استفسار عن عائلة بالقصيم؟؟؟ [الأرشيف] - شبكة قحطان - مجالس قحطان

مشاهدة النسخة كاملة : استفسار عن عائلة بالقصيم؟؟؟

فزاع قحطان

04-08-2006, 05:07 AM

السلام عليكم ورحمة الله وبركاته

ارحبوووووووووو يارجال

لاهنتم بغيت انشدكم من عنده عرف بعائلة العبدان بالقصيم و عفيف في نجد

لا تخلوناااا بفزعتكم الامر ضروري

عاشق الوطن

04-08-2006, 11:02 AM

الاخ فزاع القحطاني

السلام عليكم ورحمة الله وبركاته

سؤالك عن عائلة العبدان

سبق ان اوضح لي شخص من عائلة العبدان

انهم من العرينات سبيع وهي عائله طيبه تتميز

بالعلم والمعرفه وطيب المعشر

تحياتي

مذحج الطعان

04-08-2006, 04:10 PM

أخي الفاضل عاشق الوطن لابد لنا أن نفرق بين عائلة العبدان والعبداني

العبداني اللي في القصيم يرجعون لسبيع لكن العبدان أهل حرمة بسدير من تميم واللي في بريدة يرجعون لقحطان

وشكراً

فزاع قحطان

04-08-2006, 04:53 PM

لاهنتم اخوي عاشق العبدان يقال انهم يرجعون لقحطان وقسم منهم صدقت يرجعون لسبيع لكن سكان

القصيم يقال انهم من قحطان ولكن من اي بطون قحطان؟

عيافي بيض الله وجهك ووجه عاشق على الرد

القحطاني النجدي

05-08-2006, 12:12 AM

العبدان الي ببريدة وضرما من قحطان

اما الذين في عفيف فما هم قحاطين
و إن كان تبغى تأكد اسأل اي واحد بعفيف ويعلمك وش هم .

فزاع قحطان

06-08-2006, 02:27 AM

القحطاني النجدي ارحب ارحب لاهنت على مرورك اهل عفيف واهل القصيم عيال عم

جدهم واحد ولو اني اعرف منهم احد مانشدت بالمنتدى وانا اخوك علمنا وش يرجعون له

منكم نستفيد

القحطاني النجدي

06-08-2006, 11:26 AM

أنا أعرف واحد من اهل عفيف
يقول إن العبدان بعفيف ما احد يزوجهم وترى عفيف يغلب عليها قبائل بدوية وهم يعدون أغلب الحضر ما لهم أصل
بس يقول حتى الحضر (القبيلية) الي بعفيف ما يزوجونهم أبد وهذا مشهور .

هذا الي اعرفه بس .

منذر بن محمد القحطاني

06-08-2006, 03:46 PM

العبدان من العفالق من ال عياف

محمد بن عبدالله القحطاني

06-08-2006, 05:16 PM

صادفت رجل سعودي يعمل خارج السعوديه ويقال لعائلته العبدان ولكن سألت الشباب قالوا لي انه شيعي من اهل القطيف وسؤالي هل يوجد صله بينه وبين العبدان القصيم وعفيف وسلام على الجميع.

القحطاني النجدي

06-08-2006, 05:56 PM

ارجو من فزاع قحطان ان يذكر الدليل ان العبدان الي ببريدة هم ابناء عم الي بعفيف لأن هذا كلام يحتاج إلى توثيق
فالذين ببريدة من قحطان وكذلك الذي في ضرما
وفيه بعنيزة عائلة العبدان وهم أصل العبدان الي بعفيف وهم مناسبين اليحيا
واهل عفيف (القبيلية ) ما يزوجونهم ولا يتزوجون منهم .
ولك أن تسأل أي شخص في عفيف ويعلمك الخبر
هذا على حسب الواقع وحسب سؤالي عنهم
وما نحب انا نتكلم في الناس لأن الطعن في الأنساب شي محرم وما هو هين .

باختصار
العبدان الي بعفيف وعنيزة غير الي ببريدة لأن الي ببريدة أصلهم قحاطين .

عزران بن حرق

07-08-2006, 01:15 AM

قحطان معروفين وقبايل قحطان معروفه عند الله وخلقه والله يعز قحطان من بعض العوايل
والعوايل جمع عايل وما في قحطان الله يعزهم عايل

فزاع قحطان

07-08-2006, 02:46 AM

بارك الله فيكم جميع بالنسبة لاخوي القحطاني النجدي اللي ذكر لي انهم عيال عم لاهل بريده احد كبار السن منهم

يدعىب احمد بن محمد العبدان ولقدسالت من طلب مني ان اتاكد عن اصلهم بقولك عن اهل عفيف بانهم لايزوجون

ولايتزوج منهم فقال لي بان منهم من هم متزوجين من قبائل عتيبة والدواسر وسبيع

هذا والعلي القدير هو الاعلم مني ومنك دمتم بود

كل نهار الملزمة نب ربعه وأنا نهار الملزمة قلت قحطان

آل نادر

07-08-2006, 08:27 AM

العبدان الذين في عفيف أبناء ثلاثة أشخاص فقط علي (توفي قبل عشر سنوات ) وإبراهيم (توفي العام الماضي) وعبد العزيز ولايزال على قيد الحياة .
وما ذكره القحطاني النجدي صحيح فلا أعلم أحدا من القبائل المعروفة تزوج من العبدان ولا زوجهم حتى الحاضرة الذين ليسوا خضيرية .
هذا الذي أعرفه .
وأما ما ذكره فزاع قحطان من أن عتيبة و الدواسر وسبيع تزوجوا منهم أو زوجوهم فليته يذكر بعض النماذج حتى نعرف .
ولعله يقصد عائلة ثانية غير الذين في عفيف.
ولا يوجد من العبدان في عفيف ألا ابناء الثلاثة الذين ذكرتهم
وهم نعم العائلة ما نقول فيهم أي شيء.

لكن ارجو من فزاع قحطان أن يتثبت فلم أسمع انا واحداً منهم يقول إنا قحاطين .
والله أعلم .

فزاع قحطان

07-08-2006, 04:12 PM

اخواني الكرام ما انا الا وسيط اسعى للخير بين شخص استفسرني واستفسرتكم لجهلي بمن يسال عنهم ــــ

فلا ناقة لي فيها ولا جمل ــــ اخي آل نادر من الواضح بان لك علاقة بهذه العائله والدليل معرفتك بهم

اما من ناحية سؤالك لي فلقد سالت سآلي عما قلت فاجاب بان علي ( المتوفى ) وابنيه متزوجون من الدواسر

من اهالي محافظة الخرمة التابعه للطائف ولااعلم لنااا بانساب اخوي علي الاخرين

والله يرعاكم

بن عبدان

15-08-2006, 05:15 AM

على فكرة ياأخوان يوجد ناس من العبدان في الكويت والعراق وهم كثرة

الفاهد

01-02-2007, 11:46 PM

السلام عليكم ورحمة اللة وبركاتة

اخواني نشكر لكم مشاركاتكم ونقول ان العبدان في بريدة ونعم الرجال ففيهم من الدين و الخوة والمعشر والمرجلة مايشد الرجال اليهم وكما انهم عائلة يكثر فيهم المتعلمين

والف نعم بقحطان كافة من الجنوب الى اوساط نجد

عاشق

13-02-2007, 09:54 PM

شف ياخوي فزاع كلهم من يوم عرفت نفسي مافيهم قحاطين اكثرهم عتبان وعنوز

سالم الخنفري

13-02-2007, 10:01 PM

اذا كنت تقصد العبيدان فهم من السحابين من العفالق من قحطان طبعاً .... اما العبدان فلا اعلم عنهم شيء

