شارب الفناجيل بيض الله وجهك يالجملي على العلوم اللي ترفع الراس ولا هنت والله يرحم ابن هادي وابن سفران وابن عبود وابن جرمان فرسان نجد الأشاوس
وللعلم فإن الفارس/ عيد بن مريسن ال مسعود الملقب (بعييدان الخيل) هو الذي قتل شبيب ابن حجنه شيخ النفعه الذي صوب خاله ذيب ابن عبود وأخذ فرسيه المشهورتين (العباس والعبيسه) وأعطاها لخاله الشيخ ذيب بن عبود عندما كان صويبا في محل إقامته من عتيبه وقال هذي هدية مني وعيد لسلامتك يا خال،،،وعندما توفي ذيب ابن عبود بعدها بفتره طويله من مرض اصابه
فرحو العتبان بموته فقال شاعرهم/
خله يذوق الموت ياحبشان_خذا جزاه بذبحتكم شبيب
وهذا الكلام موثق من شيبان ال مسعود ،،، أما كلام العتبان فنعلم أن فيه من الدجل ما الله به عليم فيقولون أن الابيات قيلت بهذه الطريقه/
خله يذوق الموت ياحبشان_خذا جزاه بنطحته شبيب
صابه بشلفا من نجران_تفرق حبيب(ن) من حبيب
وابن عبود لا توفي بسيف ولا بجنبية وموته كان من مرض اصابه واوشك على أن يطيب منه ولكنه انتكس وتوفي بسببه فتوجد عليه الشاعر الفهري بن حبشان/
بنشد الطرقي من الحيان_وبنشد وش سوى ذيب
إن كانه وجع فانا وجعان_وإن كانه طيب فان باطيب
وكانه لحق بابن جرمان_فتقمح مشعثرت السبيب
ونعلم والكل يعلم بأن البيت الثاني من قصايد العتبان ملفق ومقيول في حدا اخر لشاعر عصيمي يتحدا فيه ابن سفران الخنفري/
يا عيال جروا الحيران_والخيل عطوها الحليب
نبي نذبح ابن سفران_ونفرق حبيب من حبيب
فقاموا وادخلو الأبيات بعضها ببعض واختلط الحابل بالنابل،،،
والشيخ ذيب ابن عبود وقبائله ال الجمل كانو يفجون نجد من جنوبه لشماله ولم يذكر ان ابن عبود دفع القصره لأحد من القبايل بل يرعى بحد السيف:
ذيدانا مرباعها الصمان_بين القبايل ما عطانا الشاه
وإن سندت تاطا خشوم ذقان_والهضب تشرب برايد ماه
ويقال أن ال مسعود من قوتهم اخذو في طريقهم 7 قبايل في محدارهم ومسنادهم من تثليث إلى نجد ومن نجد إلى تثليث و ابن عبود يسرد قصصه شايب دوسري يعرف قصص عنه فيقول: والله يوم يقبل علانا ابن عبود في (الهضب) إن حنا والسبعان نبتعد من طريقه ولا وقف جيناه حنا والسبعان وعطاناه الخيل هدايا له هذا كلام الدوسري عن ابن عبود.
وعفاكم.

سلمهههههه يالطير الخضر ومشكوووووور على مرورك ,,,,
وردودك الطيبه وانت سألت أسئله كبيره تريد اجابات طويله من الافضل ان تنفرد لها بموضوع مخصص لها او مخصص لكل قصه بحيث نذكر ما نعرفه اما ال مسعود وشيخهم ابن عبود فهم اهل تاريخ عظيم يصعب حصره في صفحات بالانتر نت
مع الشكر والتقدير

__________________

نبذه مختصره عن أحد فرسان ال عبود ال مسعود الفارس عرار بن منيس بن حمد بن عبود،،، خواله ال سويدان ال الجمل قحطان،،، وعرار بن منيس بن حمد بن عبود،،، اخوه شيخ ال مسعود جعفر ابن منيس ابن حمد ابن عبود ،،،وعرار ابن عبود كنيته صاحب (الباروده) ووصلت شهرة الباروده حتى إلى القبائل اللي مواقعها بعيد من ديار ال مسعود وقحطان مثال قبيلة شمر،،،فيذكر أن عرار بن عبود ماكان طويل في القامه كان (قصيِّر) وقابله أحد فرسان شمر المشهورين ولا عرفه وقال (أنت عرار إبن عبود راعي الباروده؟ قال عرار نعم، قال الشمري: أنت اللي ترمي بالباروده هيتش وهيتش فوق وتصيد اللي ترميه ولا تخطيه؟ فضحك عراربن عبود وقال: أنا ارميبها والله يصيب اللي ارميه بها) وعرار بن عبود لا شك إنه من ابرز فرسانال مسعود وال عبود يقول فيه الشاعر/
وعرار خيال البكارالحنازيب__لا خف هوش مسدرين الجماعة
وعرار بن عبود له من الأبناء خمسة/ (الفديع_عبدالله_سلطان_عبيد_وضاوي) وكلهم فرسان ولهم قصصهم مع القبائل الأخرى،،،وعلى سبيل المثال/ سلطان بن عرار بن عبود هو اللي يقول فيه الشاعر الدوسري/
إحتدهم عند السهل سلطان_إحتدهم شوق الطموح
وسلطان بن عرار هو اللي يتوعد طامي إبن باحص سبيع فيقول/
على الخيل يالجذعان_ومسكة طامي بالراس
وطردة سربةالسبعان_لاتواجهنا بقب الافراس
وعرار ابن عبود له قصص كثيره مع السبعان والدواسر والعتبان،،، وله قصه قديمة ومشهورة مع افرس فرسان ال محمد سبيع (ابن سحمان) وكان مع عرار في الحادثه احد فرسان الخنافر المشهورين (ابن حصوان راعي العرفاء) اللي يقول: كم راعي(ن) يرعى وانا له راعي. ومن قصص الفارس عرار بن عبود وقعة (الجفير) مع الدواسر (المصارير) نزل عرار بن عبود على (الجفير) ويوم درى ابن قويد شيخ الدواسر بأن ابن عبود نازل بدون قصير تجمعوا الدواسر على راس شيخهم ابن قويد وساق ابن قويد فنجال عرار على ربعه ولا احد شربه خوفا من عرار بن عبود وكان مع عرار ابن عبود خيل سبوقه اسمها (الحذيه) وتقابل مع الدواسر وقبل المعركة يقال أن اللي شرب فنجال عرار بن عبود الفارس طليفيح بن شبنان المصارير وطلب عراربن عبود (المنع) من الدواسر اثناء المعركة،،، وبعد المعركة أعجب الفارس طليفيح بن شبنان المصارير بفروسية عرار بن عبود وسمى الفارس طليفيح ولده عرار على عرار ابن عبود اعجابا منه بفروسية الشيخ عراربن عبود. ويقول أحد شعراء الدواسر في الوقعة اللي بينهم وبين عرار:
وانبيك بطليفح ذيب على ساس ...حوَّل بابن عبود من فوق خـيـلـه
يومه على الفنجال من بدت الناس...شربه ولاهابه سبق للنفـيـله
ويقول شاعر دوسري اخر/
وفنجال ابن عبود حنا شربناه=شربه فتى عز العرب ماخذلها
ويقول شاعر دوسري ثالث/
لا خير في هرج بليا دلايل=فنجال ابن عبود حنا شربناه
شربه طليفيح عريب السلايل=سنه صغير ونية العز ممشاه
وعراربن عبود له تقدير كبير عند الدواسر وله سوالف وعلوم واجد مع الغييثات والنتيفات والهوامله والرجبان والمخاريم والمصارير والحقبان والوداعين والعجالين وال وثيله وغيرهم من الدواسر،،، ويقال من تقديرالدواسر لعرار بن عبود سمو عليه وكانو يرجعون له في بعض الأحيان للتدخل لحل بعض النزاعات اللي تواجهم وذلك كله علشان العنوه والرفقه اللي بينهم.
