المساعد الشخصي الرقمي

مشاهدة النسخة كاملة : الفارس ذيب بن شالح بن هدلان والفارس ذيب بن جعفر بن عبود.


أبا الذموم
22-08-2006, 01:48 PM
أررررررررررررررررررحبو يا رجال ومساكم الله بالخير

في هذا الموضوع سوف أتكلم عن فارسين كبيرين من فرسان قبيلة قحطان وهم :
1) الفارس ذيب بن شالح بن حطاب بن هدلان الخنافر .
2) الفارس ذيب بن جعفر بن منيس بن عبود آل مسعود .

مما لاشك فيه أن الجميع يعرف فروسية وشجاعة وإقدام الفارسين ذيب بن شالح بن هدلان وذيب بن جعفر بن عبود وهم مثل نار ٍ على علم من شهرتهم وصيتهم بين القبايل .

# اللي جعلني أكتب هذا الموضوع هو اللبس الحاصل بين الناس حول هذين البيتين :

ياذيب أبا بوصيك لا تآكل الذيب =كم ليلة ٍ عشاك عقب المجاعه .
كم ليلة ٍ عشاك حرش العراقيب =وكم شيخ قوم ٍ كزته لك ذراعه .
الدارج بين الناس أنها للشيخ شالح بن هدلان في ولده ذيب وهذا غير صحيح لأن الشيخ محمد الأحمد السديري في كتابه أبطال من الصحراء جعلها في ذيب بن شالح وهذا غير صحيح والصحيح أن هذين البيتين للشاعر راشد بن معديه آل قير الخنافر قالها في ذيب بن جعفر بن عبود بعد موته في منطقة ثميلان قرب بيشه .

وإليك عزيزي القارئ القصيدتين كاملتين .

# القصيده الأولى قالها الشيخ شالح بن هدلان في ولده الفارس ذيب بن شالح بعد موته :


يا ربعنا ياللي على الفطر الشيب =عز الله إنه ضاع منكم وداعه .

رحتوا على الطوعات مثل العياسيب =وجيتوا وخليتوا لقلبي بضاعه .

خليتوا النادر بدار الأجانيب =وضاقت بي الآفاق عقب اتساعه.

تكدرن لي صافيات ا لمشاريب =وبالعون شفت الذل عقب الشجاعه .

كفّه بعدوانه شنيع المضاريب =ويسقى عدوّه بالوغى سم ساعه .

ويضحك ليا صكت عليه المغاليب =ويلكد على جمع العدو باندفاعه .

وبيته لجيرانه يشيّد على الطيب =وللضيف يبنى في طويل الرفاعه .

جرحي عطيب ولابقى لي مقاضيب =وافخت حبل الوصل عقب انقطاعه .

كني بعد فقده بحامي اللواهيب =وكني غريب الدار مالي جماعه .

من عقب ذيب الخيل عرج مهاليب =ياهل الرمك ماعاد فيهن طماعه . # القصيده الثانيه للشاعر راشد بن معديه آل قير الخنافر قالها في الفارس ذيب بن جعفر بن عبود بعد موته في ثميلان قرب بيشه بسبب إصابة في رجله في أحد المغازي وتوفي بسببها يقول الشاعر :

رحنا من الماء في هوى شمخ النيب =وخلوا على العد المسمى بضاعه .

ياذيب أنا اوصيك لا تآكل الذيب =كم ليلة ٍ عشاك عقب ا لمجاعه .

كم ليلة ٍ عشاك حرش العراقيب =وكم شيخ قوم كزته لك ذراعه .

شف عايض ٍ ومعيض هم لك معازيب =وانا بشيرك بالعشا و الشباعه .

و عرار خيّال البكار الحنازيب =لا قل هوش مدرعين الجماعه .

وأولاد مسعود رماة ٍ معاطيب =ياويل من يعطونه الوجه ساعه .

خيّالة الشرفا حرار المراقيب =كم هجمة ٍ بايمانهم جت طماعه .

بارماحهم ينحون عنا الاجانيب =ولشيخهم يمشون سمع ٍ وطاعه .
وهذا ولكم مني جزيل الشكر والتقدير .