العاطفي نت

14-02-2007, 03:46 PM

يالربع وقفوا الرمي شوي

ال عبدان فيه تشابه اسماء

فيه منهم من قحطان وهو فخذ من ال عاطف الجحادر
ومساكنهم في المزاحميه والهياثم وبعض منهم في القصيم ومنهم اللواء محمدابن رسل قايد الطيران بالقوات البحريه واخوه العميد متقاعد سليمان بن رسل قايد لواء الملك خالد بالحرس الوطني سابقا وابن سمران وابن فهم ابن مجري وهذولا معروفين اصلهم وساسهم وهم من ال عبدان ال عاطف

اما ال عبدان الي تقولون عنهم في عفيف ماعندنا فيهم علم يمكن يكون تشابه اسماء

وعفاكم

الفاهد

04-05-2007, 06:27 PM

في هذ الرابط ماذكرة العلامة حمد الجاسر عن العبدان كاملا

وتقبلوا خالص التحية
http://www.ansab-online.com/phpBB2/showthread.php?t=4399

:52_asmilies-com: :52_asmilies-com: :52_asmilies-com: :52_asmilies-com:

الفاهد

04-05-2007, 06:31 PM

كتاب "اسر تحضرت في الجزيرة العربية" ومصادره اكثر من 140 كتاب وغير المقابلت مع اصحاب الشان ..تاليف الشيخ عبدالكريم حمد الحقبل .
عضو الجمعية التاريخية السعوديه .
عضو اتحاد المؤرخين العرب.
عضو رابطة الادب الاسلامي العالميه

الكتاب قيم جدا ومفيد

وفيه ذكر 4 من اسرة العبدان في صفحة 126

العبدان اللي بحرمة سدير من تميم
العبدان ضرما من زعب.
العبدان اللي في هجرة الفريشه غرب ليلى بالافلاج من العجمان .
العبدان اللي في ضرما وبريده قحطان

يعني موجود العبدان بضرما زعوب وقحاطين

انا لا آخذ الجاسر رحمه الله كمصدر لي ..وكل واحد ومصادره التي يثق فيها

ابن عبدان وافتخر

12-06-2007, 05:00 AM

اخواني

العبدان في القصيم ثلاتة اقسام :

1-العبدان في مدينة بريده اصلهم من ضرماء ومنهم
الشيخ عبدالله عبدالعزيز العبدان رحمه الله
واولاد عمهم في ضرماء وهم قحاطين

وماذكرة العلامة حمد الجاسر
العبدان في بريده :هاجرو في اوائل هذا القرن اي حوالي 128 سنه
من ضرماء وهم من الحرقان من عبيده من قحطان

وكذلك ما ذكره الشيخ عبدالكريم حمد الحقبل
وهو
عضو الجمعية التاريخية السعوديه .
عضو اتحاد المؤرخين العرب.
عضو رابطة الادب الاسلامي العالميه
في كتابه"اسر تحضرت في الجزيرة العربية" ومصادره اكثر من 140 كتاب
غير المقابلات مع اصحاب الشان

2-العبدان في مدينة البكيريه هم ليسو في الاصل اسمهم العبدان وانما اسمهم
العبداني وموجود جزء منهم في الحجاز

3-العبدان في مدينة عنيزه اصلهم من عفيف وهم ابناء واولاد عم العبدان في
مدينة عفيف ولا اعرف الي اي قبيله ينتمون ولكنهم ليسو قحاطين

وحسب معلوماتي يوجد العبدان في مدينة ( حايل -والمجمعه -والخرج )
ولكنهم لا يرجعون الي عبدان ضرماء

ولكن العبدان في الكويت يرجعون اصلهم من ضرماء

اما العبدان في العراق فلا اعلم عنهم شي

آل نادر

13-06-2007, 09:57 AM

كلام الأخ "ابن عبدان وافتخر " هو الصحيح

والعبدان الي بعفيف ماهم قحاطين ماهم قحاطين ماهم قحاطين
هم مناسبين الصنااااع وهذا معرروووف في عفيف
وبامكانكم أن تسألوا أي واحد في عفيف ويعلمكم

ابوسعد العبدان

30-06-2007, 09:45 PM

بسم الله و على بركة الله

احبتي

عبدان عفيف ( العم علي العبدان )
عبدان بريده و عنيزه ( العم الشيخ عبدالله العبدان ) من ابناءه عبدالعزيز مدير جمعية البر في الرياض

كلهم يرجعون لأصل واحد
و عندك عبدان الخرج و ضرما و فيه من الجنوب و المجمعه و في سوريا ( يوجد مؤرخ من العبدان عاش و تزوج فيها ) و فيه بالشرقيه و حائل
لكن الي يقول عن الشيعي ما عندي علم عنه

سيف ابن ذي يزن

02-07-2007, 12:02 AM

الصلاة والسلام على محمد ابن عبدالله
اخي ابو سعد العبدان وفقك الله
هل انت اخي الكريم من هذه الاسره الكريمه ولا نزكي على الله احد
اذا كنت من هذه الاسره فارجو افادتنا الا اي فخذ تنتمون 00
شاكرا لك ولي عوده بعد اجابتك
تحياتي 000000

وازع

02-07-2007, 03:43 PM

ابوسعد لاهنت افتح ايميلك واستقبل الاضافات التي جتك

ابن عبدان وافتخر

09-09-2007, 02:22 AM

بسم الله الرحمن الرحيم
السلام عليكم ورحمة الله وبركاته
الاخ ابو سعد العبدان
لقد قمت بسؤال احد افراد عائلة العبدان من ضرماء وهم قحاطين
وافاد بأن الشيخ عبدالله العبدالعزيز العبدان رحمه الله
في بريده وابنائه عبدالعزيز الملحق الثقافي السعودي في بغداد وثم مصر وثم مدير جمعية البر في الرياض
وعبدالرحمن الامين العام للمجلس الاعلي للاعلام وزارة الداخليه
وسليمان رحمه الله رئيس مكتب الحرس الوطني في القاهره
ومحمد وناصر
هم اولاد عمهم
وافاد كذلك بان عبدان عنيزه وعبدان عفيف ليست لهم قرابه في عبدان ضرماء

أبو ياسر

13-09-2007, 11:25 PM

مشكورين على المعلومات ياشباب والله يعطيكم العافية

عبدان بن عبدان

25-11-2008, 12:13 AM

يا اخوان

العبدان بعفيف وبريده و عنيزه والخرج والدلم والهياثم الاحساء والجبيل والدمام والطائف ومكه وايضا ضرماء اصلهم واحد وابناء عم واللي يقول ان العبدان ببريده عيال عم ضرماء ولا لهم قرابه باهل الرياض والخرج انا ااكد له انهم عيال عم عيال عمنا جميعا وحنا نجتمع بالرياض كل 6 اشهر واللي يعارض انا اواجهه وجه لوجه

عبدان بن عبدان

25-11-2008, 12:35 AM

الشيخ عبدالله العبدالعزيز العبدان رحمه الله
وابنائه عبدالعزيز/ الملحق الثقافي السعودي في بغداد وثم مصر وثم مدير جمعية البر في الرياض
وعبدالرحمن/ الامين العام للمجلس الاعلي للاعلام وزارة الداخليه
وسليمان/ رحمه الله رئيس مكتب الحرس الوطني في القاهره
ومحمد
وناصر بريده

وايضاعبدان عنيزه وعبدان عفيف وايضا منتقل بعض منهم للطائف ابناء عم لزم وهم متزوجون من العتبان والدواسر واللي يعارضني يواجهني

العم مرشد /وله من الابناء
1-محمد/ رحمه الله وابناءه بالاحساء والجبيل الى الان

2-وسعيد /رحمه الله الخرج وانتقل ابنه عبد العزيز للرياض المدير بوزاره المعارف بالخرج سابقا