وعرار بن عبود كان يكثر من الغزو على قبائل العصمة عتيبة يقول الفارس/ هليل بن حمدان المدهك الحمراني العصيمي العتيبي (راعي الشعثى) عندما رد غزو عرار في يوم من الأيام وكانو اخوانه محيميد وحمد معه وملخصها أنه غار عراربن عبود على إبل المدهك يريد سلبها ولم يستطيع وانكسر وقيل فيها هذه الابيات/
الشعث حامينها يا عرار = من عصر ابو زيد وذيابي
عود على هرثم الهدار = لا تطمع بعلط الارقابي
وعراربن عبود كانت ذبحته عند العصمة في يوم من الأيام عزى على إبل العصمة ولم يكن عندها أحد لكن كان عندها راعي منخش من خلف البل ورماه الراعي بين البل ما شافه ومات عرار بن عبود،،، وقيل في مقتله عند العصمه العتبان:
ياطير دوك عرار ابن عبود______اكسر علاه وناد ذيب ذقان
كله لعين الفاطر الونود_______ترعى من الحمه لا جذوان
وكثير من شيخان القبايل يذبحونهم اللي مهب كفو لهم والكل يعرف ذلك/
وعندك احد شيخان الخنافر قحطان ذابحه عبد
وعندك ذيب ابن هدلان الخنفري افرس فرسان الجزيرة العربية ذابحه راعي.
وقال ابن حركه من ال عبود ابيات (مرثية) في عرار بن عبود/
يا ونتي ونة ضمايا على بير_داجت على العربان محدٍ سـقــاهـا
عليك ياحامي عقاب المدابير_وان دبَّرت عيرات الأنضى حمـــاها
تكفون ياهل المهارالمقاصير_من عقب ابو سلـطان خلو اغـذاها
بلعون ماشفته وسط الدوواير_والشمس لاغابت فقدنا شــعاها
رحما لله ابو سلطان كان من ابرز فرسان ال مسعود .

كفو بعرار ابن عبود وانا اشهد ان صيته ظهر بين العربان وانتشر ولا تنسى راعي الذيب الابيض وايضا ذيب بن عبود وافين وافين وافين يا ال الجمل

__________________

1) الشيخ/ منيس بن حمد بن عبُّود بن عايض بن مرزوق ال مسعود كان ياتونه ربعه اللي ماخوذه ابلهم ويطلبون منه انه يرد ابلهم ويروح ويرد ابلهم من القوم بالحاله وخاصة كبار السن منهم اللي لا يستطيع ان يرد ابله من الغازين،،، حتى أن احد كبار السن كان يتنشد من منيس بن عبـــود ويوم درى انه توفى قال/
ياعوضت الخير عوضتي في منيس،،، وسبق ان رد منيس إبن عبود 80 ناقه من عتيبه بالحاله فكان يغزي القوم بالحاله وجا عليه من الرياجيل (الشيخ جعفر بن منيس بن عبود خواله ال فهيد ال مسعود -- وعرار بن منيس بن عبود خواله ال سويدان -- وجربوع بن منيس بن عبود)
2) الشيخ/ جعفر بن منيس بن حمد بن عبّود[/u] (شيخ ال مسعود وال الجمل) وابناءه عشره (ذيب _ وهديف _ ومعيض _ وعايض _ وهذال _ وذياب _ ومحمد(عوير)_ وجربوع _ وخالد _ وناصر)، يقول المؤلف عبدالرحمن بن زبن المرشدي:"آل عايض بن مرزوق:وفيهم شيخة آل مسعود وتشمل كافة آل الجمل في آل عبود"(العرب سنة 29 ص688)وقال"جعفر بن عبود من مشاهيرهم وشيخهم وكان معاصرا للشيخ محمد بن هندي بن حميد وله معه قصة ذكرها فهد المارك رحمه الله في كتابه من شيم العرب"( العرب سنة 29ص689ــ690)
يقول الكاتب التاريخي محمد العلي العبيد في مخطوطته"النجم اللامع للنوادر جامع"أخبار وأشعار القرنين الثالث عشر والرابع عشر ص 327 عندما تطرق لقحطان وبطونها في نجد قال"وقبيلة ال الجمل ورئيسهم ابن عبود وكان يقول شاعر ال عياف حين تحولوا ال محمد(من الجحادر)إلى نجد من ماء لهم يسمى عقيلان وهو قريب من وادي بيشة ونزلوه بعدهم ال الجمل يقول شاعرهم مترك ابن جلمود العيافي:ياعد فرسان القبايل جوك__ال الجمل يتلون ابن عبود"وجاء ذكر قبيلة ال الجمل ايضا في كتاب المغيري(1364هــ)في ذكره آل الجمل من قحطان قال(ومنهم آل مسعود والإمارة في آل عبود ويلحق بهم المساعيد من عتيبة وينقل عنهم أن المقاطعة وقعت بينهم في زمان عجير بن عضيب المسعودي وجعفر بن عبود ولمقاطعتهم سبب(المنتخب ص 119)وجاء أول ذكر لقبيلة ال مسعود في نجد كقبيلة من أشهر القبائل قبل 460 سنه في كتاب البسَّام،حيث كان ال مسعود مشتركين مع قبائل الدواسر في أحداث مناخ الحرملية عام 980هـ حول(عد ماء قريب من القويعية في وسط نجد)وكان ابو ذيب مشهور رحمه الله بالدين ويلقب براعي الذيب الأبيض (براعي الجنبيه الذيب الأبيض)،،، وهي خنجر (ذريع) كان يحملها معه في الحروب وكانت مهداه له من (ال الذيب الابيض الحباب) وبقى اسم الجنبيه على اسم اهلها وكان سمعة الجنبيه مشهوره عند القبايل حتى أن الحديث كان عنها قريب جدا في مجلس بن سعود (بالتحديد عند بن سعود الكبير). وابو ذيب الشيخ جعفر بن عبود غني عن التعريف.يقول الشيخ زيد ابن شفلوت شيخ شمل قبائل عبيدة قحطان/
