[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
أسوأ خبر في حياتي قد تلقيت = موت ابن شفلوت رجال العقيدة
الله يحسن عزاكم يا الشفاليت = ويجبر عزانا على فقد الفقيده
قبل الفهر ربعي آل كناد عزيت = وأعزي النفس وأعزي حفيده
مرحوم يا الشيخ مترك ذايع الصيت = والله يحسن عزا ربعك عبيده
الله يحسنه عزا قحطان في المَيْت = ويعوضنا في محله من يجيده
جاني الخبر والخبر منه تفاجيت = لكن تذكرت والذكرى مفيده
الموت حق ولا يحسب مواقيت = الموت في العبد يمشي مع وريده
عز الله إنا فقدنا ضلع حلييت = اللي تخلص قضايانا على ايده
مترك خذا المشيخه من غير تصويت = وجمع جميع المراجل في رصيده
أقوى شكيمه من الضرغام لاقيت = وأحد وأقوى من السيف وحديده
صليب رأس لما لاقا النعاتيت = يا ثقل روز الشجاع وبعد ميده
مفتوح بابه وبيته بيّـن الليت = ون عد بيت الكرم قلنا عميده
ذرا لمن صكته الأيام ويقيت = يوم المعاسير والدنيا الزهيده
عانوا ربوعه من الفرقى وعانيت = والمعضله ما توصفها نشيده
عيال ذيب مطاليق وعلى بيت = لي مات شيخ عوضنا في عضيده
البيت عامر ولا في الصف تشتيت = مبني على ساس وأركانه جويده
هذا مناحي يسرك لا تهقويت = تلقى هقاويك وأشواره سديده
رجل المواقف لما ضاقت وناديت = أبشر بشيخ مواقيفه فريده
وعيال مترك نمور كلما جيت = تقول ما مات خلف له وليده
أدعي له المعتلي ما أصبحت وأمسيت = يدخله في جنة الخلد ويزيده
يا الله يا من على خلقك تعليت = تغفر له وتجعل الهادي قعيده
ومهما تكلمت ولا قلت ما أوفيت = كبر الحدث شتت أفكار القصيده
عن ما تكن المشاعر قلت وأبديت = والله يجبر عزانا في الفقيده[/poem]




صح لسانك والله يرحمه ويغفر له ويسكنه فسيح جناته، والله انه فقيده كبيره على قحطان وعلى الطيبين

لاهنت وتقبل تحياتي