أخوكم أبا الذموم

سعد القحطاني
23-08-2006, 12:39 AM
الأخ ابا الذموم

الحقيقه ذيب بن هدلان وذيب بن عبود إسمين من أشهر فرسان قحطان نفخر بهم جميعاً وهم فرسان أبناء فرسان الله يرحمهم

لاهنت على الأيضاح وكشف اللبس الذي حصل إنكان فعلاً لبس

ولكن ماشاع واشتهر عند الجميع أن البيتين المذكوره لشالح بن هدلان رثاءً في إبنه ذيب

وإن كان الأمر كما ذكرت فأنا ارى ان يوثق هذا الكلام بأدله قاطعه ووثائق من المقربين للطرفين
لأنه قد يصعب تعديل المفهوم بعد هذه المده الطويله
بهدف تلافي هذا اللبس مستقبلاً عند المؤلفين والمؤرخين ........إلخ

والا انت كفو وتجيب العلم وتسد اللزوم لاعدمناك

تحيات وتقدير أخوك

أبا الذموم
24-08-2006, 01:22 AM
الأخ الغالي سعد القحطاني اررررررررررررررررررررررحب يالذيب

لا هنت على مرورك وبيّض الله وجهك على تعليقك الطيب ولك مني جزيل الشكر .

الشي الثاني لو سألت احد كبار السن او احد رواة الشعر المخضرمين من قبيلة قحطان لقالوا لك إن هذين البيتين للشاعر راشد بن معديه آل قير الخنافر قالها بعد موت الفارس ذيب بن جعفر بن عبود .

أخوك أبا الذموم

سنحان بن عامر
24-08-2006, 01:45 AM
تسلم يمينك يا أبا الذموم
طرح متميز وجهد كبير لا عدمناك يا القرم

أبا الذموم
24-08-2006, 05:17 PM
الأخ سنحان بن عامر أررررررررررررررررررررررررررررحب
لاهنت على مرورك للموضوع ولك مني جزيل الشكر على ردك الطيب .
أخوك أبا الذموم.

عبدالله بن غفره
24-08-2006, 05:35 PM
بيض الله وجهك

والله يرحمهم سطروا لتاريخ مفاخر تفخر بها قبيلة قحطان والعرب كافه



مواضيعك تجذب الأعضاء والمتصفحين لمتابعتها ( كلمة حق )


أخوك / الصغير

بن غفــــــره

جبل بن زيد
24-08-2006, 06:36 PM
السلام عليكم ورحمة الله وبركاته

ونعم والله بالثنين

وبيض الله وجهك ياكحيلان على المواضيع

التي قل ما نحصل عليها

فارس عبيده
24-08-2006, 11:44 PM
السلام عليكم ورحمة الله وبركاته

أنا اللي سمعت إن فيه إختلاط بين القصيدتين

والله أعلم

ابوخالدالجحدري
25-08-2006, 02:13 AM
اخي العزيز ابا الذموم دائما مواضيعك جميله للغايه اشكرك على طرح مثل هذا الموضوع لأن فيه لبس كبير . والسبب هو كتاب السديري .
وانا هنا اقول ان اي شخص لازال لديه شك عليه فقط ان يقرأ القصيدتين بتمعن وكلا القصيدتين تحتوي على البيتين السابقين ثم ينظر للرابط بين البيتين والبيت الذي يليهما في كل قصيده .واحب ان اشرح ماذكرت :

في قصيدة راشد ابن معديه يقول وهو مخاطبآ الذيب :

ياذيب انا بوصيك لاتاكل الذيب كم ليلة عشاك عقب المجاعه
كم ليلة عشاك حرش العراقيب وكم شيخ قوم كزته لك ذراعه

ثم نلاحظ ان الشاعر لازال يخاطب الذيب في البيت الثالث ويقول :

شف عايض ومعيض هم لك معازيب وانا بشيرك بالعشا والشباعه

وكما هو معروف ان عايض ومعيض هما اخوان ذيب . وهنا يتبين لنا الارتباط بين البيتين السابقين والبيت الذي يليهما .