منـدوب سلّـم علـى ابـو ذيــب_وهــزاع اللي لابتـه تتلاه
ويقول الخنفري ابن شعوا/
يا مسوي الفنجال كثِّر بهاره_عده على عروان وثنه لابو ذيب
ويقول الشاعر محمد بن طايع ال مسعود/
يا راكب من فوق ست تبارى_ومغفلات في الليالي المخاضير
من فوقها مثل الصقور الحرارى_والزهبه اللي من حسين التغايير
منصاك ابو ذيب زبون الثبارى_حامي عقاب الجيش لاجت طوابير
3) الشيخ/ ذيب بن جعفر بن عبود شيخ ال مسعود وال الجمل قحطان[/u] وابرز فرسانها،يقول الأستاذ عبد الرحمن بن زبن المرشدي عنه:"ذيب بن عبود: من فرسان آل مسعود بل قحطان كلها ومن رؤسائهم المشاهير وكان معاصرا لذيب بن شالح الخنفري الفارس المعروف من قحطان أيضا "(العرب سنة 29 ص689)ويقول الفارس المشهور شالح بن هدلان الخنافر ممتدحا ذيب بن سفران_وذيب بن هدلان_وذيب بن عبود/
يا ذيب من سماك ذيب فغاوي_وليه ما سماك بالنسر يا ذيب
الذيب ذيبين وذيب الشواوي_والذيب الاخر ذيب حرش العراقيب
ذيب بن سفران وذيبي وعاوي_وذيب ابن عبود مقاوي الاجانيب
فيه احديه قديمه مشهوره لذيب ابن عبود:
يامرقب(ن) عسوه وعساناه -- والخيل داجت في النفود
بغاها بن باحص وحن جيناه -- بخيل يخضب عليها العود
ويقول فيه الحميدي بن باحص من شيوخ السوده طالبا منه الصلح حتى يتفرغ لحرب الرجبان الدواسر:
يا ذيب نبي منك مصلوح ------ودي نصبح سربة الرجبان
وفيه احديه قالها ذيب بن عبود يتباها بشجاعته وشجاعة ربعه في نجد وقوته ضد قبيلة سبيع ومطير والحدا لم اعرف منه الا البيت الاول/
ادنى الحيا خشم ذقان_واقصى الحيا بصيِّص مذبوح
............تشوف فيحان_...............مطروح
والشيخ ذيب بن عبود له حدا كثيره مع العتبان
وفيه حدا اظن انه في معركه/
الصفر منكم يال حجنه --------- والحمر ساقتها العصاء
كما أن هناك بيت لشاعر من ال حجنه يقول/
نبيك يانجد فنجدت حلالنا----------- ياجعلها مره على ال مسعود
فرد عليه ذيب بن جعفر/
نثلم بحد السيف دون حلالنا ------------ وذيدانكم ناطا بها الجلحود
وذيب ابن عبود له ألقاب كثيره منها(زعّاج)لأنه كان يغزي بالضعن على الضعن على القبايل الأخرى و(مخَّاض)فكان يخوض بقبائله ال الجمل نجد والشمال والجنوب دون عاني ولا خوف انما بحد السيف وسمية بأسمة(خبة مخاض)في قنيفذا. يقول الشاعر وافي الجبعه الخنافر متدحاً قبائل ال الجمل قحطان/
ال الجمل كنهم حرار(ن)مراقيب_ماناش مخلبها من الصيد ماتي
وكان ال مسعود يمتلكون من خيار خيول أهل نجد مثل الشهوانيات والدهم والطرفيات ومنها الحصان العلوه ويسمونه(رمهان)حيث جاء اسم الحصان في ابيات شعر قالها ابن هطيل ال مسعود قبل 140 عام/
نركب اللي من ظنى رمهان_حمراً على حبل العنان تزود
إن دبَّرت لا كنها ضلعان_وإن أقبلت ترد البلا جلحود
وتوفي الشيخ ذيب بن عبود من مرض اصابه وكان بيشفى منه ولكنه انتكس مره اخرى وتوفي منه ورثاه الشاعر ابن معدية الخنفري في ابيات مشهوره/
شدوا صلاة في هوى شمخ النيب____وخلوا على العد المسمى بضاعة
يا ذيب انا بوصيك لا تاكل الذيب________كم ليلة عشاك عقب المجاعة
كم ليلة عشاك حرش العراقيب______وكم شيخ قوم(ن) دزته لك ذراعه
4) الفارس محسن المطربي من ال فهد بن هادي (ال عبود) وله موقف شجاع مع ربعه ال مسعود يوم غزاهم الأمير سعود العرافا ال سعود (جد الأمير الشاعر السامر) واخوه الأمير محمد العرافا ال سعود،،،صوَّب المطربي الأمير سعود العرافا وكسر ايده بالمذورع وصوبو ال مسعود اخوه محمد العرافا ال سعود في راسه،،، وسبب المعركة إن العرافا ال سعود كانو يبون ينقلبون على حكم الملك عبدالعزيز فطلبو من ال مسعود أنهم يغزون معهم ضد الملك عبدالعزيز قالو ال مسعود ماحنا بجايين معكم فقام سعود العرافا وغزا على ال مسعود وكان معه السبعان وردوهم ال مسعود وذبح من السبعان عرب واجد،،،والقصه مذكوره في كتاب ولكن لا يحضرني إسم الكتاب،، والكاتب سعودي. وقيل في الوقعه قصيدة واللي قالها الأمير معيض إبن جعفر إبن عبود رحمه الله/
يا سعود ما حنا بشوواي.......................
