المساعد الشخصي الرقمي

مشاهدة النسخة كاملة : من شعراء الحباب وقحطان


علي بن شداد القحطاني
02-11-2012, 01:03 PM
عليان بن جرادان آل ناصر من أبرز شعراء زمانه .. صاجب مطولات وتعرض لكثير من المواقف والاحزان على أخوه راشد وعلى أبنه راشد في قصة يطول شرحها يقول :
بـادي راس رجــم ما معـه مرجله
مدهـل اللـي تواصـيف الحنايا عليه

مرقـب من هقابـه ذب الــين انكله
جعـل وبل من الرعـاد يبطـي عليه

مرقـب قبـل راشــد شاملـي اقبله
يمــتني الردى راسه والنصايب عليه

اشرف الرجـم علـي واعتـلا باوحله
دالـه القلـب والمرتاح عســر عليه

اشرف الرجـم علـي والغـناء يرسله
مثل ما يرسل المـياح ورد عليه

جـرت صوت من الدويـر حن اوله
اهجـر الورق مـنه يـوم قـنب عليه

سمعـه اللي ورى الصمان واستنفله
قال ذا باح سـده وايـش هيض عليه

سمعـه العجــم والحصا وارقله
والبـتات المركـز يطرح اللـي عليه

سمعـه اللـي ورى باب الحسا واهبله
من ثمانــين صوت يـوم لجـة عليه

لـيت راشد على سيف البحر واوصله
واتعـب الرجل بالمنهاج والفـي عليه

حال بيــني وبيــنه غـيبة مطوله
طولهــا يمحـن اللي به صواب عليه

احمـد اللـه علـى سـو من الله انزله
من خذا عقـب راشد فلا تشفق عليه

يا سـين يا راشـد اللي عزبه من هله
عقــبه البكـرة الميـلاف حنت عليه

امهــا بـالقوايــم الاربــع معقله
فـي شـداد براهـا يـوم حرت عليه

غيبـة من صـبي حجرها شمله
دايــم في هواهــا ما يـبدي عليه

وايش يبــري ملايـل نفسـي العذله
ليــتني وسـط قـبره يوم دمدم عليه

وايـش يوقـف ذواري عيـني الهمله
كـن فيهـا حريـق ما تغمــظ عليه

علـى طـير يقنـص هدتـه الاوله
مات من جـيز من الاقـدار حلت عليه

الوجد يا وجـد علي وجـد من قسم له
هايش فـي سـواد الليل يوطا عليه

الوجد يا وجـد علي وثاني الوجد له
وجد من طـاح في ثـبر طريقه عليه

الوجد يا وجـد علي وثالـث الوجد له
وجد من تاق اليـن الصبح يوظي عليه

الوجد يا وجـد علي ورابـع الوجد له
وجد من كاسبــين العــز قلوا عليه

الوجد يا وجد علي وخامس الوجد له
وجد من له ضميد جاك يلوى عليه

الوجد يا وجـد علي وسادس الوجد له
وجد من لاعــة الدنــيا وبارة عليه

فعلــم البكــرة اللـي كانت معوله
قلهـا مــن قناهــا لا تعـول عليه

وعلـم المطرق اللـي غالــي منقله
قلـه البــيع بالغوازي حــرم عليه

وعلـم الجـادل اللـي واضـح ذبيله
ياخـذ اللي عيافه فـيه ويقـدم عليه

وعلم اللي بــزا حـش ولا تــم له
عندنــا بالمروفــه على ماهو عليه

دوروا لــي همــيم دارب وارحله
والعنـيني خصيص العرض ينشر عليه

دوروا لــي معـاش شرعـتي تقبله
رب كــبدي تقبلـه والا تطمن عليه

دوروا لــي قراح بارد واشخله
يـبرد اللـي حشاه يـزم حره عليه

حـر فوح شـواه القدر فــوق اشعله
في سكـون الذواري موصـدين عليه

الحشــا به عقــيد عرضـه وادبله
حـس نجـر هل الديـر تهاووا عليه

يا مهـدي من طردهـا ما مـلا محثله