اما في قصيدةشالح ابن هدلان فأن البيت الذي يلي البيتين السابقين وهو :

كفه بعدوانه شنيع المضاريب ويسقي عدوه بالوغى سم ساعه

وهنا الشاعر يصف افعال ابنه فقط . وهنا يتضح للجميع ان البيتين الذين عليهما الخلاف هي للشاعر راشد ابن معديه في الشيخ ذيب ابن عبود . هذا ما اردت ايضاحه لاخواني الاعضاء . كما اني اكرر شكري لاخي ابا الذموم على الجهد الرائع

وتقبلوا تحياتي ...............

أبا الذموم
25-08-2006, 11:32 PM
الأخوان : [ ابن غفره ، جبل بن زيد ، أبو خالد الجحدري ] أررررررررررحبوا يارجال

الله لايهينكم على مروركم على الموضوع ولكم مني جزيل الشكر وتأكدوا إن مروركم وتعليقكم على الموضوع إنه شرف لي .

ألأخ أبو خالد الجحدري تصحيحاً لما قلته بالنسبه عايض ومعيض وعرار هم أعمام ذيب بن جعفر بن منيس بن عبود وليسوا اخوانه لك مني جزيل الشكر .

اخوكم أبا الذموم

ابوخالدالجحدري
27-08-2006, 01:32 AM
الاخ العزيز ابا الذموم اشكرك على تعقيبك الجميل . اما بالنسبه للتصحيح الذي ذكرت ليس كما قلت ان عايض ومعيض وعرار اعمام ذيب ابن جعفر ابن عبود وانا اكد لك بما لايدعو مجال للشك ان عايض ومعيض هم اخوان لذيب وعرار عمهم جميعآومعيض هو من اخذ شيخة القبيله بعد اخيه ذيب وهو من عاصر الملك عبدالعزيز وكان قائدا لبعض غزوات التوحيد
ولو احببت ان ازودك بشجرة العائله كامله فأنا على استعداد . ولك مني فائق الاحترام والتقدير

أبا الذموم
27-08-2006, 10:40 AM
الأخ أبو خالد الجحدري أرررررررررررحب
بارك الله فيك اللي أنا متأكد منه إن عرار عم ذيب
أما عايض ومعيض فالمرحوم منديل الفهيد الروقي العتيبي وهو من أفضل من يكتب عن القصص القديمة سواءً لعتيبه أو قحطان يقول إن عايض ومعيض هم اعمام ذيب بن عبود .

عموماً لك الشكر والتقدير يالذيب والله لايهينك على كل حال والعم والأخ في مرتبة ٍ واحده في القدر والقيمة واختلاف الراي لايفسد للود قضية لك الشكر .

أبا الذموم

ابن شعواء
10-09-2006, 10:44 PM
الأخ أبا الذموم....مشكور على الموضوع المميز ، وهذي دائما عادتك ...ولكن عندي مداخلة على الموضوع ....على وقت شالح بن هدلان كان فيه شعار طاروقهم وقافيتهم وحده ،هم شالح بن هدلان و ابن معدية ال قير الخنافر وعبدالهادي ابن شعواء ال سبعان، وكما ذكرت فطاروقهم وقافيتهم وحده ودائما تنسب بعض القصائد لأحد منهم وهي للآخر، منها هذه الابيات ياذيب أنا بوصيك لا تاكل الذيب كم ليلة عشاك عقب المجاعة فهذه القصيدة التي ذكرتها في موضوعك ونسبتها لإبن معدية تكون لجدي الشاعر عبدالهادي ابن شعواء ونحن نعرف انها نسبت لشالح عن طريق السديري في كتابه ونحن نعرف أيضا أنه اعتذر لأسرة آل عبودبعد نشره الكتاب واسمحو له ولكن الاعتذار من المفروض أن يكون لآل شعواء لأنهم الذين قالوا القصيدة في ابن عبود وهي كما ذكرت معروفه على مستوى الجماعه الشيبان والشباب الذين عندهم دراية بالقصيد انها لإبن شعواء

أبا الذموم
15-09-2006, 02:49 AM
الأخوان : [ فارس عبيده ، ابن شعواء ] أرررررررررررحبوا يا رجال

لكم مني جزيل الشكر على مروركم على الموضوع وعلى ردودكم الطيبه فلكم كل الشكر .

