المساعد الشخصي الرقمي

مشاهدة النسخة كاملة : قصيــــــــــــدة تقتــل القـــلب


عبدالله الوهابي
20-03-2006, 04:01 AM
اليوم سأذكر لكم قصيدة مشهورة خصوصاً في البادية القصيدة هذي للشاعر ( جحيش بن مهاوش (


جحيش رزقه الله بعيال وخير لكن دآرة دايرة الزمن عليهم وتوفت أم العيال

جحيش كان رجال قلبه رهيف
وحبه للعيال فوق كل شي لدرجة انه ما تزوج بعد زوجة عشانه يخاف على عياله من الذل

والأمر والأدهى من هذا وذاك ...

أن جحيش كان فقير وعلى قد حاله والفقر مذله ...

لدرجة انه كان يعطي عياله الأكل وهو ساعات تعاف نفسه الأكل

كل هذا حب لعياله

وما قصر معهم جحيش بتربيتهم أحسن تربية للدرجة أن ما مد يده عليهم

ومثلكم عارفين الأيام دولاب يدور

دار ها لدولاب هذا وكبروا العيال و تزوجوا ووفقهم الله
وفي نفس الوقت

كبر جحيش وشاخ ولا صار من يهتم فيه مع انه توقع ان كل اللي
سواه لعياله عيال يبون يسوونه له ( آه بس ياجحيش والله انك حبيب )

لكن للأسف عياله جحدوه
لين قرر جحيش انه يدعو عليهم
وتعلمون دعوة الأب مستجابة وما فيه بين وبين الله حجاب

وصار عياله كل ما جابوا عيال ماتوا
من دعوة جحيش

وكتب جحيش فيهم قصيده هجاهم فيها

القصيدة هذي مشهورة وفيه بيت منها تغنوا في مغنين الخبيتي والسامري ونين

ويمكن البيت هذا بعضكم يردده دون ما يعرف القصة وهو


واليوم شوفوا لحيتي كلها شيب
*****وشوفوا محل اتخوضعي في ذراكم



قمت اتوكا فوق عوج المصاليب
*****قصرت إخطاي يوم طالت إخطاكم










قال الذي يقراء بليا مكاتيب
****** ياللي تقرّون العمى من عماكم

ياعيال ياللي تشرفّون المراقيب
****** تريضولي وقصروا من خطاكم

خذو كلام جحيش مابه تكاذيب
****** مثل السند مضمون للي وراكم

ياعيال وان صرتوا ضيوف معازيب
****** ترى الكلام الزين ملحه قراكم

ترى البلاسه من كبار العذاريب
****** ترى البلاسه ما تطول لحاكم

يصير بعيون الرفاقه تقل شيب
****** ليا منه اقبل قيل هذا بلاكم

المذهب المذهب ترا المذهب الطيب
****** ترى ردى المذهب يبوّر نساكم

ياعيال ما سرحتكم للمعازيب
****** ياعيال ما عمر المعزب ولاكم

ياعيال ماضربتكم بالمشاعيب
****** ولا سمعوا الجيران لجة بكاكم

ياما تمسعرت الخلايق تقل ذيب
****** من خوفتي ينقص عليكم عشاكم

أحفيت رجليني بحامي اللواهيب
****** وخليت لحم الريم يخالط غداكم

واليوم شوفوا لحيتي كلها شيب
****** وشوفو محل اتخوضعي في ذراكم

قمت اتوكا فوق عوج المصاليب
****** قصرت إخطاي يوم طالت إخطاكم

ياعيال ياعيال لي عليكم مطاليب
****** عطوني القرضة جزاء ما وتاكم

خوالكم ياعيال من ماكر الطيب
****** ياعيال مدري هالردى منين جاكم

قصيتكم وسندت وادي سلاحيب
****** لقيت بالسبخاء مدافيق ماكم

ياعيال بعتوني بصفر العراقيب
****** ماهي حقيقة سود الله أقراكم

أطلب عسى نساكم لاتحمل ولا تجيب
****** وتغيب شمس الصبح ويغتم سماكم

ولابد ماهو عاويٍ دوني الذيب
****** بالقبر افارق طيبكم مع رداكم

جبل بن زيد
20-03-2006, 12:16 PM
لاهنت على
نقل القصة والقصيدة

مايكل القحطاني
20-03-2006, 02:34 PM
قصيدة جميله وحلوه

والله لايهينك

عبدالله الوهابي
20-03-2006, 07:50 PM
مشكورين ياجبل بن زيد ،
ومايكل القحطاني!!!!
بارك الله فيكما