ومن ذرى فـي سعدها لا تباطـا عليه

يا مهـدي حـن بقايـا صفــة اوله
شوفهـم بالحبايــب ما لحقـنا عليه

يا مهـدي كم شقـي فالبــيدا حفر له
شـدوا الـبدو من داره وخلـي عليه

يا مهـدي ذي حياة فوق صـبر اسحله
الـيا انجفت كيف قال اللي مقره عليه

يا مهـدي من فدانا فاقــبره واجعله
في حجـا الرجـم واده لا تحسف عليه

يا زبــون الجنايــا عدهـا مجمله
لا تعلـم علــيل ولا تشكــى عليه

جعـل ما عاد لـيل ظوانـي ما اطوله
مرقـدي فـوق حزم واتقلــب عليه

جعل ما عـاد علـم جاحـديـنه هله
غايـب الوثـر بقعـا خالفتـني عليه

قلـت انا واين راشد قالوا عــند اهله
يتبـع القفر بالطرعات تسمـن عليه

قلـت انا وايـن راشـد ثانـي المسأله
قالوا انه علي زملـه بياتــي عليه

واثـر راشـد مر عجـل ولا رد له
كامـل ما يودي مــن ترحـل عليه

يا نعـا من تعــنا بالعــنا ما أخبله
خاتمــة من تعــنا جا رديف عليه

من عـيا من مخـاواة الحــيا زمله
ما يدانـي عصـا راعـيه تومي عليه

يلحـق اللي يـبوج الخـد فوق اعجله
يطـرح الظـبي والشيهـان يقدر عليه

ياخذ اللي يمـينه عزهــا تفعلـه
لا يجافـي رفيقه ولا يحدث عليه

ياخـذ اللـي شحيح غـره طول أمله
ما يقـدر رفيقـه يـوم يلفـي عليه

جعـل دار نظـيم من الدهر مدوله
كان حالي شلـي لــين جينا عليه

هاض ما بـي غصون تحتهـا مشمله
يـوم جاني من الحثـلات رمد عليه

هاض ما بـي قنـيف مر لـه زلزله
جا بقيلــه على العارض تحـدر عليه

يجـرح الحزم سيله والخشب ينقله
يسقي اللي ديـاره موقــتات عليه

يــوم زل البــياض فـشد من خيله
صـوب دار الوضيحي جا حقوق عليه

اصـبح الوقـت في حالـي ويا عز له
حال غمـر طواه الجـرح صبر عليه

سعـد مـن مصـير جــنة بأعمله
ما مصـيره بـنار ولا يعـرض عليه

سعـد من هو عـداه البعـد من مدهه
شايف الباب والمقسوم يصـبر عليه

سعـد منهو تريح دالـه مـا وله
ما غـدا لـي مثـيل لما نـي عليه

ما غـدا لـه قريـن في الخلا يا صله
والعشي راح لـه والليل يظوي عليه

مـــل قلـب وقـع به هاوى واقذله
قذل ما س وريـع شـاخ حـده عليه

كن باقصـى ظميري ليفـة مشعله
زرعـنا اللي بكـور حل صرف عليه

خمسـة شوفهم راعي العمى بكحيلـه
النقايص من اللــه والخلايـف عليه

عقب ذا دوروا لــي زيــنة الزرفله
مـا تقـــيل بخـد و لا تمرح عليه

ركبهـا يطـرب اللي في الخلا ما دله
حسبة الف هواجيســه ودكت عليه

من ضرايــب عمـان سـتو محيله
با طـنيٍ فحلهـا وهــي شقـر عليه

المعارف معـارف ســــبع منيله
والميارك هدبهـــا وافــيات عليه

فوقهـا اللـي ديـار البعـد ما تجهله
الدجـا والغداري ما تشابه عليه

ليلــة النصف تاتي قريـب من سله
واصبحـت راعـي الصمان مرة عليه

تنحر اللـي على سـيف البحـر منزله
صـدرت من وسيع وثانـي ورد عليه

لــيل تسعة عشر يـوم وهـي مقبله
راعـي البـر والغـراس تنشـد عليه

انكفـت من جــناح مـا عرفـنا هله
ومن حدود الشمـال ومصر طافة عليه

