معركة ( حليف) المشهوره بين ال عاطف ويام و دهم

ارحب يالمسلماني
سوف اقوم بالردد عليك داخل ردك علي في الموضوع

( السلام عليكم

أبا الذموم .. ما قدرت أتجاهل الموضوع لأنه بالذمات!

ولا عادتي أمر على كثير من المواضيع واتبسم

أنت عندك لبس مع احترامي لك و الموضوع مختلط عليك وفيه من الأخطاء مالا يمكن ترقيعه إلا بنسف الموضوع من أساسه

يالمسلماني كل المواضيع عندك فيها لبس فيها!!!
انتم يام كفو ولا فيكم كلام حتى موضوع الاخ الظور عن مقعد الدهينة يوم جوره الشيخ خليل بن عمر حاولت تدخل قبيلة يام والعجمان فيه بما فيهم الدامر !!!!!

(الأوله .. ابن هضبان .. من الوعله يام ( مقرع حق) معروف حتى ياتونه من قحطان الجنوب و من قبايل الجنوب عنده في الزمان الغابر للتحكيم ..)

انا عارف ان ابن هضبان من شيوخ الوعله اهل الجبل وهو المقصود بالسالفه وظنك انه مايغزي مثل الرياجيل والفرسان كلامك غير مقنع يالمسلماني!!!
يعني همه يحكم بين القبايل فقط !!!

(وهو غير عن ( هضبان) شيخ دهم المشهور ! الذي كان يقود هجمات على أطراف بوادي يـام )

المجال هنا لم يتطرق لهضبان احد شيوخ دهم المعروفين

(وقد قتله ( فالح بن فهيد بن ثعيل ال العرجا يـام ثارا في والده )بعد أن غزى على فالح وربعه يريد الأبل

وهو الذي يقول أحد صبيان دهم (وهم والله ونعم) بعد ما رجعوا لربعهم حيث منعهم فالح بن ثعيل العرجاني وأطلق سراحهم .. يقول الدهمي لأحد أمراهم واسمه بجاش بن بجاش ان ما خاب ظني

ياحن قلبى حـن خلفـات هزيـل....... غنا عليها العبـد قـدام الصـلاه
عيا على البل كل من شبره طويـل ..... بمهندن ما ناش من عظـم شظـاه
سبعه وعشرين هباهم فالح في المسيل....... والذيب يا بجاش هضبان عشاه !

هذا التوضيح .. ولا ابن هضبان الوعله ماقد جاء عليه سالفة مع ال عاطف وانت خذيت تشابه الأسماء وبنيت عليه قصه , وكذلك ابن عفراء ..أعرف ال علي بن عفراء من دهم وهم فخذ وليس اسم رجال .. ولا أعرف في يام ابن عفراء خل عنك يكون شيخ يام


القصه على ابن هضبان الوعله يام اهل الجبل
ولم اذكر هضبان احد شيوخ دهم !!!!
وكذلك ابن عفراء من يام
وابن عفراء مستسمي باسم امه اسمها( عفراء)
ولم اقل انه شيخ لقبيلة يام !!!
ياليت تركز في الموضوع


(وأيضا من أخطاء القصة .. تقول الكرب والصيعر من قبايل همدان!! ..يا رجال ماهم في همدان خالص.. الصيعر والكرب من قبايل كنده .. لازم تقول شي تعرفه فديت خشمك)

يارجال الكرب والصيعر لاهم في حاجتك ولا انت بحاجتهم وهم اساسا ليسوا بالموضوع الموضوع يخص يام ودهم !!!!

(وبعدين ابراهيم الإسلومي ماقد سمعنا انه هاب من ال عاطف ولا غير ال عاطف .. وهو عقيد ما هوب شيخ ..للتوضيح )


الشيخ ابراهيم الاسلومي شيخ وعقيد قرم وموفق ومشبب ( اخو ملحه ) من اطيب فرسان قبيلة يام اغلب شيوخ يام يقدمونه عليهم
ومن ضمن شيوخ يام اللي يتقدمون في المغازي قديماً :
ذيب المهان شيخ ال فطيح
فلاح ابن الشدقاء من شيوخ يام
محمد ابن سجوى ابن مجحود من شيوخ ال العرجاء
مجهار بن فرج شيخ ال مرهم من ال العرجاء
علي بن شاجع شيخ ال رزق
صمعان بن محمد شيخ ال رشيد
ابن شعفه وابن مسدر من شيوخ وعقداء ال رشيد
راكان بن حثلين شيخ العجمان
فهد الدامر من شيوخ العجمان
المرضف شيخ قبيلة ال مره قبل حكم الملك عبدالعزيز
راشد بن عزره من شيوخ ال مره
جريس بن جلبان من شيوخ العجمان
عامر بن خرصان شيخ ال شامر العجمان


وغيرهم

لكن الشيخ الفارس ابراهيم الاسلومي شيخ ال عامر كان يتقدم على بعضهم في بعض المعارك فبالك وانت تصفه بانه ليس شيخا اتق الله !!!!