محمد الحياني
21-03-2006, 12:29 AM
تسلم اخوي الغالي



ابن رشد



مبدع دائماً


كما عهدناك

الجوارح
22-03-2006, 02:35 AM
قصيدة تدق بالأعماق وتهز لها الابدان والنقللهذة القصة والقصيدة جميل جدآ وتستاهل الشكر عليها
والعاقل يأخذ منها الموعظة ونسأل الله بأن يعوض لقائلها بالجنة لما عانا في حياتة على هذة الخلفة
المخلفة ونسأل الله أن لايرينا وياكم في ذرياتنا ما حصل لجحيش من ذريتة


ولا تحرمنا يا ابن راشد وغيرك من مثل ذالمواعض ولك تحيات الجوارح

سنحان بن عامر
22-03-2006, 02:53 AM
تربية الأبناء تثمر دائما إلا ما ندر
ولا تنسى بأن بر الوالدين ذا اهمية
وكما تدين تدان فبرّوا آبائكم تبركم أبنائكم
لا هنت يبن رشد جهد تشكر عليه ولا تحرمنا جديدك

عبدالله الوهابي
25-03-2006, 01:45 PM
أخي الكريم الجوارح شكراً على مرورك وففقك ربي سنحان جزاك ربي الجنة
وارجو أن نكون عند حسن الظن وكما قلتما بر الوالدين وعقوقهما مقدم في الدنيا قبل الآخرة

فتى الجوه تعجبني ردودك وملاحظاتك تراها في الاعتبار لاحرمناك أخي الحبيب الغالي

العرام
26-03-2006, 10:26 PM
ابن رشد بيض الله وجهك وجمّل الله حالك على نقل هذه القصيدة المؤثّره

وأعتقد ان صلاح الأولاد يعود على التوفيق من الله والدعاء لهم من قبل الوالدين .

ألف تحيّة وشكر يابن رشد . ودعائي لك بالتوفيق .

المشعان
27-03-2006, 09:52 AM
شكرا على الموضوع

نجم السعد
28-03-2006, 12:55 AM
بارك الله فيك .... قصة معبرة وقصيدة رائعة واله أنها مسكتني العبرة لا حول ولا قوة إلا بالله

مرتاح البال
26-05-2006, 07:16 PM
كبير يا ابن رشد --------------- وبيض الله وجهك------------------------ ولا هنت

حسين العبيدي
26-05-2006, 08:41 PM
أخوي ابن رشد الصغير

مشكور ياأبن لجواد على هذه القصه والقصيده

والأكثر من رائعه

وبيض الله وجهك ولا هنت

والله يعافيك ما قصرت

وتقبل تحياتي .

عبدالله الوهابي
26-05-2006, 10:17 PM
أخي الكريم العرام جزاك الله خيراً على مرورك الطيب أخي الكريم ، وفقني الله وإياك وجميع المسلمين لما يحبه ويرضاه . آميــن

عبدالله الوهابي
26-05-2006, 10:19 PM
المشعان جزاك الله خيراً وعلى مشاركتك واطلاعك

عبدالله الوهابي
26-05-2006, 10:22 PM
أخي نجم السعد بوركت أخي الكريم ، وعسى أن ينفعنا وأياك لما يحبه ويرضاه

عبدالله الوهابي
26-05-2006, 10:23 PM
أخي الحبيب ونعم ونعم : ولا هان من قال شكراً على مرورك الطيب أخي الكريم

عبدالله الوهابي
26-05-2006, 10:26 PM
أخي الكريم راعي السمراء جزاك الله خيراً وبركت وأسأله تعالى أن يعصمنا وإياك وجميع المسلمين آمين