المساعد الشخصي الرقمي

مشاهدة النسخة كاملة : قصة لها العجب


ابو عابر
19-10-2009, 08:29 PM
االسلام عليكم ورحمة الله وبركاته

سمعت هذه القصه قبل عدة ايام من أحد الشياب الله يعطيه الصحه والعافيه

يقول في نهايه حكم الملك عبد العزيز رحمه الله تعالى

رحل واحد من اهل الجنوب قاصدا الرياض طلبا للرزق والحياة الكريمه ومعه زوجته وثلاثة أطفال ولدين وبنت أعمارهم

3 و2و1 سنوات على التوالي ويوم قدهم في الحوطه صابهم الجدري وماتت الزوجه والبنت وسلم الرجال والأولاد ,,,

بعد ماتعافى شراله ناقه وشوي تمر وحب وقرر إنه يعود لدياره ,, حط العيال في الخرج يمين ويسار وحط مع كل واحد

مع كل منهم شوي تمر وفي الطريق مر على بير يقالها الطويله قريب من الهدار يبي يروي ,, وعلشان يعرف البير فيها

ماء قام وحذف حصاه في البير لأن البير على إسمها طويله,, وكان في البير طيور وحمام نفرت وطارت وجفلت الناقه

اللي هجت والعيال عليها ’’

أتوقف الأن على أن أكمل في وقت آخر إن شاء الله






ابو عابر

عايض الفهري ابوبندر
19-10-2009, 09:10 PM
الله يعينه

لاهنت

على القصه

تحياتي

العبدي
20-10-2009, 12:15 PM
وليه نظام الأجزاء والحلقات

؟


واصل

مشاري بن نملان الحبابي
20-10-2009, 02:17 PM
حبّذا لو أنك طرحت القصة مرة واحدة ..

فذلك خير من بترها ..

ابو عابر
21-10-2009, 01:51 PM
السلام عليكم ورحمة الله وبركاته

بعد ماهجت الناقه حاول الرجال انه يلحقها وضوى عليه الليل وكلما لها الناقه وتبعد

انقطع نسمه وغابت عن ناظره

واصل مسيره ليله كله وأغلب يومه التالي حتى وصل للمكان إللي شراء منه الناقه

على أمل إنها ترجع لمراحها وكانت المفاجأه حيث اخبره البايع أن الناقه مشريه

مع ابل أخرى من الشمال وماهي من هالديره ,,,

رقب يومين والناس تصبره عل وعسى ترجع ولا يسمعون عنها خبر ,, وما حصل

من كل هذا شي عود قام الرجال وتسلف جنبيه وخذا له شوي حب معه وتوجه يم البير

عله يلقى الناقه ,,, وصل للبير ما لقى لها أثر داج في البر عدة أيام ولا وافقه الحظ

وفي تالي نهاره ذاك اليوم لقى أثر رجال يسحب رجليه سحب وتبع الأثر حتى ,,,,





اتابع بعدين

شكري للجميع



ابوعابر

ابن شطفان
21-10-2009, 01:58 PM
أخوي أبو عابر ....

أولا مشكور على القصة ....

ثانيا فمثل ما تفضلوا الأخوان يا ليت تكملها مرة وحدة و تفكنا من نظام الأجزاء... لأن كل جزء سطرين و على كذا ما حن بخالصين





أخـــ ابن شطفان ــــوك

ابو عابر
21-10-2009, 04:15 PM
السلام عليكم ورحمة الله وبركاته

بعد ما تبع الأثر فتره لقى أثر ذيب يتبع أثر الرجال وفجأه سمع صوت صرخه وعواء

قرب من الصوت وإلا الذيب فوق الرجال مازع جنبه وعاده حي وينازع جاءت عينه في

عين أبو العيال وأشرله بطرف إيده يعني روح وخلني مع مصيري يقول راوي القصه

إن الرجال يسولف عليهم وهو يبكي لإنه ما قدر يفزعله لعدة اسباب منها حالة الوهن

الشديد والتعب والجوع وشراسة الذيب والرجال ميت في كل الأحوال ,,,,

’’ينعى وجهي للأولين ياما شافوا وجاهم’’

المهم عود مع طريقه يهبد ليله وقد أيس إنه يلقى العيال شوي ولا صوت بعير قريب

ولا إبل همل ثلاثه او اربعه باركه في بطن الوادي ويطمر في ظهر واحد منها ما إنتبه

للوسم ويسري ليله كله ويومه الثاني وحول العصر ولا الطلب وراه صاحب البل على

عل ذلول له وفي يده مشعاب وهبده به ولا هو مغمي عليه وطايح من البعير ارتد راعي

البل إبله وخلاه بين الحياه والموت وماوعاه إلا حرارة الشمس اليوم الثاني وهو في هالحال

مر عليه راعي ذود واسعفه وأخذه يم أهله ..

خذاله كم يوم حتى تعافى وكمل طريقه لدياره وهذاك أخر علمه بالعيال تزوج ورزقه الله

بعيال وحلال وتوفي قبل سنتين ولا أكثر شوى رحمه الله رحمه واسعه...

عياله كانهم سلموا فأعمارهم فوق الستين سنه ويومنهم ضاعوا ذاك الوقت ما يعرفون

منهم منه ولا ديارهم فين .......وقادر الله سبحانه إنه يجمعمه بأهلهم

القصه حقيقيه وماهي من وحي الخيال أختصرت الباقي لأنه غير مهم المهم كتبته

وسلامة الجميع









ابوعابر

أبو تركي الحرملي
23-10-2009, 12:29 AM
ابو عابر تسلم على كل حال .
ولكن الكشن والنقطاع والعوده جعلت من الموضوع اكثر تشويق وزادته جمال غايه الابداع وقصه مشوقه ومحزنه
أسال الله ان يعوض ماجاه في الدنيا بنعيم الجنه ونا وانتم اجمعين

ابو عابر
23-10-2009, 07:20 PM
الأخوه عايض الفهري والعبدي ابن نملان وابن شطفان

شكرا على مروركم

وشكري الخاص للأخ ابو تركي الحرملي









ابوعابر

الـــجـــحــلــي
03-11-2009, 03:37 PM
مشكور على القصة
واسال الله ان يجزا الاولين خير وان يغفر لهم وان يجعل ما قد واجهوه في الدنيا من مصائب مكفرات لذنوبهم ورفعا لدرجاتهم
قولو اااااامين