3-وناصر /اطال الله بعمره وله 3 ابناء رجال وهو الى الان بالخرج وابناؤه وهم ابناء عم لزم

العم راشد /وله من الابناء

مساعد
سالم
ومحمد بالهياثم وهم ابناء عم لزم

ابناء ابراهيم / حائل

عبد الرحمن/ اليمامه بالخرج رحمه الله وله من الابناء
1-سعد /رحمه الله الرياض وله ابناء وهو متزوج من الدواسر
الرياض
2-فهد / الرياض وله ابناء الرياض وهم ابناء عم لزم

مساعد / الدلم وله من الابناء

1- ناصر/ رحمه الله وابناؤه

2- راشد / وابناؤه

3- فهد / وابناؤه

العم سليمان / وابناؤه الرياض عليشه

كل ماذكر ابناء عم في جد واللي يعارض يواجهي حنا نلتقي في جد واحد ولنا ملتقيات اجتماع وفله احجاج

اما اذا كان ماقيل ان اهل بريده ابناء عم لاهل ضرماء فقط فهذا غير صحيح ولنا جماعه لنا بالعرق ابناء سعد رحمه الله ولنا ايضا بالكويت وسوريا

والــــــــــــــــــــــــــــــــــــــــــي جـــــــــــــــــــــالس يهايط ويلعب باصــــــــــــــــــــــول الناس ويلفق ان عجبه ال فلان لانهم مراكز خــــــــــــــــــــلاهم عيال عمه وغيــــــــــــــــرهم مايعـــــــــــــــرفهم يستحي على وجهه

عــــــــــــــــــــــــــــيال عمك عـــــــــــــــــــــزوتك

وكلـــــــــــــــــــــــــــــــنا اصل واحد

حنا بني عبدان والساس قحطان ** بافعلنا زمنا بروس الطويلة
ركابة الخيل الاصايل وظفران ** شجعان ياويل من نحتميله
اسطر فخر متعدادت وعنوان ** تكتب بطولات الرجال الجليلة
والنعم في كل القبايل ولا هان ** شخص ظلام الليل ولع فتيله
وسلامتكم

سيف ابن ذي يزن

30-11-2008, 11:04 PM

عبد العزيزبن سعد القحطاني

04-12-2008, 12:57 PM

العبداني اللي في القصيم يرجعون لسبيع لكن العبدان أهل حرمة بسدير من تميم واللي في بريدة يرجعون لقحطان

وشكراً

سمعت مثل كذا

ولاهنت

سيف ابن ذي يزن

19-12-2008, 12:56 AM

ولا زال الانتظار يابن عبدان
ارجو ان تكون بصحه جيده

سيف ابن ذي يزن

13-01-2009, 12:14 AM

]-12-2008, 12:56 A

بانتظارك اخي
ارجو من الله سبحانه ان تكون بصحه جيده [/color]

آبن فهم ال عبدان العاطفي

29-09-2009, 01:50 PM

آبن فهم ال عبدان العاطفي

29-09-2009, 01:52 PM

http://www.d1m3.com/vb/images/smilies/zmnn201436.gifhttp://www.d1m3.com/vb/images/smilies/zmnn201436.gifhttp://www.d1m3.com/vb/images/smilies/zmnn201436.gif

السلام عليكم ورحمه الله وبركاته
هذه نبذه بسيطه عن قبيلة ال عبدان ال عاطف الجحادر قحطان

في البدايه عبدان بن مسفر بن مبارك بن سالم بن سريع بن حسين بن حمد بن عاطف بن سلطان بن دهيم بن محمد بن سليمان بن جحدر
هو شقيق سعيدان بن مسفر بن مبارك بن سالم بن سريع بن حسين بن حمد بن عاطف بن سلطان بن دهيم بن محمد بن سليمان جحدرشيخ ال عاطف
وهو شقيقه من الام والاب
حيث ان الشيخ مسفر له من الابناء خمسة فرسان(سعيدان .وعبدان . وعيد . وعايد. وعياد.)
و له من النسوه اثنتان
1- معجبه وهي والدة عبدان وسعيدان شيخ ال عاطف
أهل الوسم المعروف وهو كلوب ومطرق ورقمه
ولكن بعد مرور الزمن وتكاثر النسل أصبح ال عبدان لهم شأنهم وال سعيدان كذالك لهم
شأنهم فيما يتعلق بالفرقه والجاهيات وباقي الامور.
2- حجريه وهي والدة عيد وعياد وعايد وهم أخوة سعيدان وعبدان من الاب

وينقسم ال عبدان الى : ثلاثة أقسام
1- ال محمد ( ال هتل ) ومنهم:
ال دليان . وال مجريhttp://www.d1m3.com/vb/images/smilies/zmnn201436.gif
ال مجري( وهم اجداد ال فهم المعروفين حاليا
ومنهم الشيخ :حزام بن فهم بن مبارك بن حسين بن مجري بن محمد بن سالم بن عبدان ال عاطف وأبنائه
والشيخ : عشق بن فهم بن مبارك بن حسين بن مجري بن محمد بن سالم بن عبدان ال عاطف وأبنائه
والشيخ : فهد بن فهم بن مبارك بن حسين بن مجري بن محمد بن سالم بن عبدان ال عاطف وأبنائه
والشيخ مهدي بن حزام بن فهم بن مبارك بن حسين بن مجري ال عبدان وابنائه وهو كبير ال فهم ويعتبر صاحب الكلمةوالراي السديد نيابة عن بني عمه ال عبدان في المناسبات والطلبات واصلاح ذات البين)
وال عضو ومنهم الشيخ فهد بن مسفر بن حمد بن مسفر بن مجري العضو ال عبدان ووسلالته
ومنهم سلالة الشيخ : حمد بن مجري بن حمد بن مجري العضو ال عبدان
ال دليان ( ومنهم سلالة الشيخ : عبيد بن هطيل بن عبيد بن دليان ال عبدان ( ومنهم الشيخ سالم بن عبيد بن هطيل بن عبيد بن دليان بن محمد بن سالم بن عبدان ال عاطف ال عاطف )
ومنهم الشيخ :دليان بن سالم بن عبيد بن هطيل بن عبيد بن دليان ال عبدان ال عاطف )
2- المدافعه ومنهمhttp://www.d1m3.com/vb/images/smilies/zmnn201436.gif
ال محمد

ومنهم سلالةالشيخ :هادي بن محمد المدفع ال عبدان ال عاطف
ومنهم الشيخ ( محمد بن هادي بن محمد المدفع ال عبدان والشيخ شبيب بن هادي بن محمد المدفع ال عبدان والشيخ مران بن هادي بن محمد المدفع ال عبدان )
وأبنائهم
والشيخ : شعيل بن محمد المدفع ال عبدان وأبنائه
والشيخ: غيث بن سالم بن محمد المدفع ال عبدان
ال سالم :وهم سلالة الشيخ : سالم بن هادي المدفع ال عبدان ال عاطف
مسفر بن سالم بن هادي المدفع ال عبدان
والشيخ
محمد بن سالم بن هادي المدفع ال عبدان
والشيخ
محماس بن سا لم بن هادي المدفع ال عبدان

3- ال سمران http://www.d1m3.com/vb/images/smilies/zmnn201436.gif
ومنهم سلالة المرحوم
الشيخ فهد بن سمران ال عبدان ال عاطف
ومنهم الشيخ
سمران بن فهد بن سمران ال عبدان ال عاطف وأبنائه
والشيخ : محمد بن سمران بن فهد بن سمران ال عبدان ال عاطف
والشيخ : فهد بن سمران بن فهد بن سمران ال عبدان ال عاطف
والشيخ
محمد بن فهد بن سمران ال عبدان ال عاطف وأبنائه
وأيضاً
الشيخ حمد بن مبارك ال سمران ال عبدان ال عاطف وسلالته
وأيضاَ
الشيخ :مبارك بن محمد ال سمران ال عبدان ال عاطف وسلالته
ال رسل ومنهم
الواء ركن طيار / محمد بن رسل ال عبدان ال عاطف قائد القوات البحريه الملكيه السعوديه
العميد متقاعد / سلمان بن رسل ال عبدان ال عاطف قائد لواء الملك خالد بالحرس الوطني .بمنطقة الرياض سابقا
والشيخ : فهد بن رسل ال عبدان اال عاطف وأبنائه
وال دخيل الله
ومنهم الشيخ : محمد بن دخيل الله ال عبدان ال عاطف
وسلالتهم