بالرغم ان اغلب مغازيه على ال عاطف تبوؤا بالفشل و وعدم التوفيق وهذا لا يقلل من شجاعته وفروسيته المعروفه



(وأمر آخر بعد .. قبايل المشرق ماهي على حد آل عاطف على حد علمي ولا أنت وش رايك ؟)


ال عاطف واللي معهم من قحطان ذاك اليوم هم اللي غازين على قبايل المشرق في اخر الربع الخالي !!!!!!


وللمعلومية الفرسان الشجعان يقطعون الحدود للمغازي ومن ضمنها مغزى ( ثجر) للشيخ الفارس مسفر بن هادي بن سعيدان على ال فهاد الوعلة يام وخذا ابل ال بدره شيوخ ال فهاد من ثجر الا تعلم وين يقع فيه ؟
يقع على حدود نجران !!!!

وكذلك مغزى العقيد الفارس علي بن راجح ابن القينه على ابل ابن بخيته دهم وخذاها من مدرك الدويغر على حدود اليمن !!!
وغيرها من المغازي المشهوره


وكذلك مغزى كبير للشيخ الفارس مسفر بن هادي بن سعيدان والشيخ الفارس ناصر بن مجدل بن سفران على قبائل الوعلة يام في وادي السليل ووادي القري وهي من وديان الوعلة المعروفه
حتى ان احد فرسان قحطان حذرهم وقال :
( اتقوا الله ياشيوخ لا تقطعون الحد ما بعد خذيت لكم قصيره)
فرد عليه الشيخ الفارس ناصر بن مجدل بن سفران: ( والله ان نقطع السليل والذلول تغير والسلف يسير ولا اشل القصير)
رد عليه الشيخ الفارس مسفر بن هادي بن سعيدان وقال: ( والله ان تموت عيني ماخليت ام حليقه )
يقصد بام حليقه ابل ال فهاد الوعله يام حيث ان وسمهم الحلقه

(وبعدين على حد علمي أيضا ان الشيخ الفارس مناحي بن جرمان بن عويضه بن سعيدان اللي تقول ان ايده جمد الدم عليها على الجنبيه ذبحوه جماعة من يام من ال العرجا الوعله .. وأظن كذلك ترثة سعيدان شيوخ ال عاطف .. مسفر بن سعيدان وملهي بن مسفر بن سعيدان وغيرهم ما يحضرني الله يرحمهم ومن مات من المسلمين . تقبل ردي بصدر رحب)


نعم الشيخ الفارس مناحي بن جرمان بن سعيدان ذبحوه يام غدر عقب ما منعهم وهم في الجبل قال انزلوا وتراكم في وجهي وطلبوا المنع ومنعهم ويوم نزلوا من الجبل مدها عليه واحد وذبحه وتقاضوا ال عاطف ذاك اليوم وذبحوا كل الفرسان ذاك اليوم الا بعضا منهم منهم من طق وهو الشيخ محمد بن سجوى بن مجحود ال العرجاء وغيره
واما الشيخ الفارس مسفر بن هادي بن سعيدان وولده الشيخ الفارس ملهي بن سفر بن هادي بن سعيدان نعم ذبحتوهم يا يام في معركة مخيبيه عقب ما خذوا ابل ال العرجاء كلها ودخلوبها شعب مخيبيبه وانتظروهم الياميه لين دخلو ا الشعب وكان الشعب ضيق وقاموا يرمونهم ال ال العرجاء واللي معهم وحطوهم نصع وفيها نوع من انواع الحيله في الحروب والمغازي وذبح ذاك اليوم فرسان من ال عاطف اشهرهم الشيخ الفارس مسفر بن هادي بن سعيدان وولده الشيخ الفارس ملهي بن مسفر بن هادي بن سعيدان وكذلك قتل فرسان من ال العرجاء من اشهرهم العقيد الفارس ناصر بن مصلح بن عسكر ال مرهم ال العرجاء والفارس ابن جعي ال العرجاء وغيرهم
وقد ثاروا ال عاطف لمقتل الشيوخ ( مسفر وولده ملهي) من قبيلة يام بقتل اكثر من عشرين فارس في معركة سر المدبغ بقيادة الشيخ الفارس هذال بن مسفر بن هادي بن سعيدان وقبيلة يام بقيادة الشيخ الفارس محمد بن سجوى بن مجحود ال العرجاء والشيخ الفارس بليه بن عبدالرحمن بن بدره شيخ ال فهاد والشيخ ابن مسرع من شيوخ يام وكان من ضمن القتلى ذاك اليوم اما الشيخ محمد بن سجوى فطق ذاك اليوم هربا وخوفا من ال عاطف يقول الشاعروالفارس معجب بن بويريد الضوره ال عاطف ذاك اليوم :
ياطير علمني بملحاق ال عاطف == علم الحياء والكاينات جياد
راعي أرك ٍ جاهم على زلافه == راعي أرك ٍ في شوره السداد
يوم شار شايرهم على اللي مشيرهم== مامنهم اللي شار بالمعواد
يتلون هذاب السرايا مجرب== هذال حامي وانيات اسناد
ويتلون حزام قوّاد نمرى = دايم على راس الحفيف يذاد
ويتلون عاطف سعد الابل == ليا من ارزمت تبغى المقاد
نشد عليهم نايفٍ من ذاهبه == وغدالهم في ذكرهم نفاد
طق ابن سجوى يوم سمع اعزاهم== ولا بد صياد الفهود يصاد
وكله لعينا ملهي ومسفر == وجرمان اللي طاح في الميراد
وكله لعينا اهل مخيبيه== اللي مفرش وملحفٍ بوساد
وكله لعينا جادلٍ ططار سترها== وتقول تكفون يالاجواد
برى الصدا من كبد كل مجرب== والكبد طابت واشرعت للزاد