...........................لا أنته ولا الراس الكبير
5) الفارس المشهور عايض بن فهيد ابن عبّود (ابن حركه) وهو شاعر وفارس مشهور من ال عبود وله الكثير من المواقف مع ربعه ومع القبايل الثانيه ومن اشعاره:
لا مسكنا شالية الضريبه===تشبع الضبعة مع السرحان
ومن اشعاره:
خبرعتيبه ردده ترديد====الدين مايجعل بنا سجات
ان دينوا حنا هل التوحيد===وان اشركو حنا هل الزلبات
شبعان جانا طامع بالفيد===واليوم يحسب من عددالاموات
وقيل فيه العديد من الاشعار منها:
عايض بن حركه شيخ وعقيد====ماهوب مغلول كبير الثنادي
يتبعه كل قرم باسه شديد======والردي بخمسه كانه يفادي
وقيل فيه ايضا:
جدّكم عايض المشهور بالجاهلية===ابن حركة مثل حد الرهيف الحسامي
يوم لحق الغزاة افتك ذوده لحاله===وجندل اثنا عشر فارس ومن هج دامي
وصاح زيزومهم بالمنع تكفى دخيلك===وكب صهوة جواده وانبطح للسلامي
الفارس المشهور عايض بن فهيد ابن عبّود (ابن حركه) وأخوه ناصر بن فرج ابن عبّود الملقب (بالنادوق) وأخوه كميخ بن فهيد ابن عبّود وقد ردو غزو قبيلة سبيع كاملة وهم لا يتجاوزون الثمانية فرسان وكلهم يقال لهم ال سعد بن فهيد (فرسان الشمال من ال عبود) ولهم قصه قديمة مع شيخ الخنافر ابن سفران أطنه جمعل أو ذياب واحد منهم. من قصصهم أن ردو غزو السبعان على راس شيخهم فيحان بن باحص شيخ السوده وقيل فيها قصيدة/
يابسيس قرب بكرتك ذلحين**** اسلم وسلمني على الظفران
يابسيس ردلهم سلام(ن) زين**** السربـه الي لحقوا السبعــان
يانــفدا الـي ردهـم حـافـيـن**** حتى النسيب مجرد(ن)عريـان
يالي بعد في مالهم مشفين**** تسلفوا لمسلم(ن) حذيـــــان
خلوا مناحي في مداس الخيل****في ورد ربعن في اللقا شجعان
لعيون ملحا" نيها ردفين**** لحقو وردهم مع الذيدان
عادتنا نقضي رمسوس الدين**** لا مامسكنا سبرة النيشان
ذيب الحصاصه مهتجا في الليل**** او ذيب المصامه ممسي شبعان
(وفيحان بن باحص) كان نسيب لهم ويقال إنه كان متزوج منهم لانه يخشى فرسانهم فكان يجيهم (بحكم إنه نسيب) لسبب أنه يبي (يتجسس عليهم) ليعرف قوة فرسان ال مسعود وال عبود وفيحان بن باحص من أدهى الرجال ولكن ال عبود ردوه هو وربعه في الوقعه اللي صارت بينهم.وقام بنفس التجربة (الشيخ الفديع بن باحص) ولكن المره ذي كانت بفرسان أكثر من اللي جابهم الشيخ فيحان المره اللي قبلها والدليل على الكلام هذا إن ال مسعود ضاعت ابل لهم قبل 40 سنه وراحو يدورونها في ديار سبيع اهل الوديان وعينوا لهم رجال سبيعي شايب (عود) وجهه عريض وايديه عراض وجوه ال مسعود وخذا حمايض علومهم وعلموه بانهم يدورن ابلهم الضايعه قال الشايب ما شفنا شي قال وش انتم؟ قالو قحاطين قال السبيعي من انتم من قحطان قالوا جحادر قال السبيعي من انتم من الجحادر؟ قالوا حنا من ال مسعود على الشر والخير فضج السبيعي واعتزا (بابن شديّد) ورد لسلاحه وقام ينطق بكلمه وحده ويرددها ال مسعود ال مسعود ال مسعود الرياجيل بغو يذبحونه يحسبون وراه علم وشافوه شايب ورحموه ونشدوه وش علمك يا عود؟قال ال مسعود الله لا يوفقكم وقام يدعي ويعتزي قالو علمنا بعلمك قال: سنه من السنين على عهد (الفديع بن باحص) غزانا على ال مسعود وسبيع على (6 بيارق) وقايد البيارق كلها (الفديع ابن باحص) وقام يدعي السبيعي على ابن باحص ان الله لا يوفقه يقول غزو سبيع ببيارقهم وخذو ذود ال مسعود كله ماخلو منه حوار وشافوهم ال مسعود وخلوهم يوم قفوا السبعان بالبل يحلف السبيعي يقول والله ماجانا من ال مسعود الا (6 خيول) مردوفه كل خيل فوقها (رجالين) وحوطو بنا من كل جهه ويقول الشايب ان واحد من البيارق كان عليه رجال من جدانه او عمانه ومعه بعير ما يسبقه حافر يقول الشايب:يوم تحاودو بنا الرياجيل قامت كل فرس فوقها رجالين تخرق صفوف البيارق وتظهر من طرفها الاخر واول من طاح من السبعان عم او جد الشايب اللي يسرد القصه اللي يقول بعيره مايسبقه سابق ويحلف يقول والله ما عهدناه الا شواه طايح في الارض قد حولو به ال مسعود من بعيره وردو ال مسعود البل كلبوها مانقص منها حوار.
6) الفارس المشهور حزام بن مجرِّي من (ال عايض بن مرزوق) ال مسعود،،، وله شهره بين القبايل سواء قحطان او غيرها،،، عقّر الكثير من خيل الملك عبدالعزيز ،،، حتى أن الملك عبدالعزيز اشتكى منه يوم (غزوة الدّهينه) في زمن الأخوان وكان الملك عبدالعزيز يتحلف في ابن مجرِّي لانه ذبح اكثر خيل الملك عبدالعزيز وله الكثير من المواقف.
7) الأمير معيض بن جعفر بن منيس بن حمد بن عبود ،،، وابو فيحان معروف والمعروف لا يعرّف وهو اللي يقول فيه الشاعر:
يابن عبود يا شيخ الجنوب___________يا يسد نجد لامن رحت صوبه
وقال فيه شاعر الدواسر/
يشهد بها راعي المعم ابن عبود___________يومه يهوز الدار بثياب الأخوان
ويقول الشاعر الحنفري فيه وفي أخوه عايض ابن جعفر ابن عبود (ابو هلال)/
شف عايض ومعيض جولك معازيب__وانا بشيرك بالعشا والشباعه
واخوانهم مثل الحرار المراقيب___ياكم قزا في دقلهم من قلاعه
8) ذياب بن جعفر بن منيس بن حمد بن عبود ،،، وخاله الربادي بن سعيدان ال عاطف وخوال اخوه هذال بن جعفر، وقد توفي ذياب وخاله العاطفي في مواجهه ضد عتيبه (ضد المعترض) عمر بن تركي بن حميد وقيل فيهم/
يا ذيب ياللي تدهل السرداح______اكل الربادي وزل بن عبود
الربادي: العاطفي خال ذياب بن عبود
وردو عليهم ال مسعود/
يا طيور ياللي فالهوا سبَّاح______اكلي حنك وربوعه اللي زود
9) عــــــايض بن هــــــديف بن ذيـــــــــاب بن عبود (المــــــجدَّع)،،، من اشجع فرسان ال مسعود وله مواقف مشهوره مع ربعه.
