المساعد الشخصي الرقمي

مشاهدة النسخة كاملة : قصة وقصيدة للفارس بن كدم ,,,الكاتب الظور


عبدالله العنبسي
08-09-2009, 06:45 AM
بسم الله الرحمن الرحيم

قصة نقلها اخي العزيز ((الظور))عن الفارس والشاعر المعروف بن كدم ولا يحتاج للتعريف ونا حبيت انقلها لكم في موضوع مستقل لان الشخصيه تستاهل موضوع مستقل والله لايهين اخي الظور ولا يواخذني على النقل ,,,,,

والقصه هي

ان المرحوم باذن الله محمد بن ناصر بن كدم ( نخران )

ذهب في عام 1351 هجري من طريب الى الرياض على بعيره طعيزين والبعير هذا مااحد يمسك به الا صاحبه نخران( شرود) الا اذا شاف راعيه

كان اذا اراد ان يركبه نزل له رقبته فاذا حط رجله عليها رفعه الاوهو فوق الشداد وكان هذا الجمل اذا مشى نخران على رجله في مشاوير قريبه تبعه هذا البعير

ومره عقله من يد واحده وكان في اليل ونخران بدوي حول قرية طريب ونخران وده يسمر عند راعي مزرعه حوله يقال له ابن شينان من الجرابيع فخرج خلسه حتى لايشوفه البعير لان البعير ضاره يطمر في المزارع وراح لابن شينان الله يغفر لهم جميعآ رحب ابن شينان وقلطوا في السقف الثاني وجلس نخران على الدريشه وعاده يكون ارتفاع السقف الثاني عن الارض 3امتار ولاحس نخران الا البعير يدق كوعه معى الطاقه بخشمه وكانه يقول ليش تروح من غير ماادري

فقال نخران انزل اعقله من الثنتين فحلف ابن شينان ان يفكه في البرسيم يتعشا منه

ومره كان نخران مريض 3 ايام ماخرج من البيت ويوم جا اليوم الثالث وهو في فراشه في البيت لحاله الا البعير جاي وبرك عند المقدم لبيت الشعر واخذ يزحف وهو بارك حتى حط راسه فوق راس راعيه برهه ودمعت عيناه ثم اعاد ادراجه للخارج

المهم سافر على بعيره حاط عليه الشداد والخرج ودفاه وبندقه والقربه وتعدا بني بسقان وقطع المهمل وبعد اربعه ايام وصل هضب الدواسر الا الديره مسنيه وخلا مافيها طاير يحوم وصل عد هو خابره يبا يملا قربته ويسقي بعيره ويوم وايق في العد الا الدبابير لها رنه باسفل العد تدور الثرى قال لاحول ولاقوة الا بالله

البعير ماوصل العد الا وهو يقوده من العطش وبرك وحط راسه على الارض واخذ يحن بصوت خافت

بقي معه غرفة ماء في القربه وكان ضميان فاخذ الماء وتوضى ثم صلى ركعتين ثم قال بالحرف الوحد

يالله يامنشي السحاب -- ويامعتق الرقاب -- وياقابل من العبد لاتاب --- ان انكان في من الاجواد ريح ان تنزل علي المطر -- ثم جلس يذكر الله واذن للظهر وهو يصلي الا ظل الغيمه يوم غشيته ويوم سلم ليوم انشت باذن الله وضربه المطر عرضها حدود 2 كيلو وطولها مثل وشرب بعيره وكلا من الحشايش اليابسه المبلوله بالمطر الين شبع

وكان قبل سفره سئله واحد من حوله وين رايح قال باروح الملك عبدالعزيز قال مدري لاتموت في المهمل من الضماء وقال له كلام ماطاب لنخران

تذكر كلام الرجال

فقال هذه الابيات

قال أبن ناصر يوم شـــــــرف نايف --------------------- والقلـب والله ينهـبـه ســـــــــعـيـر

في ديرة خلو وقطع مـن العــــرب---------------------- والمـاء قليـل والذلـول بعــــــــيـر

يرغي ليا شافني اوميت بالعصـــا --------------------- وعقـب الشراده كـــاده المـســــير

حطيت أنا القربة ثمان من الشهــــر -------------------- حساب الليالـي والنهـار نســـــيـر

والي من العربه تلوج كــــلامـــــها -------------------- مثل الـــــحاء لــــواجته فـــــــطير

ركبي على البابور في غبة البحـر ------------------- فيـه النصـارى والعـذاب كـــــــثيـر

اخير من لامـــــــا رفيقن حـــــــاقر -------------------- الفـــــعل خـــــامل والكـــــلام مرير

يبغي يزحزني من الجود للـــــردى -------------------- يشمت علينا حـــــــاقد وغــــــــرير

