وقوم الى جيتها صكت حواجبها


وابدت لى البغض فى مقفاي واقبالى

ما كنّي الا مسوّى حال مغضبها

والكلّ فى عشرته ماكر ودجّالى

يا حيف تخفى امور كنت حاسبها

واللى على بالهم كله على بالى

الجار جافى وكم قوم محاربها

والاهل والاصحاب واللى دون والعالى

والروح وش عذرها فى ترك واجبها

راح الحسب والنسب فى جمع الاموالى

نفسى تبى العزّ والحاجات تغصبها

ترمى بها بين اجاويد وانذالى

المال يحيى رجال لا حياة ابها

كالسيل يحيى الهشيم الدمدم البالى

عفت المنازل وروحى يوم اجنّبها

منها غنيمه وعنها البعد أولالى

لا خير فى ديرة يشقى العزيز بها

يمشى مع النّاس فى همّ واذلالى

دار بها الخوف دوم ما يغايبها

والجوع فيها ومعها بعض الاحوالى

جوعى سراحينها شبعى ثعالبها

الكلب والهر يقدم كل رابالى

عزّ الفتى راس ماله من مكاسبها

يا مرتضى الهون لا عزّ ولا مالي