10) غتــــــــــار بن الحمــالــية من ال عبود،،، من اشهر الفرسان وله مواقفه.
11) الفجحي (الميّال) من الفرسان المشهورين.
12) الفارس ماجد بن غيده ولا اعرف بالتحديد من يعود فيه من ال مسعود بالتحديد واعتقد انه يرجع في ال ناجع بن مملوك بن مسعود.
13) الفارس مملوك بن مسعود الفارس المشهور الذي كسب ابل ال مسعود (الشرف) واصبحت عزوة لهم خيالة الشرفا وهو (الرماي) الذي عناه الشاعر الناهسي الشهراني في البيت الذي يقول:
ال الجمل جمع زحوم_رمّايهم عدى على كل رامي
ومملوك هو نفسه اللي تعنيه الشاعره القحطانيه اللي تقول/
بيرق(ن) عليه مملوك ماينهزم..............
14) الفارس المشهور شنار بن محمد بن فهيد من ال مسعود وهو الذي عناه الشاعر المسعودي في هذا البيت:
ياطـير ماعينت لـي حـرين_عند المـطوع وعند ابن فدغـوش
15) الفارس والشاعر حمود ابن مسدِّر ال فهده ال مسعود وخواله (ال حثله) من ال مخلّص ال شامر العجمان وله معهم مواقف كثيرة وسطر بطولاتهم في اشعاره،،،واشترك في فوج ابن عبود اللي غزا على جنود الإمام يحيى في الجنوب وقال قصيدة يذكر فيها احداث المعركة.
16) عبدالعزيز بن شثين بن شثين (بن عبود) من ال المطيري من ال عايض بن مرزوق ال مسعود،،، من اشهر فرسان الملك عبدالعزيز وقت توحيد البلاد وقد اعطاه الملك عبدالعزيز الفوج الأول (التابع للحرس الوطني) تقديرا له لما قام به من جهود في المغازي التي سبقت توحيد المملكة وقد ورد ذكره في كتاب ابن مسلط عسير في رسالة ابراهيم الحفظي ص324 الطبعة الخامسة سنه 1413هـ وورد ذكره في كتاب منطقة تثليث وما حولها عبر العصور للكاتب عمر بن غرامه العمروي وقيل عنه (وأما عبدالعزيز بن شثين بن عبود فهو أحد رجال الملك عبدالعزيز المعروفين فقال: وأمر أبن أبراهيم الفرقتين اللتين نزلتا إلى تهامة واستقرتا في إطراف صبيا بقيادة أخيه سعد بن ابراهيم و(عبدالعزيز)بن عبود ان تخرجا مع جماعات من قوات الادريسي إلى شمال تهامة. لمنازلة قوات الشريف في (بأرق)و(ألقنفذه)) وتحدث عنه الشيخ: عياد بن نهير ـ رحمه الله ـ واللواء المتقاعد: عيسى المشاري فقالا ((كان الشيخ:عبدالعزيز بن شثين بن عبود أحد القادة في جيش الملك عبدالعزيز في حروب تهامة خاصة وفي غزوات حرض وميدي والحديدة عامه,وكان يحمل بيرق قحطان,وكان معه محمد بن جخدب أمير ألمشاعله,الذي خلف عمه محمد بن بخيتان في الأمارة بعد إن أصيب عمه في إحدى معارك تهامة سنة1341هـ,وحمل وتوفي في وادي طريب متأثر بجراحه ـ رحمه الله) وقال عنه المعمرون من قحطان: (في عام 1352هـ طلب الملك عبدالعزيز ـ رحمه الله ـ من الأمير عبدالعزيز بن شثين بن عبود وهو في هجرة المنيصف بالخرج1 ,مع اخيه وابن عمه أمير ألهجره ((الأمير/ عايض بن جعفر بن منيس بن عبود)) وبعض من جماعتهم, وأتجهو إلى الرياض بمن معهم من الإفراد , ولما وصل الرياض وجهزهم الملك عبدالعزيز, أمرهم بالتوجه إلى عسير تحت بيرق حسن بن دغيثر,وأوصى الملك عبدالعزيز ابن دغيثر قائد جيشه بأن عبدالعزيز بن شثين بن عبود معك وأنت وهو على رأي واحد في التدبير والمشورة, وخرجو من الرياض حتى وصلو الى أبها , وعندما وصلو إليها وجدو الملك سعود في أبها فحضرو إليه واخذو منه الأوامر والتعليمات بالنزول إلى تهامة فوصلوا إلى جيزان وانضموا تحت قيادة أمير جيزان: الأمير حمد الشويعر ولما نشبت الحرب بين القوات السعودية وقوات الإمام احمد كان الأمير عبدالعزيز بن شثين بن عبود على رأس قحطان,ولما حاصرت القوات السعودية مدينة حرض وأحكمت عليها الحصار , وبعث المتوكل بقوة فيها السادة وكبار العشائر لفك الحصار ورد القوات السعودية غير أن الملك عبدالعزيز علم بتحرك القوات اليمنية قبل علم القوات نفسها,فأرسل ببرقية إلى الأمير الشويعر في حرض وطلب منه تشكيل قوة سعوديه ووضع قائد لها ممن يعتمد عليه في مثل ذالك فأمر الشويعر بتشكيل القوة وتبادل الرأي مع الأمير حسن بن دغيثر عن من يقود القوة واتفقا على إن يكون الأمير:عبدالعزيز بن شثين بن عبود أمير القوة وبعد ذلك تحرك بقوته تلك وتصدى للقوات المهاجمة وكسرها ـ بأذن الله ـ وكان معه من قحطان والسهول وأميرهم ابن شمع وال شامر وأميرهم ابن مجحود وكلهم تحت قيادة الأمير عبدالعزيز وتحرك على بركة الله بجموعه في ثلث الليل الأخير باغت القوات اليمنية فقتلو من قتلو واسرو من اسروا وكانت تلك الحادثة بداية الحرب فيما بعد الحدود ثم جاء الملك فيصل ومعه القوات النظامية وغيرها وسارو على بركت الله حتى دخلو مدينة ألحديده ثم بابل ثم صدرت الاومر من الملك عبدالعزيز بالتوقف والعودة)) هكذا قال المعمرون المشاركين في تلك المعارك يومئذ. وقد ورد ذكر الأمير عبدالعزيز بن شثين بن عبود في كتاب الذكر الممتاز في إخبار نجد وعسير والحجاز. حيث قيل عنه: ((فتحصن فيه السياني القائد ومن معه من الجند فامدهم الامام يحيى بسريه يقودها عبدالرحمن بن عباس من أقارب يحيى فعلم الشويعر بقدومهم فأرسل قوة بقيادة بن عبود القحطاني صاحب تثليث فصبحهم وادي بين ميدي واللحية ونصره الله عليهم بعد وقعة شديدة قتل فيها ابن عباس قائد السرية وكثير من جنده ولم يسلم إلا القليل).