الأخ ابن شعواء بالنسبه لجدك عبدالهادي ابن شعواء شاعر مافيه كلام وهو من أفضل شعار الخنافر على وقته هو وشالح بن هدلان وراشد بن معديه .

لكن اللي أعرفه ويعرفه كبار السن من رواة الشعر من قحطان إن البيتين :


يا ذيب أنا بوصيك لاتاكل الذيب = كم ليلة ٍ عشاك عقب المجاعه .
كم ليلة ٍ عشاك حرش العراقيب = وكم شيخ قوم ٍ كزته لك ذراعه .هي للشاعر راشد بن معديه آل قير الخنافر قالها بعد موت الشيخ ذيب بن جعفر بن منيس بن عبود .
والشاعر راشد بن معديه عاش أغلب حياته مع آل مسعود وخصوصاً مع آل عبود.
أما الشاعر عبدالهادي بن شعواء آل سبعان الخنافر وهو اللي قال في قصيدة ٍ له عقب وقعة عقيلان بين آل مسعود بقيادة الشيخ جعفر بن منيس بن عبود ومعهم آل الجرو عبيده بقيادة الفارس ضويحي بن عبيد الله بن عريج ضد قبيلة عتيبه بقيادة الشيخ محمد بن هندي بن حميد ومعهم بعضاً من قبيلة سبيع وانتصرت بانتصار قحطان على عتيبه وسبيع.
يقول الشاعر ابن شعواء :

حر ٍ شهر من صوب نجد ٍ مطاره = نوى المطار وقرًب الفطر الشيب .
ثوّر من الصخه تقطّع شراره = يتلاه من برقا أسوات العياسيب .
وعلى عقيلان نوانا بغاره = وعما علينا مدنا من الأقاريب .
قلط حشيفان يدور سباره = متعلي في نايفات المراقيب .
كانوا علينا والدبش بنت شاره = لاد الكريزي ميبسين المشاريب.
لحقوا قحاطين سواة النماره = والكل منهم لفها بالعراقيب .
ابشلف ٍ مظاربها سوات الحجاره = ترعى بها العرا ويرقى بها الطيب .
عاداتنا بالجلب ننقي خياره = ثلاثة الجذعان غصب ٍ بلا طيب .
اللي شرد خلا الحويا يساره = واللي نصا رنيه يدور معازيب.
عز الله إنها حجة ٍ بعتماره = نطاحت الوكحا انجوم المغاييب .
يا مسوي الفنجال كثر بهاره =عده على عروان واثنه لبو ذيب .
وعده على الشاوي متيه بكاره = ضويحي يا شوق البني الرعابيب .## [حر ٍ شهر من صوب نجدٍ مطاره ] المقصود هو الشيخ الفارس محمد بن هندي بن حميد .
## [ لاد الكريزي ] هم الحمده من عتيبه نسبة ً لأصلهم من الكرزان من البقوم .
## [ اللي شرد خلا الحويا يساره ] المقصود الشيخ محمد بن هندي بن حميد وعتيبه اللي معه .
## [ واللي نصا رنيه يدور معازيب ] المقصود قبيلة سبيع .
## [ عروان ] المذكور في القصيده هو الفارس عروان بن منيشط آل جاهل آل مسعود الجحادر.
## [ أبو ذيب ] المذكور في القصيده هو الشيخ الفارس جعفر بن منيس بن عبود آل مسعود الجحادر .
## [ ضويحي ] المذكور في القصيده هو الفارس ضويحي بن عبيدالله بن عريج آل الجرو عبيده .

أخوك أبا الذموم.

بن خرصان
22-09-2006, 01:40 PM
بيض الله وجهك يابالذموم

وعلومك دايما تنومس الرياجيل

كلمة شكر وتقدير لمجهوداتك

أبا الذموم
30-09-2006, 08:57 PM
الأخ ابن خرصان أررررررررررررررررررررررررررحب

لك مني جزيل الشكر والتقدير على كلامك الجميل وعلى ردك الجمل تقبل مني فائق الاحترام .

أخوك أبا الذموم .