آبن فهم ال عبدان العاطفي

29-09-2009, 01:53 PM

دياااااااااااااااار ال عبدان قحطانhttp://www.d1m3.com/vb/images/smilies/zmnn201436.gif
اما بالنسبه للديار فديارهم سابقأَ الرين وأيضاَ الجنوب في تثليث والحصاه وأما حالياَ فمعظم
رجالهم في الرياض والمزاحميه والخرج والقصيم
فرساااان ال عبــدااان قحطانhttp://www.d1m3.com/vb/images/smilies/zmnn201436.gif
الفارس والشيخ: دليان بن محمد بن سالم بن عبدان ال عاطف
الفارس دليان هو (( دليان بن محمد بن سالم بن عبدان ال عاطف ))
وسلالته حاليا هم ال هطيل ومنهم
الشيخ والفارس1/ الشيخ عبيد بن هطيل بن عبيد بن دليان بن محمد بن سالم بن عبدان ال عاطف
وهو فارس وكريم وشجاع ومضرب مثل عند ربعه في الحمياء وكان له شأنه عند ال عبدان وال عاطف وقحطان
له من الذريه رجال : الشيخ سالم بن عبيد بن هطيل ال دليان والشيخ حزام بن عبيد بن هطيل ال دليان.
2/ الشيخ والفارس هادي بن هطيل بن عبيد بن دليان بن محمد بن سالم بن عبدان ال عاطف
وهو فارس لا يشق له غبار كان مضرب مثل في الشجاعه عند ال عاطف وهو حامل بيرق ربعه في الطايف
ومات رحمة الله عليه اثناء توحيد البلاد كان مقداما يفتخر بشجاعته جميع ربعه وكنت اذكر الكثير من المديح
في شأنه من كبار السن والقصص البطوليه حوله ......... شيخنا هادي بن هطيل كان له من الذريه بنت اسمها نوره
من احفادها الشيخ : حزام بن ناصر بن ملهي بن سعيدان.
بعد هذا التوضيح السريع سوف نتكلم عن الفارس (( دليــــــــــان)) ــ
اثناء المعارك التي حدثت بين ال عاطف وقبيلة يام برز الفارس ((( دليــــــــــان )) بشجاعته وبطولته وبره بقسمه وحميته
والجميع يعرف ان الغزو والمعارك يقتل فيها الأبطال ضريبة الشجاعه والأقدام وخلال المعارك التي حدثة بين يام وال عاطف قتل الكثير من
الطرفين ,
وقد قتل الأمير والشيخ سعيدان على يد الياميه
وقد قال الشاعر اليامي في هذا الموقف
والي خذانا بالمغازي (( دليان )) = مرن مع قومه ومرن"فرودي
وهذا على غمه ذبحنا سعيــدان = الي جراته كما وصف الفهودي
جا يعتليني فعتليته بدسمان =ووقيت خده من صليب الحيودي
الأ مير سعيدان هو عــــــــــــم سالم بن عبدان جد الفارس ( دليــــــــــــــــان ) وكان لابد من الثار من قاتل الشيخ سعيدان
وقد تصدى لهذا الأمر الفارس (دليان) حيــــــث اقســـــــــــم ان يأخذ بدم الشيخ سعيدان بن مسفر ــــــ خمسة عشر رجال من فرسان يام ـــــ

وفعلا بر بقسمه وقتل اكثر من خمسة عشر فارس من يام.

وهنا يقول احد شعراء ال عاطف من (الدخن )

اغدوا عصب كف(ن)على الحف ضفران****واحموا ديار بلادكم والجدودي

والي خذاهم بالمغازي ((دليــــان))******مرن مع ربعه ومرن فرودي
*وهنا نلاحظ الشاعر الدخيني استشهد ببيت اليامي في الأبيات التي قالها اليامي
( البيت الاخير)
والدخيني يقصد ان دليان خذا بثار الشيخ والفارس سعيدان بن مسفر وهو مع قومه وايضا لوحده وهو هنا يحث ربعه مستشهدا ببطولة الفارس دليان اللذي خذا بثار عم جده
حيث ان سعيدان بن مسفر عم الشيخ والفارس سالم بن عبدان بن مسفر جد الفارس دليان بن محمد بن سالم بن عبدان بن مسفر ال عاطف

ومن المعروف ان الفارس دليان قد قاتل لوحده احيانن فهو لم يرضى بغزوه او اثنتين بل اراد ان يبر بقسمه وان يقتل اكثر مما اقسم عليه وخمسة عشر

من فرسان يام وهذا ما نلاحظه في الأبيات ((( مرن مع قومه ومرن فرودي)))
والفارس دليان كان يضرب به المثل عند ربعه في الخوه والحمياء

فهذا احد الشعراء يمدح فروسيته ووقفته مع الخوي وكانت المناسبه لأبياته انه احد الأشخاص لانريد ان نحدد من اي فخذ هو لكي لا نسبب

حزازيات يدعى (( عدلان )) تخلى عن خويه في معركه
فقال الشاعر::
يا بيض يا خفرات كبن عدلان = خلا خويه يوم جات الضبابه
ليته خوي عبيد ولا (دليــان =ولا رديف مجري(ن)كان جابه
عبيد :عبيد بن دليان بن محمد بن سالم بن عبدان
مجري : اخو دليان وسلالته ال فهم والعضاوه
وايضا من المعلومات التي لازالت حتى الان
ان هناك جبل في ديار يام يسمى (( جبل دليـــــان )) وسمي بذلك لان دليان يقال انه وجد ميت هو وعبد له في ذلك الجبل حيث كان مستمرا في

طلب المزيد من فرسان يام بدم الفارس و الشيخ سعيدان ولم اعلم كيف توفي رحمة الله عليه ولكن هذا ما ذكر .

الفااااارس والشيخ: مجري بن محمد بن ساالم بن عبدان ال عاطف
فارس معروف ويشتهر مع فروسيته النادره جمال الخلق وطيب الفعل له من المواقف الطيبه مع ربعه وبني عمه ال عبدان وال عاطف وقحطان عامه من افضل الصفات التي يتميز بها رحمةَ الله الكرم والشجاعه فكان معروف بالحميه لربـعه
وهذه أبيات قيلة في مـدح الفارس
يابيض ياخفرات كبن عدلان ×××خلى خويه يوم جات الضبابه
ليته خوي عبيد ولادليان ××× ولارديف مجري(ن) كان جابه
توضيح الاسماء في البيتين
1-مجري : هو الفارس مجري بن محمد بن سالم بن عبدان ال عاطف
2- دليان: هو الفارس المشهور دليان بن محمد بن سالم بن عبدان ال عاطف
3-عبيد: هو ابن الفارس دليان وهو عبيد بن دليان بن محمد بن سالم بن عبدان ال عاطف