17) الفارس الرسّام من ال مسهره ال مسعود وخواله ال عاصم الجحادر ومارثته يسكنون الكويت حاليا في المنطقة العاشرة في (الجهراء).
18) الفارس فهاد بن شديِّد ال جاهل ال مسعود.
19) الفارس خالد بن عويِّد ال جاهل ال مسعود.
20) الفارس فالح بن عويِّد ال جاهل ال مسعود.
21) فراج بن عويدِّ ال جاهل ال مسعود.
22) الفارس جعيول من ال مسفر بن مملوك ال مسعود.
23) الفارس قثرد بن جاهل من ال مسفر بن مملوك بن مسعود.
(آل مسفر وآل سيف من آل ناجع من ال حسن بن مملوك ال مسعود)
ويعرف هذين الفرعين بأسم آهل المسمر نسبة إلى موقعة المسمر التي حدثت بينهم وبين أحدى القبائل المعروفة بقوتها وبشراستها سنة 1890م تقريباً وكان عدد أهل المسمرلايتجاوز 20 رحلاّ بيمنا كان عدد القبيلة التي غزتهم390رجل، وقد حدث شبه معجزة في أحداث هذي المعركة، حيث كانت الغلبة فيها لأهل المسمر التابع للحمضة جنوب محافظة تثليث حوالي40كم تقريباً ويسكنها حالياً (ال مسفر وال سيف من ال ناجع)
يقول الشاعر علي بن ذروه العبيدي عندما كان يشاهد منطقة الحمضة:
يقول ابن ذروه بادي في طويل ارجود=جنوب من الحمضه وغرب من الوادي
وادي هل الردات لاغيّم البارود = وعاداتهم كسب النواميس لجوادي
ويقول شاعر اخر من قبيلة الحباب:
الجميحي بادي رأس الجديره= في لهو لجت عليه الرايحاتي
غيرتشنى انه مناخ للمغيره =ذي مناكيف وهذي عادياتي
علم اهل رغوان جاء في كل ديره= بالمراسم والعشاير موقفاتي
بنتهم تخطب ولافيها خسيره= وقفوا عشرين تو أربع مياتي
(رغوان ولهو منطقتين من مناطق الحمضه)
ويقول شاعر من قبيلة المشاعله الجحادر
يارباب على المرباء ركد نوه=كل من شاف برقه قال ياكافي
برقه الماو الأحمر والبلا سوّه=وبله اللي برؤسه سم ألا تلافي
ليت منهو حضر ومصالي ضوه=بين علي الوبير وبين هدافي
(المرباء منطقه من مناطق الحمضه)
ويقول جعيول من آل مسفـّـر ال مسعود الجحادر
ياذيب وضبه معاذيب المضيبيع = تباشري بالعشا عند الجماعه
عداك من يشتري فالسوق ويبيع = ويسبل الروح لامن جاء وداعه
لعيون عفراء رعت نبت المرابيع= تأخذ وراء أماتها في القفر ساعه
من خشم حاضا ألى حد المواقيع = يبار لهاكل نقال الجراعه
من دونها لابتي كنهم فراريع = متحزمين بربي والشجاعه
(وضبه والمضيبيع هي جبلين في منطقة الحمضه)
24) الفارس والشاعر المشهور مريط بن عامر الملقب (بمريط بن رايعه) من ال عايض بن حسين ال مسعود، فكان ياخذ (الاخاوه من السهول) لسبب ان ال مسعود غزو على قبيلة عتيبة في نجد فكسرت قدم مريط بن رايعه من ال مسعود فجبروها السهول وطلبوا من ال مسعود تجويرهم من غزو ال الجمل الجحادر على السهول في نجد مقابل ان ياخذون (اخاوه) واخر من خذاها كان فراج بن سيف وابنه محمد وقد ذكر هذا الكلام الجاسر في كتابة مجلة العرب حيث قال بالنص:"ومن أبطال آل مسعود فراج بن سيف قال الأستاذ عبد الرحمن بن زبن المرشدي:" فراج بن سيف: أحد مشاهيرهم المتأخرين كان يأخذ الاخاوة على بعض قرى العرض وقبله أبوه سيف وأخوه بداح الأول وأول من أخذها جدهم مريط السالف الذكر أقبل من وادي تثليت غاز على قبائل عتيبة فسقط جريحا في المعركة فآواه عون السهلي كبير أهل الرويضة وعالجه وعندما شفي قال له: أطلب قال: أريد أن تمنعني من غزو قحطان فقام بجواره على آل الجمل وأعطاه الاخاوة منذ ذلك العهد وتسمى الصرة وهي عبارة عن نخلة على كل مزرعة " (العرب سنة 29 ص 690 ) وقال:"بالاضافه الى ذلك كان الدوشان في ذلك العصر يرعون نجدا كيف شاءوا ويأخذون الاخاوة على قبائله فخلفتهم قحطان فكان محمد بن هادي تهدي له القبائل النازلة نجدا ويأخذ عليها إتاوة وممن كان يجمع له الإتاوة مريط بن رايعه ال مسعود ( العرب سنة 29 ص689 ) ومريط ابن رايعه ال حسين ال مسعود هو صاحب القصيدتين المشهورتين:
ابوس يا ميثا صبي مجرب = = لا انتاش مسلول طوال فتايله
وابوس راعي كرامة خجعبيه = لاعاد ولد اللاش مانثر زمايله
حنا ال مسعود حما وادي الفضا = يأمن بنا اللي راتع في مسايله
جمعا من الشتا وريب على العدا = والجرف خطر على اللي يهايله
احلى من الدواء على الداء == ونجما خج القبايل فصايله
كثر المعاني بينا ما تشتنا == هذا نداريبه وهذا نحايله
وهو اللي قال القصيده المشهوره التي رد فيها غزو الدويش ضد ال مسعود:
عدا العقيلي براس الرجم ويويق --- يشوف له بوش تزاعج صوب مضماه
وغرنا على البل ورمينا المعاليق --- والكل منهم للجنب راح ينخاه
ولحقوا مطير على طوال السماحيق--- معهم دويش على صفرا محلاه
ولحق المريخي وسوق البرغدا ضيق --- والجيش عيا وسيع البر يبزاه
وقال المبندق عندكم يالمطاليق --- اخذوا هدومه وخلوا الشمس تنداه
وغدا الرمك نطله سوات الجواليق --- يوخذ رسن ذي والاخرى مخلاه
ويومن حدونا على كره المضاييق --- للخيل حول مثل جفران وحلياه
25) فارس مشهور من (ال سند) ال جاهل ال مسعود ويكنى على امه (ابن القعيسا) وهو من اشهر فرسان ال مسعود في القتال ولكن لا اتذكر اسمه.