المقصود من: [ هذال ] هو الشيخ الفارس هذال بن مسفر بن هادي بن سعيدان شيخ قبيلة آل عاطف.
المقصود من : [ حزام ] هو الشيخ الفارس حزام بن مسفر بن هادي بن سعيدان .
المقصود من : [عاطف] هو العقيد الفارس عاطف بن مبارك بن سعيّد ال عاطف.
المقصود من : [ نايف ] هو الشيخ الفارس نايف بن مناحي بن جرمان بن بن عويضه بن سعيدان .
المقصود من : [ ابن سجوى ] هو الشيخ الفارس محمد بن سجوى بن مجحود من شيوخ قبيلة آل العرجاء وقايد قبيلة يام في المعركة .
المقصود من [كله لعينا ملهي ومسفر** وجرمان اللي طاح في الميراد ] المقصود هو الشيخ الفارس مسفر بن هادي بن سعيدان شيخ قبيلة آل عاطف واللي قتل في معركة مخيبيه بين قبيلة آل عاطف وقبيلة آل العرجاء يام سنة 1328هـ وقتل ذاك اليوم أحد شيوخ آل العرجاء يام .
ومعنى البيت أن جميع القتلى اللي قتلوا يوم سر المدبغ ثار في الشيخ الفارس مسفر بن هادي بن سعيدان وولده الشيخ الفارس ملهي بن مسفر بن هادي بن سعيدان والشيخ الفارس جرمان بن هذال بن جرمان بن عويضه بن سعيدان الملقب بـ [ صلف ] قتلوا الشيوخ الثلاثه في معركة وحده في معركة [ مخيبيه ] بين آل عاطف آل العرجاء يام سنة 1328هـ .


ويقول الشاعر والفارس قراش بن حليس ال مشني ال فرسان ال عاطف ذاك اليوم:

ياذيب فحامه مع ذيب قمشان==اعوي لسنح لين تاتي ذيابه
دونك بليه شوق سحاب الاردان== سعد الرفيق والاجنبي للتوابه
ودونك الكفر في السرب طيحان== والنصر من رب المقادير جابه
طق ابن سجوى وتلا الربع شرثان == مثل البهم لا تلته ذيابه

المقصود من[ فحامة وقمشان ] جبال جنوب الوادي جهة المريبخ جنوب وادي الدواسر

المقصود من [ بليه ] هو الشيخ الفارس بليه بن عبدالرحمن بن بدره شيخ آل فهاد يام وكان الشاعر يعتقد أن الشيخ الفارس بليه بن عبدالرحمن بن بدره قد قتل في هذه المعركة .

المقصود من [شرثان ] هو الفارس شرثان بن مبارك بن سعيّد ال عاطف بان له فعل طيب ذاك اليوم ( اخو زبنه ) .


ملاحظه :
بالنسبة للقتلى من ال عاطف ويام في الكثير من المغازي فعندنا وعندكم خير وكل فيه حقه من كل شي!!

اتمنى لك طيب المتابعه
وشكرا

__________________

البقا يا ابا الذموم ..أنا ماني بمعاييك أنا أوضح لك وأنت بصرك

بس أنت بارك الله فيك زدت الخطأ القديم بلحيق !

