلي

بيض الله وجهك على هذا النقل والله يكثر خير سبيع ولايحرمهم الاجر وفعولهم ونعم اول وتالي

تقبل تحياتي

مرعي بن دواس الحبابي
11-01-2007, 01:52 PM
بيض الله وجه سيف بن كليفيخ

لاهنت يالجحلي

اخوك

ابو فراس المندي
11-01-2007, 03:59 PM
أخوي / الجحلي

بيض الله وجهك على هذا النقل الرائع الهادف

الذي يسهم في زرع التسامح والعغو بين القبائل

لا هنت يا السنافي وكثر الله من امثالك

وتقبل تحياتي

أخوك / أبو فراس المندي

الـــجـــحــلــي
29-01-2007, 12:20 PM
لاهنتوا جميعا على الاطلاع على المشاركه ولكم خالص تحياتي

سعيد بن محمد بن خريم
29-01-2007, 01:33 PM
لاهنت يالجحلي على هذا النقل الطيب