26) حزام ابن عبدالله ابن فهد ابن هادي بن عبود،،، من (ال فهد بن هادي) وله مواقف شجاعه وهو اللي حول بالشيخ فيحان بن باحص من حصانه وسالفته معروفه وله مواقف واجد مع ربعه.
27) الفارس المعروف هديف بن جعفر بن منيس بن حمد بن عبود ،،، والمعروف لا يعرّف يقول الشيخ هذال بن فهيد شيخ الشيابين من عتيبه:
نرعى الحمل بمذلق العودان___ديـرة عشق وهديف بن عبود
وقال احد شعراء العصمه من عتيبه:
عشر تنحت للحصاة وللنكير__وتعمدت تثليث دار قحطاني
ديـرة عشق وهديف حامي المثابير__حم الثبور الى ثوت والحصاني
وقال أخر:
هديف بن عبود جتنا غزاياه__ياربعنا حطوا على الجيش مشدود
ويقول أحد شعراء السودة سبيع/
شيخ من حما ديرة السبيعية____من عشق وهديف والدوسري بادي
وله من القصص في الشجاعه الكثير الكثير....
28) الفارس/ عقاب بن هديف بن عبود وخواله ال حشيفان شيوخ ال روق ال محمد قحطان يقول فيه الشاعر/
نعم يابوموضى يوم التجِوالـي___يوم الردى هايب مايقرب الريبـه
نعم مع نعم ياشيخنا الغالــي___ياعقابنا يادرعنا لاعوى ذيبـــه
جدك جعفر شيخنا حامي التالي___وابوك هديف نجد تعرف مضاريبه
29) عروان بن منيشط من ال جاهل ال مسعود راعي (القَرده) ،،، رجال شجاع وله مواقف مع ربعه ومع غير ربعه وهو اللي عناه الشاعر ابن شعوا الخنفري في بيته/
يا مسوي الفنجال زود بهاره_____عدّه على عروان وثنه لابو ذيب
وقيل في عروان بن منيشط ايضا/
سربة فيها بن حركه وعروان_____اللي فعايلهم على البعد تذكر
30) الفارس سرحان بن مريسن من ال ناجع ال مسعود ،،، له مواقف مشهوره مع ربعه وال مريسن حمولة معروفه بالصمله وقد غزو عليهم العتبان واظن اللي غزو عليهم من العتبان يقالهم (الطويلات) وذبحو ال مريسن منهم 3 رياجيل وقالو فيها قصيده ولكن لا اتذكرها.
31) الفارس/ عيد بن مريسن من ال ناجع ال مسعود الملقب (بعييدان الخيل) وهو الذي قتل الحجنه شيخ النفعه الذي صوب خاله وأخذ فرسيه المشهوره (العباس والعبيسه) وأعطاها لخاله الشيخ ذيب بن عبود عندما كان صويبا في محل إقامته من عتيبه وقال هذي هدية مني وعيد لسلامتك يا خال.
32) جربوع بن جعفر بن منيس بن حمد بن عبود ،،، له شهره ومعروف والمعروف لا يعرّف ،،، فكان يتميز بغزوه على القبايل (بالسيف) وكان اكثر مغازيه على القبايل اللي في الجنوب بني شهر ،،، وشهران ،، ويام ،،، قتل في معركة مخضوب اللي حصلت بين الياميه وبين ال سعد الجحادر وقيل في مقتله/
خذانا بن عبود وبن ريحان_________كله لعين ظافر هو وشعلان
33) سلطان بن عرار بن منيس بن حمد بن عبود ،،، فارس مشهور وله فعله يوم العرب من اول ماخذ وماخوذ وقال فيه الشاعر الدوسري/
احدتهم عند السهل سلطان_______ارتدهم شوق الطموح
وابن حركه كنه السرحان_________واميرهم في دقلهم مطروح
وسلطان بن عرار هو اللي يقول/
عليكم بالخيل يالجذعان__وعلي مسكة طامي(ن) بالراس
نبي نحتد سربة السبعان__لا تواجهنا على قب الأفراس
34) الشاعر والفارس فهد بن محمد بن هطيل ال جاهل ال مسعود اللي يقول رد على فيحان بن باحص/
مندوب لا جيت لي فيحان = كثر الحكا يقرب من المنقود
الصبح لا جا للرمك ميدان = لا الرمح في راعي الحصان ينود
نركب اللي من ظنا رمهان = حمراً على حبل العنان تزود
ان دبرت لا كنها ضلعان = وان اقبلت ترد البلا جلحود
35) محمد بن فرج الطبيشي ال عبود ،،، له فعل مشهود في غزوة مخضوب على الياميه وله الكثير من السوالف مع ربعه.
