الشوق يجذبني
 

الشوق يجذبني وانا حاول اعصيه
يبين في عيني وانا اسدل ستاره

والشوق فضاح وانا كيف اواريه
ياوجد منه بين حالي ومراره

بلشت في حبه ولاني بمصخيه
ولا لي على بوح المشاعر جساره

مدري شعور الخوف خوف المشاريه
ولا يجي عكس التمني قراره

احيان احس بلهفتي ودي اجيه
وادوج دون البيت حاره وحاره

وارجع قبل لا تدري الناس ويش فيه
اخاف لا يدرون لا جيت داره

لا شفت زوله قمت ارحب براعيه
خفيه ولا يدري بقلبي وناره

ازم شوقي بخاطري عنه واخفيه
لو كان جمر الشوق زاد استعاره

ولا غاب ودي بعالي الصوت اناديه
ويحدني شيب اقدر وقاره

توه غرير وزايد الحسن مطغيه
وانا ربيع العمر باخر مداره

لو كان يدري بخافقي كيف يغليه
وانه سكن في داخلي وبجداره

وانه غدا في تالي العمر حاليه
ليته لفى باول سنين الاثاره

احب بين الناس حتى مطريه
مو بس احبه احب حتى جداره