الفاارس والشيخ:مسفر بن مبارك بن حسين بن مجري ال عبدان ال عاطف الملقب ب( زهير)
فارس معروف لايشق له غبار له من المواقف البطوليه في ساحه المعارك كان شجاعا كريما يتمتع بالقوه والشجاعه وهو من المشاركين مع الملك عبدالعزيز ال سعود في توحيد المملكه وكان له مقامه الخاص لدى الملك عبدالعزيز ال سعوود وكان معروف بالحميا ويقال انه في احد المجالس كان ابن سمران وهو جد ال سمران حاليا أطول رجل في ال عاطف وعندما قام من المجلس قال واحد من الحاضرين يمازحه
يافكرتي ياطول ابن سمران === ياسرحتن محدن براقيها
فكان الفارس والشيخ مسفر بن مبارك( زهير ) موجود في المجلس ورد على هذا الرجل بقوله
لاعاد تنبث كما الفيران ===رجلك لاتخطي مواطيها

الفارس الشيخ :فهم بن مبارك بن حسين بن مجري ال عبدان ال عاطف
الشيخ والفارس :فهم بن مبارك بن حسين بن مجري ال عبدان العاطفي رحمه الله كان رحمه الله شجاعا كريما محبوب عند جماعته وعند القبائل الاخرى متماسك بأمور الدين
وكان من ضمن المشاركين في توحيد المملكه مع الملك عبدالعزيز وقد برز فعل الفارس فهم بن مبارك في معركة الرغامه مع الملك عبدالعزيز وقد اثنى عليه الملك عبدالعزيز وكان له مقامه الخاص عنده

الفارس والشيخ :هادي بن محمد المدفع ال عبدان ال عاطف
كان فارس وله من المواقف البطوليه في توحيد المملكه العربيه السعوديه على يد الملك عبدالعزيز ال سعود وكان معروف أنه أذا نوى يغزي على احد القبائل المجاوره أنه يذهب لوحده ويذكرانه قد أتى بذود كامل الى ربعه قد كسبه من احدى القبائل المجاوره

الفارس والشيخ: فهد بن سمران ال عبدان ال عاطف
كان من الفرسان المشهورين وكان من ضمن المشاركين مع الملك عبدالعزيز في فتح مكه .وله من المواقف الطيبه مع ربعه وبني عمه ال عبدان وال عاطف وقحطان كافه

الفارس والشيخ : سالم بن هادي المدفع ال عبدان
كان من ضمن الفرسان المشاركين في توحيد المملكة مع جلالة الملك عبدالعزيز
الفارس والشيخ: سالم بن محمد المدفع ال عبدان ال عاطف
كان من الفرسان المشاركين في توحيد البلاد مع الملك عبدالعزيز ال سعود

االفارس والشيخ : مجري بن حمد بن مجري العضو ال عبدان
وهو صاحب المضيف المشهور في الديره ( الرياض سابقا ) وكان من المقربين لجلالة الملك عبدالعزيز ال سعود

االفارس والشيخ :حمد بن مجري العضو ال عبدان و الملقب ( الاخن )

بالنسبه للغزوات فيعلم الله لو أذكر غزوات ال عبدان ال عاطف أيان ماكانو جميعاَ مع أخوانهم ال سعيدان وبعد ما أفترقو لجف القلم من كثر غزواتهم مع القبائل المجاوره ولكنني وبقدر الامكان لا احاول التطرق لذكر الاسماء فجميعنا أخوه تحت راية ال سعود والله يديم الامن والامان .

آبن فهم ال عبدان العاطفي

29-09-2009, 01:54 PM

شعراء ال عبدان قحطانhttp://www.d1m3.com/vb/images/smilies/zmnn201436.gif
الشاعر الكبير : غيث بن سالم ال عبدان ال عاطف وان شالله بجيب لكم احدى قصائده عن قريب
ووالشاعر الكبير ابن دخيل الله الذي يقول في أحد قصائده:
ياناشد عني ترى لي عشيـره ... الاد عاطف من عصـور الصحابه
ومن لانفعني في الليال العسيره... لامت قبري لايوفي ترابـــــه
وايضا من الشعراء الشاعر فهد بن حزام بن فهم ال عبدان ال عاطف شاعر الاماره
ويقول :
http://www.d1m3.com/vb/images/smilies/zmnn201436.gif
عودٍ أذا هذرا يهذري على الطيب
قولة هلا يامرحبـا فـي لسانـه
ويشوش راسي لاسمعت التراحيب
من شايب ٍ حاش الثناء في زمانه
سلام ياراعي الكرم والمواجيـب
للي فرض بين النشامـا مكانـه
له وقفه لاكشـر بنابـه الذيـب
وقفة قسى ماهيب وقفـة ليانـه
تركز له البيضاء بروس المراقيب
أبن وحي ماخذ عليهـا ضمانـه
يكرم عن ازله ويكرم عن العيب
لاجاء مجاله فيه تفخـر اخوانـه
ويقول ايضاhttp://www.d1m3.com/vb/images/smilies/zmnn201436.gif
والبارحه مامسيت والناس ممسيين... احس بــين اضـــلوعــي الــنار تشتــب
اقنب قنيب الذيب من وقتي الشين... من وقتي القاسي ولاهوب من حب
هذا زمان قلب جميع الموازين... خلى قليل الاصل للاصل ينـــــسب
وراعى الوفاء في مامضى له معادين... قليل حالٍ وماحدٍ له بيحـــــــسب
ولارديٍ كل العرب له مودين... من شان ماله لاتــــــــــــسبه فتنشب
ويقول الشاعر مشبب بن عشق بن فهم ال عبدان ال عاطفhttp://www.d1m3.com/vb/images/smilies/zmnn201436.gif
قالت من أنت ولآزم تجاوب الان
قلت اسمعيني والجواب بقصيده
دامك سألتيني فلانيب حيران
متعـود لآقلـت شي مااعيـده
ياضامر السرجوف يامطرق البان
ياللي عيونك في سهمها مكيـده
انا قحطاني والفخر صوب قحطان
والله مايكفيه حبر وجريده
ربعي جحادر وافتخر طول الازمان
اهل القنا واهل الفعول المجيده
ولي عزوت(ن) نوماسهـا رده الشان
اهل المواقف في الليال الشديده
عواطف(ن) رجالنـا بكل ميدان
طبع الحميا جاري في وريده
وصغيرنا في شبحته طير حوران
انشهد انه عنـد ربعه وليـده
وعبدان هـو جدي واخونـا سعيـــدان
عيال مسفر يوم كلٍ وعضيـده
فينا مجري والصميـدع دليــان
وعبيـد وهادي وافخــري يانشيـده
اهل البيارق يوم روغات الاذهان
والجيش يثبت لاتعزوى عقيــده
هـذي جذوري قلـتها لك وطربان
وماهوب طبعـي لكن انتـي عنيـده
قالت نسيـت ابوك وشفيك عجلآن
قلت الفخــر يابنت مكثر رصيـده
ابوي يدعونه بوقــته شحيمـــان
وهـذي تكفــي والمـزايا عديـده
قالت بقى وحــده ولا تـكون زعلان
منهــم خوالك واللـه اني سديده
قلت الخوال اكبـر من حروف ديــوان
وشلون توفيــهم حروف القصيــده
ياوالله اللي بفتـخر بال سفــران
خوالـي اللي في الهقــاوي بعيــده
خيـــــالة الــــبلها اليا ثار دخـــــان
اقربهم الي يجمد الســيف بيـده
ماوخروه الا بســمن وشحمـــــان
يالله عســىا منتي لقصدي بليـــده
هذاك جــدي يوم توحيــد الاوطان
في نصــرة بن ســـعود واهــل العقيــده
قالت لك الله مابقـى شي مابان
وانا لك ابقـى في الليــال المديـــده
قلـت الله اكبــر عد ماهل ودان
وعداد ماتقـرى كتــــابه عبيــــده
الموت قافيـــني ولو كان ماكان
وبخــتم كلامي جملــتين مفيــده
لو كان زيــنك يفــتن قلــوب واعيان
ماوالله اخطــي دام نفــسي رشيـده
سؤال وجاوبتـه وكلــه علشــــان
عيــنك وانا يابنـــت مانيـــب صيــــده
هــذي القصيــدهـ ألقــاها الشاعر :مشـبب بن عشـق بن فهم ال عبدان ال عاطف امـام جمــع غفيــر من رجــال وشيوخ قبيلــه قحطان في احـدى المناسباات التــي اقيــمت من شان أصلآح ذات البيــن وارجــو المعــذرهـ
لعــدم اكتــمآل القصيـدهـ .