بو كلمتن لا وقعت في القلب كنهـا -------------------- أمحق من المخطر على القــــصديـر

ما طــال من بنيه عسى الله يطيحـه -------------------- وياجعل قبره مثـل غــــــــور البيـر

وياجعله عمى ويقوده اللي يكرهه -------------------- ومن القــــوايم وحــــدتن كســـــير

كنه يوصينـي لجمـع المــــــــرجلـه -------------------- ونا بطبعـي قـــــانـع وبصــــــــيـر

لاجمعت لسعار في الســــوق قلٌبت -------------------- ماتســـتوي سمــــرا وحـب شــعيـر

ولايستوي الفلفل وهيل من الحــبش ------------------- ولايستوي ثوب خـام وثـوب حــريـر

كلن على ماله وحـوزه وجـــــــانبـه ------------------ ولا الذهـــب يطبع معى القصــــــ-دير

ماقــدمت يمناك مــدحه لحـــــــــيتك ------------------ وعـــقب يمنن مــــدها قصـــــــــــير

واصل سفره ووصل الرياض ولا الملك في الحجاز فرقبه 3 شهور حتى وصل الملك عبدالعزيز وسلم عليه وبارك له

بقيام المملكه العربيه السعوديه

والقاء قصيده بين يديه فاكرمه الملك عبدالعزيز رحمهم الله جميعآ

ودمتم بخير[/color]

العبدي
08-09-2009, 11:28 AM
بيّض الله وجهك ع السّالفة يالأجودي

وما نستغني عن غيرها

الظور
08-09-2009, 02:42 PM
اخوي عبدالله العنبسي

الله يشكر مسعاك

ابد انا ومواضيعي تحت امرك

اشكر فيك الحميه الي هي نيشان اقحطان

عسى فالك الطيب

سفر بن مبارك
08-09-2009, 04:03 PM
سلمت أخوي عبدالله وسبق لي التعليق ع هذا الموضوع في عذب الكلام موضوع مشرف جدا ..............

عبدالله العنبسي
08-09-2009, 07:04 PM
الظور ارحب ملايين جعل الشر لا يضرك ولا يمرك ولا خلا ولا عدم والله العظيم ايمان واديان ما نقلت الموضوع حبا في الظهور او اقتباس لاعمال الغير لمصلحة خاااصه انما شفت الموضوع الي طاف ما خذا حقه في النقل والفارس يستاهل النشر اكثر من مموضوع في شبكة ولوانك حولي كان حبيت خشمك والله لا يهينك وبيض الله وججهك وننتظر مزيدك,,,,

عبدالله العنبسي
08-09-2009, 08:15 PM
العبدي مرحبن بك ومرورك اعتزاز لي والفضل لله ثم للاخونا الظور

عبدالله العنبسي
08-09-2009, 08:27 PM
مرحبن مليون بلي عنا لي ,,,,, عد حرفن بالقلم يكتبونه
ونثي الترحيب قدر وجلالي ,,,, في محلن يكرم الي يجونه
يوم سوي الكيف سوق الدلالي ,,,اشقرن يازين شفه ولونه
بدو الشيبان قبل العيالي,,,,, الشحم والطيب يستاهلونه



ارررررررررحب يبو مبارك ملايين في ساقتها ملايين واشكرررررررررك على المرور ,,,,,


اخوك / عبدالله العنبسي

مشاري بن نملان الحبابي
09-09-2009, 07:18 AM
أرحب ملايين يا وجه سنحان ..

وبيض الله وجهك على هذا الموضوع الرائع ..

وتقبل فائق التقدير والاحترام ..

أخوك/ مشاري آل نملان

عبدالله العنبسي
12-09-2009, 09:25 PM
ارررررررررررررررحب يا مشاري واسف على التاخير والله لايهينك

واشكرك على المرووور يا بن الشيوخ الصمايلي الي تعدل كل مايلي ,,,,

حمد الجحدري
21-09-2009, 02:54 AM
ارحب ياعبدالله ولاهنت ويسلم الظور على الموضوع الجميل

عبدالله العنبسي
21-09-2009, 03:39 AM
تبقااااااااااا يا حمد والله يحييك واشكرك على المرور

عايض الفهري ابوبندر
21-09-2009, 09:39 AM
لاهنت


يعطيك العافيه


تحياتي

خالد ال هيف
22-09-2009, 12:16 AM
لاهنت

عبدالله العنبسي
22-09-2009, 12:04 PM
عيدك مبارك يا خالد وقايله ما يهون

منيف العاطفي
22-09-2009, 12:37 PM
لاهنت على الموضوع ياخوي عبدالله وبيض الله وجهك انت والضور وجميع الاعضاء

عبدالله العنبسي
23-09-2009, 01:44 PM
مطوووع العاصي قايله ما يهوون واشكرك على المرور العطر