شاعراماراتي يشكو الحال

تو .. طين

وش عاد يا دار ٍ بها صار ( توطين )
و في مكتب التوظيف سوسن و ميسون !
مديرهم مدحت و نائبْته نسرين
و على الرسبشن حمّص و فول و زيتون !
كل ما اتصلت اسمع ( الو مرحبا مين؟
بدّك وظيفه ؟ .. مين دلّك على هون ؟ )
اقول انا لي اتصل صار شهرين
و انتوا وعدتوني متى بس توفـــــون؟
اسمي ( مواطن ) ( جامعي ) طيب و زين
كني ابخطب عندكـم و اتّغــــــــــون !
عندي شهاده طايحه بجبدي سنين
عـشـش عليها شي لـه ستة عيــــــون !!
لو للشهاده لسان قالت ( على وين
ناوي تودينـي .. تلـف فيني الكـون ؟ )
من كثر ما صورتها غارق بدين
للهندي راعـي المطبعـه صـرت مديــون
لا ليلي ليل ولا نهاري نوى يبين
دقيت راسـي ليـن ما صـرت مينــــون !
مطلوب خبره عالأقل في مجالين
ولا تجينا بواسطه و سير مدهـــــــون !
ولا انثبر في بيتك .. افرك بكفين
يـومـك يشابه امسـك و عيـش مغبــــون
تعدادنا ويّاهم اربع ملايين
و اهـل البلـد للحيـن مـا صـاروا مليـون !!
ويلاه من باكر اذا وضعنا الحين
و احنا اقـل من الربـع حـالنـا شـجـون !
و اللي ابتسم له حظه والله مسكين !
حصّل وظيفه .. بس في وين .. تدرون ؟
ساكن في راس الخيمه .. حطوه في العين !!
و اللي سكن في الذيد .. في السلع مدفون !!
يشوف اهله بس في الأسبوع يومين
و اذا حسبتوا الدرب كم ساعه .. تبكون
يعني في كل احواله ذاق الأمرين
شغّـال محـزون و بلا شغل محـــزون
و الأجبني اللي راتبه فوق عشرين
فله و سياره و تذاكر .. و طـاعــــــون
عنده بدل كل شي عالراتب الفين
حتى بدل معجون اسنان و صابــــون !
و من بعد ما يجمع من بلادي فلسين
و يربّي م القعده على الكرسي بطون
و يصير في بلاده غني و عنده برجين
يرحل و هو جاحد .. و كم مثله ملعون !
و حتى الجماعه قوم مدحت و نسرين
مـردّهـم لـبـلادهــم لـو يـطـولـــــــــــون
يرضون بشوية دراهم .. و شفتين
صبح و عصر .. لو حتى في الليل يرضون
بس لو سمعتوا همسهم بينهم بين
وسط القهـاوي يلعنون و يســـــــــبون !
لا تحسبوني عنصري .. كلنا طين
و الخل لو عـاتـب محبينـه يمــــــــــــــون
داري و انا اولى بها من الغريبين
ما يوصلون لحبها لو يموتـــــــــــــــــون
و ( الأقربون اولى ) .. كلام ٍ من الدين
ما جبته من شعري مع الهام و ظنــــــون
ولد البلد ما يبغي لبلاده الشين
بالروح بالدم يفتديها ولا يخـــــــــــــــون
لكن سؤاله يوم قلتوا له ( توطين )
يا كيف بيد الغرب توظيفه يكــــــون ؟؟!!
شعارهم معروف ( راجعنا بعدين )
و باين من التأجيل .. انهم يخافـــــــــــون
اذا معك خبره .. يا اهلين و سهلين
و اذا شهاده بس .. عنك يصـــــــــــــــدون
ما عندنا شاغر .. و بطلنا تعيين
ولو تحرق الهاتف ترى ما يــــــــــــــردون !
من وين اجيب الخبره ؟ من وين من وين ؟
دام الوظيفه عند سوسن و ميســــــــــــــون !
عندي بمطبخ بيتنا خبره سنتين !
تنفع اذا صاروا المطاعم يوطنــــــــــــون ؟؟!
ولا اهاجر و آخذ الخبره في الصين ؟
صح العيون صغار .. لكن يقـــــــــــــــــدْرون
سؤال يا دار ٍ ..صراحه بترضين ؟
اني اسافر و اطلب الغرب لي عـــــــــــون ؟
و سؤال يا ناس ٍ على الراس و العين
صدق الوظايف واسطه و سير مدهـــــون ؟
اما الجواب الشافي يجيني الحين
او هاتوا تأشيره .. اذا كنتوا ترضــــــــــون !
منقوووووووووووووووووووووووووووووووووووووووووووووول