عـــد النجــوم وعــد مــاهــــل ودأن ***** يامرحبــــا ترحيــــبه كلـــها نــــــــــور
ترحيبه تبــقى على مر الآ زمــــان ***** قوة صدأها تجعـل البــــال مســـــرور
ترحيبه بسمي وبسـم ال عبـــدان ***** على الشحم والعود والكيــف منحور
ترحيبه الصفطان بشـــيوخ قحطان ***** شيوخنـا الـــي كل شيـــــــخ وله دور
بين القبــــايل فـازو برده الشـــــان **** وفازو بعســف الخيل ومعانق الكـــور
انتم بني عـم وعوانـــي وجيـــران ***** وذيب القشر ولى وقبل امس مسعور
شاعر وانا لي لآبه شانها شـــــان **** ذيابــه في الارض وان طارو صــــقــور
عبـداان جـدي وأفخــر بطير حوران*** جـد(ن) يروم الطـــيب بالـــدور بالــدور
وختـامها صلـوا على نسـل عدنـان ***** على نبـــي دعـــــوته كلــهـــا نــــــــور

ويقول الشاعر مشبب بن عشق بن فهم ال عبدان ايضا
يالاد عاطف والغنايم قريبه .. أنا دخلت بمعركة عين جالوت
أسمع صهيل خيول وأشبح كتيبه .. والعاطفي لجل الخوي يارد الموت
ولحدن نشدني قال من تعتزي به .. أبعتزي بعبدان ثم أرفع الصوت
ربعي هل الوقفات واهل الصعيبه ... وعندي على ماقول برهان وثبوت
ومن الشعراء الحاليين
ا الشاعر هذال بن فهد العضــو ال عبدان ال عاطف
وأيضا الشاعر حمود بن حمد بن سمران ال عبدان
الشاعر : فهد بن محمد بن سمران ال عبدان
شخصيات من القبيله وقصائد قيلة في مدح ال عبدانhttp://www.d1m3.com/vb/images/smilies/zmnn201436.gif
1-الشيخ حزام بن فهم ال عبدان ال عاطف . رحمه الله
كان رحمه الله كريما متواضعا ومحبوبا من الجميع وذو حنكه وحكمه وملاذ للضعيف
وقد توفي رحمه الله في يوم الاربعاء الموافق 2/ 1/1416
فرحمه الله رحمة واسعه وادخله فسيح جنات
ه وله من الابناء ثلاثه
1- مهدي بن حزام بن فهم 2-عشق بن حزام بن فهم 3- فهد بن حزام بن فهم
قصائده .
كان الشيخ حزام ابن فهم رحمه الله عليه قادمأ من العمره برفقة الشيخ سلامه
بن ملهي ال سعيدان رحمه الله فقال الشيخ سلامه بن ملهي ال سعيدان ال عاطف ابيات موجههها الى رفيق
دربه الشيخ حزام بن فهم بن مبارك ال عبدان ال عاطف ومعاتبا بها البكره .
ياحزام بكره خويك حيلها ثاوي ... قصر جهدها واثر مهيب مامونه
والبعد للقلب لايرحم ولاياوي ... خلي بركبه وعرق سبيع من دونه
فرد الشيخ حزام بن فهم مازحا على لسان البكره .
ظلمتني ياسلامه شوركم غاوي ... ماقصدي الا الحمل ودي تشيلونه
قطب حبال الرسن والكور متساوي ... وان طار طير الهوى بتقول مجنونه

2-الشيخ سمران بن فهد بن سمران آل عبدان ال عاطف.
حيث شهد له بالخير والكرم والسخاء وإصلاح ذات البين وحل كثير من الخلافات والتنازعات بتوفيق من الله ثم بحكمته وسداد رأيه .
عرف بين جماعته بالطيب والخدمة لجميع أفراد قبيلته كان رحمه الله شجاعا مقداما
صارما في جميع الأمور والمواقف مما جعل له مكانه عظيمة بين جماعته وعند القبائل الأخرى.
حيث توفي يوم الخميس ليلة الجمعة في تاريخ 25/7/1422هـ أثر مرض حل به وادخل من خلاله المستشفى التخصصي وكان فقيدة على جماعته وعلى أهل الخير,وله من الابناء خمسه
1-محمد2-فهد3-حمد4-مبارك-
أرثي بالكثير من القصائد كان منها لـ الشاعر/ سالم بن ظافر آل وبره آل كعده.