أجل بالله عليك ( جريس ابن جلبان) اللي متوفي له فوق 200 سنه على عصر (تركي بن عبدالله) يتبع العقيد ابراهيم الإسلومي اللي على عصر الملك عبدالعزيز ؟

ويتبعه بعد راكان بن حثلين ؟!!! اللي متوفي والملك عبدالعزيز عاده ولد صغير مع ابيه في الكويت !!!!

الله يرحم ابراهيم السلومي ما قد سمعنا أحد يقول انه يخاف من ال عاطف إلا منك ابا الذموم الله يبارك فيك

وتراه ماهوب شيخ ال عامر ..عقيد موفق ..وفارس كريم ذو أخلاق

طيب نرجع لأبن هضبان وش اسم ابن هضبان من أهل الجبل اللي غزى على ال عاطف ؟؟!

وبعدين ويش قرب الوعلة وبالأخص أهل الجبل من قبيلة دهم وهم ما بينهم إلا السيف ؟!

وبعدين أنت اللي قلت ان الكرب والصيعر من همدان مهوب أنا ! سبحان الله(بس زين انك مسحت الخطأ في موضوعك الأصلي لكنك ما شكرتني على التوضيح)

على العموم مثل ما قلتلك ..أنا ما ودي أجادلك في أمة أفضت لربها .. لكن أوضح لك ..انه فيه عندك أخطاء كثيره

وما دامك ذكرت الشيخ ناصر بن مجدل بن سفران شيخ الخنافر الجحادر من قحطان.. فتراه أيضا ذبحوه الوعله ( ال فهاد ) ووالله ما كان ودي أذكرها لكنك جبت طاريها!

وكل اللي تقول من شيوخ قحطان من ال عاطف والخنافر غزو الوعله ..الله يرحمهم ذبحوهم الوعلة أهل السهل وهذا حال الأولين ما فيه امن ولا أمان ولا علم..

بالنسبة لآل العرجا ولا ابن سجوى( يا كبرها يطق) ماني بقايل شيء في ما مضى ودرس , لأن الأمور معروفه عند الجميع ..ما تحتمل تأليف أو تكييف زايد..أنت عليك بالفعل واترك منك القصيد .. راحت الله يرحمهم كلهم

تقبل سلامي

__________________

اخوي ابا الذموم أنا ما أقدر على ذا الحال في النقاش معك

أنت مراقب .. وكل ما وضحت لك خطأ .. قمت ومسحت الخطأ في ردك بأثر رجعي دون اشارة!.. وهذا يأثر على الحوار ومصداقيته

مثل خطأك في ابراهيم الأسلومي ..والكرب والصيعر !

يعني يصير حوار طرشان .. ردي يصلح لك .. وردك صالح عقب ردي!

ما فيها شي لو قلت مشكور على التوضيح والخطأ وارد

على العموم حتى أغلب الذين ذكرتهم ما تقدمهم الفارس الشجاع ابراهيم السلومي أبد !

المهم موفقين خير

ياهلابك يالمسلماني
وشرفت الموضوع يا وجه محلف
تقبل فائق ودي

__________________

ارحب يالضويري
ماعليك زود
والله يطول عمرك على الاطراء الجميل
وشهاده اعتز فيها
والله يقدرني اكون قد هالثقه التي منحتني اياها
الله يعطيك العافيه واشكرك جزيل الشكر
تقبل فائق الاحترااام

__________________

الحيـــن تركت المـــوضوع بــكبره ولا عندك تعليق عليه

ورجعت على النقطه هذي صدق ماعندك حيــله ..



لو انك متابع صحيح كان قارعت الرجال بالحجج واثبت عكس ذلك


يعطيك العافيه ياأباالذموووم

__________________

اخي العزيز لو تلاحظ رد ابا الذموم (13) الفقره الرابعه يعترف ويقول حذفته وهم اساسا ليسوا صلب الموضوع .. واخونا المسلماني مسك السالفه ليشكك بالموضوع ..




وانت ايضاا اخطيت علي وتخاطبني بالتأنيث والمشكله الأسلوب واضح وغير كذا التوقيع أوضح ولكن اعتبرها زله ,,




وشكراا يابن مهري

__________________

ابا الذموم الله يعطيك العافيه


بس ممكن اعرف اسم الفارس ابن صيفان الأول اذا وجد ؟

__________________

ارحب يارسن
والله يعطيك العافيه
ومشكور على ردودك الجميله

والله اسم الفارس ابن صيفان لا اعرفه لكن بحاول اجيبه إن شاء الله .

تقبل فائق احترامي

__________________