قصيدة الشيخ عبدالرحمن بن مشلح بن سفران في اخيه سلمان
قصيدة وجهها
الشيخ /
عبدالرحمن بن مشلح بن سلطان بن سفران
لاخيه الملازم /
سلمان بن مشلح بن سلطان بن سفران
بسم الله يالمعبود جزل العطايا = أبدا بذكره واذكره بين الأشهاد
... واستغفره من خافيات الخطايا = وأرجيه عفوه لا قلطنا باالألحاد
ان ما وقانا ما تفيد الوقايا = اليه مرجع كل نفس بميعاد
يا راكبن جيبن فريد المزايا = صنعة يهودين على الصنع معتاد
في صنعته ما هوب يبغا وصايا= مبدع ولولا فكرته كان ما ساد
لا دارها ما قال باقي بقايا =يدرك مدى اللي تجهله روس الأسياد
صمم عديمن ما وجد له حلايا = لو حده الحادي عن الصعب ما حاد
عليه يا المندوب زبن الونايا = وصل كتاب اللى ذبحه التوجاد
صوب الشجيع اللي يقض السرايا = لا عودت بين العرب نهب وطراد
حفيد قومن فالملاقا جرايا = نارن سناها في سما المجد وقاد
لا جيت أبو مشلح زبون الونايا = تلقى تراحيبن على العز تزداد
وتلقى الشحم في دار سمح النوايا = سلمن تسلسل من على روس الأجداد
سلم عليه اعداد وبل الرفايا = واعداد ما غنى على القاف قصاد
سلامن أجزل من جزيل الهدايا = وأبلغ من الترحيب في طبع الاجواد
واثن السلام و بلغه بالتحايا = وعطه الكتاب اللي من الجاش منقاد
عزالله اني في كثير القضايا = ما سقت هجسي بين صادر ووراد
واللي على قول الحقايق زرايا = تشعب ضعنها في ذرى الضلع من غاد
مالي ومال امزيفين الحكايا = صدام راح وما صلح حال بغداد
للعز قومن يشعبون المطايا = والعز يلزم صاحبه صبر و اعناد
ولا الهزايل و الردى و الدنايا = ما هيب في حاجة معانات واجهاد
الحر ما يرضى الوطا والدنايا = لو جور وقته من على منكبه زاد
والاوله ما هيب مثل التلايا= قد قيل من لا يسبر الصيد ما صاد
يا حر يا اللي ماكرك فالعلايا = طبعك عديم ولك مخاليبن إحداد
طرقت دربن يتعب أهل الحكايا = للي مراجلهم على مكلة الزاد
والرجل يصبر وان بلته البلايا = يسطى ويبجد له على العز ميراد
وإليا صدف له في طريقه حيايا = ياطى عليها بالقدم لين تنباد
لعل غمرن ما يسوي سوايا= اتنومس أعياله وربعه والاحفاد
ياتيه من سود الليالي شظايا = تفنيه ما له بين الاشبال مقعاد
ويذفن وهو حي بقاع خلايا = لامنه لاعز ولا منه افواد
العز يطلب في جميع النحايا = وعمر الفتى مره ولا فيه معواد
ايه افتخر بك يا كريم السجايا = مثل تفاخر عبس في نجل شداد
لانك تذكرني الشيوخ الدهايا = شيخانا اللي روحو دون ميعاد
أهل المواقف والوفا والحمايا = مشلح وأخوه أذياب كساب الامجاد
ما مت يا مشلح وسيع النهايا = دام ان أبومشلح لنا درع واسناد
سلمان سعد اللي وطته الرزايا = أمجري الهياب وقت الترداد
هاذي حقيقه من بنوك الخفايا = أبديتها من منطلق حق وأحياد
وأنا على خبرك عزومي رهايا= ما لدني عن سكة الطيب لداد
حتى لو اختلفو كثير البرايا = تبقى مبادينا على ساس واشداد
اصارع الدنيا على كل رايا = وتطيعنا لو هي صعب لين تنقاد
نجعل على كبد المعادي كوايا = وكلن يحدد منهجه كيف ما راد
و الطيب يجزى بالكفوف السخايا=ينطح ابمثله ما يجازى بالاضداد
واللي يلقط له علومن عرايا = ما همنا وسيوفنا وسط الاغماد
عمر الفتى يقفاه سيل المنايا= ولا يدوم إلا الذكر بين الأشهاد
وختامها مني جزيل التحايا = يا معرب الجدين يا الساطي الحاد
عيد الفطر يقفاه عيد الضحايا = وشوفك نعده ثالثن بين الأعياد
__________________
اللهم اغفر ولوالدي ووالديهم والمسلمين اجمعين
انا حس كني مالك الارض واهل الارض ***** وكن الملوك اللي على الارض خدامي
ليا قمت من نومي وصليت قبل الفرض ***** وسبحت واستغفرت والناس نيامي
#
#
مشلح بن حسن بن سلطان بن سفران