يقول الشاعر/ سالم بن ظافر ال عاطف

خمس الليالي وأنا سهران ** والقلب للنوم ماطــاعي
العين تذرف على سمران ** ماينفع الميت النــــاعي
لجت بيوته مع الجيران ** كم خفره كحلها ضــــــــــاعي
يبكون من يكرم الضيفان **زود على الطيب قزاعي
بالجاه والعرف ذرب لسان ** ميزان للــحـــق قـــــطاعي
وليا نطـــق يفــــــتح البيبان ** يثني على المد بالصــاعي
مارافق الخبـــل والرديان **حر عن البوم جزاعـــي
الله يرحمك ياسمــــــــران ** لو كان ماتسمع الداعي
يرحمك يا مركز الشيبان ** ياوفي الشــــبر والباعي
عله رفيع بك المسكـــــان ** في جنه الحور رتاعـــي
أختامها آمين لك صفطان ** آمين ياسامع الداعــــي
3-الشيخ ســـــالـــم بن عبيد بن هطيل ال دليان ال عاطف
وهو أشهر من نار على علم عند ربعه ال عبدان وال عاطف شهد له بشجاعه والرأي السديد كان صاحب الراي السديد
عند الملمات شهد له بالخير والكرم والفزعه الكثير الكثير كان محبوبا من كل جماعته يساعد القريب والبعيد وينصاه
ربعه في حاجاتهم وجماعته من ال عبدان او ال سعيدان يحفضون له مكانته الكبيره في قلوبهم حتى بعد وفاته ويعلم
الله انني اعرف من الشيبان الاحياء من اذا جاء ذكر شيخنا (( سالم بن عبيد بن هطيل ال دليان )) ذرف الدموع عليه
وقال راح شايبنا الله يرحمه وهو يستاهل هذا الوفاء من ربعه وقد كان مع صرامته في المواقف رجل يدخل البسمه على كل
من يعرفه فهو متواضع وصاحب حضور لا يمل وهذه بشهادة كل من عرفه من الرجال الذين عاصروه وعرفوه ولقد كان
صاحب مكانه عاليه ومرتبه في عمله في فوج بن سعيدان الحرس الوطني وهو فوج ال عاطف وقد خدم الكثير من ربعه
وسعى في توضيف ربعه الذين نصوه بكل حمياء ولم يقصر مع الجميع رحمه الله رحمة واسعه توفي رحمة الله عليه
في مدينة الرياض عام 1419 هــ وكانت فاجعه على جماعته وقد حزن عليه الكبير والصغير وحتى من خارج قبيلة
قحطان ...... ومما أذكر ابيات رثاء قالها شاعر حويصلي فيه رحمة الله عليه:
يا كيف نصبر على فرقاه ابو دالي *** لكن عـزانا شهـيد وراح للبـاري
انا اشهد انه على الميلات مامالي *** صميدعي وكـريم وذاك ابو دالي
انا اعتبرته ابوي وعمـي وخالـي ***من طيب راسه عساه بجنة الوالي
هذا ما اذكره من القصيده وهذا شرح بعض المفردات في الا بيات :
*ابو دالي : ابو دليان وهو الشيخ سالم بن عبيد ال دليان وقد كان الجماعه يحبون مناداته ابو دالي
*شهيد : حيث انه توفي رحمة الله عليه مبطون والمبطون بأذن الله شهيد عسى ان يتقبله الله شهيد رحمة الله عليه
وله حاليا من الا بناء :
*الشيخ/ دليان بن سالم بن عبيد ال دليان كبير ال دليان
*الرائد/ هذال بن سالم بن عبيد ال دليان
*النقيب/عمر بن سالم بن عبيد ال دليان
*عبيد بن سالم بن عبيد ال دليان
*خالد بن سالم بن عبيد ال دليان
*راجح بن سالم بن عبيد ال دليان
*بدر بن سالم بن عبيد ال دليان
ومن ال دليان ايضا :
* الشيخ دليان بن سالم عبيد بن دليان ال عبدان ال عاطف:
وهو كبير ال دليان ورجل الاعمال المعروف وله الايادي البيضاء في اصلاح ذات البين.
4- الشيخ عشق بن فهم بن مبارك ال عبدان العاطفي . رحمه الله
كان رحمه الله أكرم أهل نجد في زمانه بل يعتبر رمز الكرم
في نجد وقد أشتهر رحمه الله بذبح الابل والغنم وقد اطلقو عليه رجال قبيلته بعض الالقاب ومنها ( شحيمان ).. وايضأ(عدو الشاه ) وقد توفي رحمه الله في يوم الثلاثاء 6/3/1411هـ صباحأ أثر حادث مروري وكان في ذالك اليوم قد اوصى ابنائه بالاستعداد في الليل بمناسبة عشاء قد أعده للشيخين ذياب بن سلطان ابن سفران ومشلح بن سلطان بن سفران رحمهما الله لما يكن لهما من حب وموده وحسن جوار فرحمهم الله رحمة واسعه واسكنهم فسيح جناته
وله من الابناء ثلاثه 1- حزام 2-مشبب 3- فهد
قصائده.
هذه البيتين للشيخ عشق بن فهم رحمه الله عليه وهي موجهه الى الشيخ والامير : مشلح بن سلطان ال سفران الخنفري
أنـا خـــوي لبـو سلــطان ... مانيب اخاوي الردييني
ياشوق من تنثر الريحان ... بنت الشيوخ السلاطيني
وهذه البيتين قالها وهو في رنيه موجهها الى محمد بن مسفر ال سفران الخنفري في مهمه عمل تبع وزاره الداخليه ( العماله )
يااميرنا ماورى رنيه لنا قره ... يالله تستر عليهم ستره الضافي
اشرب قراح"وكبدي على مره... راع الهوى مالقى له مشرب"صافي
وهذه البيتين للشاعر : مشبب بن عشق بن فهم ال عبدان ممتدحا
والده
قالت نسيت ابوك وشفيك عجلان ... قلت الفخر يابنت مكثر رصيده
ابوي يدعونه بوقته شحـــــيـــمــان ... وهذي تكفي والمزايـــــــــــــا عديده
وهذه القصيده للشاعرالكبير والدكتور : شالح بن خريزان بن سفران الخنفري
وهي موجهه الى الشاعر مشبب بن عشق بن فهم ممتدحا والده الشيخ
عشق بن فهم بن مبارك ال عبدان ال عاطف
يامشبب المنعور ياواف الاشبار... نسل الرجال موردين السلالي
وابوك ذباح الغنم وقت الاعسار ... كريم سبلا يوم شح الريالي
يوم القسى والجوع والوقت جوار ... مايذبح الا الحيل والا الجمــالي
الاد ابن عاطف مديحين الاذكار ... هم درعنا لاصطك جال"بجالي
5- الشيخ : فهـــد بــن فــهم ال عبــــدان العاطفي .رحمة الله عليه
كان رحمه الله أب الجميــــع ولـــكل ابنــــائه وكان رحمه الله ذو شخصيــــه مرحــه
محبـــوب لـــدى الجميـــع يتمتع بالاخلاق النبيـــــله والكـــرم والطيــــــب
صفــــاته الطيبـــــه رحمه الله عليه جعلته يكســـــب السمعـــــه الطيــــبه
عنــــد القـــــــريــــــب والبعيـــــدوقد تميز بصفه ولاابالغ اذا قلت انها لاتوجد
الا في ذالك الشخص رحمه الله وهي انه اذا غاب عن الوجود بدا الصغير والكبير يسأل عن ذالك الشيخ توفي يوم الاثنين11/12/1424فرحمه الله رحمة واســـــــــــــــــــــــــــــــــــعه واسكنه فسيح جناته
له من الابناء خمسه
1-فهم2-حزام3-معدي4-عشق5-سلمان
وقد رثاه أبن اخيه الشاعر : مشبب بن عشق بن فهم في قصيدة طويله لم احفظ منها الا هذي الابيات
عمي توفى يافهد ثاني العيد ... وشلون اعايد وألتقي بالرفاقه
وجهي شحوب وطاولتني التناكيد ... وقلبي تـفحم يوم زاد احتراقه
يابوي لاوالله فلانيب في عيد ... دمعي مطر والصدر زاد اختناقه
وهذه القصيده للشاعرالدكتور شالح بن خريزان ال سفران الخنفري في مدح قبيلة ال عبدان ال عاطف وهي موجهه الى الشاعر مشبب بن عشق العاطفيhttp://www.d1m3.com/vb/images/smilies/zmnn201436.gif
يامرحبــابك عــــد وبـــلآت الآمطـــــار ..... لآنــــشت من القبــله حقـــوق الخيـــالــــي
الشعر يقطف مثل مقطوف الازهــار ..... وانتـه قطفــــت من الزهــر كــل عـــــــالـــي
والشعر ينحـت مثــل منحوت الآحجار.... والبــعض يـــنقد مثــــل نقــــد الريــالــــــــي
ياناسج الفكــــره كمــــا عقـــد وسوار.... فــي جيــد عنقـــا مارمــــت بالدلآلــــــــــــي
تلعب على الطاروق وزيـنات ألشــعار .... لآ جــرهـــا الحــــداي خلـــف التــوالـــــــي
يأمشــبب المنــعور يـاواف الاشبــــار .... نســل الرجــــال مورديــن الســــــلآلــــــي
جــدك راع العصـــلآ ليـــا ثــور غبــــار .... يرســي كمـــا ترســي خشــوم الجبــالـــــي
لــه ماقـــف ما ياقــفه كل مغـــــوار ..... يـــــوم تــربـه ســـيفــه يــحل الجــدالـــــــــــي
ترمــي فلآهـــا الخيــل وتروح الاعمار.... ويــطيــر من زيـــن البـــنات الجــــــــــلآلـــــي
اليا اعتزا من فوق اصيـــلآت الامهار .... يطـــرح زعيــم القـــوم ذيـــــب العيـــــــالـــي
وابـوك ذبآح الغنــم وقـــت الاعســـار .... كريـــم سبــلآ يــوم شــــح الريـــــــــــــــالي
يوم القســــى والجوع والوقت جـوار .... مايـــذبح الا الحيــــــــل والآ الجمـــــــــالــــي
الآد ابــن عأطـف مديــحيـن الآذكـــــار ..... هــم درعــنا لآصـــطــك جــــال بجـــــــالــــي
اهــل الوفا والعـــز والمـــجد والكــــار ..... واهـل البيـوت الي بهـــا كـــن وظــلآلـــــــي
دون الخوي والضـــيف والثالث الجـار.... ترخــــص حشــاش الــروح وجــل الحـــلآلـــي
ياطيبــهم ياشــرهم وقــــت الاشــرار .... مثـــل العســل في حـــال والمــــر حــــالـــي
لآصاح صــياح الضحى والــــدبش ذار ..... تناوشــو عضــب الســـيوف الطــــــــــوالـــي
ثم انثنــــوا من دون حسكات الاوبار..... علــــط الرقــــاب مزوجــــات الرجـــــــــالـــــــي
يامشـبب ابوصيـك في ذرب الاشوار... مهـدي ولـد عمــك رفيـــــق مـــوالــــــــــــــــي
وباقي اخوانك مثل وصــف الاحـــرار.... شقـــر الاحــرار الــــــــي تروم العوالـــــــــــي
اجمـــع بني عمك واشعـم لها النــــار ... واول مواري الطــــيب صــــفر الدلالـــــــــــــي
والله فرض لآمـــك حشـــمه ومقـدار... ان كان طآمــــع في القـــطوف الروالـــــــــــي
وختامهـــا صلـــو على سيـــد الاخيــار.... اعــداد ماهبــــت هبــــوب الشمــــــالــــــــي
توضيح بعض الكلمات في القصيده
مهدي : هو الشيخ مهدي بن حزام بن فهم ال عبدان ال عاطف وهو كبير ال فهم وهو
وهو صاحب الكلمه والراي السديد في جميع مناسبات صلح ذات البين وطلبات ال عبدان
مشبب : هو الشاعر مشبب بن عشق بن فهم ال عبدان ال عاطف