36) الشاعر ابن فرج ال مسعود اللي مسك عمر بن عبيد المعترض مع رجله يوم كان مصوب عند ال مسعود ورفعها فالسما قال انت على ابن حميد (حلال والا حرام) وكان بم حميد مصوب في ظهره وخاف ال مسعود يذبحونه وهو طالب منهم (المنع) فقال ايه انا على تركي ابن حميد فجبرو كسره ال مسعود ويوم شفا عطوه ناقه وقالو رح للربعك فراح للعتبان وأول مادخل على ابوه تركي بن حميد قال:
ياذيب ياللي تدهل السرداح__اكل الربادي وزل ابن عبود
فرد عليه الشاعر ابن فرج ال مسعود:
يا طيور ياللي فالهوا سباح_اكلي حنك وربوعه اللي زود
37) الشيخ والفارس محمد بن جعفر بن عبّود من اشهر شيوخ قحطان في قيادة المغازي وكان كريم العين فسموه (عوير بن عبود) وهو معروف بكثرة مغازيه على القبايل اللي فالجنوب مثل يام وبني شهر ورجال الحجر وشهران،،،ومن مغازيه على يام (وقعة الصفاح) وهو موقع قريب من بدر و (كون مخضوب) ووقعة حول ثار وغيرها الكثير كل هذا قبل مايقود الاخوان في (غزوة بدر) المشهوره والتي اشترك فيها اعداد كبيره من قبيلة قحطان وقيل فيها الكثير من القصائد منها/
يقول الشاعر محمد بن سالم بن ردعه الوادعي من قصيده طويله/
اخيل البرق فوق الراس يلمع=وحس الرعد من تحت الرمالي
اثاري البرق ابو لعثه محمد=وابن عبود مقدام الصوالي
ويقول الشاعر العاطفي ال محمد الجحادر/
يا جابر كان المغازي حدرا__________صوب بن عبود انعم الخياله
اللي خذا الخانق وخرب بدرا__________ووفا بقوم المكرمي وعواله
ويقول احد شعراء يام في يوم بدر الجنوب/
قد هاضني عصر يوم مصخل قطره________رعده معابر ووبله دم شجعاني
عصر الخميس ادهمتنا غارة عسره_________يوم ابن عبود غازينا بقحطاني
ويقول ايضا احد شعراء يام في غزوة بــــــــــدر الجنوب/
أنا اللي هاضني خرج يوم(ن)______قوم(ن) لابن عبود عصاتي
وقالوا صوب بدر(ن) لنا مزارا_____نبغى الدين من عند الدعاتي
وايضا من المعارك المشهوره اللي قادها عوير ابن عبود (كون مخضوب) وقد نصحوه الجحادر مايحول على الياميه في عجمة الوادي (مخضوب) لأن الرياجيل كانو متحزمين ودارين بغزو الجحادر لهم فقال عوير بن عبود: والله ما عاد نعود دونا صوب تثليث ووراعينا مذبحين وقيل فيها قصائد كثيره من الطرفين جحادر وياميه/
شاعر قبيلة ال عاطف ال محمد الجحادر000000
لما التقى صف الجحادر وعبدالله=ثم اقبلوا يمشون صبيان قحطاني
لبسنا اللي كنها الداب منسله=مع حشره اللالوب والمشط عماني
وشاعر يــام00000000000
البل خذوها كاسبين النفايل=راحوا بها جحادر و حباب
يا ليت منهو حاضرٍ في دقلهم=ما عاد يرجع سابر المرقاب
ويقول احد شعراء يام...................
كالوا لنا بالمد كيلِ يزلي_وكلنا لهم بالصاع كيلِ تعداه
فرد عليهم شاعر الجحادر.....................
يالاجنبي حكيك علينا يزلي_ومانبت عليكم من ريشِ نتفناه
38) الفارس فالح بن ذياب ال مسعود من قحطان.
عام1050
مناخ البخرا(1) بين الدواسر وقحطان:
وقد استمر المناخ عدة ايام وهم يغادون القتال ويراوحون طرادا على الخيل,,, ثم اشتبكوا في قتال شديد ,, ودارت الدائره على الدواسر..وقتل عدت رجال من الفريقين من مشاهيريهم قحيصان بن زايد شيخ المخارشه من الدواسر..وفالح بن ذياب ال مسعود من قحطان.
39) الفارس فــــهـــيـــد بن علوش ال مسعود.
عام1060
تناوخوا القحاطين والدواسر واستمر المناخ قرابة عشرين يوم ثم التقوا وقتتلوا قتالا شديدا وصارة الدايرة على الدواسر ومن مشاهير القتلى فيحان بجاد شيخ حمالة وفهيد بن علوش آل مسعود وحجاج بن سالم.
40) راجح بن مسفر ال مسعود شيخ آل الجمل من قحطان
1030 مناخ الحرملية الثاني بين الدواسر وقحطان:
مناخ الحرمليه العظيم بين قحطان والدواسر:
وخلاصة مايذكره ابن بسام: ان حشدت قبايل قحطان ومعها آل كثير من طرف والدواسر ومعها سبيع والسهول من طرف اخر واقاموا في مناخهم نحو شهر ثم التقوا..... ودارت الدائرة على قحطان واتباعها وقتل عدة رجال منهم راجح بن مسفر ال مسعود شيخ آل الجمل من قحطان وحسن بن مطارد ودغيم بن فراج من مشاهير الدواسر.
41) درباس بن نفجان شيخ آل الجمل من قحطان.
مناخ تبراك بين الفضول وقحطان سنة 1074هـ:
قال البسام: وفى هذه السنه تناوخوا الفضول هم وقحطان ومع الفضول آل كثير وذلك على تبراك وحصل بينهم قتال شديد وصارت هزيمه خفيفه على قحطان وقتل من الجميع عده رجال وممن قتل من مشاهير قحطان درباس بن نفجان شيخ آل الجمل من قحطان ومظهور بن محمد ومصلط بن مطالب شيخ السحمة ومن الفضول عبد الله بن قاسي وعايض بن عقاب ومن ال كثير شويش بن خلف.
وهناك الكثير من فرسان ال الجمل الباقين مثل/
عندك ابن جلمود العيافي.
وفرسان ال شريان ال عليان.
وفرسان ال سويدان فعلهم واضح وضوح الشمس.
وفرسان ال شبوة(ال معيض) وشيخهم ابن التوم.
وفرسان ال مريتع مثل/
الفارس المشهور فهد بن فهاد ال فاران
وكذلك الفارس سلطان بن عايض ال فاران (رحمة الله)
وكذلك الفارس فهد بن عايض ال فاران (الموصل)
وكذلك الفارس محمد بن عايض ال فاران.
وكذلك عيد المريتعي (عيد الخيل) له قصص مع مطير والدوشان.
وكذلك الفارس ابن بلاع المريتعي.
وكذلك الفارس مفرح بن شقير بن مريتع (الغيول)
وفرسان العجارشة مثل/
الفارس مقبل العجرشي وولده محمد بن مقبل العجرشي
والفارس عايض ابن حاذان
والفارس ابن شرحوف العجرشي.

الطير الخضر لا هنت على ما ذكرته وسجل اعجابي فيما كتبت ,,,, قدمت موضوع عن بني عمك بالأدله والبراهين مع القصائد التي قيلت وبصراحه ردودك مواضيع بحد ذاتها كبيره في معناها فأشكرك جزيل الشكر وكنت عارف انك من الرواة الكبار عند ال مسعود فهذا ما جعلني اتريث في عدم الرد على أسئلتك ,,,,, لان اسئلتك تدل على علمك بجميع القصص والمعارك السابقه

اكرر شكري لك ودمت بخير

__________________

ما سوانا شي يا وجه ال الجمل وهذا أقل واجب نسويه وال الجــــمل بيرقهم من اشهر بيارق قحطان وفيه قصيده لأل الجمل تذكر لهم وقعه مع المطران قديمة في نجد وإنشالله باتيكم بها بإذن الله .

شارب الفناجيل بيض الله وجهك على هذا الموضوع القيم
ولدي سؤال من القائل وماهي المناسبة

اكان ذيب ٍ لحق ابن جرمان / تقمح مشعثرة السبيب

من هو ذيب ومن هو ابن جرمان