المساعد الشخصي الرقمي

مشاهدة النسخة كاملة : محاورة ابن شايق و المورقي .. في جريدة المدينة


مفلح الشواطي
09-11-2006, 10:46 PM
محاورة شعرية

مفلح القحطاني – أبها

هذه المحاورة الشعرية جرت بين الشاعرين الكبيرين عبد الله بن شايق القحطاني وملفي بن مزيد المورقي في حفل الافتتاح الرسمي لمركز الإمارة التابع لمحافظة القويعية بمنطقة الرياض يوم الأربعاء الموافق 29/7/1427هـ وهي من المحاورات القوية حيث جمعت بين عمق المعنى وجزالة اللفظ والبراعة في الفتل والنقض وكان البادي في المحاورة ابن شايق .. حيث قال:

هلا ترحيبة مثل الخلاص وتمرة النبُوت

على طاسة حليب بكار شقح عند مصلاحي

دعوني والتقيتك يا ابن مزيد وأنت مثل الموت

لكن لا تهتني لك يوم يا قصاف الارواحي

المورقي

يدوم بك البقا يا شاعر شعرك شراب وقوت

ليا مني ذكرتك في المنام أنهض ليا صاحي

أنا ما ارضى عليك تغيب لا شوفه ولا لك صوت

أبا أحدك وأردك لين يحيا ذكرك الماحي

ابن شايق

بيوتٍ كنها الثلجة وبيت من صخر منحوت

حضرنا والمعارك مابها مشمش وتفاحي

ثمان بيوت عن بيتٍ وبيتٍ عن ثمان بيوت

لكن هذا زمان الهجولة يا لاح ياملاحي

المورقي

ما أبا السيارة اللي ما لها رفرف ولا كبوت

ولو كانت مع السكة تسابق هوج الأرياحي

ذلول إبليس تركض في السباق وحبلها مفلوت

مطية مير فوق خفوفها خفين وجناحي

ابن شايق

قليل العاقل اللي لا هرج شفت الجميع سكوت

ويا كثر اللي تشوف اليوم في يمناه مسباحي

أنا خابرك يا بحر العرب كلك درر ياقوت

لكن اليوم كلك يا بحر حوتة وتمساحي

المورقي

ليا شفت الك فرصة لا تخليها عليك تفوت

ترى يا صاحبي في وقتنا كم جاء وكم راحي

أعرف أن البحر فيه الجواهر والدرر والحوت

وفيه الشر كله والعلاج مداوي الأجراحي

ابن شايق

يا ما شاء الله يا بو وافي سحت المال يا ساحوت

ومغترة ولد خالد عطتك وسام ووشاحي

أنا ما ني مصدق قصة التلفاز والريموت

وتراني مستحي لا أقول لك سارق ومزاحي

المورقي

تراك أنته هواوي عارفٍ قصة عقاب ونوت

تعذَب في هواها كيف يتركها ويرتاحي

ابن شايق بعد ما لبسوه الناس بشت وكوت

تركهنَه وقفَل دونهن بابه بمفتاحي

ابن شايق

لعبنا بالمحبة لعبة الشطرنج والبيلوت

تمثل لي سعاد وقمت أمثل فيصل الضاحي

مما لا شك فيه أن كرتٍ أحمر عن ثلاث كروت

لكن ويش أنت خاسر قول يا رازق يا فتاحي

المورقي

ألا يا شايت الكورة توقَع لا تشوتك شوت

ترى كم لاعب في أثناء المحاور طاح ثم طاحي

أنا وانته لساق السدر لكن الورق محتوت

تعبنا في النهار وليلنا ما ذقنا الامراحي

ابن شايق

قناة الساحة تصور ترى هرجك عليه ثبوت

مع أنك ذيب في المسرى ولك في الصبح مسراحي



منقول عن صفحة شعبي بجريدة المدينة عدد يوم الخميس 18 شوال 1427هـ

محمد بن مشبب البشري
09-11-2006, 11:34 PM
بيض الله وجهك على النقل
اخوك محمد

ناصر بن فهد آل سعد
09-11-2006, 11:44 PM
لاهنت على النقل وانا اخوك

سعد القحطاني
10-11-2006, 05:51 AM
لاهنت يامفلح


بيض الله وجهك


نقل موفق لمحاوره بين شاعرين كبار


ننتظر منك المزيد ياذيبان


لاعدمناك


.

محمد المرقوع
10-11-2006, 01:06 PM
لاهنت وجعلك تسلم

عبدالله بن غفره
10-11-2006, 02:53 PM
مفلح الشواطي


أررررررررررررحب يالوافي

وبيض الله وجهك على نقل هذه المحاورة التي تعتبر من أفضل المحاورات الموسم الماضي


لاهنت لاهنت


أخوووووك

ابوفهيدالعاطفي
30-11-2006, 09:17 AM
لاهنت على النقل

ألمسعودي
30-11-2006, 04:27 PM
لاهنت على النقل الرائع

مرعي بن دواس الحبابي
30-11-2006, 04:41 PM
لاهنت يامفلح


اخوك

سعد بن عدال
19-01-2007, 02:49 PM
أبيض وجع يامفلح




محاوره واااااافيه



تحياتي