هذه نبذه بسيطه عن قبيلة ال عبدان ال عاطف العريقه
واتمنى اني وفقت في هذه النبذه
تحياتي للجميع
آبن فهم ال عبدان
http://www.d1m3.com/vb/images/smilies/zmnn201436.gifhttp://www.d1m3.com/vb/images/smilies/zmnn201436.gifhttp://www.d1m3.com/vb/images/smilies/zmnn201436.gif

نايف الشبوي

02-10-2009, 06:26 AM

اللي عرفه فيهم اناس يرجعون الى بن تميم واخرين الى سبيع وفيهم القحاطين الذي ذكرهم اخوي فهم ال عاطف

عبدان بن عبدان

13-12-2009, 07:16 PM

بسم الله الرحمن الرحيم..

اولا اهني الشعب السعودي الكريم والاسره المالكه بسلامه امير القوب سلطان الخير ورجوعه للوطن سالم

ثانيا / اللي يقول ان عبدان بريده هم من ابناء عم اللي بضرماء كما قال المؤرخ الجاسر انا عبدان بن عبدان واقول الجاسر في العلم ذا ماعنده سالفه واتحدا اي شخص يثبت لي انهم ابناء عمهم بورق واذا كان يوجد شخص من العبدان من ضرماء هنا يثبت لي اتحداه قدام الرجال
العبدان ببريده كانو بالجنوب وانتقلو الى بريده واصلا هم ماهم من القصيم
ام لانهم ماشالله مراكز صارو عيال عمهم ؟؟
ونعم الرجال ابناء عبدان ماقول فيهم شي رجال شروا من سمع وقرا

ال عبدان كلهم ابناء عم اللي ببريده وعفيف وعنيزه والخرج وحائل والطائف ولاحساء وغيرها من مناطق .. وعلى فكره العبدان اللي بالجهراء ماهم اصلا من العبدان لكن الدنيا ثبتتهم وتلزقو بالعبدان ولا لهم صله بنا واتحدا من هنا انهم يثبتون بورق من ساسهم الى يومنا هذا هذا اللي حبيت اقوله وسلامتكم ولا هنتم......

عبدان بن عبدان

13-12-2009, 07:29 PM

السلام عليكم جميع .... ال عبدان كلهم اصلهم واحد ومرجعهم ضرماء تفرقو بسبب الفقر والجوع وانتم اعرف مني بها العلوم كثير من القبايل فرقتهم الدنيا باسباب دم او جوع او غيرها من اسباب ومنهم من تمسك باصله وفصله وفيهم من يبي يسلم وصار يزوج الخضير بسبب مصايب الدنيا

المهم // العبدان اسره ليست صغيره كما قال الجاسر بعددها بل هي ماشالله كبيره ولا اقولها مدحا لنفسي ولجماعتي لكن اللي يبي يعرف ينشد ويعرف العدد يا ابناء العم من عبدان اتقو الله في انفسكم لا تخلو الناس ينقدون عليكم امنعونا من الردا
عيال عمك عزوتك لاتقول ال عبدان من المنطقه الفلانيه عيال عمي لانهم مراكز بالدوله وغيرهم ماهم عيال عمك

لامنه صار اهل بريده من عيال عمك فاهل عفيف عيال عمك بعد وعنيزه وحائل والخرج والهياثم وغيرها من قرا ومدن وهجر وكلهم اهل خير ونعم الرجال مكرمين الضيف ومن زبن سلم
كلنا من بني قحطان فخر وعز لنا ولغيرنا
ماهمني من تكلم ولكن من اللي اشوفه عوال عم ويتهاوشون امنعونا من الردا

عبدان بن عبدان

13-12-2009, 07:41 PM

اخواني لابد ان نفرق بين العبدان لان هذه الاسره التي ينشد عنها متحضره من قديم الزمان وهم
العبدان كلهم حاضره من ضرما اصلا ومنشا عفيف وعنيزه ابناء عم لزم وهم متزوجين من الدواسر ومن قبيله عتيبه
عبدان بريده ايضا لهم صله باهل عفيف وايضا هناك من ال عبدان بالخرج والهياثم وحائل والطائف والاحساء وهناك من العراق كلهم اصلهم من قحطان

ويوجد من العبدان من ال عاطف ونعم الرجال
ويوجد من سبيع من الغلباء
ويوجد من يام اللي اعرفه انا انهم فهاديه
ويوجد من شمر كلهم رجال ونعم بهم بذكرهم وطيب معشرهم

وسلمتم

عبدان بن عبدان

13-12-2009, 07:55 PM

السلام عليكم

اخ فزاع انا دليلك

العبدان ببريده وعنيزه وعفيف والطائف ابناء عم
العبدان بالهياثم والخرج والدلم والرياض والاحساء والعراق ابناء عم
وايضا بحائل وضرماء

كلهم اعيال وكلهم مرجعهم ضرماء اصلا وفصلا
واللي يغالطني يقول اللي عنده وانا ارد عليه

وسلمتم

سيف ابن ذي يزن

18-12-2009, 12:54 AM

الاخ عبدان بن عبدان
اخي الكريم سئلتك سؤال محدد برد سابق لي ولا اعتقد انه صعب الاجابه عليه 0
واجابتك على سؤالي فيها الجواب الشافي لكل من قراء وشاهد 0
واكرر سؤالي مرة اخري ( الى اي فخذ انت تنتمي يابن عبدان ) وكفى
بانتظار اجابتك الشافيه 0 واذا ماتعرف الى اي فخذ تنتمي فقفل على الموظوع ولا تكرره مره اخري 0
ولي عوده اخري بعد اجابتك ولا تتهرب من الاجابه كما حصل سابقا 0
مع تحياتي

سيف ابن ذي يزن

25-12-2009, 12:43 AM

بانتظار عبدان ابن عبدان
للاجابه على السؤال

ياوجيه الخير يا متصفحي الموظوع اذا سؤالي لعبدان ابن عبدان صعب خبروني !

تحياتي للجميع

سيف ابن ذي يزن

07-01-2010, 01:29 PM

عبدان ابن عبدان

سوف امهلك 48 ساعه للرد

عبدان بن عبدان

09-01-2010, 07:18 PM

العذر والسموحه اخوي سيف عالتاخير لاني ما ادخل هنا الا اوقات واوقات وضروف العمل تحدنا

اخوي حنا فخذنا من ال مرشد وسلمت ودمت