الله يعطيك العافية اخوي عالمكشوف على هذه الروائع لشاعرنا الكبير ابن شايق
وانا عندي له هذه القصيدة الفريدة والرائعة اشارك بها معك في الموضوع مادام انه يخص ابوشنب
وان شاء الله انها بتعجبكم وخاصة اللي ما بعد سمعها ولكنها مشهوره .
انا احسب حساب الكل ماحب الأستبساط
ـــــــــــــــــــــــــــــ ولا داني اهل الكبر والبخـل والتقنيـط
ولكّن حـظي غـاب عنّي معَ المقـلاط
ـــــــــــــــــــــــــــــ وانا ظالـمه في الأمتحـانات .. بالتفقيـط
فرش لي ذهب .. ثم ورد .. ثم زلّ .. ثم بساط
ـــــــــــــــــــــــــــــ ولا شاف مني غير ... الأهمال والتفريط
اضيع عمل حظي بالأهمـال والأحباط
ـــــــــــــــــــــــــــــ وتأبطت منه .. وقال : ماينفع التأبيط
وخسرت الدبل والفرق كله ثلاث ابناط
ـــــــــــــــــــــــــــــ ولاعاد لي خطّه .. ولا عاد لي تخطيط
ربطني هوى خلّي .. رباطٍ وراه رباط
ـــــــــــــــــــــــــــــ وانا حالفٍ ماجفاه لو راح جفني .. خيط
ولا انشاه لين ( طريف ) ينزل بجنب (الغاط)
ـــــــــــــــــــــــــــــ (وبغداد) يصبح في ضواحي ( خميس مشيط )
واذا ماحصل لي .. قربوا طاقة المخباط
ـــــــــــــــــــــــــــــ اموت وتروح الروح .. وجعله ( مراح مقيط )
والاّ ... عطوني جركل القاز والمشخاط
ـــــــــــــــــــــــــــــ وخلّي عليه .. الصبر .. والقبر .. والتحنيط
حبيبي فريقٍ .. يصدر امره على الضباط
ـــــــــــــــــــــــــــــ عطاه الله السلطه ... وسلّط علي تسليط
لقيته صلاة العصر داخل على الخياط
ـــــــــــــــــــــــــــــ على الحجتين .. امّمشطٍ قذلته ... تمشيط
تعال اكتب اسمه داخل القلب ياخطاط
ـــــــــــــــــــــــــــــ تبصّر .. ودقّق .. وانقشه .. واضبطه تظبيط
وسلامتكم وسلامة اخوي عالمكشوف اللي فتح الموضوع الجميل للشاعر الكبير ابن شايق .