ودت اللـي عليها ما بعـد شبح له
عاد بيض اللواحي على ما هـي عليه

لـيا لفـيت ابن هادي عـيد اهل مقبله
علمـه بالسرايـر ولا تكـنا عليه

لا يخلـي رفيقـه ما حـد فــزع له
ما حـد من طوال الشــبر فرج عليه

نافـدا من شفانـي حيث ما قلـت له
ادري انه رفـيق الظيق واركـن عليه

اللـي همامه همامــي يركب امحيله
تنحـر الطور الاسود كون راشد عليه

صاعـني فقـد راشد يـوم زار ادخله
عقـب خبث وطـيب معاودنـي عليه

يا نعـا المـوت ياللـي طارشه اعجله
ما عطانـي ثمان اسنين صلـح عليه

يا نعـا اللـي علينا شامـت ما أخبله
يحسبنـها بعـيد لــين تلفـي عليه

يا نعـا القلـب غـره كل ما قلـت له
غـره العلـم والمذهوب قســــــــــــــــمـه عليه
حالي الـيوم حال امعـزل مـن هله
شاكـي من جروح موذيـات عليه

دمـع عيــني مغالـيل الظمـا تنهله
يسقي الحضـر والبدوان صفوا عليه

عامـل الزرع في حل الصدر عدله
مثل جدول ثمـان يـوم تزفـو عليه





يمكن الرجوع لكتابنا الحنين والاشجان عند شعراء قبائل قحطان لمعرفة المزيد عن شعر وقصص عليان آل ناصر وغيره . واعذرونا فالقصيدة مؤثرة ومشحونة بعواطف الابوة المحزنة والآخوة البارزة في عهودهم والغائبة إلى حد كبير في عهدنا ! .

ظافر بن عجيان
03-11-2012, 08:11 PM
بيض الله وجهك يابو إبراهيم

قصيدة رائعة ومعبرة ومحزنه

أتمنى أن تتحفنا ببعض قصائد الشاعر عليان الله يرحمه

مقدم الشفقان
06-11-2012, 09:36 PM
ابيض وجه يا بن شداد على طرحك لهذة القصيدة التي تعتبر ملحمة شعرية للشاعر: عليان ال ناصر " رحمه الله " وبها الكثير من المأسي والتوجد والأحزان التي مر بها بسبب فقده أخوه وولده.

تقبل مروري وخالص تحياتي،،

ابن حاليه
06-11-2012, 10:17 PM
رحم الله الشاعر عليان ال ناصر
قصيده وجدانيه تحمل معاني الاسى والحزن ولوعة الفراق على اغلى واقرب الناس وهم الابن والاخ ولذلك ترى وشاح الالم تتقلده هذه القصيده النابعه من اعماق القلب
لاهنت يا ابو ابراهيم ولا تحرمنا من جديدك

فتى الحباب
15-11-2012, 07:55 PM
الله يرحمه ويجعله في الجنه
لاهنت يبن شداد

علي بن شداد القحطاني
17-11-2012, 10:40 AM
بيض الله وجهك يابو إبراهيم

قصيدة رائعة ومعبرة ومحزنه

أتمنى أن تتحفنا ببعض قصائد الشاعر عليان الله يرحمه




ووجهك أبيض ياظافر والله لايهينك وماطلبت محل اهمامنا

علي بن شداد القحطاني
17-11-2012, 10:46 AM
رحم الله الشاعر عليان ال ناصر
قصيده وجدانيه تحمل معاني الاسى والحزن ولوعة الفراق على اغلى واقرب الناس وهم الابن والاخ ولذلك ترى وشاح الالم تتقلده هذه القصيده النابعه من اعماق القلب
لاهنت يا ابو ابراهيم ولا تحرمنا من جديدك

ارحب يابو هادي الله يحييك

سرني مرورك والكلمات والتعبيرات الموزونة والموفقة .

علي بن شداد القحطاني
17-11-2012, 10:47 AM
الله يرحمه ويجعله في الجنه
لاهنت يبن شداد




فتى الحباب حياك الله

لاهنت على المرور وشكرا لك