دردشه اقتصاديه الاسبوع الاول

دردشه أقتصاديه

زاويه اسبوعيه تعرض معلومات اقتصاديه مبسطه بعيداً عن تعقيدات القوانين والمعادلات

لغير المتخصصين في علم الاقتصاد

وهالحين احبتي في لله تدش في الدردشه حقت اليوم ونقول والعلم عند الله

ان علم الاقتصاد من العلوم الاجتماعيه التي له علاقه بجميع العلوم

ليش ياخواني لانه يتأثر ويؤثر بتلك العلوم الاجتماعيه الاخرى

وتراه غثيث بالحيل بالحيل يعتمد في كثير من اموره على النظريات اللي اكثركم يقول "قطع نظريات"

والنظريات مثبته بالرسم والتحليل والمعادله

واثبتو المتعمقين في هذا العلم كثير من العلوم والنتائج اللي تلامس معاشنا وحياتنا اليوميه

ببداء معكم في زاوية اليوم بسالفة العرض والطلب على سلعه وتحديد السعر في السوق

هذا الله يسلمكم مبارك لبق في سوق الخضره امس الفجر محمل الونيت طماطم "قوطه" وداج في السوق

في لمحة بصر ورجع للعامل وقال له ارفع السعر

وهالحين ندخل ونقرب الموضوع شوي ونقول ان القوطه في السوق غاليه "يدافع البلاء "

الصندوق بخمسين ريال وان الطماط حق الشام وتركيا منقطع من السوق هاليومين

انت وش تقول سعر الطماطم "القوطه"مرتفع , والطماطم قليل في السوق , والمستورد منقطع

معناته ان عرض الطماطم قليل في السوق والطلب عليه في رمضان مرتفع

وش هقوتكم السعر يسوي

مبارك وش قال للعامل يوم لف السوق في لمحة بصر ولقى الطماطم شوي في السوق هو ماقال للعامل ارفع السعر

معناته ان السعر سوف يرتفع ليه

لان السعر الرخمه ماياخذها براسه علمه عند الرجاجيل العرض والطلب كل واحد يحدره ويسنده

وقرب شي سالفة الطماط يوم انه قل في السوق ومير ينغزه مبارك فوق فوق

مبارك المهبول ماصدق على يصبح وهو اللي يجمع طماط اهل الحوطه والحريق والوادي والسليل والخرج

ويكبه اليوم الثاني في سوق الخضره وللولله انك ماتشوف اقصى حمار الطماط في كل مكان

وش هقوتكم الطماط بيرخص

ايه بيرخص لان مبارك المهبول كب على السوق كب وزاد المعروض على المطلوب

وهالحين صار الطماط سلمكم الله بتراب الفلوس

اترككم هالحين بعد ان عرفنا ان ميزان السعر هو العرض والطلب

وفي الزاويه اليايه بقولكم الامور الاخرى اللي تحرك السعر غير هذولا الملاقيف "العرض والطلب"

اللي عليه اشكال يستوضح

زاوية دردشه اقتصاديه

زاهي بطران

__________________
ابو شوووووووووشه